"Kadaku sang Imo Pagtuo! Matuman ang Imo Ginapangabay suno sa Imo Luyag"

Liturhiya sang Pulong

(Miyerkules, Agosto 7, 2019)

San Sixto, Santo Papa kag ang Iya mga Kaupdanan, mga Martires

1. Ang Pagbasa gikan sa Libro sang:

Numeros 13:1-2, 25 - 14:1, 26-29, 34-35

   Ang Ginoo nagsiling kay Moises, “Magpili ka sing isa sa mga pangulo gikan sa tagsatagsa sang 12 ka mga tribo kag ipadala sila subong mga espiya sa pag-usisa sang duta sang Canaan, nga akon ginahatag sa mga Israelinhon."

   Sa tapos nila mausisa ang duta sa sulod sang 40 ka adlaw, ang mga espiya nagbalik kanday Moises, Aaron, kag sa bug-os nga katilingban sang Israel sa Cades sa desierto sang Paran. Ginsugid nila ang ila nakita kag ginpakita nila ang prutas nga ila gindala. Ginsugiran nila si Moises, "Gin-usisa namon ang duta kag nasapwan namon ini nga maayo kag mapatubason; kag yari ang iban sang iya mga prutas. Pero ang mga tawo nga nagapuyo didto tama ka gamhanan kag ang ila mga siyudad tama ka dalagku kag napamakuran sing maayo. Ang malain pa gid kay nakita namon ang mga kaliwat sang mga higante didto. Ang mga Amaleknon nagapuyo sa nabagatnan nga bahin sang duta; ang mga Hethanon, ang mga Jebusnon, kagang mga Amornon nagapuyo sa kabakuloran; kag ang mga Canaanhon nagapuyo sa ubay sang dagat sang Mediteraneokag sa ubay sang suba sang Jordan.”

   Ginpahipos ni Caleb ang mga tawo nga nagreklamo batok kay Moises, kag nagsiling sia, "Kinahanglan salakayon naton karon kag agawon ang duta; masarangan naton ang pag-agaw sini."

   Pero ang mga tawo nga nag-upod kay Caleb nagsiling,"Indi kita makasarang sa pagsalakay; ang mga tawo didto tama ka gamhanan sang sa aton.” Gani ginpalapnag nila ang binutig nga sugid sa mga Israelinhon nahanungod sang duta nga ila gin-usisa. Nagsiling sila, "Ang duta indi makapatubas sing tuman nga kalan-on para sa mga tawo nga nagapuyo didto. Ang tagsatagsa nga nakita namon tama ka taas kag nakita pa gani namon didto ang mga higante, ang mga kaliwat ni Anak. Daw pareho lang kami ka gagmay sang mga tibakla, kag amo ina ang ila pagtan-aw sa amon."

   Sa bug-os nga gab-i ang mga tawo naghinibi sa kakulba.

   Ang Ginoo nagsiling kay Moises kag kay Aaron, "Tubtob san-o pa bala, ang pagpadayon sa pagreklamo sining malaut nga mga tawo batok sa akon? Tama na ang akon nabatian sini nga mga reklamo! Karon ihatag sa ila ini nga sabat: 'Ginasumpa ko nga samtang nagakabuhi ako, himuon ko sa inyo ang inyo gid ginpangayo. Ako, ang Ginoo, naghambal sini. Magakalamatay kamo kag ang inyo mga bangkay magalapta sa sini nga desierto. Tungod sang inyo pagreklamo batok sa akon, wala sing isa sa inyo nga nagaedad sing labaw sa 20 katuig nga makasulod sa sina nga duta.

   Magaantos kamo tungod sang inyo mga sala, sa sulod sang 40 ka tuig, isa ka tuig para sa tagsatagsa sang 40 ka adlaw nga inyo gingamit sa pag-usisa sang duta. Mahibal-an ninyo kon daw ano kon ako magsumpong sa inyo! Ginasumpa ko nga himuon ko ini sa inyo, kamo nga malaut nga mga tawo nga nagtipon sing tingob batok sa akon. Diri sa desierto ang tagsatagsa sa inyo magakalamatay. 

   Ako, ang Ginoo, naghambal sini.'"

Salmo sa Pagsabat:

Mga Salmo 106:6-7, 13-14, 21-22, 23

(S) Dumdoma ako, O Ginoo, kon ikaw magbulig sa imo mga tawo.

Nakasala kami subong sang amon mga katigulangan; nanginmalaut kag malain kami. Ang amon mga katigulangan sa Egipto wala makahangop sang makatilingala nga mga buhat sang Dios. (S)

Apang madali nga nalimtan nila ang ginhimo sang Dios, kag wala sila maghulat sang iya laygay. Napun-an sila sing kailigbon sa desierto, kag gintilawan nila ang Dios. (S)

Nalimtan nila ang Dios nga nagluwas sa ila, paagi sa iya gamhanan nga mga buhat didto sa Egipto. Daw ano ka makatilingala ang mga ginhimo niya didto! Daw ano ka makahalangawa ang mga ginhimo niya didto sa Mapula nga Dagat! (S)

Gani nagsiling ang Dios nga iya laglagon ang iya mga tawo;pero si Moises nga iya pinili nga alagad nagpakiluoy sa Dios, sa paglupay sang kaakig sang Dios, agod indi sila malaglag. (S)

Aleluya:

Lucas 7:16

Ang isa ka daku nga propeta nagpakita sa tunga naton, kag ang Dios nagkari sa pagluwas sang iya mga tawo.

Ang Pagbasa sang Santos nga Ebanghelyo suno kay:

San Mateo 15:21-28

   Naghalin si Jesus sa sadto nga duog kag nagkadto sa kadutaan malapit sa mga siyudad sang Tiro kag Sidon. May isa ka babayi nga taga-Canaan nga nagapuyo didto, nga nagpalapit sa iya nga nagasinggit, “Sir, kaliwat ni David! Kaluoyi ako! Ang akon anak nga babayi ginagamhan sang yawa kag malubha ang iya kahimtangan.”

   Pero si Jesus wala gid magsabat sa iya. Ang iya mga gintuton-an nagpalapit sa iya kag nagpangabay gid nga nagasiling, “Pahalina sia! Nagasunodsunod sia sa aton kag nagagahod!”

   Dayon si Jesus nagsabat, “Ako ginpadala para lamang sa nadula nga mga karnero sang Israel.”

   Dayon nagkadto ang babayi sa iya atubangan kag nagluhod nga nagasiling, “Sir, buligi ako!”

   Nagsabat si Jesus, “Indi nagakabagay nga kuhaon ang pagkaon sang mga kabataan kag ihaboy sa mga ido.”

   Nagsabat sia, “Matuod ina, Sir, pero bisan ang mga ido nagakaon sang usik nga nagakalahulog sa lamisa sang ila mga agalon.”

   Dayon nagsabat si Jesus sa iya, “Babayi, kadaku sang imo pagtuo! Matuman ang imo ginapangabay suno sa imo luyag.” Sa amo gid nga tion nag-ayo ang iya anak nga babayi.

Agosto 6 | Agosto 8