"Madamo ang Magalingkod sa Punsyon sa Ginharian sang Langit"

Liturhiya sang Pulong

(Lunes, Disyembre 2, 2019)

Ang Pagbasa gikan sa Libro ni:

Isaias nga Propeta 4:2-6

   Ang tion magaabot nga ang tagsa ka tanom kag kahoy sa duta padakuon kag patahumon sang Ginoo. Ang tanan nga mga tawo sang Israel nga mabilin magapabugal kag magakalipay sa mga patubas sang duta. Ang tagsatagsa nga mabilin sa Jerusalem nga ginpili sang Dios nga mabuhi, pagatawgon nga balaan. Paagi sa iya gahom ang Ginoo magahukom kag magapaputli sang pungsod kag magahugas sang sala sang Jerusalem kag sang dugo nga ginpaagay didto.
   Dayon sa ibabaw sang bukid sang Sion, kag sa ibabaw sang tanan nga nagtipon didto, ang Ginoo magapadala sing panganod kon adlaw, kag kon gab-i aso kag nagadabdab nga kalayo. Ang himaya sang Dios magalikop kag magaapin sang bug-os nga siyudad. Ang iya himaya magalandong sang siyudad gikan sa init sang adlaw, kag himuon ini nga isa ka duog nga hilway sa katalagman, nga indi maano sang ulan kag bagyo.

Salmo sa Pagsabat:

Mga Salmo 122:1-2, 3-4, 4-5, 6-7, 8-9

(S) Makadto kita sa balay sang Ginoo nga may kalipay.

Nagkasadya ako sang pagsiling nila sa akon, “Dali makadto kita sa balay sang Ginoo!” Kag karon yari na kita diri, nga nagatindog sa sulod sang mga puwerta sang Jerusalem. (S)

Ang Jerusalem isa ka siyudad nga ginpatindog liwat sa diin ang mga tawo naghiliusa sing tingob! Diri nagakadto ang mga tribo, ang mga tribo sang Israel. (S)
Sa pagpasalamat sa Ginoo suno sa iya ginsugo sa ila. Diri napahamtang ang mga hukmanan, sa diin ang hari nagahukom sang iya mga tinawo. (S)

Magpangamuyo kamo agod may paghidait sa Jerusalem! "Kabay ang mga nagahigugma sa imo magmainuswagon! Kabay nga may paghidait sa sulod sang imo mga pader, kag kalig-onan sa imo mga palasyo." (S)

Tungod sa akon mga abyan kag mga kaupdanan, nagasiling ako sa Jerusalem, "Ang paghidait manginyara sa imo!" Tungod sa balay sang Ginoo nga aton Dios, nagapangamuyo ako para sa imo kauswagan. (S)

Aleluya:

Mga Salmo 80:4

   Kari ka, O Ginoong Dios namon, kag luwasa kami; ipakita ang Imo nawong kag maluwas kami.

Ang Pagbasa sang Santos nga Ebanghelyo suno kay:

San Mateo 8:5-11

   Sang pagsulod ni Jesus sa Capernaum, may opisyal nga Romanhon nga nagsugata sa iya kag nagpangayo sing bulig nga nagasiling, “Sir, ang akon suloguon didto sa balay nagamasakit; indi sia makahulag kag tama gid ang iya pag-antos.” 

   Si Jesus nagsiling, “Kadtuan ko sia kag ayuhon.” 

   Nagsabat ang opisyal, “Indi na lang, Sir, kay indi ako takos nga magkadto ka sa akon balay, kundi isiling lang kag magaayo ang akon suloguon. Kay ako man yara sa idalom sang mataas nga mga opisyales, kag may mga soldado man sa idalom ko; nagamando ako sa isa, ‘Lakat!’ kag nagalakat sia; nagamando man ako sa isa, ‘Kari!’ kag nagakari sia; kag nagasugo ako sa akon suloguon, ‘Himoa ini!’ kag ginahimo niya.” 

   Natingala gid si Jesus sang pagkabati niya sini, kag nagsiling sia sa mga tawo nga nagasunod sa iya, “Nagasiling ako sa inyo nga wala pa ako makakita sa Israel sing pagtuo nga subong sini. Dumdoma ninyo ini! Madamo ang magakari halin sa sidlangan kag sa nakatundan nga magalingkod kaupod ni Abraham, ni Isaac, kag ni Jacob sa punsyon sa Ginharian sang langit.

Disyembre 1 | Disyembre 3