Liturhiya sang Pulong
San Pedro Claver, Pari
Nahauna nga Balasahon - 1 Corinto 7:25-31
Salmo sa Pagsabat - Mga Salmo 45:11-12, 14-15, 16-17
Aleluya - Lucas 6:23
Ebanghelyo - Lucas 6:20-26
"Bulahan Kamo nga mga Imol - inyo ang Ginharian sang Dios"
Ang Pagbasa gikan sa Nahauna nga Sulat ni San Pablo nga Apostol, sa mga:
Taga-Corinto 7:25-31
Karon nahanungod sa wala sing bana ukon asawa, wala ako sing sugo halin sa Ginoo, pero nagahatag ako sang akon panghunahona subong isa nga sarang masaligan tungod sang kaluoy sang Dios.
Tungod sang mga kabudlayan karon, kon sa akon lang maayo pa nga ang isa ka tawo magpadayon sa iya kahimtangan karon. May asawa ka bala? Indi na sia pagbulagi. Wala ka bala sing asawa? Indi ka na lang magpangasawa. Pero kon mangasawa ka gid man, indi ka makasala. Kon ang dalaga magpamana, indi man sia makasala. Pero luyag ko kuntani nga malikawan ninyo ang adlaw-adlaw nga palaligban sang may asawa ukon bana.
Mga utod, amo ini ang buot ko silingon: diutay na lang ang tion nga nabilin. Sugod karon ang may mga asawa magkabuhi nga daw wala sing asawa, ang mga nagakalisod subong nga daw wala man sila sing kalisod, ang mga nagakalipay subong nga daw wala man sila sing kalipay, ang mga nagabakal subong nga daw wala man sila sing binaklan, kag ang nagagamit sang mga pagkabutang sining kalibutan magkabuhi subong nga daw wala man sila nagagamit sini. Kay ang kahimtangan karon nagapakita nga ining kalibutan indi na gid magdugay.
Salmo sa Pagsabat:
Mga Salmo 45:11-12, 14-15, 16-17
(S) Nobya nga kalaslon sa hari, pamatii ang ginasiling ko.
Nobya nga kalaslon sa hari, pamatii ang ginasiling ko, kalimti ang imo mga tawo kag mga himata. Pagahandumon ka sang hari tungod sang imo katahom, agalon mo sia, gani dapat ka magtuman sa iya. (S)
Ang prinsesa yara sa palasyo—daw ano katahom sa iya! Ang iya bayu nahimo sa hilo nga bulawan. Sa iya matahom nga trahe ginadala sia sa hari, nga ginasunod sang iya mga kaubay nga mga kadalagahan, kag sila man ginadala sa hari. (S)
Nagakari sila sing malipayon kag masinadyahon, kag nagasulod sa palasyo sang hari. Magaanak ikaw, O hari ko, sing madamo nga mga anak nga lalaki, sa pagtal-os sa imo mga katigulangan, kag himuon mo sila nga mga pangulo sa bug-os nga duta. (S)
Aleluya:
San Lucas 6:23
Magkalipay kag maghinugyaw kamo, siling sang Ginoo, kay daku ang inyo balos sa langit.
Ang Pagbasa sang Santos nga Ebanghelyo suno kay:
San Lucas 6:20-26
Gintulok ni Jesus ang iya mga gintuton-an kag ginsingganan:
“Bulahan kamo nga mga imol,
Kay inyo ang Ginharian sang Dios!
“Bulahan kamo nga ginagutom karon,
Kay pagabusgon kamo!
“Bulahan kamo nga nagahibi karon,
Kay magakadlaw kamo!
“Bulahan kamo kon ang mga tawo magdumot sa inyo, magsikway sa inyo, magpasipala sa inyo, kag magtawag sa inyo nga malaut tungod sa Anak sang Tawo. Magkalipay kamo kon ina matabo, kag maghinugyaw kamo, kay daku ang inyo balos sa langit. Kay amo man ini ang ginhimo sang ila mga katigulangan sa mga propeta.
“Pero kailo man kamo
Nga mga manggaranon karon,
Nga nakaagom na
Sang mahapos nga pagpangabuhi!
“Kailo man kamo
Nga mga busog karon,
Kay gutomon kamo!
“Kailo man kamo
Nga nagakadlaw karon,
Kay magapangasubo
Kag magahibi kamo!
“Kailo man kamo kon ang tanan nga mga tawo magdayaw sa inyo, kay amo man ini ang ginhimo sang ila mga katigulangan sa di-matuod nga mga propeta.”
No comments:
Post a Comment