Marso 16, 2021, Martes, Ika-4 nga Semana sang Kwaresma

Liturhiya sang Pulong

Nahauna nga Balasahon - Ezequiel 47:1-9, 12

Salmo sa Pagsabat - Mga Salmo 46:2-3, 5-6, 8-9

Sa Wala pa ang Ebanghelyo - Mga Salmo 51:12, 14

Ebanghelyo - Juan 5:1-16

Ang Pagbasa gikan sa Libro ni:

Ezequiel nga Propeta 47:1-9, 12

   Gindala ako liwat sang tawo sa alagyan pakadto sa Templo. May tubig nga nagatubod halin sa idalom sang alagyan kag nagailig pakadto sa sidlangan sa diin ang Templo nagaatubang. Nagailig ini paidalom gikan sa idalom sang nabagatnan nga bahin sang Templo nga nagaagi sa nabagatnan nga kilid sang altar. Dayon gindala ako sang tawo sa nagwa nga bahin sang Templo paagi  sa naaminhan nga puwerta kag gindala niya ako pa gwa pakadto sa puwerta nga nagaatubang sa sidlangan. Ang isa ka diutay nga tuboran nagailig pakadto sa gwa sa nabagatnan nga bahin sang puwerta. Paagi sa iya inugtakos, ang tawo nagtakos sing 500 ka bara paubos sa ginailigan sang tubig pakadto sa sidlangan kag ginpaubog niya ako. Ang kadalom ang tubig nalambot sa akon bukobuko. Dayon nagtakos sia liwat sing 500 ka bara kag ang tubig naglambot sa akon tuhod. Sa madason pa nga 500 ka bara ang tubig naglambot sa akon hawak. Sang ulihi nagtakos pa gid sia sing 500 ka bara, kag didto ang tubig tama na kadalom nga indi na ako makatungkad. Tama na ini kadalom sa bagay nga indi na makatabok luas lamang sa paglangoy. Nagsiling sia sa akon, “Tawo nga mamalatyon, talupangda ini sing maayo.” 

   Dayon gindala ako sang tawo pabalik sa pangpang sang suba, kag sang makaabot ako didto, nakita ko nga may madamo nga mga kahoy sa magtimbang nga pangpang. Nagsiling sia sa akon, “Ini nga tubig nagailig sa duta pakadto sa sidlangan padulhog sa kapatagan sang Jordan kag pakadto sa Patay nga Dagat. Kon mag-ilig ini pakadto sa Patay nga Dagat nagapatab-ang ini sang tubig. Bisan diin mag-ilig ini nga tuboran, yara ang tanan nga mga sapat kag mga isda. Ang tuboran magapatab-ang sang tubig sa Patay nga Dagat, kag bisan diin ini nagailig, nagadala ini sing kabuhi. Sa tagsa ka pangpang sang sapa ang tanan nga sahi sang kahoy magatubo, kag amo ini ang pagakuhaan sang pagkaon. Ang ila mga dahon indi malaya, kag indi mag-untat sa pagpamunga. Magapamunga sila kada bulan, kay gintubigan sila paagi sa tuboran nga nagailig halin sa Templo. Ang mga kahoy pagakuhaan sing kalan-on kag ang ila mga dahon pagagamiton subong mga bulong.”

Salmo sa Pagsabat:

Mga Salmo 46:2-3, 5-6, 8-9

(S) Ang Ginoo nga makagagahom kaupod naton; ang Dios ni Jacob, aton dalangpan. 

Ang Dios amo ang aton dalangpan kag kusog, handa sa gihapon sa pagbulig sa tion sang mga kagamo. Gani indi kita magkahadlok, bisan pa tay-ugon ang duta kag ang mga bukid magkalatumba pakadto sa kadadalman sang dagat. (S)

May isa ka suba nga nagadala sing kalipay sa siyudad sang Dios, sa balaan nga balay sang Labing Mataas. Ang Dios nagapuyo sa sini nga siyudad, kag indi gid ini maguba, sa kaagahon magaabot sia sa pagbulig sini. (S)

Ang Ginoo nga Makagagahom kaupod naton, ang Dios ni Jacob aton dalangpan! Kari, tan-awa kon ano ang nahimo sang Ginoo! Tan-awa, kon daw ano ka makatilingala ang mga butang nga iya nahimo sa duta! (S) 

Sa Wala pa ang Ebanghelyo:

Mga Salmo 51:12, 14

   O Dios, tugaha sa akon ang isa ka matinlo nga tagipusoon, kag i-uli sa akon ang kalipay sang imo kaluwasan. 

Ang Pagbasa sang Santos nga Ebanghelyo suno kay:

San Juan 5:1-16

   Sa tapos sadto may piesta ang mga Judio, kag si Jesus nagpa-Jerusalem. Didto sa Jerusalem, malapit sa Puwerta sang Karnero, may punong nga ginalibutan sang lima ka portico. Sa Hebreo ini nga punong ginatawag Betzata. Madamo nga mga masakiton ang nagahiligda sa portico—mga bulag, mga piang kag mga paralitiko. Nagahulat sila nga maghulag ang tubig, kay may tion nga ang anghel sang Ginoo nagapanaog sa punong kag nagatublag sang tubig. Ang nahauna nga makalusong sa punong sa tapos matublag sang anghel ang tubig magaayo sa bisan ano nga balatian niya. May isa ka tawo didto nga nagmasakit sa sulod sang 38 ka tuig. Nakita sia ni Jesus nga nagahigda didto, kag nahibaluan niya nga ang tawo nagmasakit sa amo na nga kadugayon, gani nagsiling si Jesus sa iya, “Luyag ka bala mag-ayo?” 

   Ang masakiton nagsabat, “Sir, wala sing tawo nga nagadala sa akon sa punong kon ang tubig ginatublag; samtang nagatinguha pa lang ako sa paglusong ginaunahan ako sang iban.” 

   Si Jesus nagsiling sa iya, “Bangon ka, dalha ang imo banig kag maglakat.” Sa gilayon nag-ayo ang tawo sa iya masakit; gindala niya ang iya banig kag naglakat. 

   Nahanabo ini sang Adlaw nga Inugpahuway. Gani ang mga pangulo sang mga Judio nagsiling sa tawo nga gin-ayo, “Adlaw ini nga Inugpahuway, kag batok sa aton Kasugoan nga magdala ka sang imo banig.” 

   Nagsabat sia, “Ang tawo nga nag-ayo sa akon nagsiling sa akon, ‘Dalha ang imo banig kag maglakat.’” 

   Ginpamangkot nila sia, “Sin-o bala ang tawo nga nagsugo sa imo sa pagdala sang imo banig kag sa paglakat?” 

   Pero ang tawo nga gin-ayo wala makakilala kon sin-o yadto, kay si Jesus nakahalin na tungod sang madamo nga mga tawo sa sadto nga duog. 

   Sang ulihi nakita sia ni Jesus sa templo kag nagsiling sa iya, “Kita mo, maayo ka na karon. Indi ka na magpakasala, kay basi malain pa gid ang mahanabo sa imo.” 

   Dayon ang tawo naglakat kag iya ginsugiran ang mga pangulo sang mga Judio nga si Jesus amo ang nag-ayo sa iya. Tungod sini nagsugod sila sa paghingabot kay Jesus, tungod kay nagpang-ayo sia sa Adlaw nga Inugpahuway.

Marso 15 | Marso 17

Marso 15, 2021, Lunes, Ika-4 nga Semana sang Kwaresma

 Liturhiya sang Pulong

Nahauna nga Balasahon - Isaias 65:17-21

Salmo sa Pagsabat - Mga Salmo 30:2 kag 4, 5-6, 11-12 kag 13

Sa Wala pa ang Ebanghelyo - Amos 5:14

Ebanghelyo - Juan 4:43-54

Ang Pagbasa gikan sa Libro ni:

Isaias nga Propeta 65:17-21

   Ang Ginoo nagasiling, “Magatuga ako sing bag-o ngaduta kag bag-o nga langit. Ang nagliligad nga mga hitabo malipatan sing bug-os. Magkalipay kamo kag magkasadya sa walay katubtoban sa akon gintuga. Ang bag-o nga Jerusalem nga akon ginhimo mapuno sang kalipay, kag ang iya mga pumoluyo magakalipay. Ako, subong man, mapun-an sing kalipay, tungod sa Jerusalem kag sang iya mga pumoluyo. Wala na sing hinibi didto, wala sing pagpanawag sing bulig. Ang mga kabataan indi mapatay samtang lapsag pa sila, kag ang tagsatagsa magakabuhi sing malawig. Ang mga nagakabuhi sing 100 ka tuig kabigon nga pamatan-on pa. Ang mga mapatay nga indi pa makalambot sa 100 ka tuig ang ila edad, nagakahulogan nga ginsilutan ko sila. Ang mga tawo magapuyo sa mga balay nga ila ginpatindog—kag indi ang iban ang magapulos sini. Magatanom sila sing mga ubas, kag magainom sang bino-indi ini pag-imnon sang iban. 

Salmo sa Pagsabat:

Mga Salmo 30:2 kag 4, 5-6, 11-12 kag 13

(S) O Ginoo, bansagon ko ikaw kay ginluwas mo ako.

Nagadayaw ako sa imo, O Ginoo kay ginluwas mo ako, kag wala ka magtugot nga hikayan ako sang akon mga kaaway. Ginpabalik mo ako halin sa kalibutan sang mga patay, kaupod ako sang mga nagpanaog sa kadadalman, pero gin-uli mo ang akon kabuhi. (S)

Mag-amba kamo sing mga pagdayaw sa Ginoo, kamo nga matutom niya nga mga tawo! Dumdoma ninyo ang ginhimo sang Balaan, kag inyo sia pasalamatan! Ang iya kaakig wala nagadugay, pero ang iya kaayo tubtob sa ikamatay. Ayhan may kasubo sa kagab-ihon, pero nagaabot ang kalipay sa kaagahon. (S)

Pamatii ako kag kaluoyi, O Ginoo! Buligi man ako, O Ginoo!" Ginbayluhan mo ang akon kalisod sang kalipay; Gani, indi ako maghipos; magakanta ako sang mga pagdayaw sa imo. O Ginoo, Ikaw ang akon Dios, magapasalamat ako sa imo sa wala sing katapusan. (S) 

Sa Wala pa ang Ebanghelyo:

Amos nga Propeta 5:14

   Tinguhaa ninyo ang paghimo sang matarong kag indi ang malaut, agod magkabuhi kamo; dayon ang Ginoo mangin kaupod ninyo. 

Ang Pagbasa sang Santos nga Ebanghelyo suno kay:

San Juan 4:43-54

   Sadto nga panahon: sa tapos sang duha ka adlaw nga nakapabilin didto si Jesus, naglakat sia kag nagkadto sa Galilea. Kay si Jesus mismo nagsiling, “Ang propeta wala ginatahod sa iya kaugalingon nga banwa.” Sang pag-abot ni Jesus sa Galilea, gin-abiabi sia sang mga tawo didto, kay sila ila nakakadto sa Jerusalem sa Piesta sang Pascua, kag nakita nila ang tanan nga ginhimo niya sang piesta. 

   Gani nagbalik si Jesus sa Cana sang Galilea sa diin ginhimo niya nga bino ang tubig. May isa ka opisyal sang gubyerno didto nga ang iya anak nga lalaki nagamasakit sa Capernaum. Sang pagkabati niya nga si Jesus nag-abot sa Galilea halin sa Judea, nagkadto sia kay Jesus, kag iya ginpangabay nga magkadto sa Capernaum kag ayuhon ang iya anak nga tagumatayon. Si Jesus nagsiling sa iya, “Kon indi ninyo makita ang dalagku kag makatilingala nga mga buhat, indi kamo magtuo.” 

   Ang opisyal nagsabat, “Sir, upod ka sa akon sa wala pa mapatay ang akon anak.” 

   Si Jesus nagsiling sa iya, “Lakat ka, ang imo anak indi mapatay!” Ang opisyal nagtuo sa mga pulong ni Jesus kag naglakat. Sang nagahinampot sia sa iya balay, ginsugata sia sang iya mga suloguon kag ginsugiran, “Ang imo anak maayo na.”

   Ginpamangkot niya sila kon san-o nag-ayuayo ang iya anak, kag nagsiling sila, “Mga alauna kahapon sing hapon wala na sia sing hilanat.” 

   Nadumdoman dayon sang amay nga amo gid yadto nga oras sang magsiling si Jesus sa iya, “Ang imo anak indi mapatay.” Gani sia kag ang iya bug-os nga panimalay nagtuo. 

   Amo ini ang ikaduha nga gamhanan nga buhat nga ginhimo ni Jesus halin sang pag-abot niya sa Galilea gikan sa Judea.

Marso 14 | Marso 16

Marso 14, 2021, Ika-4 nga Domingo sang Kwaresma

Liturhiya sang Pulong

Nahauna nga Balasahon - Mga Cronica 36:14-16, 19-23

Salmo sa Pagsabat - Mga Salmo 137:1-2, 3, 4-5, 6

Ika-2 nga Balasahon - Efeso 2:4-10

Sa Wala pa ang Ebanghelyo - Juan 3:16

Ebanghelyo - Juan 3:14-21

1. Ang Pagbasa gikan sa Ikaduha nga Libro sang:

Mga Cronica 36:14-16, 19-23

Sadto nga mga inadlaw: ang mga pangulo sang Juda, ang mga pari, kag ang mga tawo nagsunod sang malaut nga ginahimo sang mga pungsod sa ila palibot sa pagsimba sang mga diosdios, kag gindagtaan nila ang Templo, nga ginpakabalaan sang Ginoo mismo. Ang Ginoo, ang Dios sang ila mga katigulangan, nagapadayon sa pagpadala sang mensahero sa pagpaandam sa ila, kay luyag niya nga luwason ang iya mga tawo kag ang iya Templo. Pero gin-uligyat nila ang mga mensahero sang Dios, wala ginsapak ang iya mga pulong, kag ginkadlawan ang iya mga propeta, tubtob nga sang ulihi ang kaakig sang Ginoo nagdabdab batok sa ila nga indi na sila makapalagyo.

Ginsunog niya ang Templo kag ang siyudad, lakip ang tanan niya nga mga palasyo kag manggad, kag ginguba ang pader sang siyudad. Ang nabilin nga buhi iya gindala sa Babilonia, sa diin nag-alagad sila sa iya kag ang iya mga kaliwat subong mga ulipon, tubtob sa paggahom sang Ginharian sang Persia. Amo ini ang katumanan sang ginsiling sang Ginoo paagi sa iya propeta nga si Jeremias: “Ang duta manginmamingaw ini sa sulod sang 70 ka tuig, bilang bayad sang Inugpahuway sang duta nga wala gintuman.”

Sa nahauna nga tuig nga si Ciro amo ang emperador sang Persia, ang Ginoo nagpanghikot sa iya mga maghimo sang isa ka mando nga isulat kag ipabantala bisan diin sa bug-os nga ginharian.  Ini ginhimo sa pagtuman sang ginsiling sang Ginoo paagi kay Jeremias nga propeta.

“Amo ini ang mando ni Ciro, Emperador sang Persia. “Ang Ginoo, ang Dios sang langit, naghimo sa akon nga hari sa bug-os nga kalibutan kag naghatag sa akon sing katungdanan sa pagpatindog sing Templo para sa iya sa Jerusalem, sa Juda. Karon, tanan kamo nga mga tawo sang Dios, magpauli didto, kag kabay ang Dios mag-ubay sa inyo.”

Salmo sa Pagsabat:

Mga Salmo 137:1-2, 3, 4-5, 6

(S) Kabay nga indi na gid ako makakanta liwat kon indi ko ikaw pagdumdumon.

Sa ubay sang mga suba sang Babilonia nagpungko kami kag naghibi sang madumdoman namon ang Sion. Sa mga kahoy nga sawse didto ginsang-at namon ang amon mga arpa. (S)

Ang mga nagbihag sa amon nagsugo sa amon sa pagkanta, ginsugo nila kami sa paglingaw sa ila: “Kantahi kami sing ambahanon nahanungod sa Sion!” (S)

Paano abi ang pagkanta namon sang ambahanon sang Ginoo sa duta sang mga dumoluong? Kabay nga indi na gid ako makatukar liwat sang arpa, kon malimtan ko ikaw, O Jerusalem! (S)

Kabay nga indi na gid ako makakanta liwat, kon indi ako magdumdom sa imo, kon indi ako magpanumdom sa imo subong nga akon labing daku nga kalipay! (S)

2. Ang Pagbasa gikan sa Sulat ni San Pablo nga Apostol, sa mga:

Taga-Efeso 2:4-10

Mga utod, bugana kaayo ang kaluoy sang Dios, kag daku gid ang iya gugma sa aton, sa bagay nga bisan nga patay kita sa espirituhanon nga kabuhi tungod sang aton mga paglapas, iya kita ginbuhi upod kay Cristo. Paagi sa grasya sang Dios naluwas kamo. Sa aton paghiusa kay Cristo Jesus ginbanhaw niya kita upod sa iya sa paggahom upod man sa iya sa langitnon nga ginharian. Ginhimo niya ini agod mapakita sa tanan nga palaabuton nga panahon ang bugana nga mga manggad sang iya grasya, sa gugma nga iya ginpakita sa aton kay Cristo Jesus. Kay sa grasya sang Dios naluwas kamo paagi sa pagtuo. Indi ini paagi sa inyo nahimo, kundi bugay ini sang Dios. Wala kamo sing may ipabugal sini, kay indi ini bunga sang inyo kaugalingon nga mga pagpaninguha. Ang Dios amo ang aton Manunoga, kag sa aton paghiusa kay Cristo Jesus gintuga niya kita sa pagkabuhi agod maghimo sing maayo nga mga buhat, nga iya na nga daan gin-aman agod himuon naton. 

Sa wala pa ang Ebanghelyo:

San Juan 3:16

Ginhigugma sang Dios ang kalibutan sa bagay nga ginhatag niya ang iya bugtong nga Anak, ang tagsatagsa nga magtuo sa iya may kabuhi nga wala sing katapusan.

Ang Pagbasa sang Santos nga Ebanghelyo suno kay:

San Juan 3:14-21

Nagsiling si Jesus kay Nikodemo, "Subong nga si Moises nagbayaw sang man-og nga saway sa isa ka tukon didto sa desierto, sa amo man nga bagay pagabayawon ang Anak sang Tawo, agod nga ang tagsatagsa nga magtuo sa iya may kabuhi nga wala sing katapusan. Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang tagsatagsa nga nagatuo sa iya indi na mapatay, kundi may kabuhi nga wala sing katapusan. Kay ang Dios wala magpadala sang iya Anak sa kalibutan sa paghukom sang kalibutan, kundi sa pagluwas sang kalibutan. 

Ang bisan sin-o nga nagatuo sa Anak indi pagkondenahon, pero ang bisan sin-o nga wala nagatuo nakondenar na, bangod kay wala sia magtuo sa bugtong nga Anak sang Dios. Amo ini ang kabangdanan sang pagkondenar: ang kapawa nagkari sa kalibutan, pero ang mga tawo naghigugma sang kadudolman sa baylo sang kapawa, kay malaut ang ila ginahimo. Kag ang bisan sin-o nga nagahimo sing malaut nagakontra sa kapawa kag indi magpalapit sa kapawa, kay indi sia luyag nga masapwan ang iya malain nga binuhatan. Pero ang bisan sin-o nga nagaginawi suno sa kamatuoran nagapalapit sa kapawa, agod mapahayag sang kapawa ang tanan nga iya ginhimo sa pagtuman sa Dios. 

Marso 13 | Marso 15

Marso 13, 2021, Sabado, Ika-3 nga Semana sang Kwaresma

 Liturhiya sang Pulong

Nahauna nga Balasahon - Oseas 6:1-6

Salmo sa Pagsabat - Mga Salmo 51:3-4, 18-19, 20-21AB

Sa Wala pa ang Ebanghelyo - Mga Salmo 95:8

Ebanghelyo - Lucas 18:9-14

Ang Pagbasa gikan sa Libro ni:

Oseas nga Propeta 6:1-6

   Ang mga tawo nagasiling, “Dali, mabalik kita sa Ginoo. Gingus-ab niya kita, pero sia magaayo sa aton. Ginpilas niya kita, pero pagabugkosan niya ang aton mga pilas. Pagkatapos sang duwa ka adlaw buhion niya kita. Sa ikatlo nga adlaw pabangunon niya kita, kag magapuyo kita sa iya atubangan. Tinguhaan ta ang pagkilala sa Ginoo. Pat-od gid ang iya pag-abot sa aton kaangay sang pagpamanagbanag sang adlaw. Magaabot sia sa aton kaangay sang ulan, subong kapat-od sang ulan sa tingulan nga nagapatubig sang duta.” 

Ang Ginoo nagasiling, “O Israel kag Juda, ano ang himuon ko sa inyo? Ang paghigugma ninyo sa akon madali madula kaangay sang alapuop sa aga, kaangay ini sang tun-og nga aga pa wala na. Gani ginpadala ko sa inyo ang akon mga propeta nga nagadala sang akon pahibalo sang pagsilot kag paglaglag. Ang luyag ko nga himuon sang akon mga tawo maathag. Ang ginapangita ko sing labi amo ang inyo malig-on nga paghigugma, kag indi ang inyo mga halad nga hayop. 

Labing maayo pa nga ang akon mga tawomagkilala sa akon sang sa magdulot sing mga halad nga sinunog sa akon.

Salmo sa Pagsabat:

Mga Salmo 51:3-4, 18-19, 20-21AB

(S) Akon nahamut-an ang kaluoy labi pa sang sa sakripisyo.

Kaluoyi man ako, O Dios, tungod sang imo mapinadayunon nga gugma, panasa ang akon mga sala, tungod sang imo daku nga kaluoy! Hugasi sing lubos ang akon kalaut, kag tinloi ako sa akon sala! (S)

Indi ka luyag sang mga halad, kay kuntani magahalad ako; wala ka malipay sang mga halad nga sinunog. Ang akon halad, O Dios, amo ang mapainuboson nga espiritu, ang mapainuboson kag matinumanon nga tagipusoon indi mo pagsikwayon. (S)

O Dios, kaluoyi ang Sion kag buligi sia; patinduga liwat ang mga pader sang Jerusalem. Dayon magakalipay ikaw sa nagakaigo nga mga halad, kag sa tanan nga mga halad nga sinunog. (S)

Sa wala pa ang Ebanghelyo:

Mga Salmo 95:8

   Karon nga adlaw indi ninyo pagpatig-aha ang inyo mga kasingkasing; kundi pamatii ninyo ang ginasiling sang Dios.

Ang Pagbasa sang Santos nga Ebanghelyo suno kay:

San Lucas 18:9-14

   Sa mga tawo nga nagakabig sang ila kaugalingon nga matarong kag nagatamay sa iban, si Jesus nagsugid man sini nga palaanggiran. “May duha ka tawo nga nagkadto sa templo sa pagpangamuyo. Ang isa Fariseo kag ang isa manugsokot sang buhis. Ang Fariseo nagtindog kag nagpangamuyo sing subong sini, ‘Nagapasalamat ako sa imo, O Dios, nga indi ako subong sang iban nga mga tawo nga sakon, mga madaya, mga babayidor, ukon subong sining manugsokot sang buhis. Nagapuasa ako sing makaduha sa isa ka simana, kag nagahatag ako sa imo sang ikapulo sang tanan ko nga kinitaan.’ Pero ang manugsokot sang buhis nagtindog sa malayo, kag indi gani sia magtangla sa langit, kundi nagpamukpok sang iya dughan kag nagsiling, ‘O Dios, kaluoyi ako nga makasasala!’ Nagasiling ako sa inyo nga ining tawo nagpauli sa iya balay nga ginpakamatarong sang sa isa. Kay ang nagapakataas sang iya kaugalingon pagapaubson, kag ang nagapaubos sang iya kaugalingon pagapataason.”

Marso 12 | Marso 14

Marso 12, 2021, Biyernes, Ika-3 nga Semana sang Kwaresma

Liturhiya sang Pulong

Nahauna nga Balasahon - Oseas 14:2-10

Salmo sa Pagsabat - Mga Salmo 81:6-8, 8-9, 10-11, 14 kag 17

Sa Wala pa ang Ebanghelyo - Mateo 4:17

Ebanghelyo - Marcos 12:28-34

Ang Pagbasa gikan sa Libro ni:

Oseas nga Propeta 14:2-10

   Magbalik kamo sa Ginoo, kag himoa ninyo ini nga pangamuyo nga inyo halad sa iya: “Patawara kami sang amon mga sala, kag batuna ang amon pangamuyo, kag magadayaw kami sa imo suno sa amon ginsaad. Ang Asiria indi gid makaluwas sa amon, kag ang amon mga karuwahi sa inaway indi makaapin sa amon. Indi na kami magsiling liwat sa amon mga diosdios, ‘Kamo amo ang amon Dios.’ Ginakilala namon, O Ginoo, nga ikaw nagakaluoy sa ila nga wala na sing iban nga ginadangpan.” 

   Pabalikon ko sa akon ang akon mga tawo. Higugmaon ko sila sa bug-os ko nga tagipusoon, kay wala na ako naakig sa ila. Sa mga tawo sang Israel manginkaangay ako sang ulan sa mamala nga duta. Magapamukadkad sila kaangay sang mga bulak, magapanggamot sila sing madalom kaangay sang mga kahoy sa Libano. Magapanalingsing sila kag manginmatahom kaangay sang mga kahoy nga olivo. Manginmahamot sila kaangay sang mga sedro sa Libano. Sa liwat magakabuhi sila sa idalom sang akon pag-apin. Magalagtom sila kaangay sang hardin kag manginmabungahon kaangay sang talamnan sang ubas. Manginbantog sila kaangay sang bino sa Libano. Ang mga tawo sang Israel indi na magsapak sang mga diosdios, sabton ko ang ila mga pangamuyo kag tatapon ko sila. Pasilungon ko sila sa akon kaangay sang madabong nga kahoy. Ako ang ginagikanan sang tanan nila nga mga kaayuhan. 

   Kabay nga sila nga mga maalam makahangop sang ginasulat diri kag ila ini huptan sa ila tagipusoon. Ang mga dalanon sang Ginoo husto, kag ang matarong nga mga tawo nagakabuhi paagi sini, pero ang mga makasasala nagakasandad tungod kay wala sila nagakabuhi suno sa sini nga mga dalanon.

Salmo sa Pagsabat:

Mga Salmo 81:6-8, 8-9, 10-11, 14 kag 17

(S) Ako ang Ginoo nga imo Dios. Pamatii ninyo ang akon paandam.

Nabatian ko ang tingog nga wala ko makilala nga nagasiling “Ginkuha ko ang mabug-at nga karga sa imo likod, ginpabutang ko sa imo ang imo mga alat. Sang ikaw yara sa kagamo, nagpanawag ikaw sa akon, kag ako nagluwas sa imo. (S)

Gikan sa akon ginapanaguan sa bagyo, nagsabat ako sa imo; gintilawan ko ikaw didto sa mga tuboran sang Meriba. “Mga tawo ko, pamatii ninyo ang akon paandam, O Israel, magpamati ka kuntani sa akon! (S)

Indi ka gid mag-alagad sa iban nga Dios, ukon magsimba sa kay bisan sin-o kundi sa akon lamang. Ako ang Ginoo nga imo Dios, nga nagpagwa sa imo sa duta sang Egipto. (S)

Daw ano ang akon handom nga pamatian ako kuntani sang akon mga tawo; daw ano ang akon handom nga tumanon kuntani nila ako! Pakaunon ko kamo sang pinili nga trigo, kag busgon ko kamo sang dugos sa talon." (S)

Sa wala pa ang Ebanghelyo:

San Mateo 4:17

   Magbiya kamo sang inyo mga sala siling sang Ginoo; ang Ginharian sang Langit malapit na.

Ang Pagbasa sang Santos nga Ebanghelyo suno kay:

San Marcos 12:28-34

   May isa ka manunodlo sang Kasugoan didto nga nakabati sang ila pagbinaisay. Natalupangdan niya nga si Jesus nagsabat sa ila sing nagakaigo. Gani, nagpamangkot man sia sa iya, “Ano gid bala ang labing importante nga sugo sa tanan?” 

   Si Jesus nagsabat, “Amo ini ang labing importante nga sugo, ‘Pamati ka, O Israel, ang Ginoo nga aton Dios amo lamang ang Ginoo. Higugmaa ang Ginoo nga imo Dios sa bug-os mo nga tagipusoon, sa bug-os mo nga kalag, sa bug-os mo nga hunahona, kag sa bug-os mo nga kusog.’ Ang ikaduha amo ini, ‘Higugmaa ang imo isigkatawo subong sang imo kaugalingon.’ Wala na sing sugo nga labi pa ka importante sa sining duha.” 

   Ang manunodlo sang Kasugoan nagsiling sa iya, “Husto gid, Manunodlo! Matuod ang siling mo, nga isa lamang ang Dios, kag wala na gid sing iban pa luas sa iya. Kag dapat higugmaon sang tawo ang Dios sa bug-os niya nga tagipusoon, sa bug-os niya nga hunahona, kag sa bug-os niya nga kusog, kag dapat niya higugmaon ang iya isigkatawo subong sang iya kaugalingon. Labi pa ka importante ang pagtuman sining duha ka sugo sang sa tanan nga halad nga sinunog kag halad nga inihaw.” 

   Kag sang pagkahibalo ni Jesus nga maayo ang iya sabat, iya sia ginsingganan, “Indi ka malayo sa Ginharian sang Dios.” 

   Sa tapos sadto, wala na gid sing may nangahas sa pagpamangkot kay Jesus.

Marso 11 | Marso 13

Marso 11, 2021, Huwebes, Ika-3 nga Semana sang Kwaresma

Liturhiya sang Pulong

Nahauna nga Balasahon - Jeremias 7:23-28

Salmo sa Pagsabat - Mga Salmo 95:1-2, 6-7, 8-9

Sa Wala pa ang Ebanghelyo - Joel 2:12-13

Ebanghelyo - Lucas 11:14-23

Ang Pagbasa gikan sa Libro ni:

Jeremias nga Propeta 7:23-28

Ang Ginoo nagsiling, "Nagsugo ako sa ila nga ila ako tumanon, agod nga Ako mangin-ila Dios kag sila mangin-akon mga tawo. Kag ginsingganan ko sila nga magkabuhi suno sa akon ginsugo sa ila, agod ang tanan manginmaayo para sa ila. Pero wala sila magtuman ukon magpamati sa akon, kundi ginhimo nila ang bisan ano nga ginsiling sang ila matig-a kag malaut nga mga tagipusoon, sa bagay nga naglain pa gid sila sa baylo nga magmaayo. Sugod sadto nga adlaw nga ang inyo nga katigulangan naggwa sa Egipto tubtob karon nga adlaw, nagpadayon ako sa pagpadala sang tanan ko nga mga alagad nga mga propeta sa inyo. Pero wala kamo magpamati ukon magsapak, sa baylo nagmatig-a ang inyo mga ulo, kag nagginawi kamo sing malaut pa sang sa inyo mga katigulangan. “Gani, Jeremias, nagahambal ikaw sini nga mga pulong sa akon mga tawo, pero indi sila magpamati sa imo. Magatawag ikaw sa ila, peroindi sila magsabat. Magasiling ikaw sa ila nga ang ila pungsod indi magtuman ukon magpatudlo sa akon, ang Ginoo nga ila Dios. Ang pagkamatutom wala na. Indi na gani sila maghambal nahanungod sini.” 

Salmo sa Pagsabat:

Mga Salmo 95:1-2, 6-7, 8-9

(S) Karon nga adlaw pamatii ninyo ang ginasiling sang Ginoo: "Indi ninyo pagpatig-aha ang inyo mga kasingkasing.

Kari kamo, dayawon ta ang Ginoo! Magkanta kita sing malipayon sa aton mangangapin kag manlulowas! Magpalapit kita sa iya atubangan nga may pagpasalamat, kag magkanta sing masadya nga mga ambahanon sang pagdayaw! (S)

Kari kamo, magyaub kita kag magsimba sa iya; magluhod kita sa atubangan sang Ginoo nga aton Manunoga! Sia amo ang aton Dios, kag kita ang mga tawo nga iya ginaatipan, ang mga panong nga iya ginapahalab. Karon pamatii ang iya ginasiling. (S)

“Indi kamo magpakatig-a subong sang inyo mga katigulangan didto sa Meriba, subong sang didto sila sa desierto sa Masa. Didto gintilawan kag ginsulay nila ako, bisan nakita na nila ang akon ginhimo para sa ila. (S)

Sa Wala pa ang Ebanghelyo:

Joel nga Propeta 2:12-13

Ang Ginoo nagsiling: "Magbalik kamo sa akon sing makinasingkasingon, kay ako labi ka maluloy-on.

Ang Pagbasa sang Santos nga Ebanghelyo suno kay:

San Lucas 11:14-23

Gintabog ni Jesus ang isa ka yawa nga apa. Sang makagwa ang yawa sa tawo, ang tawo naghambal. Natingala gid ang mga tawo, ugaling ang iban sa ila nagsiling, “Si Beelzebul nga hari sang mga yawa ang naghatag sa iya sing gahom sa pagtabog sa ila.” Ang iban luyag magdakupdakop sa iya, gani nagpangayo sila nga maghimo sia sing milagro sa pagpamatuod nga ang Dios nahamuot sa iya. Pero si Jesus nga nakahibalo sang ila mga panghunahona nagsiling sa ila, “Kon ang mga pumoluyo sang isa ka pungsod nagabinahinbahinay kag nagailinaway, ina nga pungsod malaglag. Ang panimalay nga nagabinahinbahinay magabuloblag. Gani, kon ang ginharian ni Satanas magbinahinbahinay, paano bala ini makapadayon? Suno sa inyo nagatabog ako sang mga yawa tungod sang gahom nga ginhatag sa akon ni Beelzebul. Kon nagatabog ako sang yawa paagi kay Beelzebul, sa ano bala nga paagi ang inyo mga sumolunod nagatabog sang yawa? Gani, ang inyo mga sumolunod nagapamatuod nga sayop gid kamo! Sa gahom sang Dios nagatabog ako sang mga yawa, kag ini nagapamatuod nga ang Ginharian sang Dios nakaabot na sa inyo. “Kon ang isa ka makusog nga tawo nga lupit sa hinganiban nagabantay sang iya kaugalingon nga balay, indi maano ang tanan niya nga pagkabutang. Pero kon gubaton sia sang mas makusog pa nga tawo kag madaog sia, maagaw sang makusog nga tawo ang tanan niya nga mga hinganiban nga ginasaligan, kag pamartidahon niya ang iya mga inagaw. “Ang wala nagadampig sa akon batok sa akon, kag ang wala nagabulig sa akon sa pagpanipon nagapaaplaag.”

Marso 10 | Marso 12

Marso 10, 2021, Miyerkules, Ika-3 nga Semana sang Kwaresma

Liturhiya sang Pulong

Nahauna nga Balasahon - Deuteronomio 4:1, 5-9

Salmo sa Pagsabat - Mga Salmo 147:12-13, 15-16, 19-20

Sa Wala pa ang Ebanghelyo - Juan 6:63, 68

Ebanghelyo - Mateo 5:17-19

Ang Pagbasa gikan sa Libro sang:

Deuteronomio 4:1, 5-9

   Dayon si Moises nagsiling sa mga tawo, “Tumana ninyo ang tanan nga mga kasugoan nga akon ginatudlo sa inyo kag magakabuhi kamo kag mapanag-iyahan ninyo ang duta nga ginhatag sa inyo sang Ginoo nga Dios sang inyo mga katigulangan. 

   “Gintudloan ko kamo sang tanan nga mga kasugoan suno sa sugo sang Ginoo nga akon Dios. Tumana ini didto sa duta nga inyo pagagubaton kag panag-iyahan. Tumana ini sing maayo, kay paagi sini mapakita ninyo ang inyo kaalam kag ihibalo sa mga tawo sang iban nga mga kapungsoran. Kon mabatian nila ininga mga kasugoan magasiling sila, ‘Daw ano ang kaalam kag ihibalo sining gamhanan nga pungsod!’ 

   “Wala na sing iban nga pungsod, bisan daw ano kagamhanan nga may dios nga malapit sa ila kon magpanawag sila pareho sang Ginoo nga aton Dios. Nagasabat sia kon kita magpangayo sing bulig sa iya. Wala sing iban nga pungsod bisan daw ano ka gamhanan nga may mga kasugoan, nga pareho sang akon gintudlo sa inyo karon nga adlaw. Pag-andam kamo! Samtang buhi pa kamo indi ninyo pagkalimti ang inyo nakita. Sugiri ninyo ang inyo mga kabataan kag ang inyo mga kaapuhan. 

Salmo sa Pagsabat:

Mga Salmo 147:12-13, 15-16, 19-20

(S) O Jerusalem, dayawa ang Ginoo.

Dayawa ang Ginoo, O Jerusalem! Dayawa ang imo Dios, O Sion! Ginpabakod niya ang imo mga puwerta; ginahatagan niya sing mga kaayuhan ang imo mga tawo. (S)

Nagahatag sia sing mando, kag nagaabot ini gilayon sa duta. Nagapadala sia sing yelo subong kadamol sang bulbol sang karnero, kag ginalapta niya ini subong sang yab-ok. (S)

Nagahatag sia sang iya mensahe kay Jacob, sang iya mga pagtudlo kag kasugoan kay Israel. Wala niya ini ginhimo sa iban nga mga kapungsoran, wala sia makahibalo sang iya mga kasugoan. Dayawa ninyo ang Ginoo! (S)

Sa wala pa ang Ebanghelyo:

San Juan 6:63, 68

   Ang imo mga pulong, O Ginoo, amo ang Espiritu kag kabuhi; Yara sa imo ang pulong sang kabuhi nga wala sing katapusan.

Ang Pagbasa sang Santos nga Ebanghelyo suno kay:

San Mateo 5:17-19

   Si Jesus nagsiling sa iya mga gintiton-an, “Indi kamo maghunahona nga nagkari ako sa pagdula sang Kasugoan ni Moises kag sang mga ginpanudlo sang mga propeta. Wala ako magkari sa pagdula sini, kundi sa pagpaathag sang ila matuod nga kahulogan. Dumdoma ninyo ini! Samtang may langit pa kag duta, wala sing bisan isa ka kudlit ukon labing diutay nga bahin sang Kasugoan nga pagadulaon tubtob nga matuman ang tanan. Gani, ang bisan sin-o nga maglapas sang pinakadiutay sang mga Kasugoan kag magpanudlo sa iban sa paglapas man, manginlabing kubos sa Ginharian sang langit. Pero ang bisan sin-o nga magtuman sang Kasugoan kag magtudlo sa iban sa pagtuman man, mangindaku sa Ginharian sang langit.

Marso 9 | Marso 11

Marso 9, 2021, Martes, Ika-3 nga Semana sang Kwaresma

Liturhiya sang Pulong

Nahauna nga Balasahon - Daniel 3:25, 34-43

Salmo sa Pagsabat - Mga Salmo 25:4-5, 6 kag 7, 8-9

Sa Wala pa ang Ebanghelyo - Joel 2:12-13

Ebanghelyo - Mateo 18:21-35

Ang Pagbasa gikan sa Libro ni:

Daniel nga Propeta 3:25, 34-43

   Dayon nagpundo si Asarias kag sa mabaskog nga tingog nagpangamuyo sia sa tunga sang kalayo:

   “Pero tungod na lamang sang imo kadungganan, indi pagsikwaya ang imo saad sa amon kag indi kami pagpabayai sing dayon. Ihulog sa amon ang imo kaluoy. Dumdoma ang imo mga saad kay Abraham nga imo pinalangga, kay Isaac nga imo alagad, kag kay Jacob nga amay sang imo balaan nga mga tawo nga Israel. Ginsaad mo sa ila nga hatagan mo sila sing kaliwatan nga madamo kasubong sang mga bituon sa kalangitan ukon kasubong sang balas sa higad sang baybayon. 

   Pero sa karon, Ginoo, kami ang pinakadiutay nga pungsod; bisan sa diin kami, nagakabuhi kami sa kahuloy-an tungod sang amon mga sala. Yari kami nga wala sing hari, wala sing manalagna, ukon mga pangulo. Wala na sing Templo sa diin sarang kami makahalad sang sinunog nga mga dulot, mga halad, mga dulot kag insyenso. Wala na sing lugar sa diin sarang kami makadulot sa imo kag makakita sang imo kaluoy. 

   Pero sa tagipusoon nga mahinulsolon kag sa mapainuboson nga balatyagon nagapalapit kami sa imo sa pagpakiluoy nga imo kami batunon kasubong sang daw nagadulot sa imo sang mga halad nga sinunog nga mga karnero, baka nga toro kag linibo nga matambok nga mga karnero. Batona ang amon paghinulsol subong tanda sang amon karon mga halad agod nga amon ikaw matuman sa bug-os namon nga tagipusoon. Ang mga nagasalig sa imo indi nga mas-a mapaslawan. Sa karon, sa bug-os namon nga tagipusoon, nagasaad kami sa pagtuman sa imo, sa pagsimba kag sa pagpangamuyo sa imo. Kaluoyi kami kag indi na kami pagpakahuy-i. Sa karon, sa bug-os namon nga tagipusoon, nagasaad kami sa pagtuman sa imo, sa pagsimba kag sa pagpangamuyo sa imo. Kaluoyi kami kag indi na kami pagpakahuy-i. O Ginoo, luwasa kami paagi sa bisan isa sang imo milagro; padunggi ang imo ngalan.

Salmo sa Pagsabat:

Mga Salmo 25:4-5, 6 kag 7, 8-9

(S) O Ginoo, dumdoma ang imo kaayo.

Tudloi ako sang imo mga dalan, O Ginoo, ipakilala man ini sa akon. Tudloi ako sa pagkabuhi suno sa imo kamatuoran, kay ikaw ang akon Dios nga nagaluwas sa akon. (S)

Ginoo, dumdoma man ang imo kaayo kag mapinadayunon nga gugma, nga imo ginpakita halin pa gid sang una. Tungod sang imo mapinadayunon nga gugma kag kaayo, dumdoma man ako, O Ginoo! (S)

Ang Ginoo matarong kag maayo, ginatudloan niya ang mga makasasala sing dalan nga ila pagaagyan. Ginatuytoyan niya ang mapainuboson sa matadlong nga dalan, kag iya sila ginatudloan sang iya kabubut-on. (S)

Sa wala pa ang Ebanghelyo:

Joel nga Propeta 2:12-13

   Ang Ginoo nagsiling: "Magbalik kamo sa akon sing makinasingkasingon, kay ako labi nga maluloy-on.

Ang Pagbasa sang Santos nga Ebanghelyo suno kay:

San Mateo 18:21-35

   Nagpalapit si Pedro kay Jesus kag nagpamangkot, “Ginoo, makapila bala makasala ang akon utod sa akon kag ako magapatawad sa iya? Tubtob bala sa makapito?” 

   Si Jesus nagsabat, “Wala ako magsiling sa imo nga tubtob sa makapito, kundi 70 ka pito.” Kay ang Ginharian sang langit kaangay sang isa ka hari nga luyag maghusay sang mga utang sang iya mga suloguon sa iya. Sang nagahusay sia sang ila mga utang, may gindala sa iya nga nakautang sing minilyon ka pisos. Tungod nga indi makabayad ang suloguon sang iya utang, nagsugo ang iya agalon nga ibaligya sia, ang iya asawa, ang iya mga kabataan kag ang tanan niya nga pagkabutang agod mabayaran niya ang iya mga utang. Nagluhod ang suloguon sa atubangan sang iya agalon kag nagpakiluoy, ‘Amoy, hulatholata lang ako anay, kay bayaran ko ikaw sang tanan!’ Ang agalon naluoy sa iya, gani ginpalakat niya sia kag wala na pagpabayara sang iya utang. 

   “Karon naggwa sia kag nasugata niya ang isa man ka suloguon nga nakautang sa iya sing pila lamang ka pisos. Ginliab niya sia kag ginkuga nga nagasiling, ‘Bayari ang utang mo sa akon!’ Ang iya pareho nga suloguon nagluhod nga nagapakiluoy sa iya, ‘Hulatholata lang ako anay, kay bayaran ko ikaw!’ Pero indi gid sia makahulat. Sa baylo ginpabilanggo niya sia tubtob mabayaran niya ang iya utang. Sang pagkakita sini sang iban nga mga suloguon, naglain gid ang buot nila kag ginkadtuan nila ang ila agalon kag ginsugiran sang nahanabo. Gani ginpatawag sang agalon yadtong suloguon kag ginhambalan, ‘Walay pulos ka nga suloguon! Ginpatawad ko ang imo mga utang kay nagpakiluoy ka sa akon. Kuntani magkaluoy ka man sa pareho mo nga suloguon subong sang pagkaluoy ko sa imo.’ Naakig gid ang iya agalon kag ginpabilanggo sia agod masilutan tubtob nga bayaran niya ang tanan niya nga utang.” 

   Sa katapusan si Jesus nagsiling, “Amo man ini ang himuon sa inyo sang akon Amay sa langit kon ang tagsa sa inyo indi magpatawad sang inyo utod sa inyo tagipusoon.”

Marso 8 | Marso 10

Marso 8, 2021, Lunes, Ika-3 nga Semana sang Kwaresma

Liturhiya sang Pulong

Nahauna nga Balasahon - 2 Mga Hari 5:1-15

Salmo sa Pagsabat - Mga Salmo 42:2, 3; 43:3, 4

Sa Wala pa ang Ebanghelyo - Mga Salmo 130:5, 7

Ebanghelyo - Lucas 4:24-30

Ang Pagbasa gikan sa Ikaduha nga Libro sang:

Mga Hari 5:1-15

   Si Naaman nga pangulo sang mga hangaway sang Siria, gamhanan kag ginatahod sang hari sang Siria, tungod kay paagi kay Naaman, ang Ginoo nagpadaog sang mga hangaway sang Siria. Bantog sia nga hangaway, pero aruon sia. Sa isa sang ila pagsalakay batok sa Israel, ang mga Sirianhon nakabihag sing isa ka dalagita halin sa Israel nga nanginsuloguon sang asawa ni Naaman. Isa ka tion nagsiling ang dalagita sa iya ama, “Maayo kuntani nga makapakigkita ang akon amo sa propeta nga nagapuyo sa Samaria! Ayuhon gid sia sang iya aro.” Sang pagkabati sini ni Naaman, nagkadto sia sa hari kag nagsugid sang ginsiling sang dalagita. Ang hari nagsiling, “Kadto ka sa hari sang Israel kag dalha ini nga sulat sa iya.” 

   Gani si Naaman naglakat, nagdala sia sing 30,000 ka bilog nga pilak, 6,000 ka bilog nga bulawan kag napulo ka ilislan nga matahom nga bayu. Ang sulat nga iya gindala nagasiling, “Ini nga sulat nagapakilala sa imo sang akon opisyal nga si Naaman. Luyag ko nga ayuhon mo sia sang iya aro.”

   Sang mabasa sang hari sang Israel ang sulat, gingisi niya ang iya bayu sa kainit kag nagsiling, “Ano bala ang pagpaabot sang hari sang Siria nga ayuhon ko ini nga tawo? Nagahunahona bala sia nga ako Dios, nga may gahom sa paghatag sang kabuhi kag sa pagpatay? Maathag gid nga nagapangita lang sia sing kabangdanan nga mag-away kami!”

   Sang makabati si Eliseo sang natabo, nagpadala sia sining mga pulong sa hari: “Ngaa magkaakig ka gid? Ipadala diri ang tawo sa akon, kag ipakita ko sa iya nga may propeta sa Israel.”

   Gani si Naaman naglakat upod sa iya mga kabayo kag karuwahi, kag nagdulog sa puwertahan sang balay ni Eliseo. Si Eliseo nagpadala sang iya suloguon sa pagsiling kay Naaman nga magkadto sia kag magpanghugas sang iya kaugalingon sing makapito sa suba sang Jordan, kag magaayo sia sing bug-os sang iya aro. Pero si Naaman naglakat nga naakig kag nagsiling sa iya kaugalingon. “Nagahunahona ako nga maggwa sia kag magpangamuyo sa Ginoo nga iya Dios, magbayaw sang iya kamot sa ibabaw sang akon aro kag ayuhon ako! Wala labot sina, indi bala ang mga suba sang Abana kag Farfar didto sa Damasco maayo pa sa bisan diin nga suba sang Israel? Kuntani nagpanghugas na lang ako didto kag nag-ayo!”

   Ang iya mga suluguon nagkadto sa iya kag nagsiling, “Sir kon ang propeta nagsugo sa imo sa paghimo sing mabudlay nga butang, kuntani gintuman mo ini. Karon ngaa nga indi ka na lang magpanghugas sang imo kaugalingon suno sa iya ginsiling agod mag-ayo ka?”

   Gani si Naaman naglusong sa Jordan, nagtum-oy sang iya kaugalingon sing makapito suno sa ginsiling ni Eliseo, kag nag-ayo sia sing bug-os. Ang iya panit nagtinlo kaangay sang isa ka bata. Nagbalik sia kay Eliseo upod ang iya mga tinawo kag nagsiling, “Karon nakahibalo ako nga wala sing dios, kundi ang Dios sang Israel.

Salmo sa Pagsabat:

Mga Salmo 42:2, 3; 43:3, 4

(S) Ang akon kalag nauhaw sa Dios nga buhi; san-o pa bala ako makatan-aw sang nawong sang Dios?

Subong sang usa nga ginahidlaw sang mabugnaw nga tubig sa sapa, subong man ang pagkahidlaw ko sa imo, O Dios. (S)

Ginauhaw ako sa imo, O Dios nga buhi, san-o pa bala ako makakadto sa pagsimba sa imo atubangan? (S)

Ipadala ang imo kapawa kagkamatuoran, kabay nga magtuytoy ini sa akon kag dalhon ako pabalik sa Sion, ang imobalaan nga bukid, kag sa imo Templo, sa diin ikaw nagapuyo! (S)

Dayon magakadto ako sa imo altar, O Dios, kay ikaw nagahatag sa akon sang kalipay kag kasadya, magatukar ako sang akon arpa kag magaamba sing pagdayaw sa imo, O Dios nga akon Dios! (S)

Sa wala pa ang Ebanghelyo:

Mga Salmo 130:5, 7

   Nagalaum ako sa Ginoo; nagasalig ako sa iya pulong; kay ang Ginoo mainawaon kag maalwan sia sa pagluwas.

Ang Pagbasa sang Santos nga Ebanghelyo suno kay:

San Lucas 4:24-30

   Kag nagsiling pa gid si Jesus, “Nagasiling ako sa inyo: wala sing propeta nga ginakilala sa iya kaugalingon nga banwa! Pamatii ninyo ako: matuod gid nga madamo ang mga babayi nga balo sa Israel sang panahon ni Elias, sang wala gid mag-ulan sa sulod sang tatlo ka tuig kag anom ka bulan kag may daku nga tiggulotom sa bug-os nga duta, pero si Elias wala ginpadala sa bisan sin-o sa ila, kundi sa babayi nga balo sa Sarepta didto sa Sidon. Kag may madamo nga mga aruon sa Israel sang panahon ni Eliseo nga propeta, pero wala gid sing isa sa ila nga gin-ayo, kundi si Naaman lang nga taga-Siria.”

   Ang tanan nga mga tawo sa sinagoga naakig gid sang pagkabati nila sini. Tumindog sila kag ila ginganoy si Jesus pa gwa sa banwa, kag gindala nila sia sa ibabaw sang bakulod sa diin ang ila banwa napasad, agod ila sia itiklod sa pil-as. Pero si Jesus nag-agi sa tunga nila, kag naglakat.

Marso 7 | Marso 9

Marso 7, 2021, Ika-3 nga Domingo sang Kwaresma

 Liturhiya sang Pulong

Nahauna nga Balasahon - Exodo 20:1-17

Salmo sa Pagsabat - Mga Salmo 19:8, 9, 10, 11

Ika-2 nga Balasahon - 1 Corinto 1:22-25

Sa Wala pa ang Ebanghelyo - Juan 3:16

Ebanghelyo - Juan 2:13-25

1. Ang Pagbasa gikan sa Libro sang:

Exodo 20:1-17

Ang Dios naghambal sini nga mga pulong, “Ako amo ang Ginoo nga imo Dios, nga nagdala sa imo pagwa sa Egipto, sa diin gin-ulipon ka.

“Indi ka maghupot sang iban nga dios, luas sa akon.

“Indi ka maghimo para sa imo kaugalingon sang isa ka diosdios ukon isa ka larawan sang bisan ano nga tinuga sa langit, ukon sa duta, ukon sa tubig nga yara sa idalom sang duta. Indi ka magluhod ukon magsimba sa bisan ano nga diosdios, kay ako ang Ginoo nga imo Dios, kag maimon ako nga Dios. Sa mga nagadumot sa akon silutan ko ang ila mga kaanakan tubtob sa ikatlo kag ikaapat ka kaliwatan. Pero sa mga nagahigugma sa akon kag nagabantay sang akon mga sugo, ipakita ko sa ila ang akon malig-on nga paghigugma sa linibo nga mga kaliwatan. 

“Indi mo paggamiton sa wala sing pulos ang ngalan sang Ginoo nga imo Dios, kay ako magasilot sang bisan sin-o nga maggamit sang akon ngalan sa wala sing kapuslanan.

“Dumdoma ang adlaw nga inugpahuway, kag pakabalaana ini sa Ginoo. Mag-obra ka sa sulod sang anom ka adlaw, pero ang ikapito nga adlaw amo ang adlaw nga inugpahuway nga imo pakabalaanon sa Ginoo nga imo Dios. Indi ka mag-obra sa sina nga adlaw, ikaw, ukon ang imo mga kaanakan, ukon imo mga ulipon, ukon imo mga kahayupan, ukon ang dumoluong nga nagapuyo sa imo mga banwa. Sa sulod sang anom ka adlaw ang Ginoo nagtuga sang langit kag duta, sang dagat, kag sang tanan nga yara sa ila, pero sa ikapito nga adlaw nagpahuway sia. Gani ako, ang Ginoo, nagbendisyon sang adlaw nga inugpahuway kag ginpakabalaan ini para sa akon kaugalingon.

“Tahura ang imo amay kag iloy, agod nga magkabuhi ka sing malawig sa duta nga ginhatag sang Ginoo nga imo Dios.

“Indi ka magpatay.

“Indi ka magpanginbabayi ukon magpanginlalaki.

“Indi ka magpangawat.

“Indi ka magsaksi sing binutig sa imo isigkatawo.

“Indi ka magkaibog sang balay sang imo isigkatawo. Indika magkaibog sang iya asawa, ukon sang iya mga ulipon, sang iya baka, ukon sang iya asno, ukon sang bisan ano niya nga butang!”

Salmo sa Pagsabat:

Mga Salmo 19:8, 9, 10, 11

(S) O Ginoo, yara sa imo ang mga pulong nga naghatag sang kabuhi nga dayon.

Ang kasugoan sang Ginoo himpit; nagahatag ini sing bag-o ngakabuhi, ang mga sugo sang Ginoo masaligan, kag nagahatag ini sing kaalam sa mga nakulangan. (S)

Matarong ang mga pagsulondan sang Ginoo, kag ang mga nagatuman sini malipayon, matarong gid ang iya mga sugo, kag nagahatag sing paghangop sa hunahona. (S)

Ang pagsimba sa Ginoo maayo; magapadayon ini sa walay katubtoban. Matarong ang mga paghukom sang Ginoo; wala ini sing may ginapasulabi. (S)

Halandumon pa sila sang sa bulawan, bisan pa sang sa pinakapuraw nga bulawan. Matam-is pa sila sang sa dugos, bisan pa sang sa wala simbog nga dugos. (S)

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 1:22-25

Ang mga Judio nagapangayo sing mga milagro, kag ang mga Griego iya nagapangita sing kaalam. Kami amon nagawali nahanungod kay Cristo nga ginlansang sa krus. Ini nga balita kontra sang mga Judio kag kabuangan para sa mga Gentil. Pero para sa mga tinawag sang Dios, mga Judio ukon mga Gentil, si Cristo amo ang gahom kag ang kaalam sang Dios. Kay ang kabuangan sang Dios mas maalam sang sa kaalam sang mga tawo, kag ang kaluyahon sang Dios mas makusog sang sa kusog sang mga tawo. 

Sa wala pa ang Ebanghelyo:

San Juan 3:16

   Ginhigugma gid sang Dios ang kalibutan sa bagay nga ginhatag niya ang iya bugtong nga Anak, ang tagsatagsa nga magtuo sa iya, may kabuhi nga wala sing katapusan. 

Ang Pagbasa sang Santos nga Ebanghelyo suno kay:

San Juan 2:13-25

   Nagahilapit na ang Piesta sang Pascua sang mga Judio, gani si Jesus nagpa-Jerusalem. May nakita sia nga mga tawo didto sa templo nga nagabaligya sang mga baka, mga karnero, kag mga pating, kag ang mga manugbaylo man sang kuwarta nga yara sa ila mga lamisa. Naghimo si Jesus sang inughanot nga lubid kag iya ginpanabog ang tanan nga mga sapat pa gwa sa templo, ang mga karnero kag mga baka. Ginpamaliskad niya ang mga lamisa sang mga manugbaylo sang kuwarta, kag ginwas-ag niya ang ila mga kuwarta; kag ginmanduan niya ang mga manugbaligya sang pating, “Kuhaa ninyo ina diri! Indi ninyo paghimoa nga balaligyaan ang balay sang akon Amay!” Nadumdoman sang iya mga gintuton-an nga ang kasulatan nagasiling, “Ang akon kabalaka sa imo balay, O Dios, nagadabdab sa sulod nakon subong sang kalayo.” 

Ang mga pangulo sang mga Judio nagpamangkot sa iya, “Ano bala nga milagro ang imo mahimo sa pagpakita sa amon nga may katarungan ka sa paghimo sini?” 

Si Jesus nagsabat, “Gub-a ninyo ining templo sang Dios kag sa sulod sang tatlo ka adlaw patindugon ko ini liwat.” 

Namangkot sila sa iya, “Ini nga templo ginpatindog sa sulod sang 46 ka tuig, kag patindugon mo bala ini sa sulod sang tatlo lamang ka adlaw?” 

Pero ang templo nga ginsiling ni Jesus amo ang iya lawas. Gani sang nabanhaw sia, nadumdoman sang iya mga gintuton-an nga ginhambal niya ini, kag nagtuo sila sa kasulatan kag sa mga pulong nga ginhambal ni Jesus. 

Sang didto si Jesus sa Jerusalem sa Piesta sang Pascua, madamo ang mga nagtuo sa iya sang makita nila ang gamhanan nga mga buhat nga ginhimo niya. Pero si Jesus wala magsalig sang iya kaugalingon sa ila, tungod kay nakilala gid niya sing maayo ang tanan nga mga tawo. Wala na sing kinahanglan nga sugiran sia nahanungod sang mga tawo, kay nahibaluan gid niya kon ano ang yara sa ila mga tagipusoon.

Marso 6 | Marso 8

Marso 6, 2021, Sabado, Ika-2 nga Semana sang Kwaresma

Liturhiya sang Pulong

Nahauna nga Balasahon - Miqueas 7:14-15, 18-20

Salmo sa Pagsabat - Mga Salmo 103:1-2, 3-4, 9-10, 11-12

Sa Wala pa ang Ebanghelyo - Lucas 15:18

Ebanghelyo - Lucas 15:1-3, 11-32

Ang Pagbasa gikan sa Libro ni:

Miqueas nga Propeta 7:14-15, 18-20

   Magmanugbantay ka sa imo mga tawo, O Ginoo, ang mga tawo nga imo ginpili. Nagakabuhi sila nga silahanon lamang sa desierto nga ginalibutan sang maayo nga duta. Tugoti sila sa pagkadto kag maghalab sa matambok nga halalban sang Basan kag Galaad, subong sang ila ginhimo sang una nga mga panahon. 

   Maghimo ka sing mga milagro para sa amon,O Ginoo, subong sang imo ginhimo sadtong mga adlaw sang imo pagpagwa sa amon gikan sa Egipto. 

   O Ginoo, wala sing iban nga dios nga kaangay sa imo. Ginpatawad mo ang mga sala sang imo nabilin nga mga tawo. Wala ka nagakaakig sing dayon, kundi nagapakita ka sang imo malig-on nga paghigugma. Magamaluloy-on ka sa amon liwat. Pagatasakon mo ang amon mga sala, kag itagbong ini sa kadadalman sang dagat. Magapakita ka sang imo katutom kag malig-on nga paghigugma sa imo mga tawo nga Israelinhon nga mga kaliwat ni Abraham suno sa imo ginsumpa sa amon mga katigulangan sadtong una nga panahon. 

Salmo sa Pagsabat:

Mga Salmo 103:1-2, 3-4, 9-10, 11-12

(S) Ang Ginoo maluloy-on kag mahigugmaon.

Dayawa ang Ginoo, O kalag ko! Dayawa ang iya balaan nga ngalan, bug-os ko nga tagipusoon! Dayawa ang Ginoo, O kalag ko, kag indi pagkalimti kon daw ano ang iya kaayo. (S)

Ginapatawad niya ang tanan ko nga mga sala kag ginaayo niya ang tanan ko nga mga balatian; ginaluwas niya ako sa lulobngan kag ginalikupan niya ako sang gugma kag kaluoy. (S)

Wala sia nagasabdong sing dalayon; ang iya pagpangakig wala nagapadayon. Ang iya silot kulang pa sang nagakabagay sa aton, ukon nagabalos sa aton tungod sang aton mga sala kag kasaypanan. (S)

Subong sang kataas sang langit sa ibabaw sang duta, amo man kadaku ang iya paghigugma sa mga nagatahod sa iya. Subong sang kalayo sang sidlangan sa nakatundan, amo man kalayo ang iya pagpahilayo sang aton mga sala sa aton. (S)

Sa wala pa ang Ebanghelyo:

San Lucas 15:18

   Mapauli ako kag magasiling sa akon amay: Tay, nakasala ako batok sa Dios kag batok sa imo.

Ang Pagbasa sang Santos nga Ebanghelyo suno kay:

San Lucas 15:1-3, 11-32

   Sang isa ka tion madamo nga mga manugsokot sang buhis kag mga makasasala ang nagpalapit sa pagpamati kay Jesus. Ang mga Fariseo kag ang mga manunodlo sang Kasugoan nagkulomuron, “Ini nga tawo nagabaton sang mga makasasala kag nagakaon pa gani upod sa ila.” Gani si Jesus naghambal sa ila sining palaanggiran: Dayon nagsiling pa gid si Jesus, 

   “May isa ka tawo nga may duha ka anak nga lalaki. Ang manghod nagsiling sa iya amay, ‘Tay, ihatag na sa akon ang palanublion nga naigo sa akon.’ Gani ginpartida sang amay sa duha niya ka anak ang iya pagkabutang. Sa tapos ang pila ka adlaw ginbaligya sang manghod ang iya bahin sang pagkabutang kag naglakat nga dala niya ang kuwarta. Nagkadto sia sa malayo nga duog, sa diin gin-uyangan niya ang iya kuwarta sa patuyang nga pangabuhi. Gin-urot niya gasto ang tanan niya nga kuwarta. Dayon nag-abot ang tama nga tiggulotom sa sadto nga duta kag nagpiot ang iya pangabuhi. Gani nagpamugon sia sa isa sang mga pumoluyo sa sadtong duta, nga nagpadala sa iya sa uma sa pagsagod sang mga baboy. Buot niya kuntani nga sudlan ang iya tiyan sang bahog sang baboy, pero wala sing may naghatag sini sa iya. Sang ulihi nakatalupangod sia sang iya kahimtangan kag nagsiling, ‘Ang tanan nga mga mamumogon sang akon amay may pagkaon nga nagasulobra lang, kag ako iya daw mapatay na sa kagutom. Mapauli ako kag magasiling sa akon amay, “Tay, nakasala ako batok sa Dios kag batok sa imo. Indi na ako takos nga pagatawgon pa nga imo anak. Kabiga ako nga isa sang imo mga mamumogon.”’ Gani nagpauli sia sa iya amay. 

   “Malayo pa sia sa ila balay sang makita sia sang iya amay. Ang tagipusoon sang iya amay napun-an gid sing kaluoy, gani dumalagan sia kag ginhakos ang iya anak kag ginhalukan. ‘Tay,’ siling sang anak, ‘Nakasala ako batok sa Dios kag batok sa imo. Indi na ako takos nga pagatawgon pa nga imo anak.’ Pero ang iya amay nagtawag sang iya mga suloguon, ‘Dali kamo, dalha ninyo diri ang labing malahalon gid nga bayu kag ipasuksok sa iya. Suksoki sang singsing ang iya tudlo kag sang sapatos ang iya mga tiil. Dayon kuhaa ninyo ang pinatambok nga tinday sang baka kag ihawa ini, kay mahiwat kita sing punsyon kag magkinasadya! Kay ining akon anak napatay, pero karon nabuhi; nadula sia, pero karon nakita na.’ Kag nagsugod sila sa pagkinasadya. 

   “Sa pihak nga bahin, ang anak nga magulang yadto sa uma. Sang nagapauli sia kag nagahinampot na sa balay, nabatian niya ang tinukar kag sinaot. Gintawag niya ang isa sang mga suloguon kag ginpamangkot, ‘May ano diri?’ Ang suloguon nagsabat, ‘Ang imo utod nagpauli kag si tatay mo nagpaihaw sang pinatambok nga tinday sang baka, kay nakapauli sia nga wala man maano.’ Naakig gid ang magulang kag indi sia magsulod sa balay. Gani ang iya amay naggwa kag nag-uloulo sa iya nga magsulod. Ginsingganan niya ang iya amay, ‘Abi kon sa imo man lugar, tan-awa bala, sa sulod sining mga tinuig nagpangabudlay ako nga daw suloguon mo kag bisan kaisa lang wala gid ako maglapas sang imo sugo. Ano ang ginhatag mo sa akon? Wala mo gani ako mahatagi bisan tinday lang sang kanding agod magkasadya ako upod sa akon mga abyan! Pero ining anak mo nag-uyang sang imo pagkabutang upod sa mahigko nga mga babayi, kag sang pagpauli niya gin-ihaw mo ang pinatambok nga tinday sang baka para sa iya.’ ‘Anak ko,’ ang sabat sang amay, ‘ikaw imo yari man pirme sa balay kag ang tanan nga akon imo. Pero dapat kita maghiwat sing punsyon kag magkalipay, kay ang imo utod napatay, pero karon nabuhi; nadula sia, pero karon nakita na.’ ”

Marso 5 | Marso 7

Marso 5, 2021, Biyernes, Ika-2 nga Semana sang Kwaresma

Liturhiya sang Pulong

Nahauna nga Balasahon - Genesis 37:3-4, 12-13, 17-28

Salmo sa Pagsabat - Mga Salmo 105:16-17, 18-19, 20-21

Sa Wala pa ang Ebanghelyo - Juan 3:16

Ebanghelyo - Mateo 21:33-43, 45-46

Ang Pagbasa gikan sa Libro sang:

Genesis 37:3-4, 12-13, 17-28

   Si Jacob nagpalangga kay Jose labaw sa tanan niya nga mga kabataan nga lalaki, kay si Jose natawo sang tigulang na sia. Ginhimuan niya sia sing malaba nga bayu nga may malaba nga pako. Sang makita sang iya mga utod nga ang ila amay nagpalangga kay Jose sing labi sang sa ila, naakig gid sila sa ila utod kag wala sila nagbugno sa iya. 

   Isa ka adlaw sang pagkadto sang mga utod ni Jose nga lalaki sa Siquem sa pag-atipan sang mga hayop sang ila amay, si Jacob nagsiling kay Jose, “Ang imo mga utod nagaatipan sang mga hayop sa Siquem. Maghimos ka, kay paapason ko ikaw sa ila.” 

   Gani si Jose nag-apas sa iya mga utod nga lalaki kag nakita niya sila sa Dotan. 

   Sang malayo pa sia nakita na nila sia, kag sang wala pa sia makaabot, naghimbon sila sa pagpatay sa iya. Nagsiling sila sa isa kag isa, “Yara nagapakari ang paladamgo. Dali kamo, patyon ta sia kag ihulog ang iya bangkay sa isa sining mga bubon kag masiling lang kita nga may talunon nga sapat nga nagpatay sa iya. Dayon tan-awon ta kon ano ang maabutan sang iya damgo.” 

   Pagkabati ni Ruben, gintinguhaan niya ang pagluwas kay Jose sa ila. Nagsiling sia, “Indi naton sia pagpatyon. Sa baylo nga patyon ninyo sia, ihulog lang ninyo sia sa sini nga bubon sa desierto, pero indi ninyo sia pagsakita.” Ginsiling niya ini kay nagaplano sia sa pagluwas kay Jose agod makabalik sia sa iya amay. Sang makaabot si Jose sa iya mga utod, gin-uba nila ang iya bayu nga may malaba sing pako. Gindakop nila sia kag ginhulog sa bubon nga wala sing tubig. 

   Sang nagakaon sila, sa hinali nakita nila ang mga Ismaelinhon nga nagapanglakaton halin sa Galaad pa Egipto. Ang ila mga kamelyo kargado sing mga pahamot, ihalaplas, kag mira. Si Juda nagsiling sa iya mga utod, “Ano ang aton mapulos kon patyon naton ang aton utod kag tagutaguon ta ang iya kamatayon? Ibaligya lang naton sia sa mga Ismaelinhon. Kon amo ini ang himuon ta, indi pa naton sia masakit, kon sa bagay, aton man sia utod, aton unod kag dugo.” Ang iya mga utod nagsugot man. Kag ginbaligya sia sing 20 ka bilog nga pilak sa mga Ismaelinhon kag gindala ini sia sa Egipto.

Salmo sa Pagsabat:

Mga Salmo 105:16-17, 18-19, 20-21

(S) Dumdoma ang mga katingalahan nga ginhimo sang Ginoo.

Sang pagpadala sang Ginoo sing gutom sa ila pungsod, kag pagkuha niya sang tanan nila nga kalan-on, ginpadala niya sing una sa ila si Jose, nga ginbaligya subong isa ka ulipon. (S)

Nasamad ang iya mga tiil tungod sang hugot nga mga kadena, kag gintakdan sia sang salsalon sa liog, tubtob napamatud-an ang iya gintagna. Ang pulong sang Ginoo nagpamatuod nga matarong sia. (S)

Dayon ginpabuy-an sia sang Hari sang Egipto; ang pangulo sang mga pungsod naghilway sa iya. Gintugyan sa iya sang hari ang pagdumala sang iya ginharian, kag ginhimo sia nga pangulo sa bug-os nga duta. (S)

Sa wala pa ang Ebanghelyo:

San Juan 3:16

   Ginhigugma gid sang Dios ang kalibutan, sa bagay nga ginhatag niya ang iya bugtong nga Anak; ang tagsatagsa nga nagatuo sa iya may kabuhi nga wala sing katapusan.

Ang Pagbasa sang Santos nga Ebanghelyo suno kay:

San Mateo 21:33-43, 45-46

   Si Jesus nagsiling, “Pamatii ninyo ang isa pa ka palaanggiran: may isa ka tag-iya sang talamnan nga nagpatanom sang ubas. Iya ini ginkudalan palibot, nagpakutkot sia sing buho para pulogaan sang ubas kag nagpatindog sia sing mataas nga balantayan. Iya ini ginpaagsahan kag nagpanglakaton. Sang tion na sa pagpamupo sang ubas, ginpadala niya ang iya mga suloguon sa mga agsador sa pagkuha sang iya parti. 

   Gindakop sang mga agsador ang iya mga suloguon: ang isa ginbunal nila, ginpatay ang isa, kag ang isa pa gid ginbato nila. Liwat iya ginpakadto ang iban niya nga mga suloguon nga madamo pa sang sa nahauna, kag amo man ang ginhimo sang mga agsador sa ila. Sa katapusan ginpadala niya sa ila ang iya anak. Nagasiling sia, ‘Tahuron gid nila ang akon anak.’ Pero sang pagkakita sang mga agsador sang anak, nagsinilingay sila, ‘Amo ini ang manunobli. Dali kamo, patyon naton sia, kag mangin-aton ang iya palanublion!’ Gani gindakop nila sia, ginhaboy sa gwa sang talamnan sang ubas, kag ginpatay.” 

   Nagpamangkot si Jesus, “Karon, kon mag-abot ang tag-iya sang talamnan, ano ang iya himuon sa sadtong mga agsador?” 

   Nagsabat sila, “Pamatyon gid niya ining malain nga mga tawo nga wala sing luoyluoy, kag ipaagsa niya ang iya talamnan sa iban nga mga agsador nga magahatag sa iya sang iya parti sa tagsa ka patubas.” Si Jesus nagsiling sa ila, “Wala bala ninyo mabasahi ang ginasiling sang mga Kasulatan? 

     ‘Ang bato 

     nga ginsikway sang mga manunokod 

     nanginpamakod nga bato. 

     Ang Ginoo amo ang naghimo sini, 

     Daw ano ini ka makatilingala!’” 

   Si Jesus nagsiling pa gid, “Gani nagasiling ako sa inyo, ang Ginharian sang Dios kuhaon sa inyo, kag ihatag sa mga tawo nga magapatubas sang nagakaigo nga mga bunga. 

   Nabatian sang pangulo nga mga pari kag mga Fariseo ining mga palaanggiran ni Jesus kag nahangpan nila nga sila ang ginatumod ni Jesus. Gani gintinguhaan nila nga dakpon sia. Ugaling nahadlok sila sa mga tawo, nga nagakabig kay Jesus subong isa ka propeta.

Marso 4 | Marso 6

Marso 4, 2021, Huwebes, Ika-2 nga Semana sang Kwaresma

Liturhiya sang Pulong

Nahauna nga Balasahon - Jeremias 17:5-10

Salmo sa Pagsabat - Mga Salmo 1:1-2, 3, 4 kag 6

Sa Wala pa ang Ebanghelyo - Lucas 8:15

Ebanghelyo - Lucas 16:19-31

Ang Pagbasa gikan sa Libro ni:

Jeremias nga Propeta 17:5-10

   Ang Ginoo nagasiling, “Silutan ko ang tawo nga nagabiya sa akon, kag nagabutang sang iya pagsalig sa mga tawo, sa kusog sang mga tawo nga mamalatyon. Kaangay sia sang kahuykahoy sa desierto- nga nagatubo sa kigas nga duta, sa maasin nga duta nga wala gid sing may nagatubo. Wala gid sing butang nga maayo nga nagakahanabo sa iya. 

   “Pero bendisyunan ko ang tawo nga nagasalig sa akon, ang tawo nga may pagtuo sa akon. Kaangay sia sang isa ka kahoy nga nagatubo malapit sa tubig, nagapangalapkap ang iya gamot sa sapa. Wala ini mahadlok kon mag-abot ang tingadlaw, kay ang iya mga dahon wala nagakalaya; wala ini nagapalibog bisan indi mag-ulan, nagapadayon ini sa pagpamunga. 

   “Sin-o bala ang makahangop sang tagipusoon sang tawo? Wala sing makalabaw sa iya pagkamalimbungon. Indi na gid ini mag-ayo kay tama gid ang iya pagkalaut. Ako, ang Ginoo, nagausisa sang mgahunahona, kag nagatilaw sang mga tagipusoonsang tawo. Ginabalusan ko ang tagsa ka tawo suno sa iya pagginawi, kag suno sa iya ginahimo.”

Salmo sa Pagsabat:

Mga Salmo 1:1-2, 3, 4 kag 6

(S) Bulahan ang tawo nga nagasalig sa Ginoo.

Bulahan ang tawo nga nagasikway sang laygay sang mga malaut, nga wala nagasunod sa ginahimo sang mga makasasala, nga wala nagabuylog sa mga nagayaguta sa Dios. Sa baylo, naluyag sia magbasa sang kasugoan sang Ginoo, kag nagatuon sini sa adlaw kag gab-i. (S)

Kaangay sia sang kahoy nga nagatubo sa higad sang sapa, nagapamunga ini sa nagakaigo nga panahon, kag ang iya mga dahon wala nagakalaya. Matigayon niya ang tanan nga iya ginahimo! (S)

Pero indi kaangay sini ang mga malaut! Kaangay sila sang labhang nga ginapalid sang hangin. Ang Ginoo nagatuytoy kag nagaapin sang matarong nga mga tawo, pero ang malaut nagapadulong sa ila kalaglagan. (S)

Sa wala pa ang Ebanghelyo:

San Lucas 8:15

   Bulahan yadtong nagatipig sang pulong sang Dios sa maayo kag mahinatagon nga tagipusoon, kay magapamunga sila sa nagakaigo nga panahon.

Ang Pagbasa sang Santos nga Ebanghelyo suno kay:

San Lucas 16:19-31

   Si Jesus nagsiling sa mga Fariseo, “May isa anay ka manggaranon nga tawo nga nagabayu sing malahalon kag nagapatuyang sa iya pagkaon adlaw-adlaw. May isa man ka imol nga tawo nga ginhingalanan kay Lazaro nga puno sang katol. Ini sia pirme lang ginadala sa puwertahan sang balay sadtong manggaranon nga tawo kag nagahandom sia nga makakaon sang nagakadagdag nga mga pagkaon gikan sa lamisa sang manggaranon. Bisan pa ang mga ido nagapalapit kag nagadilap sang iya katol. Ang imol nga tawo napatay kag gindala sang mga anghel sa luyo gid ni Abraham. Ang manggaranon nga tawo napatay man kag ginlubong. Nag-antos sia didto sa Hades kag sang pagtangla niya nakita niya sa malayo si Abraham kag si Lazaro sa iya gid luyo. Gani nagpanawag sia, ‘Amay nga Abraham! Kaluoyi ako, kag ipadala si Lazaro sa pagtum-oy sang iya tudlo sa tubig kag pabugnawan ang akon dila, kay tama ang akon pag-antos sa sini nga kalayo.’ Pero si Abraham nagsabat, ‘Dumdoma, anak ko, nga sang nagakabuhi pa ikaw, imo ang tanan nga maayo nga mga butang, samtang ang kay Lazaro iya ang malain nga mga butang. Pero karon nagakalipay sia diri, samtang ikaw imo nagakasakit. Wala labot sina, sa gin-utlan naton may daku nga kadadalman, gani ang luyag magkadto dira halin diri indi makatabok, kag wala man sing may makatabok halin dira pakari diri.’ 

   Ang manggaranon nga tawo nagsiling, ‘Amay, kon amo ina, nagapakiluoy ako sa imo nga ipadala mo si Lazaro sa balay sang akon amay, sa diin may lima pa ako ka mga utod nga lalaki. Pakadtoa sia didto sa pagpaandam sa ila agod nga sila indi man magkadto sa sining duog sang pag-antos.’ Si Abraham nagsabat, ‘Didto man si Moises kag ang mga propeta sa pagpaandam sa imo mga utod nga lalaki. Papamatia ang imo mga utod sa ginahambal nila.’ Ang manggaranon nga tawo nagsabat, ‘Amay nga Abraham, kulang pa ina. Kon may isa nga mabanhaw kag magkadto sa ila, ti, magabiya sila sa ila mga sala.’ Pero si Abraham nagsiling, ‘Kon indi sila magpamati kay Moises kag sa mga propeta, indi man ina sila magpamati bisan pa may isa nga mabanhaw.’ ”

Marso 3 | Marso 5

Marso 3, 2021, Miyerkules, Ika-2 nga Semana sang Kwaresma

Liturhiya sang Pulong

Nahauna nga Balasahon - Jeremias 18:18-20

Salmo sa Pagsabat - Mga Salmo 31:5-6, 14, 15-16

Sa Wala pa ang Ebanghelyo - Juan 8:12

Ebanghelyo - Mateo 20:17-28

Ang Pagbasa gikan sa Libro ni:

Jeremias nga Propeta 18:18-20

   Dayon ang mga tawo nagsiling, “Maghimbon kita batok kay Jeremias! May mga pari man sa gihapon nga magatudlo sa aton, mga mangin-alamon nga magalaygay sa aton, kag mga propeta nga magabantala sang pulong sang Dios sa aton. Isumbong naton sia, kag indi na kita magpamati sa iya ginahambal.” Gani nagpangamuyo ako, “O Ginoo, pamatii ang akon ginasiling kag pamatii man ang ginasiling sang akon mga kaaway batok sa akon. Malaut bala ang bayad sang maayo? Pero nagkutkot sila sing buho agod mahulog ako. Dumdoma kon paano ako nagdangop sa imo kag nagpakiluoy tungod sa ila, agod indi ka magsilot sa ila sa imo kaakig.  

Salmo sa Pagsabat:

Mga Salmo 31:5-6, 14, 15-16

(S) O Ginoo, luwasa ako tungod sang imo kaluoy.

Ilikaw ako sa siod nga ila ginbutang para sa akon; ikaw ang akon dalangpan. Sa imo mga kamot ginatugyan ko ang akon kaugalingon, ikaw, O Ginoo, ang magaluwas sa akon; Dios ikaw nga masaligan. (S)

Mabatian ko ang paghinutikay sang madamo nga mga kaaway; ang kahadlok nagalibot sa akon! Nagahimbon sila batok sa akon, nga nagapadihot sa pagpatay sa akon. (S)

Pero nagasalig ako sa imo, O Ginoo, ikaw ang akon Dios. Yara ako sa gihapon sa imo mga kamot; luwasa ako sa akon mga kaaway kag sa mga nagahingabot sa akon. (S)

Sa wala pa ang Ebanghelyo:

San Juan 8:12 

   Ako amo ang kapawa sang kalibutan siling sang Ginoo: Ang nagasunod sa akon may kapawa sang kabuhi.

Ang Pagbasa sang Santos nga Ebanghelyo suno kay:

San Mateo 20:17-28

   Sang nagapakadto si Jesus sa Jerusalem, ginpain niya ang dose ka mga gintuton-an kag samtang nagalakat sila nagsiling sia sa ila, “Karon, nagapakadto kita sa Jerusalem sa diin ang Anak sang Tawo igatugyan sa kamot sang pangulo nga mga pari kag mga manunodlo sang Kasugoan, kag ila sia pamatbatan sing kamatayon. Dayon igatugyan nila sia sa mga Gentil nga magauligyat kag magabunal sa iya, kag magalansang sa iya sa krus, pero sa ikatlo nga adlaw pagabanhawon sia.” 

   Dayon nagpalapit kay Jesus ang asawa ni Zebedeo upod sa iya mga anak nga lalaki, nagluhod sa iya atubangan, kag may ginpangabay. 

   Si Jesus nagpamangkot sa iya, “Ano bala ang luyag mo?” Ang babayi nagsabat, “Ginapangabay ko nga kon maghari ka na, papungkoa ining duha ko ka anak, ang isa sa imo tuo kag ang isa sa imo wala.” 

   Si Jesus nagsabat sa ila, “Wala kamo makahibalo sang inyo ginapangayo. Sarang bala kamo makainom sa kupa nga akon pagaimnan sa indi na lang madugay?” 

   Nagsabat sila, “Huo, sarang kami.” Nagsiling si Jesus sa ila, “Sarang kamo matuod makainom sa kupa nga akon pagaimnan. Pero ang pagpapungko sa akon tuo ukon sa akon wala, indi ako ang magahatag sina. Ini nga mga pulongkoan para lamang sa ila nga gin-amanan sang akon Amay.” 

   Sang pagkabati sini sang napulo ka mga gintuton-an naakig sila sa duha ka mag-utod. Gani gintawag sila tanan ni Jesus kag ginsingganan, “Inyo nahibaluan nga ang mga pangulo may gahom sa ila mga tinawo kag nagapagusto lang sila sang ila himuon sa ila mga tinawo. Pero lain iya ang para sa inyo. Kay kon may isa sa inyo nga luyag magpangulo, dapat sia magmanginsuloguon ninyo. Kag kon may isa sa inyo nga luyag mangin-una, dapat sia mangin-ulipon ninyo. Subong nga ang Anak sang Tawo wala magkari agod alagaron, kundi sa pag-alagad kag sa paghatag sang iya kabuhi sa pagtubos sang madamo nga mga tawo.”

Marso 2 | Marso 4