"Bulahan Kamo nga mga Imol - inyo ang Ginharian sang Dios"

Liturhiya sang Pulong

(Miyerkules, Setyembre 11, 2019)

Ang Pagbasa gikan sa Sulat ni San Pablo nga Apostol, sa mga:

Taga-Colosas 3:1-11

   Ginbanhaw kamo kaupod ni Cristo. Gani pangitaa ninyo ang mga butang nga yara sa langit, sa diin nagalingkod si Cristo sa iya trono sa tuo sang Dios. Ibug-os ang inyo mga panghunahona sa mga butang nga didto sa langit kag indi sa mga butang nga yari diri sa duta. Kay napatay kamo kag ang inyo kabuhi natago upod kay Cristo sa Dios. Ang inyo matuod nga kabuhi amo si Cristo, kag kon sia magpahayag, kamo man magapahayag upod sa iya kag magaambit sang iya himaya!

   Gani dapat ninyo patyon ang tawuhanon nga mga handom nga nagapanghikot sa inyo subong sang pagpakighilawas, malaw-ay nga pagginawi, kailigbon sang unod, malaut nga mga handom, kag ang pagkadalok (kay ang pagkadalok isa ka sahi sang pagsimba sa diosdios). Tungod sini nga mga butang ang kaakig sang Dios magaabot sa mga wala nagatuman sa iya. Kon sa bagay, kamo man sang una nagkabuhi suno sa sini nga mga kailigbon, sang gingamhan sini ang inyo kabuhi.

   Pero karon, dapat ninyo bayaan ini tanan: ang kaakig, ang lawasnon nga kailigbon kag ang aligutgot. Wala sing mga pagpasipala ukon mga pagdinupak nga magkawas sa inyo mga bibig. Indi kamo magbinutig sa isa kag isa, kay inyo na gin-uba ang daan ninyo nga kinaugali upod sa iya mga pagginawi, kag nagsuklob kamo sang bag-o nga kinaugali. Ini amo ang bag-o nga tawo, nga ginapabag-o sa gihapon sang Dios nga nagtuga sa iya agod nga mangin-iya kaangay, sa tuyo nga mapakilala niya sa inyo sing bug-os ang iya kaugalingon. Tungod sini wala sing mga Gentil, ukon mga Judio, mga tinuli kag indi tinuli, mga di-edukado, mapintas nga mga tribo, ulipon ukon hilway nga mga tawo, kay si Cristo amo ang tanan kag si Cristo yara sa tanan.

Salmo sa Pagsabat:

Mga Salmo 145:2-3, 10-11, 12-13

(S) Ang Ginoo maayo sa tanan.

Sa tagsa ka adlaw magapasalamat ako sa imo; dayawon ko ikaw sa wala sing katubtoban. Ang Ginoo gamhanan, kag dapat gid dayawon sing labi, ang iya pagkagamhanan indi mahangpan. (S)

Ang tanan mo nga mga tinuga, O Ginoo, magadayaw sa imo, kag ang imo mga tawo magapasalamat sa imo! Magahambal sila sang himaya sang imo ginharian, kag magasugid sila sang imo gahom. (S)

Agod ang tanan nga mga tawo makahibalo sang imo gamhanan nga mga buhat, kag sang mahimayaon nga pagkahalangdon sang imo ginharian. Ang imo ginharian wala sing katapusan, kag ikaw hari sa walay katubtoban. 

Aleluya:

Lucas 6:23

   Magkalipay kag maghinugyaw kamo, siling sang Ginoo, kay daku ang inyo balos sa langit. 

Ang Pagbasa sang Santos nga Ebanghelyo suno kay:

San Lucas 6:20-26

   Gintulok ni Jesus ang iya mga gintuton-an kag ginsingganan: 

   “Bulahan kamo nga mga imol, 

   Kay inyo ang Ginharian sang Dios!

   “Bulahan kamo nga ginagutom karon, 

   Kay pagabusgon kamo! 

   “Bulahan kamo nga nagahibi karon, 

   Kay magakadlaw kamo!

   “Bulahan kamo kon ang mga tawo magdumot sa inyo, magsikway sa inyo, magpasipala sa inyo, kag magtawag sa inyo nga malaut tungod sa Anak sang Tawo. Magkalipay kamo kon ina matabo, kag maghinugyaw kamo, kay daku ang inyo balos sa langit. Kay amo man ini ang ginhimo sang ila mga katigulangan sa mga propeta.

   “Pero kailo man kamo 

   Nga mga manggaranon karon, 

   Nga nakaagom na 

   Sang mahapos nga pagpangabuhi!

   “Kailo man kamo 

   Nga mga busog karon, 

   Kay gutomon kamo! 

   “Kailo man kamo 

   Nga nagakadlaw karon, 

   Kay magapangasubo 

   Kag magahibi kamo!

   “Kailo man kamo kon ang tanan nga mga tawo magdayaw sa inyo, kay amo man ini ang ginhimo sang ila mga katigulangan sa di-matuod nga mga propeta.”

Setyembre 10 | Setyembre 12