Setyembre 30, 2020, Miyerkules sang Ika-26 nga Semana sang Tuig

Liturhiya sang Pulong

San Geronimo, Pari kag Doktor sang Simbahan

Nahauna nga Balasahon - Job 9:1-12, 14-16

Salmo sa Pagsabat - Mga Salmo 88:10-11, 12-13, 14-15

Aleluya - Filipos 3:8-9

Ebanghelyo - Lucas 9:57-62

Takos sa Ginharian sang Dios

Ang Pagbasa gikan sa Libro ni:

Job 9:1-12, 14-16

Huo, nabatian ko na ina tanan sang una. Pero paano ang tawo makadaog sang iya kaso batok sa Dios? Paano sia makapakigsuay sa iya? Makapamangkot sia sing isa ka libo ka mga pamangkot nga wala gid sing may makasabat. Ang Dios maalam gid kag gamhanan, wala gid sing tawo nga makatindog batok sa iya. Sa wala sing paandam ginahalin niya ang mga bukid, kag sa iya kaakig ginalaglag niya sila.

Ang Dios nagapadala sing linog kag nagatay-og sang duta, nagauyog sia sang mga haligi nga nagatukod sang kalibutan. Ang Dios makapugong sang pagbutlak sang adlaw, kag sang pagsiga sang mga bituon kon gab-i. Wala sing may nagbulig sa Dios sa paghumlad sang langit, ukon sa pagtapak sa likod sang dragon sa dagat. Ang Dios nagbutang sang mga bituon sa langit, ang Oso, Orion, Pleyades, kag mga bituon sa bagatnan. Indi naton mahangpan ang dalagku nga mga butang nga iya ginahimo. Kag wala sing katapusan ang iya mga milagro.

Ang Dios nagalabay, pero indi ko sia makita. Ginakuha niya ang iya naluyagan, kag wala sing may makapugong sa iya, wala sing may makapamangkot sa iya, "Ano bala ang ginahimo mo?"

Gani paano ang pagsabat ko sa Dios? Bisan ako wala sing sala, ang akon lamang mahimo amo ang pagpakiluoy sa Dios nga akon hukom. Pero bisan tugotan niya ako sa paghambal, indi ako magpati nga pamatian niya ako.

Salmo sa Pagsabat:

Mga Salmo 88:10-11, 12-13, 14-15

(S) O Ginoo, pamatii ang akon pangamuyo.

O Ginoo, adlaw-adlaw nagapanawag ako sa imo, kag nagabayaw ako sang akon mga kamot sa imo sa pangamuyo! Nagahimo ka bala sing mga milagro para sa mga patay? Nagabangon bala sila kag nagadayaw sa imo? (S)

Ginabantala bala ang imo mapinadayunon nga gugma sa lulobngan, ukon ang imo pagkamatutom sa duog sang kalaglagan? Makita bala ang imo mga milagro sa sadto nga duog sang kadudolman, ukon ang imo kaayo sa duta sang nagkawala? (S)

O Ginoo, nagapanawag ako sa imo sa pagpangayo sing bulig, agaaga nagapangmuyo ako sa imo. Ngaa bala ginasikway mo ako, O Ginoo? Ngaa bala nagapanago ka sa akon? Halin sang pamatan-on pa ako nag-antos ako nga yara sa bibi sang kamatayon, nalapyo na gid ako sa kabug-at sang imo mga silot. (S)

Aleluya:

Taga-Filipos 3:8-9

Ang tanan ginakabig ko nga basura, agod maangkon ko si Cristo, kag agod mangin-isa kami sing bug-os.

Ang Pagbasa sang Santos nga Ebanghelyo suno kay:

San Lucas 9:57-62

Sang nagapadayon sila sa paglakat, may isa ka tawo nga nagsiling kay Jesus, “Maupod ako sa imo bisan diin ka magkadto.” 

Si Jesus nagsiling sa iya, “Ang mga singgalong may mga buho, kag ang mga pispis may mga pugad, pero ang Anak sang Tawo wala gid sing hiligdaan kag palahuwayan.” Nagsiling si Jesus sa isa na man ka tawo, “Upod ka sa akon.” 

Pero ang tawo nagsiling, “Ginoo, tugoti anay ako sa pagpauli kag paglubong sang akon amay.” 

Si Jesus nagsabat, “Pabay-i ang mga patay sa paglubong sang ila mga minatay. Lakat ka kag ibantala ang Ginharian sang Dios.” 

Ang isa pa gid ka tawo nagsiling, “Maupod ako sa imo, Ginoo, pero tugoti ako anay sa pagpaalam sa akon panimalay.” 

Si Jesus nagsiling sa iya, “Ang tawo nga nagaarado kag nagabulobalikid wala sing pulos sa Ginharian sang Dios.”

Setyembre 29 | Oktubre 1

Setyembre 29, 2020, San Gabriel, Miguel kag Rafael, mga Arkangheles

 Liturhiya sang Pulong

Nahauna nga Balasahon - Daniel 7:9-10, 13-14

Salmo sa Pagsabat - Mga Salmo 138:1-2, 2-3, 4-5

Aleluya - Mga Salmo 103:21

Ebanghelyo - Juan 1:47-51

Makita Ninyo ang mga Anghel sang Dios

Ang Pagbasa gikan sa Libro ni:

Daniel nga Propeta 7:9-10, 13-14

Samtang nagatan-aw ako, may ginbutang didto nga mga trono. Ang isa nga nagakabuhi sing walay katapusan nagpungko sa isa sang mga trono. Ang iya mga bayu maputi kaangay sang yelo kag ang iya buhok kaangay sang bulbol sang karnero. Ang iya trono natungtong sa mga rueda nga nagadabadaba nga kalayo kag ang kalayo nagakawigit gikan sa sini. May mga linibo ka mga tawo didto sa pag-alagad sa iya, kag mga minilyon ka mga tawo nagtindog sa atubangan niya. Ang paghukom nagsugod kag ang mga libro ginbuksan. 

Sa akon palanan-awon sa sadto nga gab-i, may nakita ako nga daw tawo. Nagapalapit sia sa akon nga ginalikupan sang panganod, kag nagkadto sia sa isa nga nagakabuhi sing walay katapusan kag gindala sia sa iya presensya. Dayon ginhatagan sia sing awtoridad, kadungganan, kag harianon nga gahom, agod nga ang mga tawo sang tanan nga mga pungsod, rasa, kag linggwahe magaalagad sa iya. Ang iya gahom magapadayon sa walay katubtoban, kag ang iya ginharian wala sing katapusan.

Salmo sa Pagsabat:

Mga Salmo 138:1-2, 2-3, 4-5

(S) Nagakanta ako sa pagdayaw sa imo, O Ginoo, sa atubangan sang mga angheles.

Nagapasalamat ako sa imo, O Ginoo, sa bug-os ko nga tagipusoon; nagakanta ako sing pagdayaw sa imo sa atubangan sang mga dios. Nagasimba ako sa atubangan sang imo balaan nga Templo kag nagadayaw sang imo ngalan. (S)

tungod sang imo mapinadayunon nga gugma kag katutom, kay nagpahayag ka nga ikaw kag ang imo mga sugo labaw sa tanan. Ginsabat mo ako sang nagpanawag ako sa imo; ginpabakod mo ako sang imo kusog. (S)

Ang tanan nga mga hari sang duta magadayaw sa imo, O Ginoo, kay nakabati sila sang imo mga saad. Magakanta sila nahanungod sang ginhimo sang Ginoo, kag nahanungod sang iya daku nga himaya. (S)

Aleluya:

Mga Salmo 103:21

Dayawa ninyo ang Ginoo, tanan kamo nga gamhanan sa langit, kamo nga mga alagad niya nga nagatuman sang iya naluyagan!

Ang Pagbasa sang Santos nga Ebanghelyo suno kay:

San Juan 1:47-51

Sang makita ni Jesus si Natanael nga nagapakadto sa iya nagsiling sia nahanungod kay Natanael, “Yari ang isa ka matuodtuod nga Israelinhon; waay sing limbong sa iya!” 

Si Natanael nagpamangkot sa iya, “Paano mo ako nakilala?” 

Si Jesus nagsabat, “Nakita ko na ikaw didto sa idalom sang kahoy nga higera, sa wala pa ikaw gintawag ni Felipe.” 

Nagsabat si Natanael, “Manunodlo, ikaw amo ang Anak sang Dios! Ikaw amo ang Hari sang Israel!” 

Nagsiling si Jesus, “Nagatuo bala ikaw tungod kay nagsiling ako sa imo nga nakita ko ikaw sang didto ikaw sa idalom sang kahoy nga higera? Dalagku pa gid sini nga mga butang ang imo makita!” Kag si Jesus nagsiling sa ila, “Matuod gid, makita ninyo ang langit nga nabuksan kag ang mga anghel sang Dios nga nagasakapanaog sa ibabaw sang Anak sang Tawo!”

Setyembre 28 | Setyembre 30

Setyembre 28, 2020, Lunes sang Ika-26 nga Semana sang Tuig

Liturhiya sang Pulong

San Lorenzo Ruiz kag Iya mga Kaupdanan, Martires sang Pilipinas

Nahauna nga Balasahon - Job 1:6-22

Salmo sa Pagsabat - Mga Salmo 17:1, 2-3, 6-7

Aleluya - Marcos 10:45

Ebanghelyo - Lucas 9:46-50

"Nahibaluan ni Jesus kon ano ang ila Ginahunahona"

Ang Pagbasa gikan sa Libro ni:

Job 1:6-22

Sang pag-abot sang adlaw nga ang mga anghel magaatubang sa GINOO, si Satanas didto man upod sa ila. Ang GINOO nagpamangkot sa iya, “Diin ka maghalin?”
Si Satanas nagsabat, “Naglagawlagaw ako pakadto pakari nga nagalibutlibot sa duta.”
Ang GINOO nagsiling, “Natalupangdan mo bala ang akon alagad nga si Job? Wala sing isa sa duta nga maayo kag matutom subong sa iya. Ginasimba niya ako kag nagalikaw gid sia sa paghimo sang bisan ano nga malaut.”
Nagsabat si Satanas, “Simbahon ka bala ni Job kon wala sia sing may makuha? Gin-apinan mo sia kag ang iya panimalay kag ang tanan niya nga pagkabutang. Ginapauswag mo ang tanan nga iya ginahimo, kag ginhatagan mo sia sing madamo gid nga mga kasapatan nga nagpuno sang bug-os nga duta. Abi kuhaa ini tanan nga mga butang sa iya kag tan-awon ta, kon indi ka niya pagpakamalauton sa imo atubangan.”
Ang GINOO nagsiling kay Satanas, “Sigi, ini tanan nga mga butang ginatugyan ko sa imo gahom, pero indi lang pag-anha si Job.” Gani naghalin si Satanas.
Isa ka adlaw sang nagakinaon kag nagaininom ang mga kabataan ni Job sa balay sang ila kamagulangan nga utod nga lalaki, may manugbalita nga nagdalagan pakadto kay Job. Nagsiling sia, “Samtang nagaarado kami sa uma, kag ang mga asno nagahalab sa malapit lamang nga duog, sa hinali lamang ginsalakay kami sang mga Sabeanhon kag ginkuha nila ang tanan nga mga kahayupan. Ginpamatay nila ang tanan mo nga mga suloguon, kag ako lang ang nakapalagyo sa pagsugid sa imo.”
Sa wala pa sia makatapos hambal, nag-abot ang isa ka suloguon kag nagsiling, “Naigo sang kilat ang mga karnero kag ang mga manugbantay kag nagkalamatay sila tanan. Ako lang ang naluwas sa pagsugid sa imo.”
Sa wala pa sia makatapos hambal, nag-abot ang isa ka suloguon kag nagsiling, “Ginsalakay kami sang tatlo ka guban sang mga Caldeanhon, ginpamatay nila ang tanan mo nga mga suloguon, gindala nila ang tanan nga mga kamelyo, kag ako lang ang nakapalagyo sa pagsugid sa imo.”
Sa wala pa sia makatapos hambal, nag-abot ang isa ka suloguon kag nagsiling, “Samtang nagakinaon kag nagaininom ang tanan mo nga mga kabataan sa balay sang imo kamagulangan nga anak nga lalaki, nag-abot ang mabaskog nga buhawi halin sa desierto. Ginhakwat kag ginlampos sang buhawi ang balay kag nagkalamatay sila tanan kag ako lang ang naluwas sa pagsugid sa imo.”
Dayon nagtindog si Job kag gingisi niya ang iya bayu sa daku nga kasubo. Ginkiskisan niya ang iya ulo kag naghapa sa duta. Nagsiling sia, “Natawo ako nga wala sing dala kag mapatay man nga wala gid sing dala. Ang GINOO nagahatag, kag sia man ang nagabawi. Dayawon ang iya ngalan!” Wala sapayan sang tanan nga natabo, si Job wala magpakasala paagi sa pagbasol sa Dios.

Salmo sa Pagsabat:

Mga Salmo 17:1, 2-3, 6-7

(S) Balikda ako, kag pamatii ang akon mga pulong.

Pamatii, O Ginoo, ang akon matarong nga pagpakiluoy, talupangda ang akon pagpangayo sing bulig! Pamatii ang akon pangamuyo, kay wala ako nagalimbong. (S)
Magahukom ka pabor sa akon, kay nakahibalo ka sang matarong. Nahibaluan mo ang akon tagipusoon, ginaduaw mo ako sa kagab-ihon. Gin-usisa mo ako sing maayo, kag wala ka sing nakita nga malaut nga handom sa akon, wala ako nagahambal sing malaut. (S)
Nagapangamuyo ako sa imo, O Dios, kay ikaw nagasabat sa akon, gani balikda ako, kag pamatii ang akon mga pulong. Ipahayag ang imo makatilingala nga gugma, O Manlulowas; sa imo luyo indi kami maano sa amon mga kaaway. (S)

Aleluya:

San Marcos 10:45

Ang Anak sang Tawo wala magkari agod alagaron, kundi sa pag-alagad kag sa paghatag sang iya kabuhi sa pagtubos sang madamo nga mga tawo.

Ang Pagbasa sang Santos nga Ebanghelyo suno kay:

San Lucas 9:46-50

   Ang mga gintuton-an nagbinais kon sin-o sa ila ang labing daku. Nahibaluan ni Jesus kon ano ang ila ginahunahona, gani nagkuha sia sing isa ka bata nga diutay kag ginpatindog sia sa iya luyo kag nagsiling sa ila, “Ang nagabaton sining diutay nga bata sa akon ngalan nagabaton sa akon, kag ang nagabaton sa akon nagabaton man sang nagpadala sa akon. Kay ang labing kubos sa inyo amo ang labing daku.”
   Si Juan nagsiling, “Manunodlo, may nakita kami nga isa ka tawo nga nagatabog sang mga yawa sa imo ngalan, kag ginpauntat namon sia tungod kay indi sia katapo namon.”
   Si Jesus nagsiling sa iya kag sa iban nga mga gintuton-an, “Indi ninyo sia pagdumilii, kay ang indi batok sa inyo apin sa inyo.”

Setyembre 27 | Setyembre 29

Setyembre 27, 2020, Ika-26 nga Domingo sang Tuig

Liturhiya sang Pulong

Nahauna nga Balasahon - Ezequiel 18:25-28

Salmo sa Pagsabat - Mga Salmo 25:4-5, 6-7, 8-9

Ikaduha nga Balasahon - Filipos 2:1-11

Aleluya - Juan 10:27

Ebanghelyo - Mateo 21:28-32

Diin nga Bata ang Nagtuman sang Sugo sang Amay?

1. Ang Pagbasa gikan sa Libro ni:

Ezequiel nga Propeta 18:25-28

“Pero nagasiling kamo, ‘Indi husto ang ginahimo sang Ginoo.’ Pamati kamo, mga Israelinhon. Nagahunahona bala kamo nga indi husto ang akon ginahimo? Kamo ang nagahimo sang indi husto. Kon ang matarong nga tawo mag-untat sa paghimo sing maayo, kag maghimo sing malain kag mapatay, tungod sang iya ginhimo nga malaut mapatay sia. Kon ang malaut nga tawo mag-untat sa pagpakasala kag maghimo sing matarong kag maayo, maluwas niya ang iya kabuhi. Kon matalupangdan niya ang iya ginahimo kag mag-untat sia sa pagpakasala, indi sia mapatay, kundi magakabuhi.

Salmo sa Pagsabat:

Mga Salmo 25:4-5, 6-7, 8-9

(S) Ginoo, dumdoma man ang Imo kaayo kag mapinadayunon nga gugma.

Tudloi ako sang imo mga dalan, O Ginoo, ipakilala man ini sa akon. Tudloi ako sa pagkabuhi suno sa imo kamatuoran, kay ikaw ang akon Dios nga nagaluwas sa akon. Sa bug-os nga adlaw nagasalig ako sa imo. (S)

Ginoo, dumdoma man ang imo kaayo kag mapinadayunon nga gugma, nga imo ginpakita halin pa gid sang una. Patawara man ang akon mga sala kag kasaypanan sang akon pagkapamatan-on, tungod sang imo mapinadayunon nga gugma kag kaayo, dumdoma man ako, O Ginoo! (S)

Ang Ginoo matarong kag maayo, ginatudloan niya ang mga makasasala sang dalan nga ila pagaagyan. Ginatuytoyan niya ang mapainuboson sa matadlong nga dalan, kag iya sila ginatudloan sang iya kabubot-on. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Filipos 2:1-11

Nagapalig-on bala sa inyo ang inyo kabuhi kay Cristo? Nagalipay bala sa inyo ang iya gugma? Nagahiusa bala kamo sa Espiritu? May kalulo bala kamo kag kaluoy sa isa kag isa? Ti karon, ginapangabay ko sa inyo, lipaya gid ninyo ako sing bug-os paagi sa inyo pag-isa sing hunahona, paghigugmaanay, kag paghiusa sa espiritu kag tinutoyo. Indi kamo magmaiyaiyahon ukon magpadayawdayaw sa inyo mga ginahimo, kundi magpaubos kamo sa isa kag isa kag indi kamo maghunahona nga labaw kamo sa iban. Pangitaa ninyo ang kaayuhan sang iban kag indi lang ang inyo kaugalingon nga kaayuhan. Hupti ninyo ini nga panghunahona nga iya man ni Cristo Jesus: 

Ang kinaugali sang Dios Yara sa iya gihapon, Pero wala sia maghunahona Nga sa pakusog Dapat sia magtinguha Nga manginkaangay sa Dios. Sa baylo Sa iya kaugalingon nga kabubot-on Ginpaiway niya ini tanan, Kag nagsuklob sia Sang kinaugali sang isa ka ulipon. Nagpakatawo sia, Kag nagpakita sa dagway sang tawo. Nagpaubos siya sang iya kaugalingon Kag nagmasinulondon Tubtob sa kamatayon, Bisan pa ang kamatayon sa krus. Tungod sini Ginbayaw sia sang Dios sa kahitaasan, Kag ginhatagan sia sing ngalan Nga labaw sa tanan nga ngalan. Gani sa ngalan ni Jesus, Ang tanan nga mga tinuga, Sa langit kag sa duta, Kag sa idalom sang duta Magaluhod, Kag ang tanan magkilala sing dayag Nga si Jesu-Cristo amo ang Ginoo, Sa himaya sang Dios nga Amay. 

Aleluya:

San Juan 10:27

Ang akon mga karnero nagapamati sa akon tingog, siling sang Ginoo; Kilala ko sila kag nagasunod sila sa akon. 

Ang Pagbasa sang Santos nga Ebanghelyo suno kay:

San Mateo 21:28-32

“Karon, ano bala ini sa inyo? May isa ka tawo nga may duha ka anak nga lalaki. Ginkadtuan niya ang magulang kag ginsingganan, ‘Toto, kadto ka karon sa uma kag mag-obra.’ Nagsabat sia, ‘Indi ako!’ Pero sang ulihi nagbaylo ang iya hunahona kag nagkadto sia sa uma. Karon ang amay nagkadto man sa manghod kag nagsiling sing amo man. Ang bata nagsabat, ‘Huo, Tay,’ pero wala sia magkadto. Diin sini sa ila nga duha ang nagtuman sang sugo sang amay?”

Nagsabat sila, “Ang magulang.”

Si Jesus nagsiling sa ila, “Nagasiling ako sa inyo nga unahan pa kamo sang mga manugsokot sang buhis kag sang malain nga mga babayi sa pagsulod sa Ginharian sang Dios. Kay si Juan Bautista nagkari kag nagtudlo sa inyo sang husto nga dalan, kag wala kamo magpati sa iya, pero ang mga manugsokot sang buhis kag ang malain nga mga babayi nagpati sa iya. Bisan pa nakita ninyo ini, wala gid magliso ang inyo hunahona kag magpati sa iya.” 

Setyembre 26 | Setyembre 28

Setyembre 26, 2020, Sabado sang Ika-25 nga Semana sang Tuig

Liturhiya sang Pulong

Nahauna nga Balasahon - Manugwali 11:9-12:8

Salmo sa Pagsabat - Mga Salmo 90:3-4, 5-6, 12-13, 14 kag 17

Aleluya - 2 Timoteo 1:10

Ebanghelyo - Lucas 9:43-45

"Ang Tanan nga mga Tawo Natingala gid sa Daku nga Gahom sang Dios"

Ang Pagbasa gikan sa Libro sang:

Manugwali 11:9-12:8

Mga pamatan-on, magkalipay kamo sa inyo pagkapamatan-on. Magkalipay kamo samtang pamatan-on pa kamo. Himoa ninyo ang luyag ninyo himuon kag tumana ang handom sang inyo tagipusoon. (Pero dumdoma ninyo nga ang Dios magahukom sa inyo sang bisan ano nga inyo ginahimo.)
Indi kamo magpalibog ukon magkalisod sang bisan ano kay ang pagkapamatan-on agi lang.
Gani dumdoma ninyo ang inyo Manunoga samtang pamatan-on pa kamo, sa wala pa mag-abot yadtong masubo nga mga inadlaw kag mga tinuig nga magasiling kamo, “Wala ako sing kalipay sa kabuhi.” Ina kon kapawa sang adlaw, sang bulan, kag sang mga bituon magadulom para sa inyo, kag ang gal-om wala gid nagakapanas. Dayon ang inyo mga kamot nga nagaapin sa inyo magakurog, kag ang inyo mga tuhod nga karon mapakod pa, magaluya. Ang inyo mga ngipon nga pila na lang ka bilog indi na makausang, kag ang inyo mga mata magadulom kag indi na makakita. Ang inyo mga dulonggan indi na makabati sang gahod sa kalsada. Daw indi na kamo makabati sang gahod sang galingan samtang nagagaling ini, ukon sang musika nga ginatukar, pero bisan ang kanta sang isa ka pispis magapabugtaw sa inyo sa katulogon. Mahalawhaw kamo sang mataas nga mga duog, kag ang paglakat makatalagam. Ang inyo buhok magaubanon, kag ang inyo kapagros kag handom madula.
Magapauli kita sa aton puloy-an nga dayon, kag sa sadto nga tion bisan sa kalsada makita ang mga nagalalaw. Ang kadena nga pilak mabugto, kag ang suga nga bulawan madagdag kag mabuka. Ang higot sang timba mabugto, kag ang timba mawasak. Ang aton mga lawas magabalik sa yab-ok sang duta, kag ang ginhawa sang kabuhi magabalik sa Dios, nga amo ang naghatag sini sa aton.
Wala sing kapuslanan, wala sing kapuslanan, siling sang Manugwali. Ang tanan wala sing kapuslanan. 

Salmo sa Pagsabat:

Mga Salmo 90:3-4, 5-6, 12-13, 14 kag 17

(S) O Ginoo, Ikaw ang amon puloy-an halin sang una.

Ginamanduan mo ang mga tawo sa pagbalik sa ila ginhalinan, ginahimo mo sila liwat nga duta. Ang isa ka libo ka tuig para sa imo subong lang sang isa ka adlaw; kaangay lang sila sang kahapon nga nagligad na, subong sang isa ka malip-ot nga takna sa kagab-ihon. (S)
Ginaanod mo ang mga tawo subong sang baha; subong sila sang damgo nga wala nagadugay. Subong sila sang hilamon nga nagaulhot kon aga, nagatubo kag nagalagtom, pero pagkahapon nagakalaya kag nagakapatay. (S)
Tudloi kami kon daw ano kalip-ot sang amon kabuhi, agod nga manginmainandamon kami. O Ginoo, tubtob pa bala san-o ikaw malugpayan? Kaluoyi man ang imo mga alagad! (S)
Pun-a kami sa tagsa ka aga sang imo mapinadayunon nga gugma, agod magkanta kag magkalipay kami sa bug-os namon nga kabuhi. Ginoo nga amon Dios, kabay nga bendisyunan mo kami, kag hatagi kami sing kadalag-an sa tanan nga amon ginahimo! Huo, hatagi kami sing kauswagan sa tanan nga amon ginahimo! (S)

Aleluya:

2 Timoteo 1:10

Ang aton Manlulowas nga si Cristo Jesus nagdaog sang kamatayon, kay nagsanag ang kabuhi  paagi sa Maayong Balita.

Ang Pagbasa sang Santos nga Ebanghelyo suno kay:

San Lucas 9:43-45

Samtang nagakatingala pa ang mga tawo sa mga butang nga ginhimo ni Jesus, nagsiling sia sa iya mga gintuton-an, “Indi kamo magkalipat sang akon isiling sa inyo. Ang Anak sang Tawo itugyan sa kamot sang mga tawo.” Pero wala sila makahibalo kon ano ang kahulogan sini. Ginlikom ini sa ila agod nga indi sila makahangop, kag nahadlok sila magpamangkot sa iya nahanungod sini.

Setyembre 25 | Setyembre 27

Setyembre 25, 2020, Biyernes sang Ika-25 nga Semana sang Tuig

Liturhiya sang Pulong

Nahauna nga Balasahon - Manugwali 3:1-11

Salmo sa Pagsabat - Mga Salmo 144:1 kag 2, 3-4

Aleluya - Marcos 10:45

Ebanghelyo - Lucas 9:18-22

"Sin-o bala si Jesus suno sa imo?

Ang Pagbasa gikan sa Libro sang:

Manugwali 3:1-11

   Ang tagsa ka butang nga nagakatabo sa sining kalibutan nagakatabo sa tion nga luyag sang Dios. Gintalana niya ang tion sa pagpakatawo kag ang tion sa pagkapatay, ang tion sa pagtanom kag ang tion sa paggabot, ang tion sa pagpatay kag ang tion sa pagbulong, ang tion sa pagguba kag ang tion sa pagpatindog. Gintalana niya ang tion sa pagpangasubo kag ang tion sa pagpangalipay, ang tion sa paglalaw kag ang tion sa pagsinaot, ang tion sa paghilawasay kag tion nga wala sing paghilawasay, ang tion sa paghalukanay kag ang tion nga wala sing paghalukanay. Gintalana niya ang tion sa pagpangita kag ang tion sa pagdula, ang tion sa pagtago kag ang tion sa pagpilak, ang tion sa paggisi kag ang tion sa pagtahi, ang tion sa paghipos kag ang tion sa paghambal. Gintalana niya ang tion sa paghigugma kag ang tion sa pagkaakig, ang tion sa pag-inaway kag ang tion sa paghidait. Ano bala ang makuha sang tawo sa tanan niya nga pagpangabudlay? Nahibal-an ko ang kapalaran nga ginhatag sa aton sang Dios. May nagakaigo sia nga tion nga gintalana para sa tagsa ka butang. Ginhatagan niya kita sing handom sa paghibalo sang palaabuton, pero indi gid naton mahangpan sing bug-os ang iya ginahimo.

Salmo sa Pagsabat:

Mga Salmo 144:1 kag 2, 3-4

(S) Dayawon ang Ginoo nga akon mangangapin.

Dayawon ang Ginoo nga akon mangangapin; Sia ang akon mangangapin kag mananabang, akon palalipdan kag manlulowas, sa iya nagasalig ako nga indi ako maano. (S)
O Ginoo, ano bala ang tawo, nga gintalupangod mo sia, ang ahaw nga tawo, nga ginasapak mo sia? Kaangay sia sa isa ka huyop sang hangin; ang iya mga inadlaw kaangay sang umalagi nga landong. (S)

Aleluya:

San Marcos 10:45

    Ang Anak sang Tawo wala magkari agod alagaron, kundi sa pag-alagad kag sa paghatag sang iya kabuhi sa pagtubos sang madamo nga mga tawo.

Ang Pagbasa sang Santos nga Ebanghelyo suno kay:

San Lucas 9:18-22

   Sang isa ka adlaw sang nagapangamuyo si Jesus nga isahanon lang, ang iya mga gintuton-an nagpalapit sa iya. Si Jesus nagpamangkot sa ila, “Sin-o bala ako suno sa mga tawo?”
   Nagsabat sila, “May mga tawo nga nagasiling nga si Juan Bautista ikaw. Ang iban nagasiling nga si Elias ikaw, kag ang iban pa gid nagasiling nga isa ikaw sang mga propeta sang una nga nabanhaw.”
   Ginpamangkot niya sila, “Pero suno sa inyo, sin-o bala ako?” 
   Si Pedro nagsabat, “Ikaw ang Cristo sang Dios.”
   Dayon ginmanduan sila ni Jesus nga indi magpanugid sini sa bisan kay sin-o. Kag nagsiling pa gid sia, “Kinahanglan mag-antos gid ang Anak sang Tawo kag pagasikwayon sang mga katigulangan sang mga Judio, sang pangulo nga mga pari, kag sang mga manunodlo sang Kasugoan. Pagapatyon sia kag pagabanhawon sa ikatlo nga adlaw.”

Setyembre 24 | Setyembre 26

Setyembre 24, 2020, Huwebes sang Ika-25 nga Semana sang Tuig

 Liturhiya sang Pulong

Nahauna nga Balasahon - Manugwali 1:2-11

Salmo sa Pagsabat - Mga Salmo 90:3-4, 5-6, 12-13, 14 kag 17

Aleluya - Juan 14:6

Ebanghelyo - Lucas 9:7-9

Naglibog ang Ulo ni Herodes

Ang Pagbasa gikan sa Libro sang:

Manugwali 1:2-11

   Ang Kabuhi wala sing kapuslanan, wala sing kapuslanan, ang siling sang Manugwali. Wala sing kapuslanan, ang tanan wala sing kapuslanan. Ginagamit mo ang imo kabuhi sa pagpangabudlay, sa paghimakas, kag ano bala ang makuha mo sini? Ang mga kaliwatan nagaabot kag nagataliwan, pero ang kalibutan amo man gihapon. Ang adlaw nagabutlak kag nagatunod sa gihapon, kag nagabalik sa duog diin magasugod sia liwat. Ang hangin nagahuyop sa bagatnan, nagahuyop sa aminhan, nagabuyong-buyong ini kag nagabalik liwat. Ang tanan nga suba nagailig sa dagat, pero ang dagat wala nagakapuno. Ang tubig nagabalik sa iya ginhalinan, kag nagailig ini liwat. Ang tanan nga butang nagapalapyo sa tawo—ang pagkapalapyo nga indi masaysay. Ang aton mga mata indi mabusog sang ila ginatan-aw, kag ang aton mga dulonggan indi maayawan sang ila ginapamatian. Ang natabo sang una matabo man liwat. Ang nahimo sang una pagahimuon liwat. Wala sing bag-o nga butang sa bug-os nga kalibutan. Nagasiling sila, “Tan-awa, yari ang bag-o nga butang!” Indi ina matuod! Yara na ina sang una, sang wala pa kita matawo. Wala sing may nagadumdom sang natabo sang nagliligad, kag sa mga adlaw nga palaabuton wala sing may magadumdom sang matabo sumogod karon kag sa sadto nga tion.
Salmo sa Pagsabat:

Mga Salmo 90:3-4, 5-6, 12-13, 14 kag 17

(S) O Ginoo, Ikaw ang amon puloy-an halin sang una.

Ginamanduan mo ang mga tawo sa pagbalik sa ila ginhalinan, ginahimo mo sila liwat nga duta. Ang isa ka libo ka tuig para sa imo subong lang sang isa ka adlaw; kaangay lang sila sang kahapon nga nagligad na, subong sang isa ka malip-ot nga takna sa kagab-ihon. (S)
Ginaanod mo ang mga tawo subong sang baha; subong sila sang damgo nga wala nagadugay. Subong sila sang hilamon nga nagaulhot kon aga, nagatubo kag nagalagtom, pero pagkahapon nagakalaya kag nagakapatay. (S)
Tudloi kami kon daw ano kalip-ot sang amon kabuhi, agod nga manginmainandamon kami. O Ginoo, tubtob pa bala san-o ikaw malugpayan? Kaluoyi man ang imo mga alagad! (S)
Pun-a kami sa tagsa ka aga sang imo mapinadayunon nga gugma, agod magkanta kag magkalipay kami sa bug-os namon nga kabuhi. Ginoo nga amon Dios, kabay nga bendisyunan mo kami, kag hatagi kami sing kadalag-an sa tanan nga amon ginahimo! Huo, hatagi kami sing kauswagan sa tanan nga amon ginahimo! (S)

Aleluya:

San Juan 14:6

   Ako amo ang dalan, ang kamatuoran, kag ang kabuhi, siling sang Ginoo; wala sing may makakadto sa Amay kon indi paagi sa akon.

Ang Pagbasa sang Santos nga Ebanghelyo suno kay:

San Lucas 9:7-9

   Si Herodes nga pangulo sang Galilea nakabati sang tanan nga nagkalatabo. Naglibog gid ang ulo niya kay may mga tawo nga nagsiling, “Nabanhaw si Juan Bautista.” Ang iban nagsiling nga si Elias nagpakita, kag ang iban pa gid nagsiling nga ang isa sang mga propeta sang una nabanhaw. Nagsiling si Herodes, “Ginpapugotan ko sing ulo si Juan, pero sin-o ining tawo nga madamo ang akon nabatian nahanungod sa iya?” Kag nagtinguha sia sa pagpakigkita sa kay Jesus.

Setyembre 23 | Setyembre 25

Setyembre 23, 2020, Miyerkules sang Ika-25 nga Semana sang Tuig

Liturhiya sang Pulong

Nahauna nga Balasahon - Hulobaton 30:5-9

Salmo sa Pagsabat - Mga Salmo 119:29, 72, 89, 101, 104, 163

Aleluya - Marcos 1:15

Ebanghelyo - Lucas 9:1-6

"Ginhatagan sila ni Jesus sang Awtoridad sa Pagtabog sang Tanan nga mga Yawa kag sang mga Balatian"

Ang Pagbasa gikan sa Libro sang mga:

Hulobaton 30:5-9

   “Ang Dios nagatuman sang tagsa niya ka saad. Kaangay sia sang taming sa tanan nga nagapaapin sa iya. Kon magpatupato ka sang wala niya ginsiling, sabdungon niya ikaw, kag ipakilala niya nga butigon ka.”
   O Dios, nagapangayo ako sa imo sang duha ka butang sa wala pa ako mapatay. Ipahilayo ako sa pagbutig kag indi ako pagpamanggara ukon pagpaimula. Hatagi lamang ako sang kalan-on nga akon kinahanglanon. Kon magsobra ang akon kalan-on, basi magsiling ako nga wala ako sing kinahanglan sa imo. Pero kon imol ako, basi magpangawat ako, kag magpakahuya sa akon Dios.

Salmo sa Pagsabat:

Mga Salmo 119:29, 72, 89, 101, 104, 163

(S) Ang imo pulong isa ka suga nga nagatuytoy sa akon mga tiil, O Ginoo.

Buligi ako nga indi magtalang, kag sa imo kaayo tudloi ako sang imo kasugoan. (S)
Ang kasugoan nga imo ginahatag labi pa sa akon sang sa tanan nga pilak sa kalibutan. (S)
Ang imo pulong, O Ginoo, magapadayon sa walay katubtoban; kay napasad ini sing malig-on sa langit. (S)
Ginlikawan ko ang tanan nga malain nga pagginawi, kay luyag ako magtuman sang imo pulong. (S)
Nagakuha ako sing kaalam gikan sa imo mga kasugoan, gani ginadumtan ko ang tanan nga malain nga pagginawi. (S)
Ginapakalain ko kag ginakangil-aran ang tanan nga kabutigan, pero ginahigugma ko ang imo kasugoan. (S)

Aleluya:

San Marcos 1:15

   Nag-abot na ang nagakaigo nga tion, kag ang Ginharian sang Dios malapit na. Bayai ninyo ang inyo mga sala, kag magpati sa Maayong Balita.

Ang Pagbasa sang Santos nga Ebanghelyo suno kay:

San Lucas 9:1-6

   Gintawag ni Jesus sing tingob ang iya dose ka mga apostoles kag ginhatagan sila sing gahom kag awtoridad sa pagtabog sang tanan nga mga yawa kag sa pag-ayo sang mga balatian. Dason iya sila ginpadala sa pagwali sang Ginharian sang Dios kag sa pag-ayo sang mga masakiton. Nagsiling sia sa ila, “Indi kamo magdala sing bisan ano sa inyo pagpanglakaton: bisan sungkod, puyo, tinapay, kuwarta ukon isa ka ilislan nga bayu. Kon diin kamo nga balay ginabaton, dira lang kamo dayon tubtob maghalin kamo sa sina nga banwa. Kon ang mga tawo indi magbaton sa inyo, bayai ninyo ina nga banwa kag taktaka ang yab-ok sa inyo mga tiil subong pagpaandam sa ila.”
   Ang mga gintuton-an naglakat kag nagkadto sa tanan nga kabaryuhanan sa pagwali sang Maayong Balita kag sa pag-ayo sang mga tawo sa tanan nga duog.

Setyembre 22 | Setyembre 24

Setyembre 22, 2020, Martes sang Ika-25 nga Semana sang Tuig

 Liturhiya sang Pulong

Nahauna nga Balasahon - Hulobaton 21:1-6, 10-13

Salmo sa Pagsabat - Mga Salmo 119:1, 27, 30, 34, 35, 44

Aleluya - Lucas 11:28

Ebanghelyo - Lucas 8:19-21

"Nagapamati sang Pulong sang Dios kag Nagatuman sini"

Ang Pagbasa gikan sa Libro sang mga:

Hulobaton 21:1-6, 10-13

   Ang Ginoo nagagahom sang panghunahona sang hari Subong kahapos sang pagtuytoy niya sang alagyan sang kasulgan.
   Bisan nagahunahona ka nga ang tanan mo nga ginahimo matarong, Dumdoma nga ang Ginoo nagahukom sang imo mga tinutoyo.
   Ginapasulabi sang GINOO nga maghimo ka sing husto kag nagakabagay Sang sa magdala ka sa iya sing mga halad.
   Ang malaut nga mga tawo ginagamhan sang ila pagkamaiyaiyahon kag bugal, Kag ini sala.
   Magtinguha ka kag magmapisan kag magabugana ka. Magdasudaso ka kag pirme ka lang ginakulang.
   Ang manggad nga imo makuha paagi sa daya madali madula, Kag magadala ini sa imo sa bibi sang kamatayon.
   Ang handom sang malaut nga tawo amo ang paghimo sang malaut. Wala sila sing kaluoy sa bisan kay sin-o.
   Kon ang bugalon nga tawo masilutan, Bisan pa ang wala sing tinun-an makatuon sing leksyon. Ang maalam nga tawo mahapos tudloan.
   Ang matarong nga Dios nakahibalo sang nagakatabo sa mga puloy-an sang mga malaut, kag pagalaglagon niya ang mga malaut.
   Ang wala nagapamati sa pagpangayo sing bulig sang mga imol, Indi man pagpamatian ang iya pagpangayo sing bulig.

Salmo sa Pagsabat:

Mga Salmo 119:1, 27, 30, 34, 35, 44

(S) Ginoo, tuytoyi ako sa dalanon sang Imo mga sugo.

Bulahan ang mga wala sing dagta sa ila kabuhi, nga nagakabuhi suno sa kasugoan sang Ginoo. (S)
Tudloi ako sa pagtuman sang imo mga kasugoan, kag ako magapamalandong sang imo makatilingala nga mga pagtudlo. (S)
Nagtapat ako nga magmasinulondon; gintuman ko ang imo mga pagsulondan. (S)
Isaysay sa akon ang imo kasugoan, kag akon ini tumanon; tipigan ko ini sa bug-os ko nga tagipusoon. (S)
Tuytoyi ako sa dalanon sang imo mga sugo, kay sa ila may kalipayan ako. (S)
Tumanon ko sa gihapon ang imo kasugoan, sa walay katubtoban! (S)

Aleluya:

San Lucas 11:28

   Bulahan pa gid ang mga nagapamati sang pulong sang Dios kag nagatuman sini!

Ang Pagbasa sang Santos nga Ebanghelyo suno kay:

San Lucas 8:19-21

   Ang iloy kag mga utod ni Jesus nagkadto sa iya, pero indi sila makapalapit sa iya tungod sang madamo nga mga tawo. May nagsiling sa iya, “Ang imo iloy kag mga utod yara sa gwa nga luyag magpakigkita sa imo.” Si Jesus nagsiling sa ila tanan, “Ang akon iloy kag mga utod amo sila nga nagapamati sang pulong sang Dios kag nagatuman sini.”

Setyembre 21 | Setyembre 23

Setyembre 21, 2020, San Mateo, Apostol kag Ebanghelista

 Liturhiya sang Pulong

Nahauna nga Balasahon - Efeso 4:1-7, 13

Salmo sa Pagsabat - Mga Salmo 19:2-3, 4-5

Aleluya - Te Deum

Ebanghelyo - Mateo 9:9-13

"Indi Halad nga mga Sapat ang Akon Ginapangita, kundi ang Pagkamaluloy-on"

Ang Pagbasa gikan sa Sulat ni San Pablo nga Apostol, sa mga:

Taga-Efeso 4:1-7, 13

   Karon, ako nga binilanggo tungod sang akon pag-alagad sa Ginoo, nagapakiluoy sa inyo: magkabuhi kamo suno sa talaksan nga ginhatag sang Dios, sang pagtawag niya sa inyo. Magmapainuboson kamo, magmalulo, kag magmapinasensyahon sa gihapon. Ipakita ang inyo gugma paagi sa inyo pagbinuligay. Tinguhai gid ninyo ang pagtipig sang paghiliusa nga ginahatag sa inyo sang Espiritu, paagi sa paghidait nga amo ang nagahiusa sa inyo. May isa ka lawas kag isa ka Espiritu, subong nga may isa ka paglaom nga tungod sini gintawag kamo sang Dios. May isa ka Ginoo, isa ka pagtuo, isa ka bautiso, may isa ka Dios kag Amay sang tanan nga mga tawo, nga amo ang Ginoo sang tanan, nga nagapanghikot sa tanan, kag yara sa tanan.
   Ang tagsatagsa sa aton ginhatagan sing pinasahi nga bugay, suno sa talaksan nga ginhatag ni Cristo. Sia amo ang “naghatag sang mga bugay sa mga tawo,” ginpili niya ang iban nga mangin-apostoles, ang iban nga manginpropeta, ang iban nga manginmanugwali sang Maayong Balita, ang iban nga manginpastor kag manginmanunodlo. Ginhimo niya ini sa pag-aman sang tanan nga mga tumoluo para sa bulohaton sang pag-alagad sa Dios, sa pagpalig-on sang lawas ni Cristo. Kag madangat naton ang pag-isa sang aton pagtuo kag sang aton pagkilala sa Anak sang Dios, kag manginhamtong kita nga mga tawo nga nakalambot sang talaksan sang bug-os nga kataason ni Cristo.

Salmo sa Pagsabat:

Mga Salmo 19:2-3, 4-5

(S) Ang ila tingog nagatugob sa bug-os nga kalibutan.

Ang himaya sang Dios ginapahayag sing maathag sang kalangitan! Ang langit nagapakita sang iya mga binuhatan! Ang tagsa ka adlaw nagasugid sini sa madason nga adlaw, ang tagsa ka gab-i nagasulit sini sa madason nga gab-i. (S)
Wala sing pulong ukon mga tinaga nga ginagamit, wala sing gahod nga mabatian, pero ang ila tingog nagatugob sa bug-os nga kalibutan, ang ila mga pulong nagalambot sa mga ukbong sang duta. (S)

Aleluya:

Te Deum

   Nagadayaw kami sa imo nga Dios, nagabantala kami sa imo nga Ginoo; ang imo ginpili nga mangin martir nagadayaw sa imo, O Ginoo.

Ang Pagbasa sang Santos nga Ebanghelyo suno kay:

San Mateo 9:9-13

   Naghalin si Jesus sa sadto nga duog, kag sang nagalakat sia nakita niya ang isa ka manugsokot sang buhis nga ginahingalanan kay Mateo nga nagapungko sa iya opisina. Si Jesus nagsiling sa iya, “Sunod ka sa akon.” 
   Nagtindog si Mateo kag nagsunod sa iya.
   Sang nagakaon si Jesus didto sa balay ni Mateo, madamo nga mga manugsokot sang buhis kag mga makasasala ang nag-upod sa iya kag sa iya mga gintuton-an sa pagkaon. May mga Fariseo nga nakakita sini kag nagpamangkot sila sa iya mga gintuton-an, “Ngaa bala ang inyo manunodlo nagakaon upod sa mga manugsokot sang buhis kag sa mga makasasala?”
   Si Jesus nakabati kag nagsabat sa ila, “Ang mga tawo nga wala sing balatian wala nagakinahanglan sing manugbolong, kundi ang mga masakiton lang. Lakat kamo kag usisaa ninyo kon ano ang kahulogan sini nga kasulatan: ‘Indi halad nga mga sapat ang akon ginapangita, kundi ang pagkamaluloy-on.’ Kay wala ako magkari sa pagtawag sang mga nagapakamatarong sang ila kaugalingon kundi sang mga makasasala.”

Setyembre 20 | Setyembre 22

Setyembre 20, 2020, Ika-25 nga Domingo sang Tuig

Liturhiya sang Pulong

Nahauna nga Balasahon - Isaias nga Propeta 55:6-9

Salmo sa Pagsabat - Mga Salmo 145:2-3, 8-9, 17-18

Ikaduha nga Balasahon - Filipos 1:20-24, 27

Aleluya - Binuhatan 16:14

Ebanghelyo - Mateo 20:1-16

Nahisa Ka bala kay Maalwan Ako?

Ang Pagbasa gikan sa Libro ni:

Isaias nga Propeta 55:6-9

   Dangop kamo sa Ginoo, Kag magpangamuyo sa iya, Samtang malapit pa sia. Ang mga malaut magbiya Sang ila malaut nga pagginawi, Kag magbaylo sang ila mga panghunahona. Pabalika sila sa Ginoo nga aton Dios; Maluloy-on sia, kag mapinatawaron. Ang Ginoo nagasiling, “Ang akon mga panghunahona Indi pareho sang inyo mga panghunahona, Kag ang akon mga pagginawi Indi pareho sang inyo mga pagginawi. Subong nga ang mga langit mataas sang sa duta, Amo man ang akon mga pagginawi kag mga panghunahona Mataas sang sa inyo.

Salmo sa Pagsabat:

Mga Salmo 145:2-3, 8-9, 17-18

(S) Ang Ginoo malapit sa tanan nga nagapanawag sa iya.

Sa tagsa ka adlaw magapasalamat ako sa imo; dayawon ko ikaw sa wala sing katubtoban. Ang Ginoo gamhanan, kag dapat gid dayawon sing labi, ang iya pagkagamhanan indi mahangpan. (S)
Ang Ginoo mahigugmaon kag maluloy-on, indi madali mangakig kag puno sang mapinadayunon nga paghigugma. Maayo sia sa tanan kag maluloy-on sa tanan nga iya ginhimo. (S)
Ang Ginoo matarong sa tanan nga iya ginahimo, maluloy-on sa tanan niya nga mga buhat. Malapit sia sa tanan nga nagapanawag sa iya, nga nagapanawag sa iya sing maminatud-on. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Filipos 1:20-24, 27

   Kay daku gid ang akon handom kag paglaom nga indi gid ako mahuy-an, kundi sa tanan nga tion labi na gid karon, magmaisog ako, agod nga sa akon bug-os nga kaugalingon mapadunggan ko si Cristo, bisan mabuhi ako ukon mapatay. Kay ano bala ang kabuhi? Para sa akon ang pagkabuhi amo si Cristo, kag ang kamatayon nagadala sing daku pa nga kaayuhan. Pero kon sa akon pagkabuhi makahimo pa ako sing mga kaayuhan sa akon pag-alagad, ti indi ako makahibalo kon ano ang akon pilion. Nabutang ako sa tungatonga. Luyag ko na kuntani nga magtaliwan sa sini nga kabuhi kag magpakig-upod kay Cristo, kay amo ini ang labing maayo. Ugaling tungod sa inyo, labi pa ka kinahanglanon nga magkabuhi ako. Karon ang importante nga butang amo nga magginawi kamo suno sa Maayong Balita ni Cristo.

Aleluya:

Binuhatan sang mga Apostoles 16:14

   Buksi ang amon tagipusoon, O Ginoo, agod nga pagabatunon namon ang pulong sang imo anak.

Ang Pagbasa sang Santos nga Ebanghelyo suno kay:

San Mateo 20:1-16

   “Ang Ginharian sang langit kaangay sang isa ka tag-iya sang talamnan sang ubas nga naglakat sang aga pa gid sa pagpangita sing mga manug-obra para sa iya talamnan. Nagsugot sia sa pagbayad sa ila sa minimo nga suhol sa isa ka adlaw kag ginpadala niya sila sa pag-obra sa iya talamnan sang ubas. Sang mga alas nuwebe sa aga nagkadto sia sa merkado kag nakita niya nga may mga tawo nga nagatilindog didto nga wala sing obra. Gani nagsiling sia sa ila, ‘Mag-obra man kamo sa akon talamnan sang ubas, kay suholan ko kamo sang nagakaigo.’ Gani naglakat sila sa pag-obra. Amo man ang ginhimo niya sang mga alas dose kag sang mga alas tres sa hapon. Sang mga alas singko na sa hapon nagkadto naman sia sa merkado kag may nakita pa gid sia nga nagatilindog didto, kag nagpamangkot sia sa ila, ‘Ngaa bala nagatilindog lang kamo diri sa bug-os nga adlaw nga wala sing obra?’ Nagsabat sila, ‘Ti, anhon mo kay wala man sing may nagpaobra sa amon.’ Nagsiling sia sa ila, ‘Kon amo ina, kadto man kamo kag mag-obra sa akon talamnan sang ubas.’ 
   “Sang sirom na, nagsiling ang tag-iya sang talamnan sang ubas sa iya enkargado, ‘Tawga ang mga manug-obra kag suholi sila halin sa mga naulihi gid nga nag-obra tubtob sa mga nahauna.’ Ang mga nag-ulobra sugod sang alas singko sa hapon ginbayaran sang minimo nga suhol. Sang suholan na ang mga nahauna nga nag-ulobra, naghunahona sila nga daku ang ila mabaton, pero ang tagsatagsa sa ila ginhatagan man sang minimo nga suhol. Ginbaton nila ang ila suhol, ugaling nagkulomuron sila batok sa tag-iya, nga nagasiling, ‘Ining mga naulihi nag-obra sing isa ka oras lang, pero kami nag-obra sa bug-os nga adlaw sa nagatagiti nga init, pero pareho lang ang imo suhol sa amon!’ Ang tag-iya nagsabat sa isa sa ila, ‘Abyan, pamati ka! Wala ta ikaw gindayai. Indi bala nagkasugot kita sa minimo nga suhol? Karon, kuhaa ang imo suhol, kag magpauli. Akon ini luyag nga suholan ining naulihi pareho sa imo. Indi bala ako makapagusto kon ano ang himuon ko sang akon kuwarta? Ukon nahisa ka bala kay maalwan ako?’ ” 
   Kag si Jesus nagsiling pa gid, “Gani ang mga naulihi mauna, kag ang mga nahauna maulihi.” 

Setyembre 19 | Setyembre 21

Setyembre 19, 2020, Sabado sang Ika-24 nga Semana sang Tuig

 Liturhiya sang Pulong

San Genaro, Obispo kag Martir

Nahauna nga Balasahon - 1 Corinto 15:35-37, 42-49

Salmo sa Pagsabat - Mga Salmo 56:10-12, 13-14

Aleluya - Lucas 8:15

Ebanghelyo - Lucas 8:4-15

Kon Sin-o ang Luyag Magpamati, Magpamati Sia

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 15:35-37, 42-49

   Pero may magapamangkot, “Paano bala ang pagkabanhaw sang mga patay? Ano bala nga sahi sang lawas ang ila maangkon?” Binuang ini nga pamangkot! Kon magpanggas ka sang binhi sa duta, indi ini magpamuhi kon indi anay ini mapatay. Kag ang imo ginapanggas sa duta indi ang tanom nga nagapamuhi na, kundi ang binhi, nga ayhan trigo ukon iban nga binhi. 

   Subong man sini ang pagkabanhaw sang mga patay. Ang lawas nga ginalubong mamalatyon. Kon mabanhaw na ini, indi na mamalatyon. Kon ginalubong ini, malaw-ay kag maluya. Kon mabanhaw ini, matahom kag makusog. Kon ginalubong ini, lawasnon pa. Kon mabanhaw na, mangin-espirituhanon na ini nga lawas. Kon may yara nga unodnon nga lawas, may yara man nga espirituhanon nga lawas. Kay ang kasulatan nagasiling, “Ang nahauna nga tawo nga si Adam gintuga nga may kabuhi.” Pero ang ulihi nga Adam amo ang Espiritu nga nagahatag sing kabuhi. Indi una ang espirituhanon, kundi ang lawasnon, kag ugaling ang espirituhanon. Ang nahauna nga Adam ginhimo gikan sa yab-ok sang duta, ang ikaduha nga Adam nagikan sa langit. Ang mga tawo nga dutan-on kasubong sila sadtong ginhimo gikan sa duta. Ang mga tawo nga langitnon kasubong sila sadtong nagikan sa langit. Subong nga kaangay kita sang tawo nga ginhimo gikan sa duta, manginkaangay man kita sang Tawo nga nagikan sa langit.

Salmo sa Pagsabat:

Mga Salmo 56:10-12, 13-14

(S) Magalakat ako sa atubangan sang Ginoo, sa kapawa sang mga buhi.

Nahibaluan ko ini, kay ang Dios nagadampig sa akon! Nagasalig ako sa Dios kag nagadayaw sang iya saad, pagadayawon ko ang saad sang Ginoo. Nagasalig ako sa iya, kag indi na ako magkahadlok. Ano ang mahimo sa akon sang ahaw nga tawo? (S)

Ihalad ko sa imo, O Dios, ang akon ginsaad, ihatag ko sa imo ang akon halad sa pagpasalamat, kay ginluwas mo ako sa kamatayon kag wala mo ako ginpalutos. Gani nagalakat ako sa atubangan sang Dios, sa kapawa nga nagasilak sa mga nagakabuhi. (S)

Aleluya:

San Lucas 8:15

   Bulahan ang mga nagatipig sa pulong sang Dios, sa maayo kag masinulondon nga tagipusoon kag nagapadayon tubtob magpamunga ini.

Ang Pagbasa sang Santos nga Ebanghelyo suno kay:

San Lucas 8:4-15

   Padayon ang pag-inabot sang mga tawo halin sa mga kabanwahanan, kag sang madamo nagid sila, naghambal si Jesus sining palaanggiran. 

   “May isa ka tawo nga nagkadto sa uma sa pagsab-og. Sang pagsab-og niya ang iban nga binhi nagtupa sa dalan. Tinapakan ini kag tinuka sang mga pispis. Ang iban nagtupa sa batuhon nga duta, kag sang magtubo ang binhi nalaya man lang dayon kay mamala ang duta. Ang iban nagtupa sa talungon kag ang talungon nagtubo upod sa tanom kag naglumos sang tanom. Ang iban nga binhi nagtupa sa maayo nga duta kag nagtubo kag nagpatubas sing 100 ka pilo.”

   Si Jesus nagsiling pa gid, “Gani, kon sin-o ang luyag magpamati, magpamati sia.” 

   Ang mga gintuton-an ni Jesus nagpamangkot sa iya, “Ano bala ang kahulogan sining palaanggiran?” Si Jesus nagsabat, “Ang paghibalo sang tinago sang Ginharian sang Dios ginhatag sa inyo. Pero sa iban ginahatag ini paagi sa mga palaanggiran, agod nga kon magtan-aw sila, indi sila makakita kag kon makabati sila, indi sila makahangop.” 

   “Amo ini ang kahulogan sang palaanggiran: ang binhi amo ang pulong sang Dios. Ang binhi nga nagtupa sa dalan amo ang nakabati, ugaling nagaabot ang Yawa kag nagaagaw sang pulong sa ila tagipusoon, agod nga indi sila magtuo kag maluwas. Ang binhi nga nagtupa sa batuhon nga duta amo ang nakabati sang pulong kag nagabaton sini sing malipayon. Pero ang pulong wala gid makapanggamot sa ila. Wala magdugay ang ila pagtuo kay kon mag-abot ang mga pagsulay, nagabiya sila sang ila pagtuo. Ang binhi nga nagtupa sa mga talungon amo ang nakabati, pero ang pagpalibog kag ang manggad kag ang kalipayan sining kabuhi nagalumos sa ila, kag ang ila bunga wala nagagulang. Ang binhi nga nagtupa sa maayo nga duta amo ang nagapamati sang pulong kag nagatipig sini sa maayo kag masinulondon nga tagipusoon kag nagapadayon tubtob nga magpamunga sila.” 

Setyembre 18 | Setyembre 20

Setyembre 18, 2020, Biyernes sang Ika-24 nga Semana sang Tuig

 Liturhiya sang Pulong

Nahauna nga Balasahon - 1 Corinto 15:12-20

Salmo sa Pagsabat - Mga Salmo 17:1, 6-7, 8 kag 15

Aleluya - Mateo 11:25

Ebanghelyo - Lucas 8:1-3

"Ang mga Kababayin-an Nag-amuma kay Jesus"

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 15:12-20

   Karon, kon ang amon ginwali amo nga si Cristo ginbanhaw, ngaa bala nga ang iban sa inyo makasiling nga ang mga patay indi pagbanhawon? Kon matuod nga ang nagkalamatay indi pagbanhawon, nagakahulogan nga si Cristo wala ginbanhaw. Kag kon si Cristo wala man ginbanhaw sang Dios, wala sing pulos ang amon pagwali, kag wala sing pulos ang inyo pagtuo. Dugang pa sini, kon ang mga patay wala ginabanhaw, si Cristo wala man ginbanhaw sang Dios, kag gani nanginbutigon kami nga mga saksi sang Dios, kay nagsaksi kami nga ang Dios nagbanhaw kay Cristo. Kay kon ang mga patay wala ginabanhaw, si Cristo wala man kuntani ginbanhaw. Kag kon si Cristo wala ginbanhaw, ang inyo pagtuo wala sing pulos kag yara pa kamo gihapon sa inyo mga sala. Kon amo, ang mga tumoluo kay Cristo nga nagkalamatay na wala maluwas. Kon ang aton paglaom kay Cristo diri lamang sa sini nga kabuhi, ti, labing makalulooy kita sa tanan nga mga tawo diri sa kalibutan. Pero matuod gid nga si Cristo ginbanhaw gikan sa mga minatay, kag sia amo ang garantiya nga ang mga minatay pagabanhawon. 

Salmo sa Pagsabat:

Mga Salmo 17:1, 6-7, 8 kag 15

(S) Sa akon pagmata mapuno ako sang kalipay kay yara ikaw.

Pamatii, O Ginoo, ang akon matarong nga pagpakiluoy, talupangda ang akon pagpangayo sing bulig! Pamatii ang akon pangamuyo, kay wala ako nagalimbong. (S)
Nagapangamuyo ako sa imo, O Dios, kay ikaw nagasabat sa akon, gani balikda ako, kag pamatii ang akon mga pulong. Ipahayag ang imo makatilingala nga gugma, O Manlulowas; sa imo luyo indi kami maano sa amon mga kaaway. (S) 
Tagoa ako sa idalom sang imo mga pakpak. Makakita ako sa imo, tungod kay ako matarong, kag sa akon pagmata mapuno ako sing kalipay sa imo pagpakig-upod sa akon. (S)

Aleluya:

San Mateo 11:25

   Bulahan ikaw, O Amay, Ginoo sang langit kag duta kay ginpahayag mo sa mga di-maalam ang mga misteryo sang Ginharian.

Ang Pagbasa sang Santos nga Ebanghelyo suno kay:

San Lucas 8:1-3

   Sa tapos sadto si Jesus nagkadto sa mga banwa kag mga baryo sa pagwali sang Maayong Balita sang Ginharian sang Dios. Nag-upod sa iya ang dose ka mga apostoles kag subong man ang pila ka mga babayi nga gin-ayo niya sa mga balatian kag malaut nga espiritu. Ang mga babayi amo sanday Maria nga ginatawag Magdalena nga gikan sa iya gintabog ni Jesus ang pito ka yawa; si Juana, ang asawa ni Chuza nga isa ka opisyal sa korte ni Herodes; si Susana, kag iban pa nga madamo nga mga kababayin-an nga suno sa ila masarangan nag-amuma kay Jesus kag sa iya mga gintuton-an.

Setyembre 17 | Setyembre 19

Setyembre 17, 2020, Huwebes sang Ika-24 nga Semana sang Tuig

 Liturhiya sang Pulong

San Roberto Belarmino

Obispo kag Doktor sang Simbahan

Nahauna nga Balasahon - 1 Corinto 15:1-11

Salmo sa Pagsabat - Mga Salmo 118:1-2, 16-17, 28

Aleluya - Mateo 11:28

Ebanghelyo - Lucas 7:36-50

"Diin ang Magahigugma sing Labi"

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 15:1-11

   Karon, mga utod, luyag ko ipahanumdom sa inyo ang Maayong Balita nga ginwali ko sa inyo, nga inyo ginbaton kag sa sini ang inyo pagtuo napasad sing malig-on. Amo ina ang Maayong Balita nga ginwali ko sa inyo. Naluwas kamo paagi sa Maayong Balita kon ginhuptan ninyo ini sing malig-on, luas kon nagtuo kamo sing pasapayan. 
   Ginpaalinton ko sa inyo ang isa ka butang nga labi ka importante nga akon nabaton: si Cristo napatay tungod sang aton mga sala, suno sa mga Kasulatan. Ginlubong sia kag ginbanhaw sa ikatlo ka adlaw, suno sa mga Kasulatan. Nagpakita sia kay Pedro, kag sang ulihi sa dose ka mga apostoles. Sa tapos sini nagpakita sia sa sobra sa 500 sang iya mga sumolunod sing tingob, nga ang kalabanan sa ila buhi pa, kag ang iban patay na. Sang ulihi nagpakita sia kay Santiago kag dayon sa tanan nga mga apostoles. 
   Sa katapusan nagpakita man sia sa akon, bisan nga ako kasubong sang isa nga natawo sa wala pa ang tion. Kay ako ang labing kubos sa mga apostoles. Kon sa bagay, indi gani ako takos nga pagatawgon nga apostol, kay ginhingabot ko ang iglesia sang Dios. Pero sa kaluoy sang Dios nangin-amo ako sini karon, kag ang grasya nga ginhatag niya sa akon indi nanginwalay pulos. Sa baylo, nagpangabudlay ako sing labi pa sa tanan nga mga apostoles, bisan nga indi gid man ako ang nagpangabudlay, kundi ang grasya sang Dios nga yari sa akon. Gani, bisan kon naghalin ini sa akon ukon sa ila man, amo ini ang amon tanan ginawali, kag amo ini ang inyo ginatuohan. 

Salmo sa Pagsabat:

Mga Salmo 118:1-2, 16-17, 28

(S) Magpasalamat sa Ginoo kay maayo siya.

Magpasalamat sa Ginoo, kay maayo siya, kag ang iya gugma nagapadayon sa gihapon. Magsiling ang mga tawo sang Israel, “Ang iya gugma nagapadayon sa gihapon.” (S)
Ang iya gahom nagpadaog sa aton, ang iya gamhanan nga kusog sa inaway!” Indi ako mapatay, kundi magakabuhi, kag isugid ko ang ginhimo sang Ginoo. (S) 
Ikaw ang akon Dios, kag nagapasalamat ako sa imo; ibantala ko ang imo pagkagamhanan. (S)

Aleluya:

San Mateo 11:28

   Kari kamo sa akon, tanan kamo nga ginabudlayan kag ginabug-atan, kag papahuwayon ko kamo, siling sang Ginoo.

Ang Pagbasa sang Santos nga Ebanghelyo suno kay:

San Lucas 7:36-50

   Si Jesus gin-agda sang isa ka Fariseo nga magkaon upod sa iya. Nagkadto si Jesus sa balay sining Fariseo kag nagkaon didto. May isa ka makasasala nga babayi nga nagapuyo sa amo nga banwa. Nakabati sia nga si Jesus yara sa balay sang Fariseo nga nagakaon. Nagkadto sia didto nga may dala nga tibudtibod nga puno sang agwa. Nagtindog sia sa likod nayon ni Jesus malapit sa iya tiil nga nagahibi kag ginbasa niya ang mga tiil ni Jesus sang iya mga luha. Dayon ginpahiran niya ang mga tiil ni Jesus sang iya buhok, iya ginhalukan, kag ginbuboan sang agwa. Sang pagkakita sini sang Fariseo nga nag-agda kay Jesus nagsiling sia sa iya kaugalingon, “Kon matuod nga ining tawo propeta, kuntani nahibal-an niya kon sin-o ining babayi nga nagatandog sa iya kag kon ano kahigko ang iya kabuhi.”
   Si Jesus nagsiling sa iya, “Simon, may isugid ako sa imo.” 
   Si Simon nagsabat, “Huo, Manunodlo, sugiri ako.”
   Si Jesus nagsiling, “May duha ka tawo nga may utang sa isa ka manugpautang. Ang isa nakautang sa iya sing P500 kag ang isa P50. Sila nga duha indi gid makabayad, gani, wala na lang sila ginpabayad sang nagpautang sa ila. Diin sa ila nga duha ang magahigugma sing labi sa nagpautang sa ila?”
   Si Simon nagsabat, “Sa banta ko ang nakautang sing daku kag wala na pagpabayara.” 
   Si Jesus nagsiling, “Husto ang sabat mo.” Dayon ginbalikid niya ang babayi kag nagsiling kay Simon, “Nakita mo ining babayi? Nagsulod ako sa imo balay kag wala ka maghatag sa akon sing tubig para sa akon mga tiil, pero sia naghugas sang akon mga tiil sang iya gid mga luha kag ginpahiran niya sang iya buhok. Wala ka maghalok sa pag-abiabi sa akon, pero sia halin sang akon pag-abot, wala sia mag-untat sa paghalok sang akon mga tiil. Wala mo paghiboi sing lana ang akon ulo, pero sia naghaplas sang akon mga tiil sang agwa. Nagasiling ako sa imo, ang iya daku nga gugma nagapamatuod nga ang iya madamo nga mga sala napatawad na. Ang ginpatawad sing diutay nagahigugma sing diutay.”
   Dayon si Jesus nagsiling sa babayi, “Ang imo mga sala ginpatawad na.”
   Ang iban nga upod nila sa kalan-an nagsiling sa ila kaugalingon, “Sin-o bala sia, nga nagapatawad bisan pa sang mga sala?”
   Pero si Jesus nagsiling sa babayi, “Ang imo pagtuo nagluwas sa imo. Maglakat ka sa paghidait.”

Setyembre 16 | Setyembre 18

Setyembre 16, 2020, Miyerkules sang Ika-24 nga Semana sang Tuig

Liturhiya sang Pulong

San Cornelio, Santo Papa kag Martir

kag San Cipriano, Obispo kag Martir

Nahauna nga Balasahon - 1 Corinto 12:31-13:13

Salmo sa Pagsabat - Mga Salmo 33:2-3, 4-5, 12 kag 22

Aleluya - Juan 6:63, 68

Ebanghelyo - Lucas 7:31-35

"Sa ano Ko Ipaanggid ang sining Panahon?"

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 12:31-13:13

   Handuma ninyo ang dalagku pa nga mga bugay. Pero ang labaw sa tanan nga paagi amo ang masunod.

   Bisan makahambal ako sang nagakalainlain nga mga hambal sang mga tawo kag bisan sang mga anghel, pero kon wala ako sing gugma, ang akon hambal pareho lang sang magahod nga tunog sang agong ukon sang bagting sang lingganay. Kag bisan maayo ako magwali sang pulong sang Dios, kag akon ang tanan nga ihibalo kag paghangop sang tanan nga mga tinago, kag bisan may pagtuo ako nga makahalin sang mga bukid, pero kon wala ako sing gugma, wala ako sing kapuslanan. Kag bisan ipanghatag ko ang tanan ko nga pagkabutang, kag bisan itugyan ko ang akon lawas nga sunogon, pero kon wala ako sing gugma, wala ini sing kapuslanan sa akon. 

   Ang gugma mapinasensyahon kag malulo. Ang gugma indi maimon, indi palabilabihon ukon bugalon. Ang gugma indi bastos, indi maiyaiyahon ukon maakigon. Ang gugma wala nagadumot. Ang gugma wala nagakalipay sa kalautan, kundi nagakalipay sa kamatuoran. Ang gugma nagabatas sang tanan nga mga butang, nagapati sang tanan nga mga butang, nagalaom sang tanan nga mga butang, kag nagaantos sang tanan nga mga butang. 

   Ang gugma wala sing katapusan. Ang bugay sa pagwali sang pulong sang Dios umalagi, ang paghambal sa iban nga mga hambal magauntat, kag ang ihibalo may katapusan. Kay ang aton ihibalo kag ang pagwali sang pulong sang Dios nga ginbugay sa aton indi pa himpit. Pero kon ang himpit mag-abot, ang di-himpit magataliwan. 

   Sang bata pa ako, ang akon panghambal, balatyagon, kag panghunahona binata man. Pero sang hamtong na ako ginbayaan ko ang binata nga mga pagginawi. Ang aton makita karon kasubong sang indi maathag nga larawan sa espeho, pero sa ulihi makakita kita sing maathag sa tampad. Ang nahibal-an ko karon bahin pa lang, pero sa ulihi mahibaluan ko ang tanan, pareho sang pagkahibalo sang Dios nahanungod sa akon. 

   Karon, ining tatlo nagapadayon: ang pagtuo, ang paglaom, kag ang gugma, kag ang labing daku sini sa ila amo ang gugma.

Salmo sa Pagsabat:

Mga Salmo 33:2-3, 4-5, 12 kag 22

(S) Bulahan ang tawo nga ginpili sang Ginoo nga mangin-iya kaugalingon!

Magpasalamat kamo sa Ginoo paagi sa pagtukar sing arpa, magkanta kamo sa iya nga ginaupdan sang mga instrumento nga may kuwerdas. Kantahi ninyo sia sing bag-o nga ambahanon, tukara sing maayo ang arpa, kag magkanta sing tudo! (S)

Ang mga pulong sang Ginoo matuod, kag ang tanan niya nga mga binuhatan masaligan. Ang Ginoo nagahigugma sang matarong kag nagakabagay, ang iya mapinadayunan nga gugma nagapuno sang duta. (S) 

Bulahan ang pungsod nga ang iya Dios amo ang Ginoo; bulahan ang mga tawo nga ginpili sang Ginoo nga mangin-iya kaugalingon! Kabay nga ang imo mapinadayunon nga gugma magpabilin sa amon, O Ginoo, kay ang amon paglaom yara sa imo. (S)

Aleluya:

San Juan 6:63, 68

   Ang imo mga pulong, O Ginoo, amo ang Espiritu kag kabuhi; Yara sa imo ang mga pulong sang kabuhi nga dayon.

Ang Pagbasa sang Santos nga Ebanghelyo suno kay:

San Lucas 7:31-35

   “Karon, sa ano ko bala ipaanggid ang mga tawo sining panahon? Kaangay bala sila sang ano? Kaangay sila sa mga kabataan nga nagpungko didto sa tiyendahan kag nagasinggitanay, ‘Nagtukar kami sa inyo sing plawta, pero wala kamo magsaot. Nagpanalambiton kami, pero wala man kamo maghibi.’ Nagkari si Juan Bautista nga nagapuasa kag wala nagainom sing bino, kag kamo nagsiling, ‘Ginagamhan sia sang yawa.’ Ang Anak sang Tawo nagkari nga nagakaon kag nagainom, kag kamo nagsiling, ‘Tan-awa ninyo ini nga tawo! Palakaon sia kag palainom sing bino, kag amigo sang mga manugsokot sang buhis kag sang mga makasasala!’ Pero ang kaalam sang Dios ginapahayag nga matuod sang tanan nga nagabaton sini.”

Setyembre 15 | Setyembre 17

Setyembre 15, 2020, Ang mga Kasakit sang Mahal nga Birhen Maria

Liturhiya sang Pulong

Nahauna nga Balasahon - 1 Corinto 12:12-14, 27-31

Salmo sa Pagsabat - Mga Salmo 100:1-2, 3, 4, 5

Aleluya - 

Ebanghelyo - Juan 19:25-27

Nagatindog sa Tupad sang Krus ni Jesus

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 12:12-14, 27-31

   Kay si Cristo kasubong sang isa ka lawas nga may madamo nga mga bahin. Bisan may madamo ini nga mga bahin, pero isa lang ini ka lawas. Sa amo man nga bagay, kita tanan, Judio ukon Gentil, ulipon ukon hilway, ginbautisohan sang amo nga Espiritu, agod mangin-isa kita ka lawas, kag kita tanan ginpainom sa amo man nga Espiritu. 

   Kay ang lawas indi isa lang ka bahin, kundi may madamo nga mga bahin. 

   Karon kamo tanan amo ang lawas ni Cristo, kag ang tagsatagsa sa inyo bahin sina nga lawas. Gani, ang Dios nagbutang sa iglesia, nahauna, sang mga apostoles; ikaduha, sang mga propeta; ikatlo, sang mga manunodlo; kag ugaling sang mga manugbuhat sing mga milagro, dason ang mga manugpang-ayo, mga manugtabang, mga manugmando, kag mga manughambal sa iban nga mga hambal. Indi ang tanan mga apostoles, ukon mga propeta, ukon mga manunodlo. Indi ang tanan makahimo sang mga milagro, ukon may gahom sa pagpang-ayo, ukon sa paghambal sa iban nga mga hambal, ukon sa pagsaysay sang kahulogan sini. Handuma ninyo ang dalagku pa nga mga bugay.

Salmo sa Pagsabat:

Mga Salmo 100:1-2, 3, 4, 5

(S) Iya kita mga tawo kag iya kita mga karnero.

Magsimba sa Ginoo sing masinadyahon; magpalapit sa iya atubangan nga may malipayon nga mga ambahanon! (S)

Indi pagkalimti nga ang Ginoo Dios! Ginhimo niya kita, kag iya kita; iya kita mga tawo kag iya mga karnero. (S) 

Magsulod kamo sa iya Templo nga may pagpasalamat, kag sa iya santuaryo nga may pagdayaw! Magpasalamat kamo kag magdayaw sa iya! (S)

Ang Ginoo maayo; ang iya gugma wala sing katapusan, kag ang iya katutom nagapadayon sa tanan nga panahon. (S)

Sekwensya:

   Sa may krus may hilibion,
   sang iloy nga masulub-on,
   sa pagtangla kay Jesus.

   Ginlapus sa kabangdanan,
   sang tudok nga kalisdanan,
   ang kalag sadtong iloy.

   Ang kasakit di matungkad,
   nga sang luha ginabukad,
   O iloy sa kalisod.

   Masubo ngaa talan-awon,
   si Jesus nga dalayawon,
   ginapintasan sa krus.

   Waay mata nga di magluha,
   sa pagtan-aw sining kagha,
   sang iloy sang kalisod.

   Nanong tawo di magdulog,
   sa pagbantay kag pagbuylog,
   sa amo nga kalisod.

   Si Jesus sa balatasan;
   bisan himpit sing batasan,
   ginatulok sang iloy.

   Gintulok ni Maria,
   ang hamiling bata niya,
   maghimugto na sa krus.
 
   Ipabatyag mo sa amon,
   O iloy nga maabyanon,
   ang daku nga kagha mo.

   Dabdabon mo ang kalayo,
   sang higugma nga maayo,
   nga namut-an ni Jesus.

   Itigib sa panumdoman,
   ang isa kalalauman,
   nga amo ang santa krus.

   O palabton mo kami man,
   sang gin-antos tal-os namon,
   ni Jesus nga bata mo.

   Maghibi upod sa imo,
   Birhen dayon nga mahimo,
   O Amay kahidlaw ko.

   Ginahandom ko magtindog,
   sa luyo mo kag mag-ingod,
   sa tiil sang santa krus.

   Kon ang bangkay ko mahaya,
   idangat mo ang himaya,
   nga langitnon sa kalag.

Aleluya:

   Malipayon ang Mahal nga Birhen Maria, sia nga wala napatay nag-agom sang pagkamartir sa idalom sang krus sang Ginoo.

Ang Pagbasa sang Santos nga Ebanghelyo suno kay:

San Juan 19:25-27

   Sa tupad sang krus ni Jesus nagatindog didto ang iya iloy, ang utod sang iya iloy, si Maria nga asawa ni Cleofas, kag si Maria Magdalena. Sang makita ni Jesus ang iya iloy kag ang iya hinigugma nga gintuton-an nga nagatindog didto, nagsiling sia sa iya iloy, “Babayi, yari ang imo anak.” 

   Dayon nagsiling man sia sa gintuton-an, “Yari ang imo iloy.” Kag sugod sadto, gindala sang gintuton-an si Maria sa pagpuyo sa iya balay. 

Setyembre 14 | Setyembre 16

Setyembre 14, 2020, Ang Paghimaya sang Santa Krus

Liturhiya sang Pulong

Nahauna nga Balasahon - Numeros 21:4-9

Salmo sa Pagsabat - Mga Salmo 78:1-2, 34-35, 36-37, 38

Ikaduha nga Balasahon - Filipos 2:6-11

Aleluya - 

Ebanghelyo - Juan 3:13-17

"Sa amo man nga Bagay Pagabayawon ang Anak sang Tawo"

1. Ang Pagbasa gikan sa Libro sang:

Numeros 21:4-9

   Ang mga Israelinhon naghalin sa bukid sang Hor paagi sa alagyan nga nagapadulong sa baybayon sang Aqaba, agod makalibot sila sa kadutaan sang Edom. Pero sa dalanon nadulaan sila sang pasensya, kag naghambal sila batok sa Dios kag kay Moises. Nagreklamo sila, “Ngaa bala ginpagwa ninyo kami halin sa Egipto agod magkalamatay sa sini nga desierto, sa diin wala sing kalan-on kag tubig? Indi kami makaagwanta sining kalan-on nga wala sing data!” Dayon ang GINOO nagpadala sing mga man-og nga dalitan sa tunga sang mga tawo, kag madamo sang mga Israelinhon ang ginkagat kag nagkalamatay. Ang mga tawo nagpalapit kay Moises kag nagsiling, “Nakasala kami sang paghambal namon batok sa GINOO kag sa imo. Karon magpangamuyo ka sa GINOO nga panguhaon niya ini nga mga man-og.” Gani si Moises nagpangamuyo para sa mga tawo. Dayon ang GINOO nagsugo kay Moises sa paghimo sing man-og nga saway kag ibutang ini sa isa ka tukon, agod nga ang bisan sin-o nga makagat makatulok sa sini kag magaayo. Gani si Moises naghimo sing isa ka man-og nga saway kag ginbutang ini sa isa ka tukon. Ang bisan sin-o nga ginkagat magatulok sa sining man-og nga saway kag magaayo sia.

Salmo sa Pagsabat:

Mga Salmo 78:1-2, 34-35, 36-37, 38

(S) Indi nila pagkalimtan ang nahimo sang Ginoo.

Pamati kamo, mga tawo ko, sa akon mga pagtudlo, kag talupangda ang akon ginasiling. Magahambal ako sa inyo, kag sugiran ko kamo sang mga tinago sang una. (S)

Pero sang pamatyon niya ang iban sa ila, ang nabilin nagbalik sa iya; naghinulsol sila kag nagpangamuyo sing hugot sa iya. Nadumdoman nila nga ang Dios amo ang ila mangangapin, nga ang Labing Mataas amo ang ila manlulowas. (S)

Pero ang ila mga ginahambal mga kabutigan, kag ang tanan nga ila ginsiling pagdayaw-dayaw lang. Indi sila mainunongon sa iya, ukon matutom sa ila kasugtanan sa iya. (S)

Pero ang Dios nagmaluloy-on sa iya mga tawo. Ginpatawad niya ang ila mga sala kag wala niya sila paglaglaga. Sa madamo nga mga tion ginpaiway niya ang iya kaakig kag ginpunggan niya ang iya kasingkal. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Filipos 2:6-11

   Ang kinaugali sang Dios Yara sa iya gihapon, Pero wala sia maghunahona Nga sa pakusog Dapat sia magtinguha Nga manginkaangay sa Dios. Sa baylo Sa iya kaugalingon nga kabubot-on Ginpaiway niya ini tanan, Kag nagsuklob sia Sang kinaugali sang isa ka ulipon. Nagpakatawo sia, Kag nagpakita sa dagway sang tawo. Nagpaubos siya sang iya kaugalingon Kag nagmasinulondon Tubtob sa kamatayon, Bisan pa ang kamatayon sa krus. Tungod sini Ginbayaw sia sang Dios sa kahitaasan, Kag ginhatagan sia sing ngalan Nga labaw sa tanan nga ngalan. Gani sa ngalan ni Jesus, Ang tanan nga mga tinuga, Sa langit kag sa duta, Kag sa idalom sang duta Magaluhod, Kag ang tanan magkilala sing dayag Nga si Jesu-Cristo amo ang Ginoo, Sa himaya sang Dios nga Amay.

Aleluya:

   Aleluya! Nagasimba kag nagadayaw kami sa imo, O Jesus, kay tungod sang imo krus gintubos mo ang kalibutan.

Ang Pagbasa sang Santos nga Ebanghelyo suno kay:

San Juan 3:13-17

   Kag wala sing bisan isa nga nakasaka sa langit luas lamang sa Anak sang Tawo nga nagpanaog halin sa langit.” Subong nga si Moises nagbayaw sang man-og nga saway sa isa ka tukon didto sa desierto, sa amo man nga bagay pagabayawon ang Anak sang Tawo, agod nga ang tagsatagsa nga magtuo sa iya may kabuhi nga wala sing katapusan. Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang tagsatagsa nga nagatuo sa iya indi na mapatay, kundi may kabuhi nga wala sing katapusan. Kay ang Dios wala magpadala sang iya Anak sa kalibutan sa paghukom sang kalibutan, kundi sa pagluwas sang kalibutan.

Setyembre 13 | Setyembre 15