Liturhiya sang Pulong
(Miyerkules, Mayo 20, 2020)
San Bernardino de Siena, Pari
Ang Pagbasa gikan sa:
Binuhatan sang mga Apostoles 17:15, 22–18:1
Ang mga nagdul-ong kay Pablo nag-upod sa iya tubtob sa Atenas. Dayon nagbalik sila sa Berea nga dala ang tugon ni Pablo kay Silas kag kay Timoteo nga mag-apas sila sa iya gilayon.
Nagtindog si Pablo sa atubangan sang mga tawo nga nagatilipon sa Areopago kag nagsiling, “Mga taga-Atenas! Nakita ko nga tama gid kamo ka relihiyuso. Kay sa akon paglibot sa inyo siyudad kag sa pagtan-aw ko sang mga duog nga inyo ginasimbahan, may nakita man ako nga altar nga nasulatan, ‘Sa Wala Makilal-i nga Dios.’ Ang inyo ginasimba nga wala ninyo makilala, amo ang akon ginawali sa inyo. Ang Dios nga naghimo sang kalibutan kag sang tanan nga yara sa kalibutan, amo ang Ginoo sang langit kag sang duta. Ini sia wala nagapuyo sa mga templo nga ginhimo sang mga tawo. Wala man sia nagakinahanglan sang bulig nga mahatag sang tawo paagi sa ila pagpangabudlay para sa iya, kay sia gid ang nagahatag sang kabuhi kag ginhawa kag sang iban pa nga mga butang sa tanan nga mga tawo. Gikan sa isa ka tawo gintuga niya ang tanan nga mga rasa sang mga tawo kag ginpapuyo sila sa bug-os nga kalibutan. Napat-od na niya nga daan ang tanan nga panahon kag ang dulonan sang mga duog nga pagapuy-an nila. Ginhimo niya ini agod nga pangitaon nila sia kag basi pa lang nga mabatyagan nila sia sa ila pagpangita sa iya. Pero ang matuod nga ang Dios indi malayo sa tagsa sa aton, kay suno sa ginsiling,
‘Sa iya kita nagakabuhi,
Nagagiho kag nangin-amo karon.’
Subong man ginasiling sang inyo mga manugbinalaybay,
‘Kita man mga anak niya.’
Tungod kay mga anak kita niya, indi kita magdumdom nga ang kinaugali sang Dios subong sang larawan nga nahimo sa bulawan, pilak ukon bato nga ginsilsil sang sampaton nga tawo. Wala na pag-isipa sang Dios yadtong mga panahon sang wala pa makakilala ang mga tawo sa iya, pero karon iya ginasugo ang tanan nga mga tawo bisan diin sa pagbiya sang ila malaut nga pagginawi. Kay may napat-od na sia nga adlaw nga pagahukman niya sing matarong ang bug-os nga kalibutan paagi sa isa ka tawo nga iya ginpili. Ginpamatud-an niya ini sa tanan paagi sa iya pagbanhaw sang amo nga tawo!”
Sang pagkabati nila kay Pablo nga nagahambal nahanungod sang pagkabanhaw sa mga minatay, ang iban sa ila nagyaguta sa iya, pero ang iban nagsiling sa iya, “Luyag pa kami mamati liwat sa imo nahanungod sini nga butang.” Gani naghalin si Pablo sa sadto nga pagtililipon. May mga tawo nga nag-upod sa iya kag nagtuo; ang isa sa ila amo si Dionisio nga katapo sang Areopago kag ang isa ka babayi nga si Damaris kag iban pa.
Sa tapos sini naghalin si Pablo sa Atenas kag nagkadto sa Corinto.
Salmo sa Pagsabat:
Mga Salmo 148:1-2, 11-12, 13, 14
(S) Ang langit kag duta puno sang Imong himaya.
Dayawa ninyo ang Ginoo kamo nga yara sa langit, kamo nga nagapuyo sa kahitaasan! Dayawa ninyo sia, tanan kamo nga iya mga anghel, tanan kamo nga iya mga hangaway nga langitnon! (S)
Dayawa ninyo sia, mga hari kag tanan nga mga katawuhan, mga prinsipe kag tanan nga mga pangulo, mga soltero kag mga dalaga, mga tigulang kag mga bata man! (S)
Magdayaw sila tanan sa ngalan sang Ginoo. Ang iya ngalan gamhanan sa tanan nga mga ngalan; ang iya himaya yara sa ibabaw sang duta kag langit! (S)
Ginpabakod niya ang iya pungsod, gani ang tanan niya nga mga tawo nagadayaw sa iya, ang mga tawo sang Israel, nga mahal gid sa iya! Dayawa ninyo ang Ginoo! (S)
Aleluya:
Juan 14:16
Pangayuon ko sa Amay kag hatagan niya kamo sang isa ka Mananabang, ang Espiritu sang kamatuoran, nga magapabilin upod sa inyo sa walay katapusan.
Ang Pagbasa sang Santos nga Ebanghelyo suno kay:
San Juan 16:12-15
“May madamo pa ako nga inugsugid sa inyo, ugaling indi pa kamo sarang makahangop sini karon. Pero kon mag-abot ang Espiritu sang kamatuoran, sia magatuytoy sa inyo sa bug-os nga kamatuoran. Ang iya ihambal indi iya, kundi magasugid sia sa inyo sang iya nabatian, kag magapahayag sia sang mga butang nga palaabuton. Magahimaya sia sa akon, kay sia magabaton sang akon inugsiling kag iya ini ipahayag sa inyo. Ang tanan nga iya sang Amay akon, gani nagsiling ako nga ang Espiritu magabaton sang akon inugsiling kag iya ini ipahayag sa inyo.”
No comments:
Post a Comment