Ginbendisyonan ni Jesus ang mga Tinapay kag mga Isda

Liturhiya sang Pulong

(Lunes, Agosto 5, 2019)

Ang Pagkonsagrar sang Basilika ni Santa Maria sa Roma

Ang Pagbasa gikan sa Libro sang:

Numeros 11:4-15

   Ang grupo sang mga dumoluong nga nagapanglakaton upod sa mga Israelinhon nahidlaw gid sa pagkaon sing karne, kag bisan gani ang mga Israelinhon nagsugod sa pagreklamo, "Kon may karne kontani kita! Sa Egipto nagpagusto kita sing kaon sang tanan nga isda nga aton nauyonan, kag wala kita sing bayad. Dumdoma ninyo ang mga atimon, ang mga sandiya, ang mga bawang, ang mga sebuyas, kag ang mga ahos nga aton natilawan! Pero karon nagniwang na kita. Wala na kita sing sarang kaunon, luwas lamang sining mana kada adlaw." (Ang mana kaangay sang magagmay nga mga binhi, nga ang iya kolor krema. Nagatupa ini sa kampamento kon gab-i, upod sa tun-og. Pagkaaga, ang mga tawo naglibot sa pagpamulot sini, ginabayo ukon ginagaling nila ini agod mabukbok, kag dayon lutuon nila ini nga mangin-manipis nga mga tinapay. Ang sabor sini pareho sang tinapay nga naluto sa lana sang olivo.) Nabatian ni Moises ang mga reklamo sang mga tawo samtang nagatindog sila nga nagatipontipon sa mga puwertahan sang ila mga tolda. Nasub-an gid sia, tungod kay ang Ginoo naakig sa ila, kag nagsiling sia sa Ginoo, "Ngaa bala ginhimo mo ining malain nga butang sa akon? Ngaa wala ka malipay sa akon? Ngaa bala nga ako ang manabat para sa sini nga mga tawo? Indi ako ang nagtuga sa ila ukon nagpanganak sa ila! Ngaa nga magsiling ka nga kugoson ko sila kaangay sang mga lapsag pakadto sa duta nga imo ginsaad sa ila mga katigulangan? Diin bala ako makuha sing tuman nga karne para sa sining tanan nga mga tawo? Nagapadayon sila sa pagreklamo nga nagapangayo sing karne. Indi ko masarangan ang pagdumala sini tanan nga mga tawo sa akon kaugalingon; tama ini kabudlay para sa akon! Kon amo ini ang imo himuon sa akon, maluoy ka, patya na lang ako, agod indi na ako mag-antos sang imo pagkapintas.”

Salmo sa Pagsabat:

Mga Salmo 81:12-13, 14-15, 6-17

“Pero ang akon mga tawo indi magpamati sa akon; ang Israel wala magtuman sa akon. Gani ginpabay-an ko sila sa ila pagkabatinggilan kag sa paghimo sang ila luyag. (S)
Daw ano ang akon handom nga pamatian ako kuntani kamo sang akon mga tawo; daw ano ang akon handom nga tumanon kuntani nila ako! Sa madali malutos ko kuntani ang ila mga kaaway, kag madaog ko ang tanan nila nga mga kasumpong. (S)
Ang mga nagadumot sa akon magaduko nga may kahadlok sa akon atubangan, ang ila silot wala sing katapusan. Pakaunon ko kamo sang pinili nga trigo kag busgon ko kamo sang dugos sa talon.” (S)

Aleluya:

Mateo 4:4

Si Jesus nagsabat, “Ang kasulatan nagasiling, ‘Indi lamang sa tinapay mabuhi ang tawo, kundi sa tagsa ka pulong nga ginahambal sang Dios.’”

Ang Pagbasa sang Santos nga Ebanghelyo suno kay:

San Mateo 14:13-21

   Sang pagkabati sini ni Jesus, naghalin sia sadto nga duog nga nagsakay sa sakayan kag nagkadto sa isa ka baw-ing nga duog nga isahanon lang. Sang nahibal-an ini sang mga tawo sa nagkalainlain nga banwa, nag-apas sila kay Jesus nga nagalakat lang. Sang pagtakas ni Jesus, nakita niya ang madamo nga mga tawo. Naluoy gid sia sa ila kag gin-ayo niya ang ila mga masakiton. Sang sirom na, ang iya mga gintuton-an nagpalapit sa iya kag nagsiling, “Madulom na kag baw-ing ini nga duog. Palakta ang mga tawo agod makabakal sila sang ila kaunon sa mga baryo palibot.” Nagsabat si Jesus, “Indi na kinahanglan nga maglakat pa sila. Kamo mismo ang maghatag sa ila sing pagkaon.” Nagsabat sila, “Wala gid kami diri sing pagkaon, kundi lima gid lang ka bilog nga tinapay kag duha ka isda.” Nagsiling si Jesus, “Dalha ninyo ina diri sa akon.” Ginsugo niya ang mga tawo nga maglingkod sa hilamon. Dayon iya ginkuha ang lima ka bilog nga tinapay kag duha ka isda, nagtangla sa langit kag nagpasalamat sa Dios. Ginpamihakpihak niya ang tinapay kag ginhatag niya sa iya mga gintuton-an, kag ginhatag ini sang mga gintuton-an sa mga tawo. Ang tagsatagsa nagkaon kag nabusog. Dayon gintipon sang mga gintuton-an ang nabilin kag dose pa ka alat ang napuno. Ang mga nagkalaon mga 5,000 ka mga lalaki, wala labot ang mga babayi kag mga kabataan.

Agosto 4 | Agosto 6