"Indi mo bala Makita ang Puling sa imo Kaugalingon nga Mata"

Liturhiya sang Pulong

(Biyernes, Setyembre 13, 2019)

San Juan Crisostomo, Obispo kag Doktor sang Simbahan

Ang Pagbasa gikan sa Nahauna nga Sulat ni San Pablo, nga Apostol kay:

Timoteo 1:1-2, 12-14

   Pag-abiabi halin kay Pablo, isa ka apostol ni Cristo Jesus suno sa sugo sang Dios nga aton Manlulowas kag ni Cristo Jesus nga aton paglaom—
   Sa kay Timoteo, ang akon matuod nga anak sa pagtuo:
   Kabay nga ang Dios nga Amay kag si Cristo Jesus nga aton Ginoo maghatag sa imo sing grasya, kaluoy kag paghidait. Nagapasalamat ako kay Cristo Jesus nga aton Ginoo, nga naghatag sa akon sing kusog sa pagpangabudlay. Nagapasalamat ako sa iya, kay iya ako ginkabig nga takos kag iya ako ginpili sa pag-alagad sa iya, bisan pa nga sang una ginpakamalaut ko sia, ginhingabot kag ginpakahuy-an. Pero ang Dios nagkaluoy sa akon, kay wala pa ako sadto nagatuo kag gani wala ako makahibalo sang akon ginahimo.
   Kag ang aton Ginoo naghatag sa akon sing bugana nga grasya kag iya ako ginhatagan sing pagtuo kag gugma nga nangin-aton sa aton paghiusa kay Cristo Jesus.

Salmo sa Pagsabat:

Mga Salmo 16:1-2 kag 5, 7-8, 11

(S) Ikaw, O Ginoo, ang tanan para sa akon.

Apini ako, O Dios, kay nagadangop ako sa imo agod indi maano. Nagasiling ako sa Ginoo, “Ikaw ang akon Ginoo, Ikaw, O Ginoo, ang tanan para sa akon, kag imo ako ginahatagan sang tanan ko nga mga kinahanglanon, yara sa imo mga kamot ang akon kabuhi. (S)

Nagadayaw ako sa Ginoo, kay ginatuytoyan niya ako, kag sa kagab-ihon ang akon konsyensya nagapaandam sa akon. Malapit angGinoo sa akon sa tanan nga tion, malapit sia, kag wala gid sing may makatublag sa akon. (S)

Ipakita mo sa akon ang dalan sang kabuhi, kon yara ka sa luyo ko puno ako singkalipay, kag ang imo bulig nagadala sa akon sang kasadya nga wala sing katapusan. (S)

Aleluya:

Juan 17:17

   Pakabalaana sila paagi sa kamatuoran; ang imo pulong kamatuoran.

Ang Pagbasa sang Santos nga Ebanghelyo suno kay:

San Lucas 6:39-42

   Kag si Jesus naghatag sa ila sini nga palaanggiran: “Ang isa ka bulag indi makatuytoy sa isa man ka bulag, kon himuon niya ini, sila nga duha madagdag sa kanal. Wala sing eskuwela nga maglabaw pa sa iya maestro; pero kon matapos na ang iya kurso manginsubong na sia sang iya maestro.

   “Ngaa bala ginamulalongan mo ang diutay nga puling sa mata sang imo utod, pero wala mo ginasapak ang puling nga daw tablon kadaku sa imo kaugalingon nga mata? Paano ang pagkasiling mo sa imo utod, ‘Utod, ipakuha sa akon ang diutay nga puling sa imo mata,’ nga indi gani ikaw makakita sang puling nga daw tablon kadaku sa imo mata? Salimpapaw! Kuhaa anay ang puling nga daw tablon kadaku sa imo mata, kag dayon makakita ka kag makuha mo ang diutay nga puling sa mata sang imo utod.”

Setyembre 12 | Setyembre 14