"Ang Espiritu sang Ginoo Yari sa Akon"

Liturhiya sang Pulong

(Huwebes, Enero 9, 2020)

Panahon sang Pagkatawo

Ang Pagbasa gikan sa Nahauna nga Sulat ni:

San Juan nga Apostol 4:19—5:4

   Nagahigugma kita, kay ang Dios naghigugma sa aton sing una. Kon may isa nga nagasiling nga nagahigugma sia sa Dios, pero nagadumot sa iya utod, butigon sia. Kay kon wala sia nagahigugma sa iya utod nga iya makita, indi sia makahigugma sa Dios nga indi niya makita. Gani amo ini ang sugo nga ginhatag sa aton ni Cristo: ang nagahigugma sa Dios dapat man maghigugma sa iya utod.
  Ang nagatuo nga si Jesus amo ang Cristo, anak sang Dios, kag ang nagahigugma sa amay nagahigugma man sa iya anak.

Ang nagatuo nga si Jesus amo ang Cristo, anak sang Dios. (5:1)

Sa sini nga paagi mahibaluan ta nga nagahigugma kita sa mga anak sang Dios, kon kita nagahigugma sa Dios kag nagatuman sang iya mga sugo. Kay kon nagahigugma kita sa Dios kon sayuron nagatuman kita sang iya mga sugo. Kag ang iya mga sugo indi tama kabudlay para sa aton,p kay ang tagsa ka anak sang Dios sarang makadaog sang kalibutan. Amo ini ang pagdaog naton sang kalibutan: paagi sa aton pagtuo. 

Salmo sa Pagsabat:

Mga Salmo 72:1-2, 14 kag 15, 17

(S) Kabay nga magluhod sa Imo atubangan ang tanan nga mga kapungsoran, O Ginoo. 

O Dios, ipaambit sa iya ang imo kaugalingon nga katarungan, agod magahari sia sa imo mga tawo suno sa katarungan, kag magagahum sing matarong sa mga imol. (S)

Ginaluwas niya sila gikan sa pagpigos kag kapintas, ang ila mga kabuhi mahal sa iya. Kabay nga pangamuyoan sia sa tanan nga tion, kabay nga bendisyunan sia sang Dios sa gihapon. (S)

Kabay nga ang ngalan sang hari indi gid pagkalimtan, kabay nga ang iya pagkabantog magapadayon subong sang adlaw. Kabay nga ang tanan nga mga pungsod magdayaw sa iya, kabay nga ang tanan nga mga tawo magpangayo sa Dios nga bendisyunan sila, subong sang iya pagbendisyon sa hari. (S)

Aleluya:

Lucas 4:18

   Ang Ginoo nagpili sa akon sa pagwali sang Maayong Balita sa mga imol, ginpadala niya ako sa pagbantala sang kahilwayan sa mga bihag.

Ang Pagbasa sang Santos nga Ebanghelyo suno kay:

San Lucas 4:14-22

   Dayon si Jesus nagbalik sa Galilea, kag ang gahom sang Espiritu Santo yara sa iya. Ang balita nahanungod sa iya naglapnag sa sadto nga mga duog. Nagpanudlo sia sa ila mga sinagoga kag gindayaw sia sang tanan.
   Dayon si Jesus nagkadto sa Nazaret, sa diin sia nagdaku, kag sang Adlaw nga Inugpahuway nagkadto sia sa sinagoga suno sa iya kinabatasan. Nagtindog sia sa pagbasa sang mga Kasulatan, kag ginhatag sa iya ang libro ni Isaias nga propeta. Ginbukad niya ini kag nakita niya ang bahin diin nasulat ang masunod:
   “Ang Espiritu sang Ginoo yari sa akon.
   Kag ginpili niya ako sa pagwali
   Sang Maayong Balita sa mga imol,
   Ginpadala niya ako sa pagbantala
   Sang kahilwayan sa mga bihag,
   Sa pag-ayo sang mga bulag,
   Sa paghilway sang mga ginapigos,
   Sa pagbantala sang tuig nga ang Ginoo
   Magaluwas sang iya mga tawo.”
   Gintakop ni Jesus ang libro, gin-uli sa manugbulig, kag naglingkod. Ang tanan sa sinagoga nagtulok sa iya. Nagsugod sia sa paghambal sa ila, “Ini nga dinalan sang kasulatan natuman karon nga adlaw samtang ginapamatian ninyo ang pagbasa sini.”
   Gindayaw sia sang tanan, kag natingala sila sang matahom nga mga pulong nga iya ginhambal.

Enero 8 | Enero 10