"Tungod kay Indi gid Madalom ang Gamot ang Tanom Madali nga Nalaya"

Liturhiya sang Pulong

(Miyerkules, Hulyo 24, 2019)

San Sarbelio Makhluf, Pari

Ang Pagbasa gikan sa Libro sang:

Exodo 16:1-5, 9-15

   Ang tanan nga mga pumoluyo sang Israel naghalin sa Elim, kag sa ika-15 nga adlaw sang ikaduha nga bulan sa tapos makagwa sila sa duta sang Egipto nag-abot sila sa desierto sang Sin nga yara sa gin-utlan sang Elim kag sang Sinai. Nagreklamo sila tanan kay Moises kag kay Aaron didto sa desierto kag nagsiling sa ila,"Maayo pa kuntani nga ginpamatay kami sang Ginoo didto sa Egipto. Didto makapungko kami sa luyo sang mga kaldero nga puno sang linuto nga mga karne kag makapagusto kami sing kaon. Pero inyo kami gindala sa sini nga desierto agod pagutoman tubtob magkalamatay kami.”

   Ang Ginoo nagsiling kay Moises, "Karon paulanon ko sa inyo ang tinapay halin sa langit. Ang mga tawo magagwa kag magapanguha kada adlaw sing tinapay nga ila kinahanglanon sa sina nga adlaw. Sa sini nga paagi akon sila nga tilawan kon ila tumanon ang akon mga sugo. Sa ikaanom ka adlaw, magpanguha sila sing tinapay para sa duha ka adlaw, kag amanon nila ini."

   Si Moises nagsiling kay Aaron, "Singgana ang tanan nga mga pumoluyo nga magkari sila kag magtindog sa atubangan sang Ginoo, kay nabatian niya ang ila mga reklamo.” Sang paghambal ni Aaron sa tanan nga mga pumoluyo, nagliso sila kag naglantaw sa desierto kag sa gilayon nagpakita ang himaya sang Ginoo sa isa ka panganod. Ang GINOO nagsiling kay Moises, “Nabatian ko ang mga reklamo sang mga Israelinhon. Amo ini ang isiling mo sa ila, 'Sa kahapunanon may sud-an kamo nga kaunon, kag pagkaaga makapagusto kamo sing pagkaon sang tinapay. Dayon makilal-an ninyo nga Ako, ang Ginoo, amo ang inyo Dios.' "

   Sa kahapunanon nag-abot ang mga pitaw kag nagpuno sang kampamento kag sang pagkaaga may madamol nga tun-og sa palibot sang ila kampamento. Sang magmala na ang tun-og, may nakita sa desierto nga manipis kag malapadlapad nga butang, nga pareho kapino sang ginaling nga yelo. Sang makita ini sang mga Israelinhon wala sila makakilala kon ano yadto kag nagpinamangkutay sila, "Ano bala ini? " Nagsabat si Moises sa ila, “Ini amo ang tinapay nga ginhatag sang Ginoo nga manginkalan-on ninyo.

Salmo sa Pagsabat:

Mga Salmo 78:18-19, 23-24, 25-26, 27-28

(S) Ginhatagan sila sang Ginoo sing kalan-on halin sa langit.

Gintilawan nila sing hungod ang Dios, paagi sa pagpangayo sing kalan-on nga luyag nila. Naghambal sila batok sa Dios, nga nagasiling, “Makahatag bala ang Dios sing pagkaon sa desierto? (S)

Pero ginmanduan niya ang langit sa ibabaw, kag ginsugo nga mag-abri ang iya mga puwertahan; ginhatagan niya sila sing kalan-on halin sa langit, paagi sa pagpadala sa ila sing mana nga ila kaunon. (S)

Gani nagkaon sila sang kalan-on sang mga anghel. Ang Dios naghatag sa ila sang kalan-on nga makapagusto sila sing kaon. Dayon ginpahuyop niya ang salatan, kag sa iya gahom ginbuy-an niya ang habagat. (S)

Kag ginpadalhan niya sila sang mga pispis nga nagadulom subong sang yab-ok, subong kadamo sang mga balas sa baybayon; nagtupa ini sa tunga sang ila kampamento, sa palibot sang ila mga tolda. (S)

Aleluya:

   Ang binhi amo ang Pulong sang Dios, ang manugsab-og amo si Kristo: ang tanan nga nagdangop sa iya, magakabuhi nga walay katapusan.

Ang Pagbasa sang Santos nga Ebanghelyo suno kay:

San Mateo 13:1-9

   Sa amo man nga adlaw naggwa si Jesus sa balay kag nagkadto sa higad sang linaw, kag nagpungko sia didto sa pagpanudlo. Tungod kay gintipunan sia sang madamo nga mga tawo, nagsakay sia sa sakayan kag nagpungko didto, samtang ang mga tawo nagtilindog sa higad sang linaw. Madamo nga mga butang ang gintudlo ni Jesus sa ila paagi sa mga palaanggiran nga subong sini: 

   “May isa ka tawo nga naglakat sa pagsab-og. Sang pagsab-og niya sang binhi, ang iban nagtupa sa dalan, kag ang mga pispis nagdapo kag nagtuka sini. Ang iban nagtupa sa batuhon nga mga duog, sa diin hapaw lamang ang duta. Sa wala lang madugay nag-ulhot ang binhi tungod kay manabaw ang duta. Sang udto na ang adlaw, nalayong ang bag-ong tubo nga binhi, kag tungod kay indi gid madalom ang gamot sini, ang tanom madali nga nalaya. Ang iban nga binhi nagtupa sa mga talungon, kag ang talungon nagtubo kag naglumos sang tanom. Pero ang iban nga binhi nagtupa sa maayo nga duta kag namunga: ang iban sini nagpatubas sang 100 ka pilo, ang iban sini 60 kag ang iban sini 30.”

   Kag si Jesus nagsiling, “Gani, magpamati kamo kon may dulonggan kamo!”

Hulyo 23 | Hulyo 25