GENESIS - Kapitulo 46

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50

■■■■■

Si Jacob kag ang Iya Panimalay Nagkadto sa Egipto

1 Gindala ni Jacob ang tanan niya nga pagkabutang kag nagkadto sa Beerseba, sa diin naghalad sia sing mga halad sa Dios sang iya amay nga si Isaac.
2 Ang Dios naghambal sa iya sa isa ka palanan-awon sa kagab-ihon nga nagasiling, “Jacob, Jacob.” Nagsabat sia, “Huo, nagapamati ako.”
3 Ang Dios nagsiling, “Ako ang Dios, ang Dios sang imo amay. Indi ka magkahadlok sa pagkadto sa Egipto. Pagahimuon ko didto ang imo mga kaliwat nga isa ka daku nga pungsod.
4 Magaupod ako sa imo sa Egipto, kag pabalikon ko diri ang imo mga kaliwat. Si Jose manginyara sa imo luyo sa imo kamatayon.”
5 Si Jacob naghalin sa Beerseba. Ang mga anak niya nagpasakay sa iya upod sa ila magamay nga mga kabataan, kag sang ila mga asawa sa mga karo nga ginpadala sang hari sang Egipto.
6 Gindala nila ang ila mga kahayupan kag ang mga pagkabutang nga ila nakuha sa Canaan, kag nagkadto sila sa Egipto. Gindala ni Jacob ang tanan niya nga mga kaliwat:
7 ang iya mga kaanakan kag mga kaapuhan.
8 Amo ini ang mga ngalan sang mga kaliwat ni Jacob nga nagkadto sa Egipto. Si Jacob kag ang iya mga anak nga lalaki: ang iya kamagulangan nga anak nga amo si Ruben.
9 Ang mga anak ni Ruben amo sanday Hanoc, Palu, Hezron kag Carmi.
10 Ang mga anak ni Simeon amo sanday Jemuel, Jamin, Ohad, Jaquin, Zohar kag Saul nga anak sang Canaanhon nga babayi.
11 Ang mga anak ni Levi amo sanday Gerson, Coat, kag Merari.
12 Ang mga anak ni Juda amo sanday Er, Onan, Sela, Perez, kag Zera (pero si Er kag si Onan napatay sa duta sang Canaan). Ang mga anak ni Perez amo si Hezron kag si Hamul.
13 Ang mga anak ni Isacar amo sanday Tola, Puva, Job, kag Simron.
14 Ang mga anak ni Zabulon amo sanday Sered, Elon, kag Jaleel.
15 Amo ini ang mga lalaki nga anak ni Lea kay Jacob sa Mesopotamia, wala labot kay Dina nga bata niya nga babayi. Ang mga kaliwat niya kay Lea 33 tanan.
16 Ang mga anak ni Gad amo sanday Zifion, Hagi, Suni, Ezbon, Eri, Arodi kag Areli.
17 Ang mga anak ni Aser amo sanday Imna, Isva, Isvi, Beria, kag ang ila utod nga babayi nga si Sera. Ang mga anak ni Beria amo si Heber kag si Malquiel.
18 Ining 16 amo ang mga kaliwat ni Jacob kay Zilpa, ang suloguon nga ginhatag ni Laban sa iya bata nga babayi nga si Lea.
19 Ang mga anak ni Raquel nga asawa ni Jacob amo si Jose kag si Benjamin.
20 Si Manases kag si Efraim amo ang mga anak ni Jose kay Asenat sa Egipto. Si Asenat anak nga babayi ni Potifera nga pari sang On.
21 Ang mga anak ni Benjamin amo sanday Bela, Bequer, Asbel, Gera, Naaman, Ehi, Ros, Mupim, Hupim kag Ard.
22 Ining 14 amo ang mga kaliwat ni Jacob kay Raquel.
23 Ang anak ni Dan amo si Husim.
24 Ang mga anak ni Neftali amo sanday Jaseel, Guni, Heser kag Silem.
25 Ining pito amo ang mga kaliwat ni Jacob kay Bilha, ang suloguon nga ginhatag ni Laban sa iya bata nga babayi nga si Raquel.
26 Ang kadamuon sang mga kaliwat ni Jacob nga nagkadto sa Egipto 66, wala labot ang mga asawa sang iya mga anak.
27 Duha ka anak nga lalaki ang natawo kay Jose sa Egipto, gani 70 tanan ang kabilugan sang panimalay ni Jacob nga nagkadto didto.

Si Jacob kag ang Iya Panimalay sa Egipto

28 Ginpauna ni Jacob si Juda sa pagpangabay kay Jose sa pagpakigkita sa ila sa Gosen. Sang pag-abot nila sa duta sang Gosen,
29 si Jose nagsakay sa iya karuwahi, kag nagkadto sa Gosen sa pagpakigkita sa iya amay. Sang pagkitaay nila, ginhakos ni Jose ang iya amay, kag naghibi sia sing dugay gid samtang nagahakos sia sa iya.
30 Si Jacob nagsiling kay Jose, “Karon handa na ako magtaliwan, karon nga nakita ko na ikaw kag nakahibalo nga buhi pa ikaw.”
31 Dayon si Jose nagsiling sa iya mga utod kag sa panimalay sang iya amay, “Kinahanglan maglakat ako kag sugiran ang hari nga ang akon mga utod kag ang bug-os nga panimalay sang akon amay nga nagpuyo sa Canaan, nagkari sa akon.
32 Singganon ko sia nga mga manugbantay kamo sang mga hayop kag gindala ninyo ang inyo mga karnero, mga baka kag ang tanan ninyo nga mga pagkabutang.
33 Kon ipatawag kamo sang hari kag pamangkuton kon ano ang inyo palangitan-an
34 kinahanglan magsabat kamo nga mga manugbantay kamo sang mga hayop halin sang magamay pa kamo, subong sang inyo mga ginikanan. Sa sini nga paagi, makapuyo kamo sa duta sang Gosen.” Ginsiling niya ini kay ang mga Egiptohanon nahigkuan sa mga manugbantay sang hayop.

GENESIS - Kapitulo 45 <<<   >>> GENESIS - Kapitulo 47