"Nagkari Ako sa Pagdala sing Kalayo sa Duta"

Liturhiya sang Pulong

(Domingo, Agosto 18, 2019)

1. Ang Pagbasa gikan sa Libro ni:

Jeremias nga Propeta 38:4-6, 8-10

   Dayon ang mga opisyales nagkadto sa hari kag nagsiling, "Dapat patyon ini nga tawo. Sa iya paghambal sini, ang mga soldado sa siyudad nagakadulaan sing kaisog, kag amo man ini ang iya ginahimo sa tagsa-tagsa nga nabilin sa siyudad. Ini sia wala nagatinguha sa pagbulig sa mga tawo, kundi luyag lamang sia maghalit sa ila."
   Si Haring Sedequias nagsiling, "Sigi, himoa ninyo ang luyag ninyo himuon sa iya. Indi ako makapugong sa inyo." Gani ginkuha nila ako kag gintunton sa bubon ni Malquias nga Prinsipe, nga didto sa pasiyuhan. Wala sing tubig ang bubon, kundi lunang lamang, kag naglubong ako sa lunang.
   Gani si Ebedmelec nagkadto didto sa palasyo kag nagsiling sa hari, "Mahal nga Hari, sayop ang ginhimo sini nga mga tawo. Gintunton nila si Jeremias sa bubon, sa diin pat-od gid nga mapatay sia sa gutom, kay wala na sing kalan-on sa siyudad. Dayon ginsugo sang hari si Ebedmelec sa pagdala sing 30 ka mga tawo nga yadto didto kag sa pagbatak kay Jeremias sa bubon sa wala pa sia mapatay.  

Salmo sa Pagsabat:

Mga Salmo 40:2, 3, 4, 18

(S) O Ginoo, magdali ka sa pagbulig sa akon.

Madugay na ang paghulat ko sang bulig sang Ginoo; sang ulihi ginpamatian niya ako kag nabatian niya ang pagpanawag ko. (S)

Ginbatak niya ako gikan sa makatalagam nga buho, gikan sa lunangon nga buho! Ginpahamtang niya ako sa daku nga bato agod indi maano, kag ginpalig-on niya ako. (S)

Gintudloan niya ako sa pagkanta sang isa ka bag-o nga ambahanon, isa ka ambahanon sang pagdayaw sa aton Dios! Ang madamo nga makakita sini magakahadlok, kag magasalig sila sa Ginoo. (S)

Maluya ako kag wala sing mahimo, pero ginadumdom mo ako, O Ginoo. Ikaw ang akon manugbulig kag Manlulowas, indi ka magpadugay, O Dios ko! (S)

2. Ang Pagbasa gikan sa Sulat sa mga:

Hebreo 12:1-4

   Kon nahanungod sa aton, ginalibutan kita sang madamo nga mga saksi. Gani panghuklasan ta ang aton kaugalingon sang tanan nga mga nagasablag sa aton, kag ang sala nga nagahugakom sa aton, kag dalaganon ta nga may pagbatas ang palumba nga ginaatubang naton. Indi ta pag-ibulag ang aton panulok sa kay Jesus, nga sa iya nasandig ang aton pagtuo halin sa ginsugoran tubtob sa katapusan. Ginbatas niya ang mga pag-antos sa krus kag wala niya pagsapaka ang kahuloy-an sa pagpanginmatay paagi sini, tungod sang kalipay nga nagahulat sa iya, kag karon nagalingkod sia sa tuo sang trono sang Dios. Dumdoma ninyo kon daw ano ang inagihan niya, kon daw ano ang pagbatas niya sang mga pagdumot sang mga makasasala! Gani indi kamo magpakaluya kag magdula sang inyo paglaom. Kay sa inyo pagpakigsumpong sa sala, wala pa gani kamo makapakig-away tubtob sa bibi sang kamatayon.

Aleluya:

Juan 10:27

    Ang akon mga karnero nagapamati sa akon tingog, siling sang Ginoo; Kilala ko sila kag nagasunod sila sa akon. 

Ang Pagbasa sang Santos nga Ebanghelyo suno kay:

San Lucas 12:49-53

   “Nagkari ako sa pagdala sing kalayo sa duta, kag luyag ko kuntani nga nagadabdab na ini! May bautiso ako nga pagabatunon, kag indi gid ako mapahamtang sa wala pa ini matapos! Nagahunahona bala kamo nga nagkari ako sa pagdala sing paghidait sa kalibutan? Wala ako magkari sa pagdala sing paghidait, kundi pagbinahinbahin. Sugod karon ang panimalay nga may lima ka katapo magabinahinbahin, ang tatlo batok sa duha, ang duha batok sa tatlo. Ang mga amay manginkasumpong sang ila mga anak nga lalaki kag ang mga anak nga lalaki manginkasumpong sang ila mga amay. Ang mga iloy manginkasumpong sang ila mga anak nga babayi, kag ang mga anak nga babayi manginkasumpong sang ila mga iloy. Ang mga ugangan nga babayi manginkasumpong sang ila mga umagad nga babayi kag ang mga umagad nga babayi manginkasumpong sang ila mga ugangan nga babayi.” 

Agosto 17 | Agosto 19