Halin sa Kadudolman kag Kamatayon pakadto sa Kasanag kag Kabuhi

Liturhiya sang Pulong

(Domingo, Enero 26, 2020)

San Timoteo kag San Tito, mga Obispo

1. Ang Pagbasa gikan sa Libro ni:

Isaias nga Propeta 8:23-9:3

   Ang duta sang tribo ni Zabulon kag ni Neftali sang una ginpakahuy-an, pero ang palaabuton magadala sang kadungganan sa sini nga kadutaan halin sa Mediteraneo, pakadto sa sidlangan sa duta sa tabok sang Jordan, pa Galilea, sa diin nagapuyo ang mga dumoluong.

     Ang mga tawo nga nagalakat

     sa kadudolman nakakita

     sing daku nga kapawa! 

     Nagapuyo sila sa duta sang mga landong, 

     pero karon ang kapawa nagasilak sa ila.

     O Ginoo, ginhatagan mo sila

     sing daku nga kalipay;

     ginhimo mo nga magmalipayon sila.

     Magahugyaw sila sa imo ginhimo, 

     subong sang paghinugyaw sang mga tawo nga nagaani, 

     ukon magpartida sila 

     sang inagaw nga mga manggad.

     Kay ginbali mo ang gota

     nga nagapabug-at sa ila

     kag ang baston

     nga naghanot sang ila mga abaga.

     Ikaw, O Ginoo, ang naglutos sang pungsod

     nga nagpigos kag nagpamintaha 

     sang imo mga tawo 

     subong sang imo paglutos 

     sadto anay sang mga hangaway sang Midian.

Salmo sa Pagsabat:

Mga Salmo 27:1, 4, 13-14

(S) Ang Ginoo amo ang akon kapawa kag kaluwasan.

Ang Ginoo amo ang akon kapawa kag kaluwasan: wala ako sing sin-o nga kahadlukan; ang Ginoo nagaapin sa akon sa tanan nga katalagman; wala ako sing kahadlukan. (S) 

Isa lamang ka butang ang akon ginapangayo sa Ginoo, isa lamang ka butang ang akon naluyagan: sa pagpuyo sa balay sang Ginoo sa bug-os ko nga kabuhi, sa pagpamalandong sang iya kaayo didto, kag sa pagpangayo sang iya pagtuytoy. (S) 

Huo, sa sini nga kinabuhi makakita pa ako sang kaayo sang Ginoo sa iya mga tawo. Magsalig sa Ginoo! Magtuo kag indi magdula sing paglaom. Magsalig sa Ginoo! (S)

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga- Corinto 1:10-13, 17

   Ginapangabay ko sa inyo, mga kautoran, sa ngalan sang aton Ginoong Jesu-Cristo, nga maghilisugot kamo tanan sa inyo ginahambal, agod nga waay sing pagbinahinbahin sa inyo, kundi nga magmangin-isa gid kamo sa painuino kag tinutoyo. Mga kautoran, may mga tawo halin sa panimalay ni Cloe, nga nagsugid sa akon sing maathag nga may pagsinuay sa tunga ninyo. Amo ini ang buot ko silingon: nga nanuhaytohay ang ginasiling sang kada isa sa inyo. Ang isa nagasiling, “Ako sa kay Pablo,” ang isa nagasiling, “Ako sa kay Apolos,” ang isa iya nagasiling, “Ako sa kay Pedro,” kag ang isa pa gid nagasiling, “Ako sa kay Cristo.” Nabahinbahin bala si Cristo? Si Pablo bala ang ginlansang sa krus tungod sa inyo? Ginbautisohan bala kamo subong nga mga sumolunod ni Pablo? 

   Si Cristo wala magpadala sa akon sa pagbautiso. Ginpadala niya ako sa pagbantala sang Maayong Balita, kag sa pagsugid sini indi paagi sa tawuhanon nga abilidad sa paghambal, kay basi ina magakuha sang gahom sang kamatayon ni Cristo sa krus.

Aleluya:

Mateo 4:23

   Si Jesus nagwali sang Maayong Balita kag nagpang-ayo sang mga balatian sang mga tawo. 

Ang Pagbasa sang Santos nga Ebanghelyo suno kay:

San Mateo 4:12-23

   Sang mabatian ni Jesus nga ginbilanggo si Juan, nagpa-Galilea sia. Si Jesus naghalin sa Nazaret kag nagkadto sa pagpuyo sa Capernaum, ang banwa sa higad sang Linaw sang Galilea nga sakop sang Zabulon kag Neftali. Nahanabo ini agod matuman ang ginsiling ni Isaias nga propeta:

     “O duta sang Zabulon, 

     O duta sang Neftali, 

     Sa higad sang baybayon, 

     Sa tabok sang Jordan, 

     Galilea sang mga Gentil!

     Ang mga tawo nga yara sa kadudolman 

     Makakita sang daku nga kapawa! 

     Sa mga nagapuyo 

      Sa madulom nga duta sang kamatayon 

      Ang kapawa magasilak!”

   Sugod sadto nga panahon si Jesus nagbantala sang iya mensahi, “Magbiya kamo sang inyo mga sala kay ang Ginharian sang langit malapit na!”

   Sang nagalakat si Jesus sa higad sang Linaw sang Galilea, may nakita sia nga duha ka mag-utod nga mangingisda. Ini sila amo sanday Simon nga ginatawag Pedro kag si Andres nga iya utod, nga nagaladlad sang ila sahid sa pagpangisda. Si Jesus nagsiling sa ila, “Upod kamo sa akon kay tudloan ko kamo sa pagpanahid sang mga tawo sa Dios.” Sa gilayon ginbayaan nila ang ila sahid kag nag-upod sa iya.

   Naglakat pa gid si Jesus sa unhan kag nakita naman niya ang duha ka mag-utod nga si Santiago kag si Juan, mga anak ni Zebedeo. Didto sila sa ila sakayan kaupod sang ila amay nga si Zebedeo nga nagapamuna sang ila sahid. Gintawag sila ni Jesus, kag sa gilayon ginbayaan nila ang ila sakayan kag ang ila amay kag nag-upod sila kay Jesus.

   Si Jesus naglibot sa bug-os nga Galilea; nagpanudlo sa mga sinagoga, nagwali sang Maayong Balita sang Ginharian, kag nagpang-ayo sang tanan nga sahi sang mga masakit kag balatian sang mga tawo. 

Enero 25 | Enero 27