Liturhiya sang Pulong
Nahauna nga Balasahon - Ezequiel 18:25-28
Salmo sa Pagsabat - Mga Salmo 25:4-5, 6-7, 8-9
Ikaduha nga Balasahon - Filipos 2:1-11
Aleluya - Juan 10:27
Ebanghelyo - Mateo 21:28-32
Diin nga Bata ang Nagtuman sang Sugo sang Amay?
1. Ang Pagbasa gikan sa Libro ni:
Ezequiel nga Propeta 18:25-28
“Pero nagasiling kamo, ‘Indi husto ang ginahimo sang Ginoo.’ Pamati kamo, mga Israelinhon. Nagahunahona bala kamo nga indi husto ang akon ginahimo? Kamo ang nagahimo sang indi husto. Kon ang matarong nga tawo mag-untat sa paghimo sing maayo, kag maghimo sing malain kag mapatay, tungod sang iya ginhimo nga malaut mapatay sia. Kon ang malaut nga tawo mag-untat sa pagpakasala kag maghimo sing matarong kag maayo, maluwas niya ang iya kabuhi. Kon matalupangdan niya ang iya ginahimo kag mag-untat sia sa pagpakasala, indi sia mapatay, kundi magakabuhi.
Salmo sa Pagsabat:
Mga Salmo 25:4-5, 6-7, 8-9
(S) Ginoo, dumdoma man ang Imo kaayo kag mapinadayunon nga gugma.
Tudloi ako sang imo mga dalan, O Ginoo, ipakilala man ini sa akon. Tudloi ako sa pagkabuhi suno sa imo kamatuoran, kay ikaw ang akon Dios nga nagaluwas sa akon. Sa bug-os nga adlaw nagasalig ako sa imo. (S)
Ginoo, dumdoma man ang imo kaayo kag mapinadayunon nga gugma, nga imo ginpakita halin pa gid sang una. Patawara man ang akon mga sala kag kasaypanan sang akon pagkapamatan-on, tungod sang imo mapinadayunon nga gugma kag kaayo, dumdoma man ako, O Ginoo! (S)
Ang Ginoo matarong kag maayo, ginatudloan niya ang mga makasasala sang dalan nga ila pagaagyan. Ginatuytoyan niya ang mapainuboson sa matadlong nga dalan, kag iya sila ginatudloan sang iya kabubot-on. (S)
2. Ang Pagbasa gikan sa Sulat ni San Pablo nga Apostol, sa mga:
Taga-Filipos 2:1-11
Nagapalig-on bala sa inyo ang inyo kabuhi kay Cristo? Nagalipay bala sa inyo ang iya gugma? Nagahiusa bala kamo sa Espiritu? May kalulo bala kamo kag kaluoy sa isa kag isa? Ti karon, ginapangabay ko sa inyo, lipaya gid ninyo ako sing bug-os paagi sa inyo pag-isa sing hunahona, paghigugmaanay, kag paghiusa sa espiritu kag tinutoyo. Indi kamo magmaiyaiyahon ukon magpadayawdayaw sa inyo mga ginahimo, kundi magpaubos kamo sa isa kag isa kag indi kamo maghunahona nga labaw kamo sa iban. Pangitaa ninyo ang kaayuhan sang iban kag indi lang ang inyo kaugalingon nga kaayuhan. Hupti ninyo ini nga panghunahona nga iya man ni Cristo Jesus:
Ang kinaugali sang Dios Yara sa iya gihapon, Pero wala sia maghunahona Nga sa pakusog Dapat sia magtinguha Nga manginkaangay sa Dios. Sa baylo Sa iya kaugalingon nga kabubot-on Ginpaiway niya ini tanan, Kag nagsuklob sia Sang kinaugali sang isa ka ulipon. Nagpakatawo sia, Kag nagpakita sa dagway sang tawo. Nagpaubos siya sang iya kaugalingon Kag nagmasinulondon Tubtob sa kamatayon, Bisan pa ang kamatayon sa krus. Tungod sini Ginbayaw sia sang Dios sa kahitaasan, Kag ginhatagan sia sing ngalan Nga labaw sa tanan nga ngalan. Gani sa ngalan ni Jesus, Ang tanan nga mga tinuga, Sa langit kag sa duta, Kag sa idalom sang duta Magaluhod, Kag ang tanan magkilala sing dayag Nga si Jesu-Cristo amo ang Ginoo, Sa himaya sang Dios nga Amay.
Aleluya:
San Juan 10:27
Ang akon mga karnero nagapamati sa akon tingog, siling sang Ginoo; Kilala ko sila kag nagasunod sila sa akon.
Ang Pagbasa sang Santos nga Ebanghelyo suno kay:
San Mateo 21:28-32
“Karon, ano bala ini sa inyo? May isa ka tawo nga may duha ka anak nga lalaki. Ginkadtuan niya ang magulang kag ginsingganan, ‘Toto, kadto ka karon sa uma kag mag-obra.’ Nagsabat sia, ‘Indi ako!’ Pero sang ulihi nagbaylo ang iya hunahona kag nagkadto sia sa uma. Karon ang amay nagkadto man sa manghod kag nagsiling sing amo man. Ang bata nagsabat, ‘Huo, Tay,’ pero wala sia magkadto. Diin sini sa ila nga duha ang nagtuman sang sugo sang amay?”
Nagsabat sila, “Ang magulang.”
Si Jesus nagsiling sa ila, “Nagasiling ako sa inyo nga unahan pa kamo sang mga manugsokot sang buhis kag sang malain nga mga babayi sa pagsulod sa Ginharian sang Dios. Kay si Juan Bautista nagkari kag nagtudlo sa inyo sang husto nga dalan, kag wala kamo magpati sa iya, pero ang mga manugsokot sang buhis kag ang malain nga mga babayi nagpati sa iya. Bisan pa nakita ninyo ini, wala gid magliso ang inyo hunahona kag magpati sa iya.”
No comments:
Post a Comment