"Yara sa Imo ang mga Pulong nga Nagahatag sang Kabuhi nga Dayon"

Liturhiya sang Pulong

(Sabado, Mayo 2, 2020)

San Atanasio, Obispo kag Doktor sang Simbahan

Ang Pagbasa gikan sa mga:

Binuhatan sang mga Apostoles 9:31-42

   Kag sadto nga tion may kalinong ang iglesia sa bug-os nga Judea, Galilea kag Samaria. Nagtubo ini kag nagdugang paagi sa pagbulig sang Espiritu Santo samtang nagapadayon ini sa pagtahod sa Ginoo.

   Madamo nga mga duog ang ginpangkadtuan ni Pedro, kag isa sadto ka tion nagkadto sia sa mga tumoluo nga nagapuyo sa Lida. Didto nakita ni Pedro ang isa ka tawo nga ginahingalanan kay Eneas. Ini sia isa ka paralitiko kag wala gid sia makabangon sa iya higdaan sa sulod sang walo ka tuig. Nagsiling si Pedro sa iya, “Eneas, ginaayo ikaw ni Jesu-Cristo. Bangon ka kag himusa ang imo higdaan.” Sa gilayon nagbangon si Eneas. Ang tanan nga mga pumoluyo sa Lida kag sa Sarona nakakita kay Eneas, kag nakonbertir sila sa Ginoo.

   Sa Joppe may isa ka tumoluo nga babayi nga ginahingalanan kay Tabita. (Ang iya ngalan sa Griego amo si Dorcas nga kon sayuron, usa.) Sa bug-os niya nga pagkabuhi naghimo sia sing maayo nga mga buhat kag nagmabinuligon sia sa mga imol. Sadto nga tion nagmasakit sia kag napatay. Ang bangkay niya ginsibinan kag ginhamyang sa isa ka kuwarto sa ibabaw. Ang Joppe indi gid man malayo sa Lida. Gani sang pagkabati sang mga gintuton-an nga didto si Pedro sa Lida, ginpakadto nila ang duha ka tawo didto sa pagpangabay sa iya nga magkari sia gilayon. Gani nanghimos si Pedro kag nag-upod sa ila. Sang pag-abot niya didto ginpasaka nila sia sa kuwarto sa ibabaw. Ginlibutan sia sang mga babayi nga balo nga nagahinibi kag nagapakita sa iya sang mga bayu kag mga kunop nga nahimo ni Dorcas sang buhi pa sia. Ginpagwa sila tanan ni Pedro kag nagluhod sia sa pagpangamuyo. Sa tapos sini nag-atubang sia sa bangkay kag nagsiling, “Bangon ka, Tabita!” Nagmuklat ang mga mata ni Tabita kag sang makita niya si Pedro nagpungko sia. Gin-uyatan sia ni Pedro sa kamot kag ginpatindog. Dayon gintawag niya ang mga tumoluo kag ang mga babayi nga balo kag gintugyan niya sa ila si Tabita nga nabuhi. Ini nga balita naglapnag sa bug-os nga Joppe kag madamo ang nagtuo sa Ginoo.

Salmo sa Pagsabat:

Mga Salmo 116:12-13, 14-15, 16-17

(S) Ano bala ang mahatag ko sa Ginoo tungod sang tanan niya nga kaayo sa akon? 

Ano bala ang mahatag ko sa Ginoo tungod sang tanan niya nga kaayo sa akon? Magadala ako sing halad nga ilimnon sa Ginoo sa pagpasalamat sa iya sang pagluwas niya sa akon. (S)
Sa pagtilipon sang tanan niya nga mga tawo, hatagan ko sia sang akon ginsaad, daw ano kasakit para sa Ginoo kon ang isa sang iya mga tawo mapatay! (S)
Alagad mo ako, O Ginoo, ginaalagad ko ikaw subong sang ginhimo sang akon iloy. Ginhilway mo ako. Magadulot ako sa imo sang halad sang pagpasalamat, kag magapangamuyo ako sa imo. (S)

Aleluya:

Juan 6:63, 68

   Ang Pulong mo, O Ginoo, amo ang Espiritu sang kabuhi. Yara sa imo ang mga pulong nga nagahatag sang kabuhi nga dayon. 

  

Ang Pagbasa sang Santos nga Ebanghelyo suno kay:

San Juan 6:60-69

   Madamo sang iya mga gintuton-an ang nakabati sini kag nagsiling sila, “Tama kabudlay ining mga ginatudlo niya. Sin-o bala ang makabatas sa pagpamati sini?”

   Bisan wala masugiri si Jesus, nahibaluan niya nga nagakulomuron ang iya mga gintuton-an nahanungod sini. Gani nagsiling sia sa ila, “Nasaklaw bala kamo sini? Abi kon makita ninyo ang Anak sang Tawo nga nagakayab pabalik sa iya ginhalinan? Ang Espiritu sang Dios amo ang nagahatag sang kabuhi. Ang unod wala gid sing pulos. Ang mga pulong nga ginahambal ko sa inyo amo ang Espiritu kag kabuhi. Pero ang iban sa inyo wala nagatuo.” (Kay sa ginsugoran nakilala ni Jesus kon sin-o ang indi magtuo kag kon sin-o ang magaluib sa iya.) Kag nagsiling pa gid sia, “Amo ini ang kabangdanan kon ngaa nagsiling ako sa inyo nga wala sing may makakari sa akon, kon indi sia pagtugotan sang Amay.”

   Tungod sini, madamo sang mga gintuton-an ni Jesus ang nagbiya sa iya, kag indi na mag-upod sa iya. Dayon nagsiling si Jesus sa dose ka mga apostoles, “Luyag man bala kamo magbiya sa akon?”

   Si Simon Pedro nagsabat sa iya, “Ginoo, sa kay sin-o bala kami makadto? Yara sa imo ang mga pulong nga nagahatag sang kabuhi nga dayon. Kag karon nagatuo kami kag nakahibalo nga ikaw amo ang Balaan halin sa Dios.”

Mayo 1 | Mayo 3