Ang Matuod nga Katahom kag Kaayo Nagahalin sa Sulod sang Tagipusoon

Liturhiya sang Pulong

(Miyerkules, Agosto 28, 2019)

San Agustin, Obispo kag Doktor sang Simbahan

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Tesalonica 2:9-13

   Mga kautoran, matuod gid nga indi ninyo malipatan kon daw ano ang amon pagpangabudlay kag paghimulat! Nagpangabudlay kami sa adlaw kag gab-i agod nga indi kamo mabug-atan sa pagsakdag sa amon samtang nagwali kami sa inyo sang Maayong Balita gikan sa Dios.

   Mga saksi namon kamo, kag subong man ang Dios: ang amon pagginawi sa tunga ninyo putli, matarong, kag di-salawayon. Nahibal-an ninyo nga ginkabig namon ang tagsatagsa sa inyo subong sang pagkabig sang isa ka amay sa iya mga anak. Ginlaygayan namon kamo nga magmalig-on, ginlipay namon kamo, kag nagpadayon kami sa paglaygay sa inyo sa pagkabuhi suno sa nahamut-an sang Dios, nga nagatawag sa inyo sa pag-ambit sang iya kaugalingon nga Ginharian kag himaya.

   Tungod man sini, nagapasalamat kami sa Dios sa gihapon. Sang pagdala namon sa inyo sang pulong sang Dios, ginpamatian ninyo ini kag ginbaton, indi subong pulong sang tawo, kundi subong pulong sang Dios, nga sa pagkamatuod amo gid man ini. Kay ang Dios nagapanghikot sa inyo nga nagatuo. 

Salmo sa Pagsabat:

Mga Salmo 139:7-8, 9-10, 11-12

(S) O Ginoo, gin-usisa mo ako, kag nakilala mo ako.

Diin bala ako makadto agod makapalagyo sa imo Espiritu? Diin ako makadto agod makapalayo sa imo atubangan? Kon magsaka ako sa langit, didto ikaw; kon maghigda ako sa duog sang mga patay didto man ikaw. (S)

Kon maglupad ako sa unhan sang sidlangan, ukon magpuyo sa pinakalayo nga duog sa nakatundan, didto ikaw sa pagtuytoy sa akon, didto ikaw sa pagbulig sa akon. (S)

Mapangayo ko ang kadudolman sa pagtago sa akon, ukon ang kapawa sa palibot nakon nga magmangingab-i, pero bisan ang kadudolman indi madulom para sa imo, kag ang kagab-ihon subong kasanag sang adlaw. (S)

Aleluya:

1 Juan 2:5

    Ang nagatuman sang pulong sang Dios, amo ang tawo nga ang iya gugma sa Dios nahimpit.

Ang Pagbasa sang Santos nga Ebanghelyo suno kay:

San Mateo 23:27-32

   “Kailo man kamo, mga manunodlo sang Kasugoan, kag mga Fariseo! Mga salimpapaw! Kaangay kamo sang mga lulobngan nga ginpintahan sing puti kag matahom tan-awon sa gwa, pero puno sang tul-an sang mga patay kag sang kagarukan sa sulod. Kamo amo man! Kon tan-awon kamo sang mga tawo daw sa matarong kamo, pero ang sa sulod ninyo puno sang mga kabutigan kag kalautan.”

   “Kailo man kamo, mga manunodlo sang Kasugoan kag mga Fariseo! Mga salimpapaw! Nagahimo kamo sing matahom nga mga lulobngan para sa mga propeta kag nagapuni sang pantyon sang mga matarong, kag nagasiling kamo, ‘Kon kita nagkabuhi sa mga panahon sang aton mga ginikanan, wala kuntani kita maghimo sang ila ginhimo kag magpatay sang mga propeta.’ Kon amo ginaako ninyo nga kamo mga kaliwat sang nagpatay sang mga propeta! Hala, padayuna ninyo kag tapusa ang ila ginsugoran!

Agosto 27 | Agosto 29