"Ang Ginharian sang Dios Malapit na sa Inyo"

Liturhiya sang Pulong

(Huwebes, Oktubre 3, 2019)

Ang Pagbasa gikan sa Libro ni:

Nehemias 8:1-4, 5-6, 7-12

   Sang ikapito nga bulan ang mga tawo sang Israel yara na nagapuyo sa ila mga banwa kag mga siyudad. Sa nahauna nga adlaw sina nga bulan nagtipon sila tanan sa Jerusalem, sa plasa sa atubangan sang Puwerta sang Tubig. Ginpangabay nila si Esdras, ang pari kag manunudlo sang Kasugoan nga ginhatag sang Dios paagi kay Moises, sa pagkuha sang Libro sang Kasugoan. Ginkuha ini ni Esdras kag gindala sa diin nagatipon ang mga lalaki, mga babayi kag mga kabataan nga sarang na makahangop. Didto sa plasa sa atubangan sang puwerta ginbasa niya sa ila ang Kasugoan halin sa kaagahon tubtob sa udto, kag nagpamati sila sing maayo gid.
   Sang pagbasa ni Esdras nagtindog sia sa plataporma nga tapi nga ginpatindog para gid sa sini nga tinutuyo. Ang mga tawo nga nagtindog sa tuo niya amo sanday Matitias, Sema, Anaya, Urias, Helcias, kag Maasias. Ang nagatindog sa wala niya amo sanday Pedaya, Mesael, Malquias, Hasum, Hasbadana, Zacarias, kag Mesullam.
   Sang nagatindog si Esdras didto sa ibabaw sang plataporma, ang tanan nga mga tawo nagtulok sa iya. Pagbukas niya sang libro ang tanan nagtindog. Si Esdras nagsiling, "Dayawon ang Ginoo, ang Gamhanan nga Dios!"
   Ang tanan nga mga tawo nagbayaw sang ila kamot kag nagsiling, "Kabay pa, kabay pa!” Dayon nagluhod sila sa pagsimba nga ang ila nawong nagaduot sa duta.
   Ang mga tawo nagtindog kag ang kasugoan ginsaysay sa ila sang mga Levita nga amo sanday Jesua, Bani, Serebias, Jemin, Acub, Sabetai, Hodias, Maasias, Kelita, Azarias, Jozabad, Hanan, kag Pelaya. Ginbadbad kag ginsaysay nila ang kasugoan sang Dios agod nga mahangpan ini sang mga tawo.
   Sang mabatian sang mga tawo ang ginasiling sang Kasugoan, natandog gid sila, gani naghinibi sila. Si Nehemias, si Esdras, kag ang mga Levita nga nagasaysay sang Kasugoan nagsiling sa tanan nga mga tawo, “Ini nga adlaw balaan sa Ginoo nga inyo Dios. Indi kamo maglalaw ukon maghibi. Karon mapauli kamo kag maghiwat sing punsyon. Hatagi man ninyo sang inyo pagkaon kag bino ang mga tawo nga wala sing pagkaon kag ilimnon. Karon nga adlaw balaan sa Ginoo, gani indi kamo magkasubo. Ang kalipay nga ginhatag sa inyo sang Ginoo magapabakod sa inyo."
   Ang mga Levita nagkadto sa mga tawo kag nagsiling sa ila nga indi magkasubo, kay ang adlaw balaan. Gani ang tanan nga mga tawo nagpauli kag nagkaon kag nag-inom sing malipayon kag ginhatagan man nila ang iban sang ila pagkaon kay nahangpan nila ang ginbasa sa ila.

Salmo sa Pagsabat:

Mga Salmo 19:8, 9, 10, 11

(S) Matarong ang mga pagsulondan sang Ginoo kag ang mga nagatuman sini malipayon.

Matarong ang mga pagsulondan sang Ginoo, kag ang mga nagatuman sini malipayon, matarong gid ang iya mga sugo, kag nagahatag sing paghangop kag sa hunahona. (S)
Ang pagsimba sa Ginoo maayo; magapadayon ini sa walay katubtoban. Matarong ang mga paghukom sang Ginoo; wala ini sing may ginapasulabi. (S)
Halandumon pa sila sang sa bulawan, bisan pa sang sa pinakapuraw nga bulawan. Matam-is pa sila sang sa dugos, bisan pa sang sa wala simbog nga dugos. (S)
Ginatudloan nila ako nga imo alagad, tungod sang akon pagtuman sini ginahatagan ako sing balos. (S)

Aleluya:

Marcos 1:15

   Ang Ginharian sang Dios malapit na. Bayai ninyo ang inyo mga sala, kag magpati sa Maayong Balita.

Ang Pagbasa sang Santos nga Ebanghelyo suno kay:

San Lucas 10:1-12

   Sa tapos sini ang Ginoo nagpili sing 72 ka mga tawo kag iya sila ginpadala sing tag-duhadoha sa pag-una sa iya sa tagsa ka mga banwa kag duog nga iya pagakadtuan. Nagsiling sia sa ila, “Malapad ang alanyon, pero diutay lang ang mga mangangani. Gani magpangamuyo kamo sa tag-iya sang alanyon nga magpadala sia sing dugang pa nga mga mangangani sa iya alanyon. Lakat kamo! Ginapadala ko kamo subong mga karnero sa tunga sang mga lobo. Indi kamo magdala sing kahita, ukon puyo, ukon sandalyas. Indi kamo magdulog sa pagpanamyaw bisan kay sin-o sa dalan. Kon magsulod kamo sa isa ka balay, magsiling kamo anay, ‘Paghidait sa sini nga balay.’ Kon ang nagapuyo dira tawo nga mahidaiton, ibilin sa iya ang inyo panamyaw sang paghidait. Kon indi sia mahidaiton, bawia ninyo ang inyo panamyaw sang paghidait. Magdayon kamo sa sina nga balay, magkaon kag mag-inom sang ginaamuma nila sa inyo, kay ang manugpangabudlay dapat hatagan sang iya suhol. Indi kamo magsagad saylusaylo sing dalayunan. Kon magkadto kamo sa isa ka banwa kag ginaabiabi kamo, kauna ninyo ang ginaamuma sa inyo, ayuha ninyo ang mga nagamasakit sa sina nga banwa, kag magsiling kamo sa mga tawo didto, ‘Ang Ginharian sang Dios malapit na sa inyo.’ Pero kon magsulod kamo sa isa ka banwa kag wala kamo ginaabiabi didto, kadto kamo sa mga dalan kag magsiling, ‘Bisan ang yab-ok sang inyo banwa nga nagatapik sa amon mga tiil amon nga taktakon batok sa inyo. Pero dumdoma ninyo ini, ang Ginharian sang Dios malapit na kuntani sa inyo.’ Nagasiling ako sa inyo nga sa Adlaw sang Paghukom sobra pa ang silot nga pagabatunon sadto nga banwa sang Sodoma.”

Oktubre 2 | Oktubre 4