●●●●●
1 Ang Ginoo naghatag sini nga mga sugo kay Moises.
2 Ang isa ka halad pagahimuon kon ang bisan sin-o makasala batok sa Ginoo, tungod sa iya di-pag-uli sa iya kapareho nga Israelinhon sang pinatago sa iya, ukon sa iya pagpangawat, ukon paglimbong sa iya,
3 ukon sa iya pagbinutig nahanungod sang isa ka butang nga nadula, kag pagsumpa nga wala niya ini makita.
4-5 Kon ang isa ka tawo makahimo bisan isa lang sini nga mga sala, dapat sia magbayad sang bisan ano nga iya nakuha paagi sa dinaya. Sa tion nga masapwan sia sang iya paglapas, kinahanglan bayaran niya sing bug-os ang tag-iya, kag magadugang sia sing 20 porsiyento.
6 Magadala sia sa pari sing isa ka karnero ukon kanding nga lalaki nga wala sing depekto, subong iya bayad nga halad sa GINOO. Pabilihan ini suno sa opisyal nga talaksan.
7 Ang pari magadulot sing halad para sa sala sang amo nga tawo, kag pagapatawaron sia.
Mga Halad nga Ginsunog sing Bug-os
8 Ang Ginoo nagsugo kay Moises
9 sa paghatag kay Aaron kag sa iya mga anak nga lalaki sang masunod nga mga pagsulondan para sa mga halad nga sinunog. Ang halad nga sinunog ibilin sa ibabaw sang gatong sa altar sa bug-os nga gab-i, kag padayunon sa pagdabdab ang kalayo.
10 Dayon ang pari, nga nagasuksok sang iya bayu nga lino kag karsonsilyo nga lino, magakuha sang abo nga nabulit sang tambok nga nabilin sa ibabaw sang altar kag ibutang niya ini sa kilid sang altar.
11 Dayon magailis sia sang iya bayu kag dalhon niya ang mga abo sa gwa sang kampamento sa isa ka duog nga matinlo.
12 Ang kalayo sa altar padayunon sa pagdabdab kag indi gid pagpabay-an nga mapatay. Kada aga gatungan ini sang pari, ipahamtang sa ibabaw sini ang halad nga sinunog, kag sunogon ang sapay sang halad sa paghiambit.
13 Ang kalayo kinahanglan padayunon sa pagdabdab sa altar kag indi pagpabay-an nga mapatay.
Ang mga Halad nga Kalan-on
14 Amo ini ang mga pagsulondan para sa mga halad nga kalan-on. Ang isa ka pari nga kaliwat ni Aaron magadulot sang halad nga kalan-on sa GINOO sa atubangan sang altar.
15 Dayon magakuha sia sang isa ka hakop nga arina kag lana, kag ang tanan nga insyenso, kag sunogon ini sa altar subong isa ka tanda nga ini tanan nahalad sa Ginoo. Ang baho sini nga halad mahamot sa Ginoo.
16 Ang pari magakaon sang nabilin sini. Himuon ini nga tinapay kag kaunon sa balaan nga duog, sa pasiyuhan sang Tolda nga Tilipunan.
17 Lutoon ini nga wala sing lebadora. Ang GINOO naghatag sini sa ila subong ila bahin sang mga halad nga kalan-on. Tama ini ka balaan, pareho sang halad tungod sa sala kag sang bayad nga mga halad.
18 Ang bisan sin-o nga mga kaliwat nga lalaki ni Aaron sa tanan nga panahon nga palaabuton sarang makakaon sini subong ila bahin sa gihapon sang kalan-on nga ginhalad sa Ginoo. Ang bisan sin-o ukon ang bisan ano nga makatandog sang halad nga kalan-on mahalitan sang iya sini pagkabalaan.
19 Ang Ginoo naghatag sang masunod nga mga pagsulondan kay Moises
20 sa pag-orden sang pari nga kaliwat ni Aaron. Sa adlaw nga ordinan sia, magadulot sia subong iya halad sa Ginoo sing duha ka libra nga arina (pareho kadamo sang adlaw-adlaw nga halad nga kalan-on), ang katunga sa aga kag ang katunga sa gab-i.
21 Samuan ini sing lana kag Iutoon sa isa ka sartin kag dayon pudporon niya kag idulot sa Ginoo subong isa ka halad nga kalan-on, isa ka baho nga mahamot sa Ginoo.
22 Ini nga halad pagahimuon sa tanan nga panahon nga palaabuton sang tagsa ka kaliwat ni Aaron nga nagaalagad subong Pinakamataas nga Pari. Pagasunogon ini sing bug-os subong isa ka halad sa Ginoo.
23 Wala sing bahin sang halad nga kalan-on nga ginadulot sang isa ka pari nga pagakaunon, kundi pagasunogon ini sing bug-os.
Ang mga Halad tungod sa Sala
24 Ang Ginoo nagsugo kay Moises
25 sa paghatag kay Aaron kag sa iya mga anak nga lalaki sang masunod nga mga pagsulondan para sa mga halad tungod sa sala. Ang sapat nga para sa hdad tungod sa sala pagaihawon sa naaminhan nga kilid sang altar, sa diin ginaihaw ang mga sapat para sa mga halad nga sinunog. Tama ini ka balaan nga halad.
26 Ang pari nga nagahalad sini nga sapat magakaon sini sa isa ka balaan nga duog, sa pasiyuhan sang Tolda nga Tilipunan.
27 Ang bisan sin-o ukon ang bisan ano nga makatandog sang unod sang sapat mahalitan sang iya sini pagkabalaan. Ang bisan ano nga panapton nga naagsikan sang dugo sang sapat, kinahanglan labhan sa isa ka balaan nga duog.
28 Ang kolon nga ginalutoan sang karne sini pagabuongon, kag kon ang ginlutoan isa ka kaldero, pagahinisan ini kag hugasan sa tubig.
29 Ang bisan sin-o nga lalaki sa mga panimalay sang pari sarang makakaon sini nga halad; tama ini ka balaan.
30 Pero kon ang bahin sang dugo sini gindala sa sulod sang Tolda nga Tilipunan kag ginagamit sa hilikuton sa pagkuha sang sala, kinahanglan ang sapat indi pagkaunon; dapat ini sunogon.
No comments:
Post a Comment