♤♤♤♤♤
Isa Lamang ka Duog ang Pagasimbahan
1 "Karon pamatii ninyo ang tanan nga mga kasugoan nga inyo pagatumanon samtang nagakabuhi kamo sa duta nga ginahatag sa inyo sang Ginoo nga Dios sang inyo mga katigulangan.
2 Sa duta nga inyo pagapanag-iyahan, gub-a ninyo ang tanan nga mga duog sa mataas nga kabukiran, sa kabakuloran, kag sa idalom sang madabong nga mga kahoy sa diin ang mga tawo nagasimba sa ila mga dios.
3 Gub-a ang ila mga altar kag dugmoka ang ila balaan nga mga haligi nga bato. Sunoga ang ila balaan nga mga palo kag pudla ang ila mga diosdios, agod indi na gid sila masimba liwat sa sini nga mga duog.
4 “Indi kamo magsimba sa Ginoo nga inyo Dios pareho sang pagsimba sini nga mga tawo sa ila mga dios.
5 Gikan sa kadutaan sang tanan nga mga tribo ang Ginoo magapili sang isa ka duog sa diin ang mga tawo magakadto kag magasimba sa iya.
6 Didto idulot ninyo ang inyo mga halad nga pagasunogon kag ang iban ninyo nga mga halad, ang inyo mga ikapulo kag mga halad, kag ang inyo mga dulot nga ginsaad ninyo sa Ginoo, ang inyo mga dulot nga kinabubot-on, kag ang mga panganay sang inyo mga baka kag mga karnero.
7 Didto, sa atubangan sang Ginoo nga inyo Dios, kamo kag ang inyo mga panimalay magakaon kag magakalipay tungod sang maayo nga mga butang nga ginhatag sa inyo sang Ginoo.
8 "Kon ina nga tion mag-abot indi ninyo paghimuon ang inyo anay ginahimo. Tubtob karon ang tagsatagsa sa inyo nagahimo suno sa iya naluyagan,
9 kay wala pa kamo makasulod sa duta nga ginahatag sa inyo sang Ginoo nga inyo Dios, sa diin kamo magakabuhi sing malinong.
10 Kon makatabok na kamo sa suba sang Jordan, ang Ginoo magahatag sa inyo sang duta kag magapuyo kamo didto. Apinan niya kamo sa tanan ninyo nga mga kaaway, agod magakabuhi kamo sing malinong.
11 Ang Ginoo magapili sing duog sa diin kamo magasimba sa iya, kag didto magadala kamo sa iya sang tanan nga butang nga akon ginasugo sa inyo: ang inyo mga halad nga pagasunogon kag ang iban ninyo nga mga halad, ang inyo mga ikapulo kag mga halad, kag yadtong pinasahi nga halad nga ginsaad ninyo sa Ginoo.
12 Dayon magkalipay kamo sa iya atubangan, upod sa inyo mga kabataan, sa inyo mga ulipon, kag sa mga Levita nga nagapuyo sa inyo mga banwa. Dumdoma ninyo nga ang mga Levita wala sing kaugalingon nga duta.
13 Indi kamo magdulot sang inyo mga halad bisan diin lang,
14 kundi ihalad ninyo ini sa isa ka duog nga pilion sang Ginoo sa kadutaan sang isa sang inyo mga tribo. Didto lamang kamo magdulot sang inyo mga halad nga pagasunogon kag maghimo sang tanan nga iban nga mga butang nga akon ginsugo sa inyo.
15 “Pero sarang kamo makaihaw kag makakaon sang inyo mga hayop bisan diin kamo nagapuyo. Makakaon kamo suno sa kadamuon sang ginahatag sang Ginoo sa inyo. Tanan kamo, matinlo ukon indi matinlo makakaon sini, subong sang pagkaon ninyo sang karne sang usa ukon sang gasela.
16 Pero indi kamo magkaon sang ila dugo. Iula ninyo ini sa duta subong sang tubig.
17 Sa mga duog sa diin kamo nagapuyo, indi ninyo pagkaunon ang mga ikapulo sang inyo trigo, sang inyo bino, ukon sang inyo lana sang olivo. Indi ninyo pagkaunon didto ang bisan ano nga ginadulot ninyo sa Ginoo: ang panganay sang inyo mga baka kag mga karnero, ukon ang mga dulot nga ginsaad ninyo sa iya, ukon ang inyo kinabubot-on nga mga dulot, ukon ang bisan ano nga mga dulot.
18 Kamo kag ang inyo mga kabataan, upod ang inyo mga alagad kag ang mga Levita nga nagapuyo sa inyo mga kabanwahanan, magakaon sining mga dulot sa atubangan lamang sang Ginoo nga inyo Dios, sa isa ka duog nga ginasimbahan. Magkaon kamo didto kag magkasadya tungod sang maayo nga mga butang nga ginhatag sang Ginoo sa inyo.
19 Indi ninyo pagpatumbayai ang mga Levita samtang nagakabuhi kamo sa inyo duta.
20 "Kon ang GINOO nga inyo Dios magpasangkad sang inyo kadutaan, suno sa iya ginsaad, sarang kamo makakaon sang karne kon luyag ninyo.
21 Kon ang isa ka duog nga ginasimbahan ninyo malayo, dayon suno sa akon ginsiling sa inyo, sarang kamo makaihaw sang baka ukon karnero nga ginhatag sa inyo sang Ginoo kag magkaon kamo sing karne sa inyo balay sa bisan ano nga tion nga luyag ninyo.
22 Ang bisan sin-o nga matinlo ukon indi matinlo makakaon sing karne, subong sang iya pagkaon sang karne sang usa ukon gasela.
23 Indi lang pagkauna ang dugo kon magkaon kamo sang karne, kay ang kabuhi yara sa dugo, kag indi ninyo dapat kaunon ang kabuhi upod sa karne.
24 Indi ninyo pagkauna ang dugo. Iula ini sa duta subong sang tubig.
25 Kon indi ninyo pagkaunon ang dugo, malipay ang Ginoo, kag ang tanan manginmaayo para sa inyo kag sa inyo mga kaliwat.
26 Dalha ninyo ang inyo mga dulot kag mga regalo nga ginsaad ninyo sa Ginoo sa isa ka duog nga ginasimbahan.
27 Idulot didto ang mga halad nga pagasunogon sing bug-os sa altar sang Ginoo, kag ang mga halad nga kinahanglan iula ang dugo sa altar kag ang karne kaunon.
28 Tumana sing maayo ang tanan nga ginsugo ko sa inyo kag ang tanan manginmaayo para sa inyo kag sa inyo mga kaliwat sa walay katapusan, kay magahimo kamo sing matarong, kag magapahalipay sa Ginoo nga inyo Dios.
Paandam batok sa mga Diosdios
29 "Ang Ginoo nga inyo Dios magalaglag sang mga pungsod samtang ginagubat ninyo ang ila duta, kag inyo ini panag-iyahan kag magapuyo didto.
30 Sa tapos malaglag sang Ginoo ini nga mga pungsod, tandaan ninyo nga indi gid kamo magsunod sa ila ginahimo, kay ini manginsiod para sa inyo. Indi kamo mag-usisa kon paano ang ila pagsimba sa ila dios, agod masimba man ninyo ang ila mga dios pareho sang ila ginahimo.
31 Indi ninyo pagsimbaha ang Ginoo nga inyo Dios pareho sang ila pagsimba sang ila mga dios, kay sa pagsimba nila sa ila mga dios ginahimo nila ang makangilil-ad nga mga butang nga ginadumtan sang Ginoo. Ginahalad gani nila ang ila mga kabataan sa kalayo sang ila mga altar.
32 "Tumana ang tanan nga akon ginsugo sa inyo; indi ninyo pagdugangi ukon pag-ibanan ini.
No comments:
Post a Comment