♤♤♤♤♤
Ang mga Kasugoan Nahanungod sa Gira
1 "Kon magkadto kamo sa pagpakig-away batok sa inyo mga kaaway, kag makita ninyo ang mga karuwahi kag mga kabayo kag mga hangaway nga madamo pa sa inyo, indi kamo magkahadlok sa ila. Ang Ginoo nga inyo Dios, nga nagluwas sa inyo gikan sa Egipto magaupod sa inyo.
2 Sa wala pa kamo makasugod sa pagpakig-away, ang isa ka pari magapalapit sa atubang kag magasiling sa mga hangaway,
3 'Mga tawo sang Israel pamati kamo! Karon nga adlaw magapakig-away kamo. Indi kamo magkahadlok sa inyo mga kaaway, ukon madulaan sing kaisog, ukon magsalasala.
4 Ang Ginoo nga inyo Dios nagaupod sa inyo kag padag-on niya kamo.’
5 "Dayon ang mga opisyales magasiling sa mga tawo, 'May yara bala sa inyo nga bag-o lang makapatindog sing balay kag wala pa niya mahalad? Kon may yara sarang sia makapauli, kay basi mapatay sia sa inaway kag iban ang magahalad sang iya balay.
6 May yara bala nga bag-o lang makatanom sing ubas kag wala pa gid sia makapulos sang iya bunga? Kon may yara sarang sia makapauli, kay basi mapatay sia sa inaway kag iban ang makapulos sang iya bino.
7 May yara bala nga kalasalon diri? Kon may yara, magpauli sia kay basi mapatay sia sa inaway kag iban ang mangasawa sang iya inugpakasal.'
8 "Ang mga opisyales magasiling man sa ila, 'May yara bala sa inyo nga nahadlok kag ginakulbaan? Kon may yara magpauli sia, kay basi kulbaan man ang iya kaupdanan.'
9 Kon makatapos na ang mga opisyales hambal sa mga tawo, magpili sila sing mga pangulo sa pagdumala sa tagsa ka grupo.
10 "Kon magsalakay kamo sang isa ka siyudad, hatagi anay sing kahigayunan ang mga pumoluyo sa pag-ampo.
11 Kon abrihan nila ang ila puwerta nga tanda sang ila pag-ampo, himuon mo sila nga mga ulipon kag piliton sa pag-alagad sa inyo.
12 Pero kon ang mga pumoluyo sina nga siyudad indi mag-ampo kundi mabato, kibuna ninyo sila.
13 Kon ang Ginoo nga inyo Dios magtugyan sa inyo sang siyudad, pamatya ninyo ang tanan nga mga lalaki.
14 Pero sarang ninyo mabihag ang mga babayi, ang mga kabataan, ang mga kahayupan, kag ang tanan nga butang nga yara sa siyudad. Sarang ninyo magamit ang tanan nga pagkabutang sang inyo mga kaaway. Ang Ginoo naghatag sini sa inyo.
15 Amo ini ang himuon ninyo sa mga siyudad nga malayo sa duta nga inyo pagapuy-an.
16 "Pero kon maagaw ninyo ang mga siyudad nga ginahatag sa inyo sang GlNOO nga inyo Dios, pamatya ninyo ang tanan.
17 Pamatya ninyo ang tanan mga tawo: ang mga Hethanon, ang mga Amornon, ang mga Canaanhon, ang mga Pereznon, ang mga Hevhanon, kag ang mga Jebusnon suno sa ginsugo sang Ginoo sa inyo.
18 Pamatya ninyo sila, agod indi nila kamo madala sa pagpakasala batok sa Ginoo paagi sa pagtudlo sa inyo sa paghimo sang tanan nga makangilil-ad nga mga butang nga ila ginahimo sa pagsimba sa ila mga dios.
19 “Kon ginakibon ninyo ang isa ka siyudad agod maagaw ini, indi ninyo pagpanapson ang mga kahoy nga nagapamunga, bisan nga madugay ang inyo pagkibon. Kauna lang ninyo ang bunga pero indi pagtapsa ang kahoy kay indi ini ang inyo kaaway.
20 Sarang ninyo matapas ang iban nga mga kahoy kag gamiton ini sa pagkibon tubtob maagaw ang siyudad.
No comments:
Post a Comment