"Magapanahid Ikaw sang mga Tawo para sa Ginharian sang Dios"

Liturhiya sang Pulong

(Huwebes, Setyembre 5, 2019)

Ang Pagbasa gikan sa Sulat ni San Pablo nga Apostol, sa mga:

Taga-Colosas 1:9-14

   Tungod sini, pirme lang kami nagapangamuyo para sa inyo halin sa pagkabati namon nahanungod sa inyo. Ginapangayo namon sa Dios nga mahibal-an ninyo sing bug-os ang iya kabubot-on nga may kaalam kag paghangop nga ginahatag sang iya Espiritu agod nga sarang kamo makakabuhi suno sa kabubot-on sang Ginoo, kag makahimo sa gihapon sang iya nahamut-an. Ang inyo mga kabuhi manginmabinungahon gid sa tanan nga sahi sang maayo nga mga buhat kag magatubo kamo sa inyo pagkilala sa Dios. Kabay nga mapabakod kamo sa bug-os nga kusog nga nagagikan sa iya mahimayaon nga gahom, agod nga mabatas ninyo ang tanan nga may pagpailob. Kag magpasalamat kamo nga may kalipay sa Amay, nga naghimo sa inyo nga mangintakos sa pag-ambit sang gintigana sang Dios sa iya mga tumoluo sa ginharian sang kapawa. Kay ginluwas niya kita gikan sa gahom sang kadudolman kag gindala sa ginharian sang iya hinigugma nga Anak, nga nagtubos sa aton, nga kon sayuron, nagpatawad sang aton mga sala.

Salmo sa Pagsabat:

Mga Salmo 98:2-3, 3-4, 5-6

(S) Ginbantala sang Ginoo ang iya pagdaog.

Ginbantala sang Ginoo ang iya pagdaog, ginpakilala niya sa mga pungsod ang iya gahom sa pagluwas. Gintuman niya ang iya saad sa mga tawo sang Israel, nga may mapinadayunon nga gugma kag pag-unong sa ila. (S)

Ang tanan nga katawuhan bisan diin nakakita sang pagdaog sang aton Dios! Magkanta kamo sa kalipay sa Ginoo, O bug-os nga duta; dayawa sia sa mga ambahanon kag mga paghinugyaw! (S)

Magkanta kamo sing mga pagdayaw sa Ginoo nga ginaupdan sang mga arpa, magtukar kamo sang sonata sa mga arpa! Upod sa mga trumpeta kag mga korneta, maghinugyaw kamo sa atubangan sang Ginoo, ang hari! (S)

Aleluya:

Mateo 4:19

   Upod kamo sa akon, siling sang Ginoo, kay tudloan ko kamo sa pagpanahid sang mga tawo sa Dios.

Ang Pagbasa sang Santos nga Ebanghelyo suno kay:

San Lucas 5:1-11

   Isa sadto ka adlaw, si Jesus nagatindog sa ubay sang linaw sang Genezaret. Ang mga tawo nagdinaguso pakadto sa iya sa pagpamati sang pulong sang Dios. May nakita sia nga duha ka sakayan nga yara na sa higad, kag ang mga mangingisda nakapanaog na sa paghugas sang ila sahid. Ang isa ka sakayan iya ni Simon. Ginsakyan ini ni Jesus kag ginpangabay niya si Simon nga itulak sing diutay ang sakayan. Nagpungko si Jesus sa sakayan kag nagpanudlo sa mga tawo.

   Sa tapos sia makahambal, nagsiling sia kay Simon, “Magpalawod ka kag iladlad ang inyo sahid, agod makakuha kamo sang mga isda.”

   Si Simon nagsabat, “Manunodlo, nagpanahid kami sa bug-os gid nga gab-i kag wala gid kami sing may nakuha. Pero kon amo ina ang siling mo, iladlad ko ang sahid.” Ginladlad nila ang sahid kag nakakuha sila sing madamo nga isda sa bagay nga ang ila sahid daw magisi na. 

Nakakuha sila sing madamo nga isda. (5:6)

Gani ginpaypay nila ang ila kaupod sa isa ka sakayan sa pagbulig sa ila. Nagpalapit ini sila kag ginpuno nila ang duha ka sakayan sang isda tubtob nga daw malunod na sila. Sang makita ni Simon Pedro ang natabo, nagluhod sia sa atubangan ni Jesus kag nagsiling, “Palayo ka sa akon, Ginoo, kay makasasala ako nga tawo.”

   Sia kag ang iya kaupdanan natingala gid sa kadamo sang isda nga ila nakuha. Ang mga kaupod ni Simon nga si Santiago kag si Juan, nga mga anak ni Zebedeo, natingala man. Si Jesus nagsiling kay Simon, “Indi ka mahadlok. Sugod karon magapanahid ikaw sang mga tawo.”

   Ginpatakas nila ang mga sakayan, ginbayaan nila ang tanan kag nag-upod kay Jesus.

Setyembre 4 | Setyembre 6