"Lakat kag Ibantala ang Maayong Balita sa Tanan nga mga Tawo"

Liturhiya sang Pulong

(Sabado, Abril 25, 2020)

San Marcos, Ebanghelista

Ang Pagbasa gikan sa Nahauna nga Sulat ni:

San Pedro 5:5-14

   Tanan kamo dapat magpanampi sang pagpaubos, sa pag-alagad sa isa kag isa, kay ang kasulatan nagasiling, “Ginasumpo sang Dios ang bugalon, pero iya ginabugayan ang mapainuboson.” Gani magpaubos kamo sa idalom sang gamhanan nga kamot sang Dios, agod nga bayawon niya kamo sa iya nagakaigo nga tion. Itugyan ninyo sa iya ang tanan ninyo nga mga palaligban, kay nagakabalaka sia sa inyo.
   Maghanda kag magbantay kamo! Kay ang inyo kaaway, ang Yawa, nagaluyong subong sang isa ka nagangurob nga leon, nga nagapangita sang iya tulokbon. Magmalig-on kamo sa inyo pagtuo kag magbato sa Yawa, kay nakahibalo kamo nga ang inyo pareho nga mga tumoluo sa bug-os nga kalibutan nagaantos sang amo man nga mga pag-antos. Pero sa tapos kamo makaantos sa indi lamang madugay, ang Dios nga nagahatag sang tanan nga grasya, nga nagatawag sa inyo sa pag-ambit sang iya wala sing katapusan nga himaya sa inyo paghiusa kay Cristo, magahimpit kag magahatag sa inyo sing kalig-on, kusog kag mapag-on nga sadsaran. Sa iya ang gahom sa walay katapusan. Kabay pa.
   Ginasulat ko sa inyo ining malip-ot nga sulat sa bulig ni Silas, nga akon ginakabig nga isa ka masaligan nga utod. Luyag ko nga paisugon kamo kag hatagan sang akon panaksihon nga amo ini ang matuod nga grasya sang Dios. Sa sini magpakalig-on kamo.
   Ang iglesia sa Babilonia, nga ginpili man sang Dios, nagaabiabi sa inyo, kag amo man ang akon anak nga si Marcos. Maghalukay kamo sa Cristohanon nga paghigugma.
   Kabay nga ang paghidait manginyara sa inyo tanan nga iya ni Cristo.

Salmo sa Pagsabat:

Mga Salmo 89:2-3, 6-7, 16-17

(S) Magakanta ako gihapon sang kaayo sang Ginoo.

O Ginoo, magakanta ako gihapon nahanungod sang imo mapinadayunon nga gugma, sa tanan nga tion ibantala ko ang imo katutom. Nagsiling ka, “Nakahibalo ako nga ang imo gugma magapadayon sa walay katapusan, nga ang imo katutom wala sing katapusan subong sang langit." (S)

Ang kalangitan nagakanta sang makatilingala nga mga butang nga imo ginahimo; ang mga balaan nagakantasang imo katutom, O Ginoo. Wala sing isa sa langit nga kaangay sa imo, O Ginoo, wala sing isa sa mga dios nga makatupong sa imo. (S)

Bulahan ang mga tawo nga nagasimba sa imo sa mga ambahanon,nga nagakabuhi sa kapawa sang imo kaayo. Tungod sa imo nagakalipay sila sa bug-os nga adlaw,kag nagadayaw sa imo tungod sang imo kaayo. (S)

Aleluya:

1 Corinto 1:23-24

   Kami amon nagawali nahanungod kay Cristo nga ginlansang sa krus; Sia amo ang gahom kag ang kaalam sang Dios. 

Ang Pagbasa sang Santos nga Ebanghelyo suno kay:

San Marcos 16:15-20

   Nagsiling sia sa ila, “Lakat kamo sa bug-os nga kalibutan kag ibantala ang Maayong Balita sa tanan nga mga tawo. Ang bisan sin-o nga magtuo kag mabautisohan, maluwas; ang indi magtuo, kondenahon. Ang mga tumoluo pagahatagan sining masunod nga mga gahom: magatabog sila sang mga yawa sa akon ngalan, magahambal sila sang iban nga mga hambal, kag kon mag-uyat sila sang mga man-og ukon makainom sang bisan ano nga hilo, indi sila mahalitan. Magatungtong sila sang ila mga kamot sa mga masakiton, kag ini sila magaayo.”
   Sa tapos ang Ginoo nakapakighambal sa ila, nagkayab sia sa langit kag naglingkod sa tuo sang Dios. Naglakat kag nagwali ang mga gintuton-an sa bisan diin nga duog kag ang Ginoo nagbulig sa ila, kag nagpamatuod sang ila mensahi paagi sa paghatag sa ila sing gamhanan nga mga tanda.

Abril 24 | Abril 26