Setyembre 24, 2020, Huwebes sang Ika-25 nga Semana sang Tuig

 Liturhiya sang Pulong

Nahauna nga Balasahon - Manugwali 1:2-11

Salmo sa Pagsabat - Mga Salmo 90:3-4, 5-6, 12-13, 14 kag 17

Aleluya - Juan 14:6

Ebanghelyo - Lucas 9:7-9

Naglibog ang Ulo ni Herodes

Ang Pagbasa gikan sa Libro sang:

Manugwali 1:2-11

   Ang Kabuhi wala sing kapuslanan, wala sing kapuslanan, ang siling sang Manugwali. Wala sing kapuslanan, ang tanan wala sing kapuslanan. Ginagamit mo ang imo kabuhi sa pagpangabudlay, sa paghimakas, kag ano bala ang makuha mo sini? Ang mga kaliwatan nagaabot kag nagataliwan, pero ang kalibutan amo man gihapon. Ang adlaw nagabutlak kag nagatunod sa gihapon, kag nagabalik sa duog diin magasugod sia liwat. Ang hangin nagahuyop sa bagatnan, nagahuyop sa aminhan, nagabuyong-buyong ini kag nagabalik liwat. Ang tanan nga suba nagailig sa dagat, pero ang dagat wala nagakapuno. Ang tubig nagabalik sa iya ginhalinan, kag nagailig ini liwat. Ang tanan nga butang nagapalapyo sa tawo—ang pagkapalapyo nga indi masaysay. Ang aton mga mata indi mabusog sang ila ginatan-aw, kag ang aton mga dulonggan indi maayawan sang ila ginapamatian. Ang natabo sang una matabo man liwat. Ang nahimo sang una pagahimuon liwat. Wala sing bag-o nga butang sa bug-os nga kalibutan. Nagasiling sila, “Tan-awa, yari ang bag-o nga butang!” Indi ina matuod! Yara na ina sang una, sang wala pa kita matawo. Wala sing may nagadumdom sang natabo sang nagliligad, kag sa mga adlaw nga palaabuton wala sing may magadumdom sang matabo sumogod karon kag sa sadto nga tion.
Salmo sa Pagsabat:

Mga Salmo 90:3-4, 5-6, 12-13, 14 kag 17

(S) O Ginoo, Ikaw ang amon puloy-an halin sang una.

Ginamanduan mo ang mga tawo sa pagbalik sa ila ginhalinan, ginahimo mo sila liwat nga duta. Ang isa ka libo ka tuig para sa imo subong lang sang isa ka adlaw; kaangay lang sila sang kahapon nga nagligad na, subong sang isa ka malip-ot nga takna sa kagab-ihon. (S)
Ginaanod mo ang mga tawo subong sang baha; subong sila sang damgo nga wala nagadugay. Subong sila sang hilamon nga nagaulhot kon aga, nagatubo kag nagalagtom, pero pagkahapon nagakalaya kag nagakapatay. (S)
Tudloi kami kon daw ano kalip-ot sang amon kabuhi, agod nga manginmainandamon kami. O Ginoo, tubtob pa bala san-o ikaw malugpayan? Kaluoyi man ang imo mga alagad! (S)
Pun-a kami sa tagsa ka aga sang imo mapinadayunon nga gugma, agod magkanta kag magkalipay kami sa bug-os namon nga kabuhi. Ginoo nga amon Dios, kabay nga bendisyunan mo kami, kag hatagi kami sing kadalag-an sa tanan nga amon ginahimo! Huo, hatagi kami sing kauswagan sa tanan nga amon ginahimo! (S)

Aleluya:

San Juan 14:6

   Ako amo ang dalan, ang kamatuoran, kag ang kabuhi, siling sang Ginoo; wala sing may makakadto sa Amay kon indi paagi sa akon.

Ang Pagbasa sang Santos nga Ebanghelyo suno kay:

San Lucas 9:7-9

   Si Herodes nga pangulo sang Galilea nakabati sang tanan nga nagkalatabo. Naglibog gid ang ulo niya kay may mga tawo nga nagsiling, “Nabanhaw si Juan Bautista.” Ang iban nagsiling nga si Elias nagpakita, kag ang iban pa gid nagsiling nga ang isa sang mga propeta sang una nabanhaw. Nagsiling si Herodes, “Ginpapugotan ko sing ulo si Juan, pero sin-o ining tawo nga madamo ang akon nabatian nahanungod sa iya?” Kag nagtinguha sia sa pagpakigkita sa kay Jesus.

Setyembre 23 | Setyembre 25