"Ang Nagapakataas sang Iya Kaugalingon Pagapaubson"

Liturhiya sang Pulong

(Domingo, Setyembre 1, 2019)

1. Ang Pagbasa gikan sa Sulat ni:

Sirac 3:17-18, 20, 28-29

   Anak ko, magmatarong kag magmalulo sa imo mga bulohaton,
   Kag pagapalanggaon ikaw labi
   Sang sa nagapatuyang nga manughatag.
   Sa nagadaku ikaw labi pa gid nga magpaubos ka,
   Kag ang Ginoo magapakita sang iya kaayo sa imo.
   Bisan nga daku ang gahom sang Ginoo,
   Ginabaton niya ang pagsimba sang mapainuboson.

   Wala sing bulong para sa masakit

   Sang isa ka tawo nga bugalon,

   Tungod kay ang kalautan nakapanggamot na sa iya. 

   Ang mabinatyagon nga tawo magahupot sang maayo nga mga pulong sa iya tagipusoon,

   Ang nagapamati nga dulonggan

   Amo ang ginahandom sang maalam. 

Salmo sa Pagsabat:

Mga Salmo 68:4-5, 6-7, 10-11

(S) O Dios, tungod sang imo kaayo ginhatagan mo ang mga imol sang ila mga kinahanglanon.

Ang mga matarong magakasadya, kag magahinugyaw sa atubangan sang Dios, magakalipay sila. Mag-amba kamo sa Dios, mag-amba sing mga pagdayaw sa iya ngalan; ang iya ngalan amo ang Ginoo—magkalipay kamo sa iya atubangan! (S)
Ang Dios, nga nagapuyo sa iya balaan nga Templo, nagaatipan sang mga ilo kag nagatatap sang mga balo nga babayi. Nagahatag sia sang puloy-an sa nagaisahanon, kag ginahilway niya kag ginapauswag ang mga binilanggo. (S)
Nagpadala ikaw sang bugana nga ulan; kag ginhimo mo nga mapatubason ang lamgod nga duta; didto naghimo sing puloy-an ang imo mga tawo, sa imo kaayo ginhatagan mo ang mga imol sang ila kinahanglanon. (S)

2. Ang Pagbasa gikan sa Sulat sa mga:

Hebreo 12:18-19, 22-24

   Wala kamo magkari sa sarang ninyo matandog, subong sang pagkadto sang mga taga-Israel sa bukid sang Sinai nga may nagadabdab nga kalayo, kadudolman kag mangitungito nga kadulom, bagyo, tunog sang isa ka trumpeta, kag sang isa ka tingog. Sang mabatian sang mga tawo ang tingog, nagpakiluoy sila nga indi na sila pagpabation bisan isa lang ka taga. 

   Sa baylo, nagpalapit kamo sa bukid sang Sion kag sa siyudad sang Dios nga buhi, ang langitnon nga Jerusalem, nga may linibo ka mga anghel. Nagpalapit kamo sa malipayon nga pagtilipon sang panganay nga mga anak sang Dios, nga ang ila mga ngalan nasulat sa langit. Nagpalapit kamo sa Dios, nga amo ang hukom sang tanan nga mga tawo, kag sa mga espiritu sang matarong nga mga tawo nga ginhimpit. Nagpalapit kamo kay Jesus, nga amo ang nagpatigayon sang bag-o nga kasugtanan, kag sa nawisik nga dugo nga nagapamatuod sang maayo pa nga mga butang sang sa dugo ni Abel.

Aleluya:

Mateo 11:29

   Itakod ang akon gota sa inyo, siling sang Ginoo, kag magtuon kamo sa akon, kay ako malulo kag mapainuboson sing tagipusoon.

Ang Pagbasa sang Santos nga Ebanghelyo suno kay:

San Lucas 14:1, 7-14

   Sang isa ka Adlaw nga Inugpahuway si Jesus nagkadto sa pagkaon sa balay sang isa ka pangulo sang mga Fariseo, kag didto ginpanilagan nila sia.

   Natalupangdan ni Jesus kon daw ano ang pagpili sang mga inagda sang mga pinasulabi nga mga pulongkoan, gani naghatag sia sa ila sining palaanggiran, “Kon may mag-agda sa imo sa punsyon sang kasal, indi ka magpungko sa pinasulabi nga pulongkoan, kay basi may inagda sia nga labing dungganon pa sa imo, kag ang nag-agda sa inyo nga duha magapalapit sa imo kag magsiling, ‘Sia ang papungkoa dira.’ Ti, mahuy-an ka kag mapilitan sa pagpungko sa kubos nga pulongkoan. Sa baylo, kon ginaagda ka, kadto ka kag magpungko sa labing kubos nga pulongkoan, agod nga kon mag-abot ang nag-agda sa imo magasiling sia sa imo, ‘Abyan, diri ka pungko upod sa mga dungganon.’ Ini magapadungog sa imo sa atubangan sang iban nga mga inagda. Kay ang nagapakataas sang iya kaugalingon pagapaubson kag ang nagapaubos sang iya kaugalingon pagapataason.”

   Dayon si Jesus nagsiling sa nag-agda sa iya, “Kon ikaw nagahatag sing panyaga ukon panihapon, indi pag-agdaha ang imo mga abyan, ukon ang imo mga utod, ukon ang imo mga himata, ukon ang imo kasilingan nga manggaranon, basi sila man magaagda sa imo, kag mabaton mo na ang imo balos. Kon nagahiwat ka sing punsyon, agdaha ang mga imol, ang mga pingkaw, ang mga piang kag ang mga bulag. Manginbulahan ka kay indi sila makabalos sa imo. Ang Dios ang magabalos sa imo sa pagkabanhaw sang mga matarong.”

Agosto 31 | Setyembre 2