"Sin-o bala ang Labing Daku sa Ginharian sang Langit"

Liturhiya sang Pulong

(Martes, Agosto 13, 2019)

San Ponciano, Santo Papa; San Hipolito, Pari. mga Martires

Ang Pagbasa gikan sa Libro sang:

Deuteronomio 31:1-8

   Si Moises nagpadayon sa paghambal sa mga tawo sang Israel, kag nagsiling, "Karon 120 ka tuig na ang akon edad kag indi na ako makasarang sa pagpangulo sa inyo. Kag wala labot sini ang GINOO nagsiling sa akon nga indi ako, magtabok sa suba sang Jordan. Ang Ginoo nga inyo Dios amo gid ang magauna sa inyo kag magalaglag sa sini nga mga kapungsoran, agod inyo mapanag-iyahan ang ila duta, kag si Josue mangin-inyo pangulo suno sa ginsiling sang Ginoo. Ang Ginoo magalaglag sini nga mga tawo, subong sang iya paglutos kay Sihon kag kay Og, mga hari sang mga Amornon, kag ginlaglag ang ila pungsod. Ang Ginoo magapadaog sa inyo batok sa ila, kag dapat ninyo himuon sa ila suno gid sa akon ginsiling sa inyo. Magpakabakod kamo kag magpakaisog. Indi kamo magkahadlok sa sini nga mga tawo. Ang inyo Dios, ang GINOO gid, magaupod sa inyo. Indi niya kamo pagbayaan ukon pagpatumbayaan.” Dayon ginatawag ni Moises si Josue kag ginsingganan sa atubangan sang tanan nga mga tawo sang Israel, "Magpakabakod kag magpakaisog ka. Ikaw amo ang magapangulo sini nga mga tawo sa pagpanag-iya sang duta nga ginsaad sang Ginoo sa ila mga katigulangan. Ang GINOO mismo amo ang magauna kag magaupod sa imo. Indi niya ikaw pagbayaan ukon pagpatumbayaan, gani indi ka magpakaluya ukon magkahadlok.”

Kalantahon sa Pagsabat:

Deuteronomio 32:3-4, 7, 8, 9 kag 12

(S) Ikaw, O Ginoo, ang tanan para sa akon.

Dayawon ko ang ngalan sang Ginoo, kag ibantala ninyo ang iya kagamhanan. "Ang GINOO amo ang inyo makusog nga mangangapin, himpit kag matarong sa tanan niya nga mga ginahimo. (S)
"Dumdoma ang nagligad, ang mga panahon sang una, pamangkuta ang inyo amay kon ano ang nahanabo, pamangkuta ang mga tigulang kon ano ang nagligad. (S)
Ang Labing Mataas naghatag sa mga kapungsoran sang ila mga duta. Ginpat-od niya kon diin ang mga katawuhan dapat magpuyo ginhatagan niya ang tagsa ka dios sang pungsod. (S)
Pero ginpili niya ang kaliwat ni Jacob para sa iya kaugaligon. Ang GINOO amo lamang ang nagatuytoy sa iya mga katawuhan nga wala ginabuligi sang iban nga dios. (S)

Aleluya:

Mateo 11:29

   Itakod ang akon gota sa inyo, siling sang Ginoo, kag magtuon kamo sa akon, kay ako malulo kag mapainuboson sing tagipusoon.

Ang Pagbasa sang Santos nga Ebanghelyo suno kay:

San Mateo 18:1-5, 10, 12-14

   Sa sadto nga tion nagpalapit ang mga gintuton-an kay Jesus kag nagpamangkot, “Sin-o bala ang labing daku sa Ginharian sang langit?”
   Gintawag ni Jesus ang isa ka diutay nga bata kag ginpatindog sia sa ila atubangan, kag nagsiling, “Dumdoma ninyo ini! Kon indi kamo magbaylo kag manginkaangay sa magamay nga mga kabataan, indi gid kamo makasulod sa Ginharian sang langit. Gani ang nagapaubos sang iya kaugalingon kag manginkaangay sining diutay nga bata, amo ang labing daku sa Ginharian sang langit. Kag ang nagabaton sang kasubong sining diutay nga bata sa akon ngalan nagabaton sa akon.”
   “Mag-andam kamo nga indi ninyo matamay ang isa sining magamay nga mga kabataan. Nagasiling ako sa inyo nga ang ila mga anghel sa langit yara pirme sa atubangan sang akon Amay nga langitnon.
   “Ano bala sa inyo? Ano bala ang himuon sang isa ka tawo nga may 100 nga mga karnero kag ang isa sa ila nadula? Bayaan niya ang 99 didto sa bakulod nga nagahalab kag iya pangitaon ang nadula nga karnero. Nagasiling ako sa inyo, kon iya makita ini, ang iya kalipay tungod sining isa labi pa sang iya kalipay sa 99 nga wala madula. Subong man ang inyo Amay sa langit indi luyag nga ang isa sining magamay nga mga kabataan madula.” 

Agosto 12 | Agosto 14