Higugmaa ang Inyo mga Kaaway kag Magpangamuyo Kamo sa Ila

Liturhiya sang Pulong

(Martes, Hunyo 18, 2019)

Ang Pagbasa gikan sa Ikaduha nga Sulat ni San Pablo nga Apostol, sa mga:

Taga-Corinto 8:1-9

   Mga utod, luyag namon nga makahibalo kamo nahanungod sang nahimo sang grasya sang Dios sa mga iglesia sa Macedonia. Ang pagtilaw nga ila inagihan paagi sa mga kabudlayan tama gid, pero daku gid ang ila kalipay, amo ina nga nagmaalwan gid sila sa ila paghatag, bisan nga tama gid sila kaimol. Makasaksi ako nga naghatag sila sang tanan nila nga masarangan, kag sobra pa gani sina. Sa ila kaugalingon nga kabubot-on nagpangabay kag nagpamilit sila sa amon nga hatagan sila sing kahigayunan sa pagbulig sa mga tumoluo sang Dios sa Judea. Ang ginhimo nila labaw sang sa amon ginpaabot! Nahauna, gintugyan nila ang ila kaugalingon sa Ginoo, kag dason gintugyan man nila ang ila kaugalingon sa amon sa kabubot-on sang Dios. Gani, ginpangabay namon si Tito sa pagpadayon sining hilikuton nga iya nasugoran kag buligan kamo sa pagtapos sining pinasahi nga pag-alagad sa gugma. Manggaranon kamo sa tanan nga butang: sa pagtuo, sa paghambal, kag sa ihibalo, sa inyo kaluyag sa pagbulig, kag sa inyo paghigugma para sa amon. Gani, luyag namon nga kamo magmaalwan man sa sining mahigugmaon nga pag-alagad.

   Wala ako nagahatag sing mga pagsulondan. Pero sa pagpakita sa inyo kon daw ano ang kaluyag sang iban sa pagbulig, luyag ko mahibaluan kon daw ano ka matuodtuod ang inyo paghigugma. Kay kamo gid nakahibalo sang grasya sang aton Ginoong Jesu-Cristo, nga bisan manggaranon sia, nagpakaimol sia tungod sa inyo, agod nga paagi sa iya kaimulon manginmanggaranon kamo.

Salmo sa Pagsabat:

Mga Salmo 146:2, 5-6, 6-7, 8-9

(S) Dayawon ko ang Ginoo samtang nagakabuhi pa ako.

Dayawon ko sia samtang nagakabuhi pa ako, magakanta ako sa akon Dios sa bug-os nga kabuhi. (S)
Malipayon ang tawo nga ginabuligan sang Dios ni Jacob, kag nagasalig sia sa Ginoo nga iya Dios, nga nagtuga sang langit, duta, kag dagat, kag sang tanan nga yara sa sini. (S)
Ginatuman gid niya sa gihapon ang iya mga saad, nagahukom sia pabor sa mga ginapigos, kag nagahatag sia sing kalan-on sa mga ginagutom. Ang Ginoo nagahilway sang mga binilanggo. (S)
Ang Ginoo nagaayo sang mga bulag. Ginabayaw niya ang mga nadulaan sang paglaom, ginahigugma niya ang iya matarong nga mga tawo. Ginaapinan niya ang mga dumuluong nga nagaestar sa aton duta. (S)

Aleluya:

Juan 13:34

Ginahatag ko sa inyo ang isa ka bag-o nga sugo, siling sang Ginoo; maghigugmaanay kamo. Subong nga ako nagahigugma sa inyo, sa amo man nga bagay dapat kamo maghigugmaanay.

Ang Pagbasa sang Santos nga Ebanghelyo suno kay:

San Mateo 5:43-48

   “Inyo man nabatian ang ginsiling, ‘Higugmaa ang imo mga abyan, kag dumti ang imo mga kaaway.’ Pero karon nagasiling ako sa inyo: higugmaa ang inyo mga kaaway, kag magpangamuyo kamo para sa mga nagahingabot sa inyo, agod mangin-anak kamo sang inyo Amay nga yara sa langit. Kay wala sing kapin kag kulang ang pagpasilak niya sang iya adlaw sa mga malain kag mga maayo, kag pareho man lang ang iya paghatag sing ulan sa mga matarong kag di-matarong. Ti ngaa gid abi nga ang Dios maghatag sa inyo sing balos kon ang inyo ginahigugma amo man lang ang mga tawo nga nagahigugma sa inyo? Bisan ang mga manugsokot sang buhis nagahimo man sina! Kag kon ang ginabugno ninyo ang inyo man lang mga amigo, pinasahi gid bala ina? Bisan ang mga pagano nagahimo man sina! Gani, magmanginhimpit kamo, subong nga ang inyo Amay sa langit himpit.”

Hunyo 17 | Hunyo 19