Ang Pagwali ni Juan Bautista

Liturhiya sang Pulong

(Domingo, Disyembre 8, 2019)

Ikaduha nga Domingo sang Adbyento

1. Ang Pagbasa gikan sa Libro :

Isaias nga Propeta 11:1-10

Ang harianon nga linahi ni David kaangay sang isa ka kahoy nga ginpulod; pero subong sang pagpanalingsing sang puno sang kahoy nga ginpulod, subong man magabangon ang bag-o nga hari gikan sa mga kaliwat ni David.
   Ang gahom sang Ginoo
   Magahatag sa iya sing kaalam,
   Ang ihibalo kag abilidad
   Sa paggahom sa iya mga tawo.
   Makilala niya ang kabubot-on sang Ginoo
   Kag magakahadlok sa iya,
   Kag may kalipay sia
   Sa pag-alagad sa iya.
   Indi sia maghukom paagi sa iya makita
   Ukon paagi sa sugidsogid lang;
   Pagahukman niya ang mga imol sing nagakaigo,
   Kag apinan niya ang kinamatarong
   Sang mga mapainuboson.
   Sa iya mando ang duta pagsilutan,
   Kag ang malaut nga mga tawo magakalamatay.
   Magagahom sia sa iya mga tawo,
   Sa katarungan kag kamatuoran.
   Ang mga lobo kag mga karnero,
   Magaupdanay nga may kalinong,
   Kag ang mga leopardo magaluko
   Upod sa mga tinday sang kanding.
   Ang mga tinday sang baka
   Kag ang mga totoy sang leon
   Magaupdanay sa pagkaon
   Kag ang magamay nga mga kabataan
   Amo ang magatatap sa ila.
   Ang mga baka kag mga uso
   Magasalo sa pagkaon,
   Kag ang ila mga tinday
   Kag mga totoy
   Magaluko sing tingob nga may kalinong.
   Ang mga leon magahalab sang dagami,
   Kaangay sang mga baka.
   Bisan ang lapsag indi maano
   Kon maghampang sia
   Malapit sa dalitan nga man-og.
   Sa Sion, ang balaan nga bukid sang Dios
   Wala sing butang nga makahalalit
   Ukon malaut.
   Ang duta mapuno sang pagkilala sa Ginoo
   Subong sang mga kadagatan
   Nga puno sang tubig.
   Ang adlaw magaabot nga ang bag-o nga hari halin sa linahi ni David mangintanda sa mga kapungsoran. Magatipon sila sing tingob sa iya harianon nga siyudad kag magapadungog sa iya.

Salmo sa Pagsabat:

Mga Salmo 72:1-2, 7-8, 12-13, 17

(S) Kabay nga sa iya panahon magluntad ang pagkamatarong kag ang paghidait magapadayon.

Tudloi ang hari sa paghukom suno sa imo pagkamatarong, O Dios, ipaambit sa iya ang imo kaugalingon nga katarungan, agod magahari sia sa imo mga tawo suno sa katarungan, kag magagahom sing matarong sa mga imol. (S)

Kabay nga sa iya panahon magluntad ang pagkamatarong, kag ang kauswagan magpadayon samtang nagasanag pa ang bulan. Ang iya ginharian magalambot halin sa isa ka dagat tubtob sa isa, halin sa Suba sang Eufrates tubtob sa punta sang duta. (S)

Ginaluwas niya ang mga imol nga nagapanawag sa iya, kag ang mga nawad-an kag mga pinatumbayaan. May kaluoy sia sa mga maluya kag sa mga imol, ginaluwas niya ang kabuhi sang mga nawad-an. (S)

Kabay nga ang ngalan sang hari indi gid pagkalimtan, kabay ang iya pagkabantog magpadayon subong sang adlaw. Kabay nga ang tanan nga mga katawhan magpangayo sa Dios nga bendisyunan sila subong sang iya pagbendisyon sa hari. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Roma 15:4-9

   Kay ang tanan nga nasulat sa mga Kasulatan ginsulat sa pagtudlo sa aton, agod nga paagi sa pagpailob kag pagpalig-on nga ginatudlo sa aton sang mga Kasulatan may paglaom kita. Kabay nga ang Dios nga ginagikanan sang pagpailob kag pagpalig-on mag-isa sang inyo mga panghunahona paagi sa pagsunod ninyo kay Cristo Jesus, agod nga sa isa lamang ka tingog madayaw ninyo sing tingob ang Dios kag ang Amay sang aton Ginoong Jesu-Cristo.
   Gani, magbinatunay kamo para sa himaya sang Dios, subong nga ginbaton kamo ni Cristo. Kay nagasiling ako sa inyo nga si Cristo nangin-isa ka alagad sang mga Judio, sa pagpahayag nga ang Dios masaligan, sa pagtuman sang iya mga saad sa mga patriarka, kag agod nga makadayaw man ang mga Gentil sa Dios tungod sang iya kaluoy. Kay ang kasulatan nagasiling:
   “Gani, magapasalamat ako sa imo Sa tunga sang mga Gentil, Magaamba ako sang mga pagdayaw Sa imo ngalan.” 

Aleluya:

Lucas 3:4, 6

   Amana ninyo ang alagyan Para sa Ginoo, Maghimo kamo sing tadlong nga dalan Nga iya pagaagyan! Ang tanan nga katawuhan Makakita sang kaluwasan Gikan sa Ginoo!’ ” 

Ang Pagbasa sang Santos nga Ebanghelyo suno kay:

San Mateo 3:1-12

   Sa sadtong mga adlaw nag-abot si Juan Bautista nga nagawali sa desierto sang Judea. Nagsiling sia, “Magbiya kamo sang inyo mga sala, kay ang Ginharian sang langit malapit na!” Amo ini nga Juan ang ginahambal ni Isaias nga propeta sang magsiling sia:
   “May nagasinggit sa desierto,
   ‘Amana ninyo ang alagyan
   Para sa Ginoo,
   Maghimo kamo sing tadlong nga dalan
   Nga iya pagaagyan!’ ”
   Ang bayu ni Juan nahimo sa bulbol sang kamelyo, kag ang iya paha panit. Ang iya kalan-on apan kag dugos sa talon. Ang mga tawo nagdugok sa iya halin sa Jerusalem, halin sa bug-os nga probinsya sang Judea kag halin sa mga duog sa palibot sang suba sang Jordan. Gintuad nila ang ila mga sala kag ginbautisohan sila niya sa Jordan.
   Sang pagkakita ni Juan nga madamo ang mga Fariseo kag mga Saduceo nga nagakadto sa iya sa pagpabautiso, nagsiling sia sa ila, “Mga kaliwat sang man-og, sin-o bala ang nagsiling sa inyo nga makapalagyo kamo sa kaakig sang Dios nga madali na lang mag-abot? Pamatud-i ninyo sa inyo mga buhat nga nagahinulsol kamo sang inyo mga sala. Indi kamo magsalig nga si Abraham amo ang inyo amay, kay nagsiling ako sa inyo nga ang Dios makahimo sining mga bato nga mga anak ni Abraham! Ang wasay handa na sa pag-utod sang kahoy sa iya gid puno. Ang tagsa ka kahoy nga wala nagapamunga sing maayo pagatapson kag ihaboy sa kalayo. Nagabautiso ako sa inyo sa tubig sa pagpakilala nga nagahinulsol kamo, pero ang nagakari nga dason sa akon magabautiso sa inyo sa Espiritu Santo kag sa kalayo. Gamhanan pa sia sa akon, kag indi gani ako takos bisan pa sa pagbitbit sang iya sandalyas. Ginauyatan na niya ang iya inugpahangin sa pagpain sang tinggas sa upa; dayon pagatipunon niya ang tinggas sa iya tambubo, pero pagasunogon niya ang upa sa kalayo nga indi gid mapalong!” 

Disyembre 7 | Disyembre 9