□□□□□
Ang mga Anak nga Lalaki ni Aaron
1 Amo ini ang panimalay ni Aaron kag ni Moises sang paghambal sang Ginoo kay Moises sa Bukid sang Sinai.
2 Si Aaron may apat ka mga anak nga lalaki: Si Nadab, ang kamagulangan, si Abiu, si Eleazar, kag si Itamar.
3 Ginhaplasan sila kag gin-ordinan subong mga pari,
4 pero si Nadab kag si Abiu napatay sang paghalad nila sing dibalaan nga kalayo sa Ginoo sa Desierto sa Sinai. Wala sila sing mga anak; si Eleazar kag si Itamar nag-alagad subong mga pari sang buhi pa si Aaron.
Ang mga Levita Ginpili sa Pag-alagad sa mga Pari
5 Ang Ginoo nagsiling kay Moises,
6 “Pakadtoa ninyo diri sa atubangan ang tribo ni Levi kag himoa ninyo sila nga mga suloguon ni Aaron nga pari.
7 Pagahimuon nila ang mga kinahanglanon para sa Tolda nga Tilipunan kag magahimo sila sang mga katungdanan para sa mga pari kag para sa bug-os nga katilingban.
8 Sila ang magatatap sang tanan nga mga gamit sang Tolda kag magahimo sang mga katungdanan para sa iban nga mga Israelinhon.
9 Ang katungdanan sang mga Levita amo lamang ang pag-alagad sa kay Aaron kag sa iya mga anak nga lalaki.
10 Pilion mo si Aaron kag ang iya mga anak nga lalaki sa pagtuman sang mga katungdanan sang mga pari; ang bisan sin-o nga iban nga magtinguha sa pagtuman sang ila mga katungdanan pagapatyon."
11 Ang Ginoo nagsiling kay Moises,
12-13 "Karon ang mga Levita mangin-akon. Sang pagpamatay ko sang tanan nga mga panganay sang mga Egiptohanon, ginpakabalaan ko agod mangin-akon ang panganay nga anak nga lalaki sang tagsa ka panimalay sang mga Israelinhon kag ang panganay sang tagsa ka sapat. Karon, sa baylo sang mga panganay nga anak nga lalaki sang mga Israelinhon, mangin-akon ang mga Levita. Sila mangin-akon. Ako amo ang Ginoo."
Ang Pagsenso sang mga Levita
14 Sa Desierto sang Sinai ang Ginoo nagmando kay Moises
15 sa paglista sang mga Levita suno sa mga baranggay kag mga panimalay, nga nagalakip sang tagsa ka lalaki nga nagaedad sing isa ka bulan paibabaw,
16 kag gintuman ini ni Moises.
17-20 Si Levi may tatlo ka mga anak nga lalaki nga amo sanday Gerson, Coat, kag Merari, nga amo ang mga katigulangan sang mga kabaranggayan nga nagadala sang ila mga ngalan. Si Gerson may duha ka anak nga lalaki: si Libni kag si Simei; si Coat may apat ka mga anak nga lalaki: sanday Amram, Izhar, Hebron, kag Uziel; kag si Merari may duha ka anak nga lalaki: si Mahali kag si Musi. Amo ini sila ang mga katigulangan sang mga panimalay nga nagadala sang ila mga ngalan.
21 Ang duha ka panimalay nagikan sa baranggay ni Gerson: ang mga Libninhon kag ang mga Simeinhon.
22 Ang bug-os nga kadamuon sang mga lalaki nga nagaedad sing isa ka bulan paibabaw nga nalista 7,500.
23 Ini nga baranggay dapat maghimo sing kampamento sa likod sang Tolda, sa nakatundan,
24 upod kay Eliasaf nga anak ni Lael subong nga pangulo sang baranggay.
25 Sila ang magatatap sang Tolda nga Tilipunan, ang iya nasulod nga lipon, ang iya nagowa nga lipon, ang kurtina sa puwertahan,
26 ang mga kurtina para sa pasiyuhan sa palibot sang Tolda kag sang altar, kag ang kurtina para sa puwertahan pakadto sa pasiyuhan. Sila ang gintugyanan sang tanan nga hilikuton nga may kaangtanan sini nga mga butang.
27 Apat ka mga panimalay ang nagikan sa baranggay ni Coat: ang mga Amramhon, ang mga Izranhon, ang mga Hebronhon, kag ang mga Uzielnon.
28 Ang bug-os nga kadamuon sang mga lalaki nga nagaedad sing isa ka bulan paibabaw nga nalista 8,600.
29 Ini nga baranggay magpatindog sing kampamento sa nabagatnan nga bahin sang Tolda,
30 upod kay Elizafan nga anak ni Uziel subong panguIo sang baranggay.
31 Sila ang gintugyanan sang Kaban sang Kasugtanan, sang lamesa, sang kandeliruhan, sang mga altar, sang mga gamit nga ginagamit sang mga pari sa Balaan nga Duog, kag ang kurtina sa puwertahan pakadto sa Labing Balaan nga Duog. Sila ang gintugyanan sang tanan nga hilikuton nga may kaangtanan sa sini nga mga butang.
32 Ang pangulo sang mga Levita amo si Eleazar nga anak ni Aaron nga pari. Sia amo ang nagadumala sang mga nagaalagad sa Balaan nga Duog.
33 Ang duha ka panimalay nagikan sa baranggay ni Merari: ang mga Mahalinhon kag ang mga Musinhon.
34 Ang bug-os nga kadamuon sang mga lalaki nga nagaedad sing isa ka bulan paibabaw nga nalista 6,200.
35 Ini nga baranggay magpatindog sang ila kampamento sa naaminhan nga bahin sang Tolda, upod kay Zuriel nga anak ni Abihael subong pangulo sang baranggay.
36 Gintugyan sa ila ang pagtatap sang mga gamit nga tapi, ang iya mga balabag, mga haligi, mga sadsaran, kag ang tanan niya nga mga alangtan. Sila ang gintugyanan sang tanan nga mga hilikuton nga may kaangtanan sa sini nga mga butang.
37 Sila man ang magatatap sang mga haligi, mga sadsaran, mga palpal, kag mga kalat para sa nagowa nga pasiyohan.
38 Si Moises kag si Aaron kag ang iya mga anak nga lalaki naghimo sing kampamento sa atubangan sang Tolda nga Tilipunan sa sidlangan. Sila ang gintugyanan sa pagpatuman sang mga hilikuton nga ginahimo sa Balaan nga Duog para sa mga tawo sang Israel. Ang bisan sin-o nga iban nga magtinguha sa paghimo sini pagapatyon.
39 Ang bug-os nga kadamuon sang tanan nga mga lalaki nga Levita nga nagaedad sing isa ka bulan paibabaw nga ginlista ni Moises suno sa mga kabaranggayan sa mando sang Ginoo 22,000.
Ang mga Levita Nagkuha sang Lugar sang mga Panganay nga Lalaki
40-41 Ang Ginoo nagsiling kay Moises, "Ang tanan nga mga panganay nga lalaki sang mga Israelinhon akon. Gani listahon mo ang ngalan sang tagsa ka panganay nga anak nga lalaki nga Israelinhon, nga nagaedad sing isa ka bulan paibabaw. Pero sa baylo nila, ginaangkon ko ang tanan nga Levita nga mangin-akon! Ako amo ang Ginoo! Akon man ginaangkon ang mga kabakahan sang mga Levita sa baylo sang tanan nga panganay nga lalaki sang mga kabakahan.”
42 Gintuman ini ni Moises kag ginlista niya ang tanan nga panganay nga lalaki
43 nga nagaedad sing isa ka bulan paibabaw; ang bug-os nga kadamuon 22,273.
44 Ang Ginoo nagsiling kay Moises,
45 "Karon ihalad ang mga Levita nga mangin-akon sa baylo sang tanan nga panganay nga mga anak nga lalaki sang mga Israelinhon, kag ang mga kabakahan sang mga Levita sa baylo sang mga panganay nga mga kabakahan sang mga Israelinhon.
46 Tungod kay ang panganay nga mga anak nga lalaki nagdamo sing 273 sang mga Levita, kinahanglan gawaron mo ang sobra nga mga anak nga lalaki.
47 Para sa tagsatagsa, magbayad ka sing lima ka bilog nga pilak, suno sa opisyal nga talaksan,
48 kag ihatag ini nga kuwarta sa kay Aaron kag sa iya mga anak nga lalaki."
49 Si Moises nagtuman kag nagkuha
50 sing 1,365 ka bilog nga pilak,
51 kag ginhatag niya ini kay Aaron kag sa iya mga anak nga lalaki.
No comments:
Post a Comment