Levitico

Panguna
Ang libro sang Levitico may kaangtanan sa mga pari nga Levinhon. Ini nga mga pari amo ang nagadumala sang pagsimba sa Israel sadto anay, kag sila ang nagatudlo sa mga tawo sang kabubut-on sang Dios para sa ila kabuhi kag pagsimba.
Ang tagipusoon sang libro amo ang pagkabalaan sang Dios, kag ang mga paagi sang pagsimba kag pagginawi sang mga tawo sa Israel sa pagpadayon sang ila kaangtanan sa iya, "ang Balaan nga Dios sang Israel."
Ang labing matahom nga mga pulong sa sini nga libro makita sa 19:18. Gintawag ini ni Jesus nga ikaduha nga daku nga kasugoan. Ini nagasiling. "Higugmaa ang imo isigkatawo pareho sang imo kaugalingon."

Balayan sang Kaundan
Mga kasugoan nahanungod sang mga dulot kag mga halad 1:1—7:38
Ang pag-orden kay Aaron kag sa iya mga anak nga lalaki subong mga pari 8:1—10:20
Ang mga kasugoan nahanungod sang seremoniya sa pagpaninlo kag ang indi matinlo 11:1—15:33
Ang Adlaw sang Pagtubos 16:1-34
Ang mga Kasugoan nahanungod sa pagkabalaan sa kabuhi kag sa pagsimba 17:1—27:34

☆☆☆ LEVITICO ☆☆☆

1 2 3 4 5 6 7 8 9 10
11 12 13 14 15 16 17 18 19 20
21 22 23 24 25 26 27

☆☆☆ LEVITICO ☆☆☆

EXODO 《 | 》 NUMEROS

LEVITICO - Kapitulo 27

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

●●●●●

Mga Kasugoan nahanungod sang mga Dulot sa GINOO

1 Ang Ginoo naghatag kay Moises

2 sang masunod nga mga pagsulondan para sa mga tawo sang Israel. Kon ang isa ka tawo ginhatag sa Ginoo sa pagtuman sang isa ka pinasahi nga saad, ina nga tawo sarang mahilway paagi sa pagbayad sang masunod nga mga balayran,

3-7 suno sa opisyal nga talaksan:

—Ang hamtong na nga lalaki, nga nagaedad sing 20 tubtob sa 60 ka tuig: 50 ka bilog nga pilak

—Ang hamtong na nga babayi: 30 ka bilog nga pilak

—Ang pamatan-on nga lalaki, nga nagaedad sing lima tubtob sa 20 ka tuig: 20 ka bilog nga pilak

—Ang pamatan-on nga babayi: 10 ka bilog nga pilak

—Ang bata nga lalaki nga wala pa nagaedad sing lima ka tuig: lima ka bilog nga pilak

—Ang bata nga babayi: tatlo ka bilog nga pilak

—Ang lalaki nga nagaedad labaw sa 60 ka tuig: 15 ka bilog nga pilak

—Ang babayi nga nagaedad labaw sa 60 ka tuig: 10 ka bilog nga pilak

8 Kon ang tawo nga naghimo sing saad tama ka imol nga indi makabayad sang husto nga bili, dalhon niya ang amo nga tawo sa pari, kag ang pari magapanubo sang bili suno sa masarangan sang tawo sa pagbayad.

9 Kon ang saad nahanungod sa sapat nga sarang mabaton subong isa ka halad sa Ginoo, dayon ang tagsa ka ulot nga ginahimo sa Ginoo manginbalaan,

10 kag ang tawo nga nagahimo sang saad indi na makabaylo sing isa ka sapat sa baylo sini. Kon iya ini himuon, ang duha ka sapat mangin-iya sang Ginoo.

11 Pero kon ang saad nahanungod sa isa ka sapat nga di-matinlo, nga indi sarang mabaton subong isa ka halad sa Ginoo, ang tawo magadala sang amo nga sapat sa pari.

12 Ang pari magapabili sini, suno sa sahi sini, maayo ukon malain, kag ang iya ginapabili amo ang matuman.

13 Kon ang tawo luyag maggawad sini, kinahanglan bayaran niya ang bili sini kag magadugang sia sing 20 porsiyento.

14 Kon may isa ka tawo nga maghalad sang iya balay sa Ginoo, ang pari magapabili sini suno sa iya sahi, maayo ukon malain, kag ang iya ginapabili amo ang matuman.

15 Kon ang maghalad sang balay luyag maggawad sini, kinahanglan bayaran niya ang bili, kag magadugang sia sing 20 porsiyento.

16 Kon ang isa ka tawo maghalad sang bahin sang iya duta sa Ginoo, ang bili sini manginsuno sa kadamuon sang binhi nga sarang mapanggas sa sini nga duta, sa bili nga napulo ka bilog nga pilak sa tagsa ka tunga sa sako nga sebada.

17 Kon ihalad niya ang duta sa tapos gid ang Tuig sang Pag-uli, bayaran ini sing bug-os suno sa iya bili.

18 Kon ihalad niya ini sa ulihi sa bisan ano nga panahon, ang pari magapabili sini suno sa kadamuon sang tinuig nga nabilin tubtob sa madason nga Tuig sang Pag-uli, kag iya panuboan ang bili.

19 Kon ang tawo nga naghalad sang uma luyag maggawad sini, kinahanglan bayaran niya ang bili kag magadugang sia sing 20 porsiyento.

20 Kon ibaligya niya ang uma sa iban sa wala pa niya magawad ini sa Ginoo, wala na sia sing kinamatarong sa paggawad sini.

21 Sa madason nga Tuig sang Pag-uli, ang uma manginpagkabutang sang GINOO sing dayon; mangin-iya ini sang mga pari.

22 Kon ang isa ka tawo maghalad sa GINOO sang isa ka uma nga iya ginbakal,

23 ang pari magapabili sini suno sa mga tinuig nga nabilin tubtob sa madason nga Tuig sang Pag-uli, kag ang amo nga tawo magabayad sang bili sa sina gid nga adlaw; ang kuwarta mangin-iya sang Ginoo.

24 Sa Tuig sang Pag-uli ang uma pagaiuli sa nahauna nga tag-iya ukon sa iya mga kaliwat.

25 Ang tanan nga bili manginsuno sa opisyal nga talaksan.

26 Ang panganay nga bata sang sapat mangin-iya sang Ginoo, agod nga wala sing may maghalad sini sa GINOO subong isa ka halad nga kinabubot-on. Ang isa ka tinday nga baka, cordero ukon kanding iya sang Ginoo,

27 pero ang panganay nga bata sang isa ka di-matinlo nga sapat sarang magawad sa opisyal nga bili kag magadugang sing 20 porsiyento. Kon indi ini magawad sarang ini mabaligya sa iban suno sa opisyal nga bili.

28 Wala sing isa nga sarang makabaligya ukon makabakal sang ginhalad niya sing dayon sa Ginoo, bisan ini isa ka tawo, isa ka sapat ukon duta. Iya ini sang Ginoo sing dayon.

29 Bisan gani ang isa ka tawo nga ginhalad sing dayon sa Ginoo indi sarang magawad, kundi pagapatyon gid sia.

30 Ang ikanapulo nga bahin sang tanan nga patubas sang duta, bisan ini mga uyas ukon mga prutas, iya sang Ginoo.

31 Kon ang isa ka tawo luyag maggawad sang bisan ano sini nga mga butang, kinahanglan magbayad sia suno sa opisyal nga bili kag magadugang sia sing 20 porsiyento.

32 Ang isa sang tagsa ka napulo nga sinagod nga mga hayop iya sang Ginoo. Sa tapos maisip ang mga sapat, ang ikanapulo iya sang Ginoo.

33 Indi niya pagpaigoigoon agod nga ang mapigaw nga hayop amo ang mapilian kag indi na niya sarang mabaylohan. Kon iya ini himuon, ang duha ka hayop mangin-iya sang Ginoo kag indi na sarang magawad.

34 Amo ini ang mga sugo nga ginhatag sang Ginoo kay Moises sa bukid sang Sinai para sa mga tawo sang Israel.

LEVITICO - Kapitulo 26 <<<   >>> NUMEROS - Kapitulo 1

LEVITICO - Kapitulo 26

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

●●●●●

Ang mga Kaayohan sang Pagtuman

(Deut. 7:12-24; 28:1-14)

1 Ang Ginoo nagsiling, “Indi kamo maghimo sing mga diosdios ukon magpatindog sing mga estatwa, mga haligi nga bato, ukon mga bato nga ginkortehan agod simbahon. Ako amo ang Ginoo nga inyo Dios.

2 Sauloga ninyo ang mga piesta sang Ginoo kag tahora ninyo ang akon balaan nga tolda. Ako amo ang Ginoo.

3 "Kon magkabuhi kamo suno sa akon mga kasugoan kag magtuman sang akon mga sugo

4 padalhan ko kamo sing ulan sa nagakaigo nga panahon, agod ang duta magapatubas sing mga kalan-on kag ang mga kahoy magapamunga.

5 Ang inyo patubas manginbugana sa bagay nga magaani pa kamo sing mga uhay samtang panahon na sa pagpamupo sing mga ubas, kag magapadayon kamo sa pagpamupo sing mga ubas samtang panahon na sa pagsab-og sing mga uyas. Indi kamo pagkulangon sang luyag ninyo kaonon, kag magapuyo kamo nga wala sing katalagman sa inyo duta.

6 "Paluntaron ko ang kalinong sa inyo duta, kag sarang kamo makatulog nga wala sing kulbaan bisan sin-o. Panguhaon ko ang tanan nga makatalagam nga mga sapat diri sa duta, kag manginwala na sing inaway didto.

7 Magadaug kamo batok sa inyo mga kaaway;

8 ang lima sa inyo makalutos sang isa ka gatos, kag ang isa ka gatos sarang makalutos sang napulo ka libo.

9 Bendisyonan ko kamo kag hatagan sing madamo nga mga anak; tumanon ko ang akon bahin sa kasugtanan nga akon ginhimo upod sa inyo.

10 Ang inyo patubas manginmadamo sa bagay nga indi ini maubos sa sulod sang isa ka tuig, kag bisan pa ang nabilin sang daan nga patubas inyo ihaboy agod may butangan kamo sang bag-o.

11 Magapuyo ako upod sa inyo sa akon balaan nga Tolda kag indi na gid ako magsikway sa inyo.

12 Ako magaupod sa inyo; ako mangin-inyo Dios, kag kamo mangin-akon mga tawo.

13 Ako, ang Ginoo nga Dios, nagpagwa sa inyo sa Egipto agod mangin-indi na kamo ulipon. Ginguba ko ang gahom nga naghugakom sa inyo kag ginpalakat ko kamo nga tadlong na ang inyo ulo.”

Silot tungod sang Di-pagtuman

(Deut. 28:15-68)

14 Ang Ginoo nagsiling, "Kon indi kamo magtuman sang akon mga sugo, pagasilotan ko kamo.

15 Kon indi kamo magtuman sang akon mga kasugoan kag mga sugo kag lapason ninyo ang kasugtanan nga akon ginhimo upod sa inyo,

16 silotan ko kamo. Mapadala ako sa inyo sing mga kalalat-an—mga balatian nga indi mag-ayo kag mga hilanat nga magabulag sang inyo mga mata kag magapakag-as sa inyo. Magatanom kamo, pero indi ini makabulig sa inyo, kay ang inyo mga kaaway magalutos sa inyo kag magakaon sang inyo gintanom.

17 Manginbatok ako sa inyo, agod malutos kamo, kag ang mga nagadumot sa inyo magagahom sa inyo; pagakugmaton kamo sa bagay nga magadalagan kamo bisan wala sing may nagalagas sa inyo.

18 "Kon sa tapos sini tanan indi pa gihapon kamo magtuman sa akon, dugangan ko ang pagsilot sa inyo sing pito ka pilo.

19 Sumpaon ko ang inyo batinggilan nga pagbugal; manginwala sing ulan, kag ang inyo duta magamala kag manginsubong ini katig-a sang salsalon.

20 Ang tanan ninyo nga pagpangabudlay manginwala sing pulos sa inyo, kay ang inyo duta indi magpatubas sing kalan-on kag ang mga kahoy indi magpamunga.

21 "Kon magpadayon pa gid kamo sa pagsumpong sa akon kag indi magtuman sa akon, dugangan ko liwat sing pito ka pilo ang inyo silot.

22 Magapadala ako sa inyo sing makatalagam nga mga sapat, kag pamatyon nila ang inyo mga anak; laglagon nila ang inyo mga kabakahan, kag diutay lang ang mabilin sa inyo sa bagay nga ang inyo mga dalan manginmamingaw.

23 "Kon sa tapos sini tanan nga mga silot indi pa kamo gihapon magpamati sa akon, kundi magpadayon sa pagsumpong sa akon,

24 dayon manginbatok ako sa inyo kag silotan ko kamo sing pito ka pilo ka bug-at sang sa nahauna.

25 Magapadala ako sang inaway sa inyo sa pagsilot sa inyo tungod sang inyo paglapas sang aton kasugtanan, kag kon magtipon kamo sa inyo mga siyudad agod indi kamo maano, magapadala ako sa inyo sing mga balatian nga indi mag-ayo, kag mapilitan kamo sa pag-ampo sa inyo mga kaaway.

26 Indi ko kamo paghatagan sing kalan-on, agod nga ang napulo ka babayi magakinahanglan lamang sang isa ka lulutoan sang tanan nga tinapay nga yara sa ila; ila ini ipanagtag, kag kon makaon na ninyo ini tanan, gutom man kamo gihapon.

27 "Kon sa tapos sini tanan magapadayon gihapon kamo sa pagsumpong sa akon kag indi magtuman sa akon,

28 dayon sa akon kaakig manginbatok ako sa inyo kag sa liwat silotan ko kamo sing pito ka pilo ka bug-at sang sa nahauna.

29 Ang inyo kagutom tama gid sa bagay nga kaonon ninyo ang inyo kaugalingon nga mga anak.

30 Gub-on ko ang mga duog nga inyo ginasimbahan sa mga bakolod, gub-on ko ang inyo mga altar nga ginasunogan sang insyenso, kag ihaboy ko ang inyo mga bangkay sa ibabaw sang inyo napukan nga mga diosdios. Sa akon bug-os nga kaakig,

31 gub-on ko ang inyo mga siyudad, laglagon ko ang mga duog nga inyo ginasimbahan, kag indi ko pagbatonon ang inyo mga halad.

32 Laglagon ko sing bug-os ang inyo duta sa bagay nga ang mga kaaway nga magaagaw makibot sang kalaglagan sini.

33 Magadala ako sing inaway sa inyo kag paalaplaagon ko kamo sa iban nga mga pungsod. Ang inyo duta manginmamingaw, kag ang inyo mga siyudad magapabilin nga nalaglag.

34-35 Dayon ang duta makaangkon sang bug-os nga kapahuwayan nga wala ninyo ginhatag sa sini; magapabilin ini nga pinatumbayaan kag makapahuway ini samtang yara kamo sa kabihagan sa duta sang inyo mga kaaway.

36 "Pakugmaton ko gid kamo nga yara sa kabihagan sa bagay nga sa huni lamang sang dahon nga ginahuyop sang hangin magapalagyo na kamo. Magadalagan kamo pareho sang daw ginalagas kamo sa inaway kag mapukan kamo bisan nga wala sing kaaway nga malapit sa inyo.

37 Magakadusmo kamo sa isa kag isa, bisan nga wala sing may nagalagas sa inyo kag indi kamo makasarang sa pagpakig-away sa bisan sin-o nga kaaway.

38 Magakalamatay kamo sa kabihagan, kag halunhonon kamo sang duta sang inyo mga kaaway.

39 Ang pila ka bilog sa inyo nga mabilin sa duta sang inyo mga kaaway magakag-as, tungod sang inyo kaugalingon nga sala kag sang sala sang inyo mga katigulangan.

40 “Pero ang inyo mga kaliwat magakilala sang ila mga sala kag sang mga sala sang ila mga katigulangan, nga nagsumpong kag nagrebelde batok sa akon,

41 nga nanginkabangdanan sang akon pagsumpong sa ila kag ginpadala ko sila sa kabihagan sa duta sang ila mga kaaway. Sa ulihi, kon ang inyo mga kaliwat magpaubos kag mabayaran nila ang silot tungod sang ila sala kag pagrebelde,

42 dumdomon ko ang akon kasugtanan kay Jacob kag kay Isaac kag kay Abraham, kag bag-ohon ko ang akon saad sa paghatag sa akon mga tawo sang duta.

43 Pero sa wala pa ini, kinahanglan nga makuha sa duta ang mga pumoluyo, agod nga makapahuway sing bug-os ang duta, kag kinahanglan bayaran nila sing bug-os ang silot tungod sang ila paglapas sang akon mga kasugtanan kag mga sugo.

44 Pero bisan yara pa sila sa duta sang ila mga kaaway indi ko sila pagpatumbayaan sing bug-os ukon laglagon sila, kay magatapos ini sang akon kasugtanan sa ila, kag ako amo ang Ginoo nga ila Dios.

45 Bag-ohon ko ang akon kasugtanan nga akon ginhimo sa ila mga katigulangan sang ginpakita ko ang akon gahom sa tanan nga mga kapungsoran paagi sa akon pagpagwa sang akon mga tawo sa Egipto, agod nga ako, ang Ginoo, mangin-ila Dios.”

46 Ini tanan amo ang kasugoan kag mga sugo nga ginhatag sang GINOO kay Moises sa bukid sang Sinai para sa mga tawo sang Israel.

LEVITICO - Kapitulo 25 <<<   >>> LEVITICO - Kapitulo 27

LEVITICO - Kapitulo 25

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

●●●●●

Ang Ikapito nga Tuig

1 Ang GINOO naghambal kay Moises sa bukid sang Sinai kag nagsugo sa iya

2 sa paghatag sang masunod nga mga pagsulondan sa mga tawo sang Israel. Kon makasulod kamo sa duta nga ginahatag sang Ginoo sa inyo, pahuwayan ninyo ang duta sa tagsa ka ikapito nga tuig sa pagpadungog sa Ginoo.

3 Magtanom kamo sa inyo mga uma, magkapon sa inyo mga ubas, kag mag-ani sang mga patubas sa sulod sang anom ka tuig.

4 Pero sa ikapito nga tuig amo ang isa ka tuig sang bug-os nga pagpahuway para sa duta, isa ka tuig nga ginhalad sa Ginoo. Indi pagtamni ang inyo mga uma ukon magkapon sang inyo mga ubas.

5 Indi ninyo pag-anihon ang mga uhay nga nagatubo sa iya lang kaugalingon nga wala ninyo gintanom, ukon magpamupo sang mga bunga sang ubas nga wala ninyo makapon; isa ini ka tuig sang bug-os nga pagpahuway para sa duta.

6 Sa sina nga tuig ang duta nga wala matamni magahatag sing kalan-on para sa inyo, sa mga ulipon, sa inyo mga sinuholan nga mga tawo, sa mga dumoluong nga nagapuyo upod sa inyo,

7 sa inyo mga hayop, kag sa mga sapat nga talonon nga yara sa inyo mga uma. Ang tagsa ka butang nga mapatubas sang duta nga wala matamni sarang makaon.

Ang Tuig sang Pag-uli

8 Mag-isip kamo sing pito ka ikapito nga tuig, nga ang kabug-osan 49 ka tuig.

9 Dayon, sa ikanapulo nga adlaw sang ikapito nga bulan, ang Adlaw sang Pagtubos, magpadala kamo sing isa ka tawo sa pagpatunog sang trumpeta sa bug-os nga duta.

10 Sa sini nga paagi painon ninyo ang ika-50 nga tuig kag ibantala ninyo ang kahilwayan sa tanan nga pumoluyo sang duta. Sa sini nga tuig ang tanan nga pagkabutang nga ginbaligya pagaiuli sa nahauna nga tag-iya ukon sa iya mga kaliwat, kag ang bisan sin-o nga ginbaligya subong isa ka ulipon magabalik sa iya panimalay.

11 Indi ninyo pagtamni ang inyo mga uma ukon mag-ani sang uhay nga nagtubo sa iya lang kaugalingon ukon magpamupo sang mga bunga sa inyo wala makapon nga mga ubas.

12 Ang bug-os nga tuig manginbalaan para sa inyo; magakaon kamo sang patubas lamang sang mga kaumhan nga wala ninyo gintanom.

13 Sa sini nga tuig ang tanan nga pagkabutang nga ginbaligya pagaiuli sa nahauna nga tag-iya.

14 Gani kon magbaligya kamo sing duta sa inyo kapareho nga Israelinhon ukon magbakal kamo sing duta sa iya, indi kamo magdinayaay.

15 Ang bili sang pagkabutang ipaigo ninyo suno sa kadamuon sang tinuig nga ang duta makapatubas sa wala pa ang madason nga Tuig sang Pag-uli.

16 Kon may madamo pa nga mga tinuig, ang bili sang duta mahal, pero kon pila na lamang ka tuig, ang bili barato, kay ang ginabaligya amo lamang ang kadamuon sang mapatubas sang amo nga duta.

17 Indi kamo maglimbong sa inyo kapareho nga Israelinhon, kundi magkahadlok kamo sa GINOO nga inyo Dios.

Palaligban sang Ikapito nga Tuig

18 Tumana ninyo ang tanan nga mga kasugoan kag mga sugo sang Ginoo, agod magpuyo kamo nga wala sing katalagman sa duta.

19 Ang duta magapatubas, kag indi kamo mawad-an sang tanan nga luyag ninyo kaonon kag magapuyo kamo nga wala sing katalagman.

20 Pero ayhan may magapamangkot kon ano ang aton nga kaonon sa ikapito nga tuig, nga wala man sing uma nga gintamnan kag wala sing patubas nga gin-ani.

21 Ang Ginoo magabendisyon sang duta sa ikaanom nga tuig agod magapatubas ini sing tuman nga kalan-on para sa duha ka tuig.

22 Kon magtanom kamo sing kaumhan sa ikawalo nga tuig, ang inyo pagakaonon amo ang inyo patubas sa ikaanom nga tuig, kag indi kamo pagkulangon sang inyo mga kalan-on tubtob sa pag-ani sang patubas sang inyo gintanom sina nga tuig.

Ang Pag-uli sang Pagkabutang

23 Ang inyo duta indi dapat ibaligya sing dayon, indi kamo ang tag-iya sini, iya ini sang Dios, kag kaangay kamo sang mga dumoluong nga ginatugotan sa paggamit sini.

24 Kon ang duta nabaligya, kinahanglan pagakilalahon ang kinamatarong sang nahauna nga tag-iya sa pagbakal sini liwat.

25 Kon ang isa ka Israelinhon mag-imol kag mapilitan sia sa pagbaligya sang iya duta, ang iya pinakamalapit nga himata amo ang dapat magawad sini.

26 Ang isa ka tawo nga wala sing himata nga makagawad sini, ayhan magauswag sa ulihi, kag sarang na niya ini magawad para sa iya kaugalingon.

27 Sa sina nga kahimtangan, kinahanglan bayaran niya ang tawo nga nagbakal sini sang bili nga nagakaigo sa nabilin nga mga tinuig tubtob sa madason nga Tuig sang Pag-uli; dayon mabawi niya ang iya duta.

28 Pero kon kulang ang iya kwarta sa paggawad sang duta, magapabilin ini sa kamot sang tawo nga nagbakal sini tubtob sa madason nga Tuig sang Pag-uli. Sa sina nga tuig iuli ini sa nahauna nga tag-iya.

29 Kon ang isa ka tawo magbaligya sing isa ka balay sa sulod sang siyudad nga nalibutan sing pader, may kinamatarong sia sa paggawad sini sa sulod sang isa ka tuig sugod sa adlaw nga ginbaligya ini.

30 Pero kon indi niya magawad ini sa sulod sang isa ka tuig, wala na sia sing kinamatarong sa pagbakal sini liwat, kag ang balay manginpagkabutang nga permanente sang nagbakal kag sang iya mga kaliwat; indi ini pag-iuli sa Tuig sang Pag-uli.

31 Pero ang mga balay sa mga baryo nga wala sing pader pagakabigon kaangay sang mga kaumhan; ang nahauna nga tag-iya may kinamatarong sa paggawad sini, kag kinahanglan iuli ini sa Tuig sang Pag-uli.

32 Pero ang mga Levita may kinamatarong sa paggawad sang ila pagkabutang sa bisan ano nga panahon sa siyudad sang mga Levita.

33 Kon ang isa ka balay sa sulod sang siyudad nga nalibutan sang pader ginbaligya sang isa ka Levita kag wala maggawad, kinahanglan iuli ini sa Tuig sang Pag-uli, tungod kay ang mga balay sang mga Levita sa mga siyudad yara sa ila permanente nga pagkabutang sa tunga sang mga tawo sang Israel.

34 Pero ang duta nga palahalban sa palibot sang mga siyudad sang mga Levita indi gid pag-ibaligya; ila ini pagkabutang nga wala sing katapusan.

Pagpahulam sa mga Imol

35 Kon ang imo kapareho nga Israelinhon nga nagapuyo malapit sa imo mangin-imol kag ginakulang sa iya pangabuhi, kinahanglan buligan mo sia subong sang imo pagbulig sa isa ka sinuholan nga tawo, agod makapadayon sia sa pagpuyo malapit sa imo.

"Buligan mo sia." (25:35)

36 Indi mo sia pagsukton sang saka, kundi magkahadlok ka sa Dios kag buligi ang imo kapareho nga Israelinhon sa pagpuyo malapit sa imo.

37 Indi sia pagpahulama sing kwarta nga may saka kag indi ka maganansya sa imo pagbaligya sa iya sing kalan-on.

38 Amo ini ang sugo sang Ginoo nga inyo Dios, nga nagpagwa sa inyo sa Egipto agod ihatag sa inyo ang duta sang Canaan kag sia mangin-inyo Dios.

Ang Paghilway sang mga Ulipon

39 Kon ang imo kapareho nga Israelinhon nga nagapuyo malapit sa imo imol na gid kaayo, sa bagay nga ginabaligya niya ang iya kaugalingon sa imo subong isa ka ulipon, indi mo sia pagpaobrahon sang obra sang isa ka ulipon.

40 Magapabiin sia sa imo subong isa ka sinuholan nga tawo kag magaalagad sa imo tubtob sa madason nga Tuig sang Pag-uli.

41 Sa sina nga tion, sia kag ang iya mga anak magahalin sa imo kag magabalik sa iya panimalay kag sa pagkabutang sang iya mga katigulangan.

42 Ang mga tawo sang Israel mga ulipon sang Ginoo, kag ginpagwa niya sila sa Egipto; indi dapat sila ibaligya subong mga ulipon.

43 Indi mo sila pagpintasan, kundi magkahadlok ka sa imo Dios.

44 Kon nagakinahanglan ka sing mga ulipon, makabakal ka sa ila sa mga pungsod sa imo palibot.

45 Sarang ka man makabakal sang mga anak sang mga dumoluong nga nagapuyo sa palibot mo. Ina nga mga kabataan nga natawo sa imo duta mahimo nga mangin-imo pagkabutang,

46 kag sarang mo sila mabilin subong panublion sang imo mga anak nga lalaki, nga dapat nila alagaron tubtob nagakabuhi sila. Pero indi mo gid pagpintasan ang bisan sin-o sang imo kapareho nga Israelinhon.

47 Abi kon ang isa ka dumoluong ukon sinuholan nga tawo nga nagapuyo upod sa imo magmanggaranon, samtang ang isa ka kapareho mo nga Israelinhon mangin-imol kag ibaligya niya ang iya kaugalingon subong isa ka ulipon sa sina nga dumoluong ukon sinuholan nga tawo.

48 Sa tapos sia mabaligya, may kinamatarong sia sa gihapon agod gawaron. Ang isa sang iya utod nga lalaki

49 ukon ang iya tiyo ukon ang iya pakaisa ukon ang isa sang iya malapit nga himata sarang makagawad sa iya; ukon sia mismo, kon may kwarta na sia nga natipon, sarang makagawad sang iya kaugalingon nga kahilwayan.

50 Kinahanglan hambalon niya ang nagbakal sa iya, kag isipon nila ang mga tinuig halin sang pagbaligya niya sang iya kaugalingon tubtob sa madmon nga Tuig sang Pag-uli, kag ipaigo ang bili sang paghilway sa iya suno sa suweldo nga ginabayad sa isa ka sinuholan nga tawo.

51-52 Kinahanglan bayaran niya ang bahin sang bili sang pagbakal sa iya suno sa tinuig nga nabilin,

53 subong nga daw ginasuholan sia sa kada tuig. Indi sia dapat pagpintasan sang iya agalon.

54 Kon indi sia mahilway sa bisan diin sini nga paagi, sia kag ang iya mga anak kinahanglan hilwayon sa madason nga Tuig sang Pag-uli.

55 Ang bisan sin-o nga Israelinhon indi mahimo nga mangin-ulipon sing dayon, kay ang mga tawo sang Israel mga ulipon sang Ginoo; ginpagwa niya sila sa Egipto, kag sia ang GINOO nga ila Dios.

LEVITICO - Kapitulo 24 <<<   >>> LEVITICO - Kapitulo 26

LEVITICO - Kapitulo 24

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

●●●●●

Ang Pagtatap sang mga Suga

(Ex. 27:20-21)

1 Ginsingganan sang Ginoo si Moises

2 sa pagsugo sang mga tawo sang Israel sa pagdala sang puraw nga lana sang olivo nga labing maayo nga sahi para sa mga suga sa Tolda nga Tilipunan, agod ang suga magpadayon sa pagsiga.

3 Sa tagsa ka gab-i, sindihan ini ni Aaron kag pasigahon tubtob mag-aga, didto sa atubangan sang Ginoo sa gwa sang kurtina sa atubangan sang Kaban sang Kasugtanan, nga amo ang Labing Balaan nga Duog. Ini nga pagsulondan pagatumanon sa tanan nga panahon nga palaabuton.

4 Si Aaron magatatap sang mga suga nga yara sa kandelerohan nga puraw nga bulawan kag pat-uron gid nga nagapadayon ang pagsiga sini sa atubangan sang Ginoo.

Ang Tinapay nga Nahalad sa Dios

5 Magkuha kamo sing 24 ka libra nga arina kag magluto kamo sing 12 ka bilog nga tinapay.

6 Ipahamtang ang mga binilog sang tinapay sa duha ka idas, tig-anom sa tagsa ka idas, sa ibabaw sang lamisa nga nahaklapan sing puraw nga bulawan nga yara sa atubangan sang GINOO.

7 Butangi sing puraw nga insyenso ang tagsa ka idas, subong nga handumanan sang halad nga kalan-on sa Ginoo paagi sa kalayo sa pagkuha sang lugar sang tinapay.

8 Kinahanglan ipahamtang ang tinapay sa atubangan sang GINOO sa tagsa ka Adlaw nga Inugpahuway para sa tanan nga panahon nga palaabuton. Amo ini ang walay katapusan nga katungdanan sang Israel.

9 Ang tinapay iya ni Aaron kag sang iya mga kaliwat, kag pagakaonon nila ini sa isa ka balaan nga duog, kay tama ini ka balaan nga bahin sang halad nga kalan-on sa Ginoo nga paagi sa kalayo para sa mga pari.

Isa ka Halimbawa sang Matarong kag Husto nga Pagsilot

10-11 May isa ka tawo nga ang iya amay isa ka Egiptohanon kag ang iya iloy isa ka Israelinhon. Ang ngalan sang iya iloy amo si Selomit, ang anak nga babayi ni Dibri halin sa tribo ni Dan. Ini nga tawo nagsulod sa kampamento kag nagpakig-away sa isa ka Israelinhon. Samtang nagaaway sila, ginpakamalaut sang amo nga tawo ang Dios, gani gindala nila sia sa kay Moises.

12 Ini nga tawo gintugyan ni Moises sa isa ka gwardya kag naghulat sang sugo sang Ginoo kon ano ang pagahimuon sa iya.

13 Ang Ginoo nagsiling kay Moises,

14 "Dalha ina nga tawo sa gwa sang kampamento. Ang tagsatagsa nga nakabati sa iya nga nagapakamalaut magbutang sang ila kamot sa ulo sang tawo sa pagpamatuod nga nakasala sia, kag dayon batohon sia sang bug-os nga katilingban tubtob mapatay sia.

15 Dayon singgana ang mga tawo sang Israel nga ang bisan sin-o nga magpakamalaut sa Dios dapat mag-antos sang silot

16 kag pagapatyon. Ang bisan sin-o nga Israelinhon ukon dumoluong nga nagapuyo sa Israel nga magpakamalaut sa Ginoo pagabatohon sang bug-os nga katilingban tubtob mapatay.

17 “Ang bisan sin-o nga nakapatay sing tawo pagapatyon,

18 kag ang bisan sin-o nga nakapatay sing isa ka sapat nga iya sang iban nga tawo dapat mag-ilis sini. Ang kasugoan amo nga ang kabuhi pagabayaran sing kabuhi.

19 "Ang bisan sin-o nga makasakit sang isa ka tawo, ang bisan ano nga iya nahimo pagahimuon man sa iya.

20 Kon nakabali sia sing tul-an pagabalion man ang isa sang iya mga tul-an; kon nakalukat sia sang isa ka mata, pagalukaton man ang isa niya ka mata; kon nakabingaw sia sang isa ka ngipon, pagabingawon man ang isa niya ka ngipon. Kon ano nga halit ang iya nahatag sa iban nga tawo, amo man ang ibalos sa iya.

21 Ang bisan sin-o nga makapatay sing sapat, magailis sini, pero ang bisan sin-o nga makapatay sing tawo pagapatyon man.

22 Ini nga kasugoan para gid sa inyo tanan, sa mga Israelinhon kag sa mga dumoluong nga nagapuyo sa tunga ninyo, kay ako amo ang Ginoo nga inyo Dios."

23 Gani naghambal si Moises sa mga tawo sang Israel, kag gindala nila ang tawo sa gwa sang kampamento kag ginbato sia tubtob mapatay. Sa sini nga paagi ang mga tawo sang Israel nagtuman sang ginmando sang Ginoo kay Moises.

LEVITICO - Kapitulo 23 <<<   >>> LEVITICO - Kapitulo 25

LEVITICO - Kapitulo 23

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

●●●●●

Ang mga Piesta para sa GINOO

1 Ginhatag sang Ginoo kay Moises

2 ang masunod nga mga pagsulondan para sa mga piesta sang Ginoo, kon ang mga tawo sang Israel magtipon sa pagsimba.

3 May anom kamo ka adlaw sa paghimo sang inyo mga buluhaton, pero dumdoma ninyo nga ang ikapito nga adlaw amo ang Adlaw nga Inugpahuway. Sa sini nga adlaw indi kamo mag-obra, kundi magtipon kamo sa pagsimba. Ang Adlaw nga Inugpahuway iya sang Ginoo, bisan diin kamo nagapuyo.

4 Ibantala ninyo ang masunod nga mga piesta sa natalana nga mga panahon.

Ang Pascua kag ang Tinapay nga Wala sing Lebadora

(Num 28:16-25)

5 Ang Pascua, nga ginasaulog sa pagpadungog sa Ginoo, nagasugod sa pagtunod sa ika-14 nga adlaw sang nahauna nga bulan.

6 Sa ika-15 nga adlaw nagasugod ang Piesta sang Tinapay nga wala sing Lebadora, kag sa sulod sang pito ka adlaw magkaon kamo sang tinapay nga wala sing tapay.

7 Sa nahauna nga adlaw magatipon kamo sa pagsimba kag indi kamo maghimo sang inyo adlaw-adlaw nga mga buluhaton.

8 Magdulot kamo sing halad nga kalan-on paagi sa kalayo sa Ginoo sa sulod sang pito ka adlaw. Sa ikapito nga adlaw magtipon kamo liwat sa pagsimba kag indi kamo maghimo sang inyo adlaw-adlaw nga mga buluhaton.

9-10 Kon mag-abot kamo sa duta nga ginahatag sang Ginoo sa inyo kag mag-ani kamo sang inyo mga patubas, ihatag ninyo ang nahauna nga inupong sa pari.

11 Ihalad niya ini subong isa ka pinasahi nga dulot sa Ginoo, agod nga batonon kamo. Ang pari magahalad sini sa adlaw pagkatapos sang Adlaw nga Inugpahuway.

12 Sa adlaw sang inyo pagdulot sang halad nga kalan-on, magdulot man kamo sing cordero nga wala sing depekto nga nagaedad sing isa ka tuig subong isa ka halad nga sinunog.

13 Lakip sini maghalad kamo sing apat ka libra nga arina nga nasamoan sing lana sang olivo subong isa ka halad nga kalan-on paagi sa kalayo. Ang baho sini nga halad mahamot sa Ginoo. Magdulot man kamo upod sini sing isa ka salmonan nga bino.

14 Indi kamo magkaon sang bag-o nga uhay, bisan hilaw ukon sinanlag, ukon ginhimo nga tinapay, tubtob madala ninyo ang inyo halad sang nahauna nga patubas sa Dios. Ini nga pagsulondan pagatumanon sang tanan mo nga mga kaliwat sa tanan nga panahon nga palaabuton.

Ang Piesta sa Pag-ani

(Num 28:26-31)

15 Mag-isip kamo sing pito ka semana halin sa adlaw sa tapos ang Adlaw nga Inugpahuway sa diin nagdala kamo sing inupong sang mga uhay nga idulot sa Ginoo.

16 Sa ika-50 nga adlaw, sa tapos ang ikapito nga Adlaw nga Inugpahuway magdulot kamo sa Ginoo sing isa ka bag-o nga halad nga kalan-on.

17 Ang tagsa ka panimalay magdala sing duha ka bilog nga tinapay kag idulot ini sa Ginoo subong isa ka pinasahi nga halad. Ang tagsa ka binilog nga tinapay nahimo sa apat ka libra nga arina nga naluto nga may lebadora, kag pagaihalad ini sa Ginoo subong isa ka dulot sang nahauna nga patubas.

18 Kag upod sa tinapay, ang katilingban magdulot sing pito ka cordero nga nagaedad sing isa ka tuig, isa ka toro nga baka, kag duha ka kanding, nga ang kadaisa sini sa ila wala sing bisan ano nga depekto. Idulot ini sila subong isa ka halad nga sinunog sa GINOO, lakip ang isa ka halad nga kalan-on kag isa ka halad nga bino. Ang baho sini nga halad mahamot sa Ginoo.

19 Maghalad man kamo sing isa ka toro nga kanding subong isa ka halad tungod sa sala kag duha ka cordero nga nagaedad sing isa ka tuig subong isa ka halad sa paghiambit.

20 Ang pari magahalad sang tinapay lakip ang duha ka cordero subong isa ka pinasahi nga dulot sa Ginoo para sa mga pari. Ini nga mga halad balaan.

21 Sa sini nga adlaw wala sing isa sa inyo nga maghimo sang iya adlaw-adlaw nga hilikuton, kundi magtipon kamo sa pagsimba. Ang inyo mga kaliwat kinahanglan magtuman sini nga pagsulondan sa tanan nga panahon nga palaabuton, bisan diin sila nagapuyo.

22 Kon mag-ani kamo sa inyo mga uma, indi ninyo paggaraba ang mga uhay sa higad sang mga uma kag indi kamo magbalik sa pagsaghaw sang nablin nga mga uhay. Ibiiin ini sa imol nga mga tawo kag sa mga dumoluong. Ang GINOO amo ang inyo Dios.

Ang Piesta sang Bag-o nga Tuig

(Num 29:1-6)

23-24 Sa nahauna nga adlaw sang ikapito nga bulan, sauloga ninyo ang isa ka pinasahi nga adlaw sang pagpahuway, kag magtipon kamo sing tingob sa pagsimba kon magtunog ang mga trumpeta.

25 Indi kamo maghimo sang adlaw-adlaw ninyo nga hilikuton kag magdulot kamo sa GINOO sing isa ka halad nga kalan-on paagi sa kalayo.

Ang Adlaw sang Pagtubos

(Num 29:7-11)

26-27 Ang ikanapulo nga adlaw sang ikapito nga bulan amo ang adlaw nga pagasaulogon ang tuigtuig nga tulumanon sa pagkuha sang mga sala sang mga tawo. Sa amo nga adlaw indi gid kamo magkaon sang bisan ano; magtipon kamo sing tingob sa pagsimba, kag magdulot kamo sa GINOO sing halad nga kalan-on paagi sa kalayo.

28 Indi kamo mag-obra sa sini nga adlaw, kay amo ini ang adlaw sa paghimo sang tulumanon sa pagkuha sang sala.

29 Ang bisan sin-o nga magkaon sang bisan ano sa sini nga adlaw indi na pagkabigon nga isa sing mga tawo sang Dios.

30 Kag ang bisan sin-o nga maghimo sang bisan ano nga obra sa sini nga adlaw, ang Ginoo gid amo ang magapapatay sa iya.

31 Ini nga pagsulondan para sa tanan ninyo nga mga kaliwat, bisan diin sila nagapuyo.

32 Halin sa pagtunod sang adlaw sa ikasiam nga adlaw sang bulan tubtob sa pagtunod sang adlaw sa ikanapulo, saulogon ninyo ini nga adlaw sa pagpahuway kag indi gid kamo magkaon bisan ano sa sini nga panahon.

Ang Piesta sang mga Tolda

(Num 29:12-40)

33-34 Ang Piesta sang mga tolda nagasugod sa ika-15 nga adlaw sang ikapito nga bulan kag nagapadayon ini sa sulod sang pito ka adlaw.

35 Sa nahauna nga adlaw magtipon kamo sing tingob sa pagsimba kag indi kamo maghimo sang inyo adlaw-adlaw nga hilikuton.

36 Sa sulod sang pito ka adlaw magdulot kamo sing halad nga kalan-on paagi sa kalayo kada adlaw. Sa ikawalo nga adlaw magtipon kamo liwat sing tingob sa pagsimba kag magdulot sing halad nga kalan-on paagi sa kalayo. Isa ini ka adlaw sa pagsimba kag indi kamo maghimo sang bisan ano nga obra.

37 (Ini nga mga piesta para sa Ginoo sa diin ginapadunggan ninyo ang Ginoo paagi sa pagtipon sing tingob sa pagsimba kag pagdulot sing mga halad nga kalan-on paagi sa kalayo, mga halad nga sinunog, mga halad nga kalan-on, mga halad, kag mga halad nga bino, suno sa ginakinahanglan adlaw-adlaw.

38 Wala labot sini nga mga piesta may yara na nga mga kinaandan nga Inugpahuway, kag wala labot sini nga mga halad yara na ang inyo kinaandan nga mga halad, ang inyo mga halad sa pagtuman sang mga saad kag ang inyo mga halad nga kinabubot-on nga ginahatag sa GINOO.)

39 Sa ika-15 nga adlaw sang ikapito nga bulan, kon naani na ninyo ang inyo mga uma, sauloga ninyo ini nga piesta sa sulod sang pito ka adlaw. Ang nahauna nga adlaw amo ang isa ka pinasahi nga adlaw sang pagpahuway.

40 Sa sini nga adlaw magkuha kamo sang labing maayo nga mga bunga sang inyo mga kakahoyan, magkuha kamo sang mga paklang sang mga palma kag mga sanga sang madabong nga mga kahoy, kag sauloga ninyo ang piesta para sa Ginoo sa pagpadungog sa Ginoo nga inyo Dios.

41 Sauloga ninyo ini sa sulod sang pito ka adlaw. Ini nga pagsulondan kinahanglan tumanon sang inyo mga kaliwat sa tanan nga panahon nga palaabuton.

42 Ang tanan nga mga tawo sang Israel magapuyo sa mga tolda sa sulod sang pito ka adlaw,

43 agod ang inyo mga kaliwat makahibalo nga ang GINOO nagpapuyo sang mga tawo sang Israel sa mga tolda sang pagpagwa niya sa ila sa Egipto. Sia amo ang Ginoo nga inyo Dios.

44 Gani sa sini nga paagi ginhatag ni Moises sa mga tawo sang Israel ang mga pagsulondan sa pagsaulog sang mga piesta para sa Ginoo sa pagpadungog sa Ginoo.

LEVITICO - Kapitulo 22 <<<   >>> LEVITICO - Kapitulo 24

LEVITICO - Kapitulo 22

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

●●●●●

Ang Pagkabalaan sang mga Halad

1 Ang Ginoo nagsugo kay Moises

2 nga singganon si Aaron kag ang iya mga anak nga lalaki, "Tahora ninyo ang balaan nga mga halad nga gindulot sa akon sang mga tawo sang Israel, agod indi mahuy-an ang akon balaan nga ngalan. Ako amo ang GINOO.

3 Kon ang bisan sin-o sang inyo mga kaliwat, samtang di-matinlo pa sia, magpalapit sa balaan nga mga halad nga gindulot sa akon sang mga tawo sang Israel, indi na gid sia makaalagad sa akon altar. Pagatumanon ini sa tanan nga panahon nga palaabuton. Ako amo ang Ginoo.

4 "Wala sing kaliwat ni Aaron nga may makalalaton nga balatian sa panit ukon ginapanggwaan, nga sarang makakaon sang bisan ano sang balaan nga mga halad tubtob nga magmatinlo sia. Ang bisan sin-o nga pari nga makatandog sang bisan ano nga butang nga di-matinlo paagi sa pagtandog sang bangkay sang tawo ukon sang tawo nga ginpanggwaan sang iya binhi

5 ukon makatandog sang isa ka di-matinlo nga sapat ukon isa ka tawo nga di-matinlo mangindi-matinlo sia.

6 Ang bisan sin-o nga pari nga nangindi-matinlo magapabilin nga di-matinlo tubtob sa gab-i, kag wala sapayan sini, indi sia sarang makakaon sang bisan ano nga balaan nga mga halad tubtob makapaligo sia.

7 Sa tapos matunod ang adlaw matinlo na sia, kag sarang na sia makakaon sang balaan nga mga halad, nga amo ang iya kalan-on.

8 Indi sia magkaon sang karne sang bisan ano nga sapat nga napatay ukon ginpatay sang mapintas nga mga sapat, kay magadagta ini sa iya. Ako amo ang Ginoo.

9 “Ang tanan nga mga pari magatuman sang mga pagsulondan nga akon ginhatag. Kon indi sila magtuman magamalinapason sila kag magakalamatay, kay ginlapas nila ang balaan nga mga pagsulondan. Ako amo ang Ginoo kag ginapakabalaan ko sila.

10 "Ang katapo lamang sang panimalay sang pari amo ang sarang makakaon sang bisan ano nga balaan nga mga dulot; kag wala na sing iban nga sarang makakaon sa sini, bisan gani ang isa nga nagadayon sa balay sang pari ukon ang iya sinuholan.

11 Pero ang isa ka ulipon sang pari, nga iya ginbakal sang iya kaugalingon nga kuwarta ukon natawo sa iya balay, sarang makakaon sang kalan-on nga ginabaton sang pari.

12 Ang anak nga babayi sang pari nga makapamana sang indi pari indi sarang makakaon sang bisan ano sa balaan nga mga halad.

13 Pero ang isa ka anak nga babayi nga nabalo ukon ginbulagan, nga wala sing mga anak, kag nagpauli sa pagpuyo sa balay sang iya amay subong isa ka salaguron, sarang makakaon sang kalan-on nga ginabaton sang iya amay subong isa ka pari. Ang katapo lamang sang panimalay sang pari ang sarang makakaon sang bisan ano nga bahin sini.

14 "Kon ang bisan sin-o nga indi katapo sang panimalay sang pari nga makakaon sang bisan ano nga bahin sang balaan nga dulot sa indi hungod, kinahanglan magbayad sia sa pari sang bug-os nga bili sini kag magadugang sing 20 ka porsiyento.

15 Indi pagpasipakpakan sang mga pari ang balaan nga mga halad

16 paagi sa pagpakaon sini sa tawo nga indi takos, kay tungod sini magalapas kag pagasilotan ang amo nga tawo. Ako amo ang Ginoo kag ginapakabalaan ko ang mga halad.”

17 Ginsugo sang Ginoo si Moises

18 sa paghatag kay Aaron kag sa iya mga anak nga lalaki kag sa tanan nga mga tawo sang Israel sang masunod nga mga pagsulondan. Kon ang bisan sin-o nga Israelinhon ukon dumoluong nga nagapuyo sa Israel magdulot sang isa ka halad nga sinunog, bisan ini isa ka pagtuman sang saad ukon isa ka halad nga kinabubot-on, ang sapat kinahanglan wala sing depekto.

19 Agod nga mabaton ini kinahanglan isa ini ka lalaki nga wala sing depekto.

20 Kon maghalad kamo sang bisan ano nga sapat nga may depekto, ang Ginoo indi magbaton sini.

21 Kon ang bisan sin-o magdulot sa Ginoo sang halad sa paghiambit, bisan ini isa ka pagtuman sang saad ukon isa ka halad nga kinabubot-on, ang sapat kinahanglan wala sing depekto agod batonon ini.

22 Indi kamo maghalad sa Ginoo sang bisan ano nga sapat nga bulag, ukon piang, ukon madamo sang pilas, ukon may nagabuswang nga hubag, ukon katulon ukon arikison. Indi kamo mag-dulot sini nga sahi sang mga sapat sa altar subong isa ka halad nga kalan-on paagi sa kalayo.

23 Sarang kamo makadulot subong isa ka halad nga kinabubot-on sing isa ka sapat nga wala magdaku ukon kiwi, pero indi ini mabaton subong isa ka pagtuman sang saad.

24 Indi kamo maghalad sa Ginoo sang bisan ano nga sapat nga napus-an sing itlog, napilas, nabagrasan ukon nautod. Indi ini tugot sa inyo duta.

25 Indi kamo magdulot subong isa ka halad nga kalan-on paagi sa kalayo sang bisan ano nga sapat nga inyo nakuha sa isa ka dumoluong. Ini nga sahi sang mga sapat ginakabig nga may depekto kag indi sarang mabaton.

26-27 Kon matawo ang isa ka tinday nga baka, cordero, ukon kanding, indi ini pagkuhaon sa iya inang sa sulod sang pito ka adlaw, pero sa tapos sini, sarang na ini mabaton subong isa ka halad nga kalan-on paagi sa kalayo.

28 Indi kamo maghalad sang isa ka inang nga baka upod sa iya tinday ukon isa ka obeha upod sa iya cordero ukon isa ka inang nga kanding upod sa iya tinday sa amo man nga adlaw.

29 Kon magdulot kamo sang isa ka halad sa pagpasalamat sa Ginoo, tumana ninyo ang mga pagsulondan agod batonon kamo;

30 kaona ninyo ini sa amo gid nga adlaw kag indi kamo magbilin sang bahin sini tubtob sa madason nga aga.

31 Ang Ginoo nagsiling, "Tumana ninyo ang akon mga sugo; Ako amo ang Ginoo.

32 Indi ninyo pagpakahuy-i ang akon balaan nga ngalan; ang tanan nga mga tawo sang Israel kinahanglan magkilala nga ako balaan. Ako amo ang Ginoo kag ako nagapakabalaan sa inyo;

33 kag gindala ko kamo pa gwa sa Egipto agod ako mangin-inyo Dios. Ako amo ang Ginoo."

LEVITICO - Kapitulo 21 <<<   >>> LEVITICO - Kapitulo 23

LEVITICO - Kapitulo 21

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

●●●●●

Ang Pagkabalaan sang mga Pari

1 Ginsugo sang Ginoo si Moises nga singganon niya ang mga pari nga kaliwat ni Aaron, "Wala sing pari nga magdagta sang iya kaugalingon paagi sa pagpakigbahin sa lubong kon ang isa sang iya mga paryente mapatay,

2 luwas kon iya ini iloy, amay, anak nga lalaki, anak nga babayi, utod nga lalaki,

3 ukon utod nga babayi nga wala sing bana kag nagapuyo pa sa iya balay.

4 Indi niya pagdagtaan ang iya kaugalingon tungod sang kamatayon sang iya utod nga babayi nga may bana.

5 "Wala sing pari nga magkiskis sang bisan diin nga bahin sang iya ulo ukon magkorte sang iya bungot, ukon magpilas sang iya lawas sa pagpakita sang iya pagpangasubo.

6 Dapat sia manginbalaan kag indi niya pagpakahuy-an ang akon ngalan. Magdulot sia sa akon sing halad nga kalan-on paagi sa kalayo, kag kinahanglan manginbalaan sia.

7 Ang pari indi magpangasawa sang isa ka babayi nga sang una anay nagabaligya sang iya dungog ukon isa ka babayi nga indi na ulay ukon isa ka babayi nga ginbulagan, kay ang pari balaan.

8 Kinahanglan kabigon sang mga tawo nga ang pari balaan, kay nagadulot sia sa akon sing kalan-on paagi sa kalayo. Ako amo ang Ginoo; Ako balaan kag ginapakabalaan ko ang akon mga tawo.

9 Kon ang isa ka anak nga babayi sang pari manginbabayi nga nagabaligya sang iya dungog, ginpakahuy-an niya ang iya amay; sunogon sia tubtob mapatay.

10 "Ang Pinakamataas nga Pari, nga ginhaplasan sang lana ang iya ulo kag ginhalad sa pagsuksok sang mga bayo sang pari, indi magtugot nga maggumon ang iya buhok ukon magisi ang iya mga bayo sa pagpakita sang iya pagpangasubo.

11-12 Ginhalad sia sa akon kag kinahanglan indi niya pagdagtaan ang iya kaugalingon ukon dagtaan niya ang akon balaan nga Tolda paagi sa pagbiya sini kag pagsulod sa isa ka balay nga may isa ka bangkay, bisan pa nga bangkay ini sang iya kaugalingon nga amay ukon iloy.

13 Magapangasawa sia sing ulay,

14 kag indi isa ka balo, isa ka babayi nga ginbulagan, ukon isa ka babayi nga sang una anay nagabaligya sang iya dungog. Ang iya lamang pangasaw-on amo ang isa ka ulay nga babayi halin sa iya kaugalingon nga kabaranggayan.

15 Kay kon indi, ang iya mga kabataan, nga kinahanglan manginbalaan, mangindi-matinlo. Ako amo ang Ginoo kag ginpain ko sia subong nga Pinakamataas nga Pari."

16 Ginsugo sang Ginoo si Moises

17 nga singganon si Aaron, "Wala sing isa sang inyo mga kaliwat nga may depekto sa lawas nga magdulot sa akon sing halad nga kalan-on paagi sa kalayo. Ini pagatumanon sa tanan nga panahon nga palaabuton.

18 Wala sing tawo nga may depekto sa lawas nga maghimo sing paghalad: wala sing bulag, lupog, nagkiwi, ukon kompol;

19 wala sing piang ukon pingkaw;

20 wala sing buktot ukon inano; wala sing may balatian sa mata ukon sa panit; kag wala sing kapon.

21 Wala sing kaliwat ni Aaron nga pari nga may depekto sa lawas nga magdulot sa akon sing halad nga kalan-on paagi sa kalayo.

22 Ang amo nga sahi sang tawo sarang makakaon sang kalan-on nga ginhalad sa akon, ang balaan nga kalan-on nga ginhalad paagi sa kalayo kag ang tama ka balaan nga kalan-on nga ginhalad paagi sa kalayo,

23 pero, tungod kay may depekto sia sa lawas, indi sia magpalapit sa balaan nga kurtina ukon magpalapit sa altar. Indi niya dapat pasipakpakan ining balaan nga mga butang, kay ako amo ang Ginoo kag ginapakabalaan ko sila.”

24 Gani, amo ini ang ginsiling ni Moises kay Aaron, sa mga anak nga lalaki ni Aaron kag sa tanan nga mga tawo sang Israel.

LEVITICO - Kapitulo 20 <<<   >>> LEVITICO - Kapitulo 22

LEVITICO - Kapitulo 20

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

●●●●●

Mga Silot tungod sang Pagkadi-matinumanon

1 Ginsugo sang Ginoo si Moises

2 nga singganon ang mga tawo sang Israel, "Ang bisan sin-o sa inyo ukon ang bisan sin-o nga dumoluong nga nagapuyo upod sa inyo nga nagahatag sang bisan sin-o sang iya mga anak nga gamiton sa pagsimba sa dios nga si Moloc pagabatohon sang bug-os nga katilingban tubtob mapatay.

3 Ang bisan sin-o nga magahatag sang isa sang iya mga anak kay Moloc kag magdagta sang akon balaan nga Tolda kag magpakahuya sang akon balaan nga ngalan, ako magasumpong sa iya kag indi ko na sia pagkabigon nga isa sang akon mga tawo.

4 Pero kon ang katilingban wala nagasapak sang iya ginhimo kag wala magpatay sa iya,

5 ako mismo magasumpong sang amo nga tawo sang iya bug-os nga panimalay kag batok sa tanan nga nagabuylog sa iya sa pagkadi-matutom sa akon kag nagasimba kay Moloc. Indi ko na sila pagkabigon nga akon mga tawo.

6 "Kon ang bisan sin-o magpangayo sing laygay sa mga tawo nga nagapakig-angot sa espiritu sang mga patay, ako magasumpong sa iya kag indi ko na sia pagkabigon nga isa sang akon mga tawo.

7 Tipigi ang inyo kaugalingon sa pagkabalaan, kay ako ang GINOO nga inyo Dios.

8 Tumana ninyo ang akon mga kasugoan, kay ako, ang GINOO, nagpakabalaan sa inyo.”

9 Ang GINOO naghatag sang masunod nga mga pagsulondan. Ang bisan sin-o nga nagapakamalaut sang iya amay ukon iya iloy pagapatyon; sia ang may salabton sang iya kamatayon.

10 Kon ang isa ka tawo magpanginbabayi, sia kag ang babayi kinahanglan patyon.

11 Ang tawo nga nagapakighilawas sa isa sang mga asawa sang iya amay nagapakahuya sang iya amay, kag sia kag ang babayi pagapatyon. Sila ang may salabton sang ila kamatayon.

12 Kon ang isa ka tawo nagapakighilawas sa iya umagad nga babayi, sila nga duha pagapatyon. Nagsinapat sila kag sila ang may salabton sang ila kamatayon.

13 Kon ang isa ka lalaki nagapakighilawas sa kapareho niya nga lalaki, nakahimo sila sang makangilil-ad nga butang kag sila nga duha pagapatyon. Sila ang may salabton sang ila kamatayon.

14 Kon ang isa ka tawo magpangasawa sang isa ka babayi kag sang iloy sang babayi, sila nga tatlo pagasunogon tubtob mapatay, tungod sang makahuloya nga butang nga ila ginhimo; ini nga butang indi dapat pabay-an sa tunga ninyo.

15 Kon ang isa ka tawo nagapakighilawas sa isa ka sapat, sia kag ang sapat pagapatyon.

16 Kon ang isa ka babayi magtinguha sa pagpakighilawas sa isa ka sapat sia kag ang sapat pagapatyon. Sila ang may salabton sang ila kamatayon.

17 Kon ang isa ka lalaki magpangasawa sang iya utod nga babayi ukon babayi nga utod niya sa amay ukon utod niya sa iloy, pakahuy-an sila sa atubangan sang mga tawo kag tabugon sa gwa sang katilingban. Nagpakighilawas sia sa iya utod nga babayi kag kinahanglan silotan sia tungod sini.

18 Kon ang isa ka tawo nakapakighilawas sa isa ka babayi nga yara ang iya pamulanon, sila nga duha tabugon sa katilingban, kay ginlapas nila ang inga pagsulondan nahanungod sang tulomanon sa pagkadi-matinlo.

19 Kon ang isa ka tawo nakapakighilawas sa iya tiya, sila nga duha kinahanglan silotan tungod sang ila sinapat nga ginhimo.

20 Kon ang isa ka tawo nakapakighilawas sa asawa sang iya tiyo, ginapakahuy-an niya ang iya tiyo, kag sia kag ang babayi kinahanglan magbayad sang silot; wala sing isa sa ila nga makaangkon sing mga anak.

21 Kon ang isa ka tawo magpangasawa sang asawa sang iya utod, mapatay sila nga wala sing anak. Nakahimo sia sang di-matinlo nga butang kag ginpakahuy-an niya ang iya utod nga lalaki.

22 Ang Ginoo nagsiling, "Tumana ninyo ang tanan ko nga mga kasugoan kag mga sugo, agod nga ang duta sang Canaan, sa diin ko kamo ginadala, indi magsubol sa inyo.

23 Indi ninyo pagsundon ang mga batasan sang mga tawo nga nagapuyo didto; gintabog ko pa gwa yadto nga mga tawo agod makasulod kamo sa amo nga duta. Ginakangil-aran ko ang tanan nga kalautan nga ila ginhimo.

24 Pero ginsaad ko sa inyo ining maayo kag mapatubason nga duta nga mangin-inyo pagkabutang, kag ginahatag ko ini sa inyo. Ako amo ang Ginoo nga inyo Dios kag ginpain ko kamo sa iban nga mga kapungsoran.

25 Gani butangi ninyo sing maathag nga kinatuhay ang mga sapat kag mga pispis nga matinlo kag ang di-matinlo. Indi kamo magkaon sang di-matinlo nga mga sapat ukon mga pispis. Ginpakilala ko nga di-matinlo sila, kag kon magkaon kamo sini mangindi-matinlo kamo.

26 Magmanginbalaan kamo, kag kinahanglan mangin-akon lamang kamo, kay ako amo ang Ginoo kag ako balaan. Ginpain ko kamo sa iban nga mga kapungsoran agod mangin-akon lamang kamo.

27 "Ang bisan sin-o nga lalaki ukon babayi nga nagapakig-angot sa mga espiritu sang patay nga tawo pagabatohon tubtob mapatay; ang bisan sin-o nga tawo nga maghimo sini amo ang may salabton sang iya kamatayon.”

LEVITICO - Kapitulo 19 <<<   >>> LEVITICO - Kapitulo 21

LEVITICO - Kapitulo 19

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

●●●●●

Mga Kasugoan sang Pagkabalaan kag Pagkamatarong

1 Ginsugo sang GINOO si Moises

2 nga singganon ang katilingban sang Israel, “Magpakabalaan kamo, kay ako balaan; ako amo ang GINOO nga inyo Dios.

3 Ang kadaisa sa inyo kinahanglan magtahod sa iya iloy kag sa iya amay, kag magtuman sang adlaw nga inugpahuway, suno sa akon ginsugo. Ako ang GINOO nga inyo Dios.

4 “Indi ninyo ako pagsikwaya kag magsimba sa mga diosdios; indi kamo maghimo kag magsimba sa mga dios nga metal. Ako amo ang GINOO nga inyo Dios.

5 “Kon mag-ihaw kamo sang isa ka sapat para sa mga halad sa paghiambit, tumana ang mga pagsulondan nga akon ginhatag sa inyo, kag batunon ko ang halad.

6 Kinahanglan kaunon ang karne sa adlaw nga gin-ihaw ang sapat ukon sa madason nga adlaw. Ang karne nga mabilin sa ikatlo nga adlaw kinahanglan sunogon,

7 kay di-matinlo ini, kag ang bisan sin-o nga magkaon sini, indi ko pagbatunon ang halad.

8 Ang bisan sin-o nga magkaon sini magapakasala sa iya pagkabig subong di-balaan ang ginhalad sa akon, kag indi na sia pagkabigon nga isa sang akon mga tawo.

9 “Kon mag-ani kamo sa inyo mga uma, indi ninyo pag-uroton sing ani ang mga yara sa higad sang uma, kag indi pagsaghawa ang mga nabilin nga mga uhay.

10 Indi na kamo magbalik sa inyo mga talamnan sang ubas sa pag-ipo sang mga bunga nga nabilin ukon sa pagpamulot sang mga nagkaladagas; ibilin ninyo ini sa mga imol nga mga tawo kag mga dumoluong. Ako amo ang GINOO nga inyo Dios.

11 “Indi kamo magpangawat ukon magdinaya ukon magbutig. 

12 Indi kamo magsaad sa akon ngalan kon wala kamo sing tuyo sa pagtuman sini; magapakahuya ini sa akon ngalan. Ako amo ang GINOO nga inyo Dios.

13 “Indi pagpamintahai ang bisan sin-o ukon pangawatan mo sia. Indi paghawiri ang suweldo sang tawo nga imo ginsuholan bisan isa lamang ka gab-i.

14 Indi pagpakamalauta ang bungol nga tawo ukon magbutang sing makapasandad sa alagyan sang bulag. Magtahod kamo sa akon; ako amo ang GINOO nga inyo Dios.

15 “Indi ka magpasulabi sa bisan kay sin-o sa imo paghukom sa mga asunto; indi ka magpakita sing pagpasulabi sa imol ukon magkahadlok sa manggaranon.

16 Indi ka magsugid sing mga binutig nahanungod sa bisan sin-o, kag kon may yara nga ginahukman nga nagakahulogan sang iya kabuhi ukon kamatayon, magasugid ka sang imo panaksihon nga sarang makabulig sa iya. Ako amo ang GINOO.

17 “Indi ka maghupot sing dumot sa bisan kay sin-o, kundi husaya ang imo kasuayon sa iya, agod indi ikaw makapakasala tungod sa iya.^g

18 Indi ka magtimalos sa bisan kay sin-o ukon magpadayon sa pagkaakig sa iya, kundi higugmaa ang imo isigkatawo pareho sang imo kaugalingon. Ako amo ang GINOO.

19 "Tumana ang akon mga sugo. Indi mo pagpaliwaton ang mga hayop sang lain nga sahi. Indi ka magtanom sing duha ka sahi sang binhi sa isa lang ka ulumhan. Indi ka magsuksok sing bayo nga nahabol sa duha ka sahi sang halablon.

20 "Kon ang isa ka tawo nagsaad sa pagbaligya sang isa ka ulipon nga babayi sa isa ka lalaki subong isa ka kerida, pero wala makabayad ang amo nga tawo para sa sini nga babayi, ang tawo nga tag-iya sang babayi kag ang babayi indi pagpatyon kon sila nga duha nagpakighilawasay; silotan lamang sila. Kon sa bagay ulipon pa niya gihapon ang amo nga babayi.

21 Ang tawo magadala sing isa ka karnero nga lalaki sa puwertahan sang Tolda nga Tilipunan subong iya halad nga bayad,

22 kag paagi sini ang pari magahimo sang tulomanon sa pagpaninlo sa pagkuha sang sala sang amo nga tawo, kag ang Dios magapatawad sa iya.

23 "Kon mag-abot kamo sa duta sang Canaan, kag magtanom sang bisan ano nga kahoy nga nagapamunga, kabiga ninyo nga di-matinlo ang bunga sang kahoy sa nahauna nga tatlo ka tuig.

24 Sa ikap-at nga tuig ang tanan nga bunga sang kahoy ihalad subong isa ka dulot sa pagpakita sang inyo pagpasalamat sa akon,^h ang Ginoo.

25 Pero sa ikalima nga tuig sarang na kamo makakaon sang bunga sang kahoy. Kon himuon ninyo ini, ang inyo mga kakahoyan magapamunga sing madamo. Ako amo ang Ginoo nga inyo Dios.

26 "Indi kamo magkaon sang karne nga may dugo. Indi kamo maghimo sang bisan ano nga sahi sang pagbinabaylan ukon pagpamakot.

27 Indi ninyo pagguIoban ang inyo buhok sa palibot sang inyo ulo ukon pagkortehan ang inyo bungot,

28 ukon magbutang sang pika sa inyo lawas ukon magpilas sini sa pagpangasubo para sa patay. Ako amo ang Ginoo.

29 "Indi pagpakahuy-i ang imo mga anak nga babayi paagi sa paghimo sa ila nga makihilawason nga mga babayi sa templo;ⁱ kon himuon mo ini, magadangop ka sa iban nga mga dios kag ang duta mapuno sang pagkamalaut.

30 Bantayi ninyo ang Adlaw nga Inugpahuway, kag tahora ninyo ang duog sa diin akoginasimba. Ako amo ang Ginoo.

31 "Indi kamo magpangayo sing laygay sa mga tawo nga nagapakig-angot sa mga espiritu sang patay. Kon himuon ninyo ini madagtaan kamo. Ako amo ang GINOO nga inyo Dios.

32 "Tahora ang mga tigulang kag padunggi sila. Magkahadlok ka sa akon; Ako amo ang Ginoo.

33 "Indi ninyo pagdaugdauga ang mga dumoluong nga nagapuyo sa inyo duta.

34 Trataha sila pareho sang inyo kapareho nga mga Israelinhon, kag higugmaa sila pareho sang inyo paghigugma sang inyo kaugalingon. Dumdoma ninyo nga kamo anay mga dumoluong sa duta sang Egipto. Ako amo ang Ginoo nga inyo Dios.

35 "Indi pagdayai ang bisan sin-o paagi sa paggamit sang indi husto nga talaksan, kilohan ukon sulukban.

36 Maggamit sang husto nga mga talaksan, husto nga mga kilohan, kag husto nga mga sulukban. Ako amo ang Ginoo nga inyo Dios, kag ginpagwa ko kamo sa duta sang Egipto.

37 Tumana ninyo ang tanan ko nga mga kasugoan kag mga sugo. Ako amo ang Ginoo."

^gagod . . . iya; ukon agod indi kami maghimo sini nga sala batok sa iya. 

^hsa pagpakita sang inyo pagpasalamat sa akon; ukon sa pagdayaw sa akon. 

ⁱMAKIHILAWASON NGA MGA BABAYI SA TEMPLO: Ini nga mga babayi masapwan sa mga templo sang mga Canaanhon, sa diin ginasimba ang mga dios nga nagapatambok sang mga tanom. Ginapatihan nga ang pagpakighilawas sa sini nga mga babayi nagakahulogan sang mapa tubason nga uma kag mga kasapatan.

LEVITICO - Kapitulo 18 <<<   >>> LEVITICO - Kapitulo 20

LEVITICO - Kapitulo 18

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27

●●●●●

Ginadumilian nga mga Pagpakighilawas

1 Ang Ginoo nagsugo kay Moises

2 sa pagsiling sa mga tawo sang Israel, "Ako amo ang Ginoo nga inyo Dios.

3 Indi kamo magsunod sang mga ginahimo sang mga tawo sang Egipto, sa diin kamo anay nagpuyo, ukon sang mga tawo sang duta sang Canaan, sa diin pagadalhon ko kamo.

4 Tumana ninyo ang akon mga kasugoan kag himoa ang akon ginasugo. Ako amo ang Ginoo nga inyo Dios.

5 Sunda ninyo ang mga tulomanon kag ang mga kasugoan nga akon ginahatag sa inyo; maluwas ninyo ang inyo kabuhi sa inyo paghimo sini. Ako amo ang Ginoo nga inyo Dios.”

6 Ang Ginoo naghatag sang masunod nga mga pagsulondan. Indi ka magpakighilawas sa imo himata.

7 Indi pagpakahuy-i ang imo amay paagi sa pagpakighilawas sa imo iloy. Kinahanglan indi mo pagpakahuy-an ang imo iloy.

8 Indi pagpakahuy-i ang imo amay paagi sa pagpakighilawas sa bisan sin-o sang iban niya nga mga asawa.

9 Indi ka magpakighilawas sa imo utod nga babayi, ukon sa imo utod nga babayi sa iloy ukon sa amay, bisan nga nagdaku sia sa inyo balay ukon wala.

10 Indi ka magpakighilawas sa imo apo nga babayi; manginmakahuloya ini sa imo.

11 Indi ka magpakighilawas sa imo utod nga babayi sa amay ukon sa iloy; sia imo man gihapon utod.

12-13 Indi ka magpakighilawas sa imo tiya, bisan sia utod sang imo amay ukon sang imo iloy.

14 Indi ka magpakighilawas sa asawa sang imo tiyo; sia man imo tiya.

15 Indi ka magpakighilawas sa imo umagad nga babayi

16 ukon sa imo bayaw nga babayi.

17 Indi ka magpakighilawas sa anak nga babayi ukon apo nga babayi sang isa ka babayi nga imo nagapakighilawasan; ayhan mga himata mo sila, kag ang paghimo sini isa ka sala.

18 Indi pag-ipuyo ang utod nga babayi sang imo asawa subong isa sang imo mga asawa, samtang buhi pa ang imo asawa.

19 Indi ka magpakighilawas sa babayi nga yara ang iya pamulanon, kay di-matinlo sia.

20 Indi ka magpakighilawas sa asawa sang iban nga tawo, kay magadagta ini sa imo.

21 Indi pag-itugyan ang bisan sin-o sang imo mga anak nga gamiton sa pagsimba sa dios nga si Moloc, kay ina magapakahuya sa ngalan sang Dios, ang Ginoo.

22 Wala sing lalaki nga magpakighilawas sa isa ka lalaki, kay ginakangil-aran ini sang Dios.

23 Wala sing lalaki ukon babayi nga magapakighilawas sa isa ka sapat, kay ini magadagta sa inyo.

24 Indi pagdagtai ang inyo kaugalingon paagi sa bisan isa sining malaw-ay nga mga buhat. Sa sini nga paagi ang mga pagano nga nagpuyo sa duta sang wala pa kamo, nagdagta sang ila kaugalingon, kag ang GINOO nagatabog sa ila pa gwa agod nga makasulod kamo.

25 Ang ila mga ginhimo nagdagta sang duta, gani ginasilutan sang GINOO ang duta kag ginasubol sini ang mga tawo nga nagapuyo didto.

26-27 Ginhimo nila ining tanan nga makangilil-ad nga mga butang, kag gindagtaan nila ang duta, pero indi ninyo paghimoa ini. Tanan kamo, Israelinhon man ukon dumoluong, kinahanglan magtuman sang kasugoan kag mga sugo sang GINOO,

28 kag dayon indi kamo pagsubolon sang duta, subong sang pagsubol sini sang mga pagano nga nagpuyo didto nga una sa inyo.

29 Nakahibalo kamo nga ang bisan sin-o nga maghimo bisan isa sining makangilil-ad nga mga butang indi na pagkabigon nga isa sang mga tawo sang Dios.

30 Kag ang Ginoo nagsiling, "Tumana ninyo ang akon mga sugo kag indi kamo magsunod sa mga ginahimo sang mga tawo nga nagpuyo sa duta nga una sa inyo, kag indi ninyo pagdagtaan ang inyo kaugalingon paagi sa paghimo sini nga mga butang. Ako amo ang Ginoo nga inyo Dios."

LEVITICO - Kapitulo 17 <<<   >>> LEVITICO - Kapitulo 19