Liturhiya sang Pulong
San Cornelio, Santo Papa kag Martir
kag San Cipriano, Obispo kag Martir
Nahauna nga Balasahon - 1 Corinto 12:31-13:13
Salmo sa Pagsabat - Mga Salmo 33:2-3, 4-5, 12 kag 22
Aleluya - Juan 6:63, 68
Ebanghelyo - Lucas 7:31-35
"Sa ano Ko Ipaanggid ang sining Panahon?"
Ang Pagbasa gikan sa Nahauna nga Sulat ni San Pablo nga Apostol, sa mga:
Taga-Corinto 12:31-13:13
Handuma ninyo ang dalagku pa nga mga bugay. Pero ang labaw sa tanan nga paagi amo ang masunod.
Bisan makahambal ako sang nagakalainlain nga mga hambal sang mga tawo kag bisan sang mga anghel, pero kon wala ako sing gugma, ang akon hambal pareho lang sang magahod nga tunog sang agong ukon sang bagting sang lingganay. Kag bisan maayo ako magwali sang pulong sang Dios, kag akon ang tanan nga ihibalo kag paghangop sang tanan nga mga tinago, kag bisan may pagtuo ako nga makahalin sang mga bukid, pero kon wala ako sing gugma, wala ako sing kapuslanan. Kag bisan ipanghatag ko ang tanan ko nga pagkabutang, kag bisan itugyan ko ang akon lawas nga sunogon, pero kon wala ako sing gugma, wala ini sing kapuslanan sa akon.
Ang gugma mapinasensyahon kag malulo. Ang gugma indi maimon, indi palabilabihon ukon bugalon. Ang gugma indi bastos, indi maiyaiyahon ukon maakigon. Ang gugma wala nagadumot. Ang gugma wala nagakalipay sa kalautan, kundi nagakalipay sa kamatuoran. Ang gugma nagabatas sang tanan nga mga butang, nagapati sang tanan nga mga butang, nagalaom sang tanan nga mga butang, kag nagaantos sang tanan nga mga butang.
Ang gugma wala sing katapusan. Ang bugay sa pagwali sang pulong sang Dios umalagi, ang paghambal sa iban nga mga hambal magauntat, kag ang ihibalo may katapusan. Kay ang aton ihibalo kag ang pagwali sang pulong sang Dios nga ginbugay sa aton indi pa himpit. Pero kon ang himpit mag-abot, ang di-himpit magataliwan.
Sang bata pa ako, ang akon panghambal, balatyagon, kag panghunahona binata man. Pero sang hamtong na ako ginbayaan ko ang binata nga mga pagginawi. Ang aton makita karon kasubong sang indi maathag nga larawan sa espeho, pero sa ulihi makakita kita sing maathag sa tampad. Ang nahibal-an ko karon bahin pa lang, pero sa ulihi mahibaluan ko ang tanan, pareho sang pagkahibalo sang Dios nahanungod sa akon.
Karon, ining tatlo nagapadayon: ang pagtuo, ang paglaom, kag ang gugma, kag ang labing daku sini sa ila amo ang gugma.
Salmo sa Pagsabat:
Mga Salmo 33:2-3, 4-5, 12 kag 22
(S) Bulahan ang tawo nga ginpili sang Ginoo nga mangin-iya kaugalingon!
Magpasalamat kamo sa Ginoo paagi sa pagtukar sing arpa, magkanta kamo sa iya nga ginaupdan sang mga instrumento nga may kuwerdas. Kantahi ninyo sia sing bag-o nga ambahanon, tukara sing maayo ang arpa, kag magkanta sing tudo! (S)
Ang mga pulong sang Ginoo matuod, kag ang tanan niya nga mga binuhatan masaligan. Ang Ginoo nagahigugma sang matarong kag nagakabagay, ang iya mapinadayunan nga gugma nagapuno sang duta. (S)
Bulahan ang pungsod nga ang iya Dios amo ang Ginoo; bulahan ang mga tawo nga ginpili sang Ginoo nga mangin-iya kaugalingon! Kabay nga ang imo mapinadayunon nga gugma magpabilin sa amon, O Ginoo, kay ang amon paglaom yara sa imo. (S)
Aleluya:
San Juan 6:63, 68
Ang imo mga pulong, O Ginoo, amo ang Espiritu kag kabuhi; Yara sa imo ang mga pulong sang kabuhi nga dayon.
Ang Pagbasa sang Santos nga Ebanghelyo suno kay:
San Lucas 7:31-35
“Karon, sa ano ko bala ipaanggid ang mga tawo sining panahon? Kaangay bala sila sang ano? Kaangay sila sa mga kabataan nga nagpungko didto sa tiyendahan kag nagasinggitanay, ‘Nagtukar kami sa inyo sing plawta, pero wala kamo magsaot. Nagpanalambiton kami, pero wala man kamo maghibi.’ Nagkari si Juan Bautista nga nagapuasa kag wala nagainom sing bino, kag kamo nagsiling, ‘Ginagamhan sia sang yawa.’ Ang Anak sang Tawo nagkari nga nagakaon kag nagainom, kag kamo nagsiling, ‘Tan-awa ninyo ini nga tawo! Palakaon sia kag palainom sing bino, kag amigo sang mga manugsokot sang buhis kag sang mga makasasala!’ Pero ang kaalam sang Dios ginapahayag nga matuod sang tanan nga nagabaton sini.”
No comments:
Post a Comment