"Wala sing Milagro nga Ipakita sa sini nga mga Tawo"

Liturhiya sang Pulong

(Lunes, Pebrero 17, 2020)

Ang Pito ka Manugtukod sang Orden sang mga Alagad sang Birhen Maria

Ang Pagbasa sa Kamunoan sang Sulat ni:

Santiago nga Apostol 1:1-11

   Pag-abiabi halin kay Santiago, isa ka alagad sang Dios kag ni Ginoong Jesu-Cristo: Sa tanan nga mga tawo sang Dios nga nag-alaplaag sa bug-os nga kalibutan.

   Mga utod ko! Kabiga ninyo nga mga mapalaron kamo kon ang tanan nga mga sahi sang pagtilaw mag-abot sa inyo, kay nakahibalo kamo nga kon ang inyo pagtuo magdaog sa sina nga mga pagtilaw, ang resulta sina amo nga manginmalig-on kamo. Pero pat-ura ninyo nga ini nga kalig-on magpadayon, nga wala sing pag-untat, agod nga manginhimpit kamo kag manginbug-os nga wala sing kakulangan. Pero kon may yara sa inyo nga kulang sa kaalam, dapat sia magpangamuyo sa Dios, kag ang Dios magahatag sini sa iya. Kay ang Dios maalwan kag nagahatag nga wala sing aligutgot sa tanan. Pero kon kamo nagapangamuyo magtuo kamo, kag indi gid kamo magpangduhadoha. Kay ang nagapangduhadoha subong sang balod sa dagat nga ginapalid kag ginahuyop sang hangin. Ina nga sahi sang tawo salimpapaw, nga indi pat-od sang iya ginahimo, kag indi sia maghunahona nga may pagabatunon sia nga bisan ano halin sa Ginoo.

   Ang imol nga utod dapat magkalipay kon ang Dios magbayaw sa iya, kag ang manggaranon nga utod kon ang Dios magpaubos sa iya. Kay ang manggaranon magataliwan subong sang bulak sa latagon. Ang adlaw nagataas nga may masingkal nga init, kag nagalaya sang tanom; ang iya bulak nagakahulog kag ang iya katahom madula. Subong man, ang manggaranon nga tawo malaglag samtang masako sia sa iya mga hilikuton.

Salmo sa Pagsabat:

Mga Salmo 119:67, 68, 71, 72, 75, 76

(S) Kaluoyi ako, O Ginoo, kag ako magakabuhi.

Sa wala mo pa ako pagsiluti nagtalang ako, pero karon ginatuman ko ang imo pulong. (S)

Daw ano kaayo kag ka maluloy-on sa imo; tudloi ako sang imo mga sugo! (S)

Ang akon silot mayo para sa akon, kay ini nagtudlo sa akon sa pagtuon sang imo mga sugo. (S)

Ang kasugoan nga imo ginahatag labi pa sa akon sang sa tanan nga pilak sa kalibutan. (S)

O Ginoo, nakahibalo ako nga angimo mga pagsulondan matarong, kag ginsilutanmo ako kay ikaw matutom. (S)

Lipaya ako sang imo mapinadayunon nga gugma, suno sa imo ginsaad sa akon nga imo alagad. (S)

Aleluya:

Juan 14:6

   Ako amo ang dalan, ang kamatuoran, kag ang kabuhi, siling sang Ginoo; wala sing may makakadto sa Amay kon indi paagi sa Akon.

Ang Pagbasa sang Santos nga Ebanghelyo suno kay:

San Marcos 8:11-13

   May mga Fariseo nga nagpalapit kag nagpakigsuay sa kay Jesus. Luyag nila nga tilawan sia, gani nagpangayo sila sing isa ka milagro sa pagpakita nga may gahom sia halin sa Dios. Nagpanghakroy si Jesus sing malawig kag nagsiling, “Ngaa bala nga ang mga tawo karon nga mga inadlaw nagapangita sang isa ka milagro? Nagasiling ako sa inyo, nga wala sing milagro nga ipakita sa sini nga mga tawo!” Ginbayaan sila ni Jesus, nagbalik sia sa sakayan kag nagtabok sa pihak sang linaw.

Pebrero 16 | Pebrero 18