"Ang Pagkamaluloy-on - Indi Halad nga mga Sapat ang Akon Ginapangita"

Liturhiya sang Pulong

(Biyernes, Hulyo 5, 2019)

San Antonio Maria Zaccaria, Pari

Ang Pagbasa gikan sa Libro sang:

Genesis 23:1-4, 19; 24:1-8, 62-67

   Si Sara nagkabuhi sing 127 ka tuig. Napatay sia sa Hebron sa duta sang Canaan, kag si Abraham naglalaw sa iya.

   Karon ginbayaan niya anay ang iya patay nga asawa kag nagsiling sa mga Hethanon, “Dumoluong kag umalagi lamang ako diri sa inyo, pabakla man ninyo ako sing duta para lulobngan, agod malubong ko ang akon asawa.”

   Dayon ginlubong ni Abraham ang iya asawa nga si Sara sa sini nga kuweba sa duta sang Canaan.

   Si Abraham tigulang na gid, kag ang Ginoo nagbendisyon sang tanan nga iya ginhimo. Nagsiling sia sa iya labing tigulang nga suloguon nga amo ang nagaatipan sang tanan niya nga pagkabutang, “Ibutang ang imo kamot sa gin-utlan sang duha ko ka paakag magsumpa ka. Luyag ko nga magsumpa ka sa akon sa ngalan sang Ginoo, ang Dios sang langit kag duta, nga indi ka magpili sing asawa para sa akon anak diri sa mga taga-Canaan sa diin ako nagapuyo. Magbalik ka didto sa akon ginhalinan nga duta kag magkuha gikan sa akon mga paryente sang babayi nga ipaasawa mo kay Isaac nga akon anak.”

   Pero ang suloguon nagpamangkot, “Abi kon ang babayi indi mag-upod sa akon sa sini nga duta? Pakadtuon ko bala ang imo anak didto sa duta nga imo ginhalinan?”

   Si Abraham nagsabat, “Indi mo gid pagpabalikon ang akon anak didto! Ang Ginoo nga Dios sang langit, nagdala sa akon diri gikan sa puloy-an sang akon amay kag gikan sa duta sang akon mga paryente, kag nagsaad sia sa akon nga nagapanumpa nga ihatag niya ini nga duta sa akon mga kaliwat. Ipadala niya ang iya anghel sa pag-una sa imo, agod nga makakuha ka didto sing asawa para sa akon anak. Kon ang babayi indi mag-upod sa imo, wala na ikaw sing salabton sa sining saad mo sa akon. Pero bisan ano ang matabo, indi mo gid pagpabalikon didto ang akon anak.”

   Karon si Isaac nakaabot sa desierto sang “Bubon sang Nagakabuhi nga Nagatan-aw sa Akon,” kag nagpuyo sia sa nabagatnan nga bahin sang Canaan. Sang kahapunanon naggwa sia sa paglakatlakat sa latagon, kag nakita niya ang mga kamelyo nga nagapadulong sa iya. Sang nakita ni Rebeca si Isaac nagpanaog sia sa iya kamelyo, kag ginpamangkot niya ang suloguon ni Abraham, “Sin-o inang tawo sa latagon nga nagapadulong sa aton?” 

   Ang suloguon nagsabat, “Amo ina sia ang akon agalon.” Gani ginkuha ni Rebeca ang iya takurong kag iya gintabunan ang iya guya.

   Ang suloguon nagsugid kay Isaac sang tanan nga iya ginhimo. Dayon gindala ni Isaac sa iya tolda si Rebeca kag nangin-iya sia asawa. Si Isaac nagpalangga kay Rebeca, gani si Isaac naumpawan sa iya kasubo sang pagtaliwan sang iya iloy.

Salmo sa Pagsabat:

Mga Salmo 106:1-2, 3-4, 4-5

(S) Magpasalamat kamo sa Ginoo, kay sia maayo.

Magpasalamat kamo sa Ginoo, tungod kay maayo sia, ang iya paghigugma wala sing katapusan. Sin-o bala ang makasugid sang gamhanan nga mga buhat sang Ginoo? Sin-o bala ang makadayaw sa iya sing tuman? (S)
Malipayon ang mga nagatuman sang iya sugo, nga nagahimo sing matarong sa tanan nga tion! Dumdoma ako, O Ginoo kon ikaw magbulig sa imo mga tawo. (S)
Indi ako pagkalimti kon ikaw magluwas sa ila. Ipakita man sa akon ang pag-uswag sang imo mga tawo, kag paambita man ako sang kalipay sang imo pungsod, sa malipayon nga pagpabugal sang imo mga tawo. (S)

Aleluya:

Mateo 11:28

Kari kamo sa akon, tanan kamo nga ginabudlayan kag ginabug-atan, kay papahuwayon ko kamo, siling sang Ginoo.

Ang Pagbasa sang Santos nga Ebanghelyo suno kay:

San Mateo 9:9-13

   Naghalin si Jesus sa sadto nga duog, kag sang nagalakat sia nakita niya ang isa ka manugsokot sang buhis nga ginahingalanan kay Mateo nga nagapungko sa iya opisina. Si Jesus nagsiling sa iya, “Sunod ka sa akon.” 

   Nagtindog si Mateo kag nagsunod sa iya.

   Sang nagakaon si Jesus didto sa balay ni Mateo, madamo nga mga manugsokot sang buhis kag mga makasasala ang nag-upod sa iya kag sa iya mga gintuton-an sa pagkaon. May mga Fariseo nga nakakita sini kag nagpamangkot sila sa iya mga gintuton-an, “Ngaa bala ang inyo manunodlo nagakaon upod sa mga manugsokot sang buhis kag sa mga makasasala?”

   Si Jesus nakabati kag nagsabat sa ila, “Ang mga tawo nga wala sing balatian wala nagakinahanglan sing manugbolong, kundi ang mga masakiton lang. Lakat kamo kag usisaa ninyo kon ano ang kahulogan sini nga kasulatan: ‘Indi halad nga mga sapat ang akon ginapangita, kundi ang pagkamaluloy-on.’ Kay wala ako magkari sa pagtawag sang mga nagapakamatarong sang ila kaugalingon kundi sang mga makasasala.”

Hulyo 4 | Hulyo 6