Liturhiya sang Pulong
(Huwebes, Nobyembre 28, 2019)
Ang Pagbasa gikan sa Libro ni:
Daniel nga Propeta 6:12-28
Dayon yadto nga mga tawo nagpanilag kay Daniel nga nagapangamuyo sa Dios, kag tanan sila nagkadto sa hari sa pagsumbong kay Daniel. Nagsiling sila, "Mahal nga Hari, nagpirma ka sang mando nga sa masunod nga 30 ka adlaw ang bisan sin-o nga magpangamuyo sing bisan ano sa kay bisan sin-o nga dios ukon tawo, luas sa imo, pagaihaboy sa lungib sang mga leon."
Ang hari nagsabat, "Huo, isa ini ka mando nga dapat gid tumanon, kaangay ini sang mga kasugoan sang mga Medianhon kag mga Persianhon nga indi maislan."
Dayon nagsugid sila sa hari, "Si Daniel, ang isa ka bihag halin sa Juda, wala nagatahod sa imo, Mahal nga Hari, ukon nagatuman sang imo ginmando. Nagapangamuyo sia gihapon sing tatlo ka beses sa isa ka adlaw."
Sang pagkabati sang hari sini, natublag gid sia kag nagtinguha sia sa pagpangita sing paagi tubtob sa kahapunanon sa pagluwas kay Daniel. Dayon ang mga tawo nagbalik sa hari kag nagsiling sa iya, "Mahal nga Hari, nakahibalo ikaw nga suno sa mga kasugoan sang Media kag Persia, wala sing mando ang hari nga sarang maislan."
Dayon ang hari nagmando nga dakpon si Daniel kag ihaboy sa lungib sang mga leon. Nagsiling sia kay Daniel, "Kabay nga ang imo Dios nga imo ginaalagad sing matutom magluwas sa imo." Nagkuha sila sing bato kag gintakop baba sang lungib. Ginmarkahan sang hari ang bato sang iya harianon nga selyo kag sang selyo sang iya dungganon nga mga tawo agod wala sing may makaluwas kay Daniel. Ang hari nagbalik sa palasyo kag sa bilog nga gab-i wala sia magkaon ukon maghimo sang masunson niya nga ginahimo nga pagpangalipay. Indi gid sia makatulog.
Sang kaagahon ang hari nagbangon kag nagdalidali pakadto sa lungib. Sang malapit na sia, nagsinggit sia sa daku nga kasubo, "Daniel, alagad sang buhi nga Dios! Naluwas bala ikaw gikan sa mga leon sang Dios nga imo ginaalagad sing matutom?"
Si Daniel nagsabat, "Mahal nga Hari, kabay nga magkabuhi ka sa gihapon. Ang Dios nagpadala sang iya anghel kag ginpakipot ang mga baba sang leon agod nga indi nila ako maano. Ginhimo niya ini tungod kay nakahibalo sia nga wala ako sing sala, kag tungod kay wala ako sing malain nga nahimo sa imo, Mahal nga Hari.”
Ang hari nalipay gid kag nagmando sia nga kuhaon si Daniel sa lungib. Gani ginkuha nila sia kag nakita nila nga wala gid sia maano kay nagsalig sia sa Dios. Dayon ang hari nagmando nga ang tanan nga mga tawo nga nagsumbong kay Daniel pagaihaboy sa Iungib sang mga leon upod sa ila mga asawa kag mga kabataan. Wala pa gani sila makatupa sa idalom sang Iungib, ang mga leon nagsalo na sa ila kag nag-usap sang ila mga tul-an.
Dayon si Haring Dario nagsulat sa mga tawo sang tanan nga mga pungsod, rasa, kag linggwahe sa bug-os nga duta. Amo ini ang iya sulat.
"Pag-abiabi. Nagamando ako nga sa bug-os ko nga emperyo ang tanan magkahadlok kag magtahod sa Dios ni Daniel.
"Buhi sia nga Dios
Kag magagahom sa walay katubtoban.
Ang iya ginharian indi gid malaglag
Kag ang iya gahom walay katapusan.
Nagaluwas sia kag nagatabang,
Nagahimo sia sing mga katingalahan kag mga milagro
Sa langit kag sa duta.
Ginluwas niya si Daniel sa gahom sang mga leon.”
Si Daniel nag-uswag sang paghari ni Dario kag si Ciro nga Persianhon.
Kalantahon sa Pagsabat:
Daniel 3:68, 69, 70, 71, 72, 73, 74
(S) Dayawon kag himayaon ikaw sa gihapon.
Dayawa ang Ginoo makangililo nga lamig kag makapalaso nga init, ambaha ang iya kadayawan kag tahura sia sa walay katapusan. (S)
Dayawa ang Ginoo mga tun-og kag yelo, ambaha ang iya kadayawan kag tahura sia sa walay katapusan. (S)
Dayawa ang Ginoo mga kagab-ihon kag kaadlawon, ambaha ang iya kadayawan kag tahura sia sa walay katapusan. (S)
Dayawa ang Ginoo kapawa kag kadulom, ambaha ang iya kadayawan kag tahura sia sa walay katapusan. (S)
Dayawa ang Ginoo yelo kag tugnaw, ambaha ang iya kadayawan kag tahura sia sa walay katapusan. (S)
Dayawa ang Ginoo nagtilig-a nga mga tun-og kag mga yelo, ambaha ang iya kadayawan kag tahura sia sa walay katapusan. (S)
Dayawa ang Ginoo mga kilat kag mga gal-om, ambaha ang iya kadayawan kag tahura sia sa walay katapusan. (S)
Aleluya:
Lucas 21:28
Magtindog kamo kag magbayaw sang inyo mga ulo, kay ang inyo kaluwasan malapit na.
Ang Pagbasa sang Santos nga Ebanghelyo suno kay:
San Lucas 21:20-28
“Kon makita ninyo ang Jerusalem nga ginalibutan sang mga hangaway, ti, mahibal-an ninyo nga sa indi madugay pagalaglagon ini. Gani ang mga yara sa Judea dapat magpalagyo sa mga bukid, kag ang mga sa sulod sang banwa maggwa, kag ang yara sa kaumhan indi magsulod sa banwa. Kay amo ini ang ‘Mga Adlaw sang Pagsilot,’ sa pagtuman sang tanan nga ginasiling sang mga Kasulatan. Kailo man ang nagabulosong nga mga babayi kag ang mga iloy nga may mga lapsag sa sadtong mga adlaw. Ang sobra nga kalisdanan magaabot sa sini nga duta, kag ang kaakig sang Dios magaabot sa sini nga mga tawo. Ang iban sa ila pamatyon, ang iban pagabihagon sa iban nga mga kapungsoran, kag ang Jerusalem pagatapakon sang mga pagano tubtob sa adlaw nga matapos ang ila paggahom.”
“Sa sadto nga tion may mga tanda nga makita sa adlaw, sa bulan kag sa mga bituon. Ang tanan nga mga pungsod sa duta magakurog sa kahadlok sang dinaguhob sang mga balod sa dagat. Ang mga tawo magakalipong sa kahadlok samtang nagahulat sila sang magaabot sa bug-os nga duta. Kay ang mga gahom sa kahawaan pagapatalangon sa ila kinaandan nga alagyan. Dayon ang Anak sang Tawo magapakita, nga nagakari sa mga panganod, nga may daku nga gahom kag himaya. Kon ini nga mga butang mahanabo, magtindog kamo kag magbayaw sang inyo mga ulo, kay ang inyo kaluwasan malapit na.”
No comments:
Post a Comment