Setyembre 12, 2020, Sabado sang Ika-23 nga Semana sang Tuig

Liturhiya sang Pulong

Nahauna nga Balasahon - 1 Corinto 10:14-22

Salmo sa Pagsabat - Mga Salmo 116:12-13, 17-18

Aleluya - Juan 14:23

Ebanghelyo - Lucas 6:43-49

Ang Kabuhi nga Napasad sa Mapag-on nga Sadsaran

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 10:14-22

   Gani, mga hinigugma ko, indi kamo magsimba sa mga diosdios. Nagahambal ako sa inyo subong nga kamo maalam nga mga tawo. Kamo ang magbinagbinag sang akon ginasiling sa inyo. Wala bala kita nagapakig-ambit sa dugo ni Cristo kon kita mag-inom sa sini nga kupa sang pagpasalamat nga aton ginapasalamatan sa Dios? Wala bala kita nagapakig-ambit sa lawas ni Cristo kon kita magkaon sini nga tinapay nga aton ginapamihakpihak? Tungod nga may isa lang ka tinapay, kita tanan, bisan nga madamo, nangin-isa ka lawas, kay kita tanan nagaambit sang isa lang ka tinapay. 

   Tan-awa bala ninyo ang mga tawo sang Israel. Indi bala nga ang mga nagakaon sang mga ginahalad sa altar nagapakig-ambit sa ginahalad sa Dios? Ano ang buot ko silingon? Nga ang diosdios ukon ang kalan-on nga ginahalad sa ila may kapuslanan? Indi amo ina ang buot ko silingon! Ang ginasiling ko nga ang ginahalad sang mga tawo sa mga altar sang diosdios ginahalad nila sa mga yawa kag indi sa Dios. Kag indi ako luyag nga magpakig-ambit kamo upod sa mga yawa. Indi kamo makainom sa kupa sang Ginoo kag mag-inom man sa kupa sang mga yawa. Indi kamo makakaon sa lamisa sang Ginoo kag magkaon man sa lamisa sang mga yawa. Ukon luyag bala kita nga magpangimon ang Ginoo? Naghunahona bala kamo nga makusog pa kita sa iya? 

Salmo sa Pagsabat:

Mga Salmo 116:12-13, 17-18

(S) O Ginoo, magadulot ako sa imo sang halad sang pagpasalamat.

Ano bala ang mahatag ko sa Ginoo tungod sang tanan niya nga kaayo sa akon? Magadala ako sing halad nga ilimnon sa Ginoo, sa pagpasalamat sa iya sang pagluwas niya sa akon. (S)

Magadulot ako sa imo sang halad sang pagpasalamat, kag magapangamuyo ako sa imo. Sa pagtilipon sang tanan mo nga mga tawo, sa sulod sang imo Templo sa Jerusalem, ihatag ko sa imo ang akon ginsaad. (S)

Aleluya:

San Juan 14:23

   Ang nagahigugma sa akon magatuman sang akon pulong, siling sang Ginoo, kag ang akon Amay magahigugma sa iya kag magakabuhi upod sa iya.

Ang Pagbasa sang Santos nga Ebanghelyo suno kay:

San Lucas 6:43-49

   “Ang maayo nga kahoy wala nagapamunga sing malain nga bunga, kag ang malain nga kahoy wala nagapamunga sing maayo nga bunga. Ang tagsa ka kahoy makilala mo sa iya bunga. Wala kamo nagapamupo sing higos sa talungon, kag wala man kamo nagapamupo sing ubas sa sapinit. Ang maayo nga tawo nagapagwa sang maayo nga mga butang nga yara sa iya tagipusoon, kag ang malain nga tawo nagapagwa sang malain nga mga butang nga yara sa iya tagipusoon. Kay kon ano ang sulod sang tagipusoon sang tawo amo man ina ang iya ginahambal.” 

   “Ngaa ginatawag ninyo ako, ‘Ginoo, Ginoo,’ kag wala ninyo ginahimo ang mga butang nga akon ginasiling sa inyo? Sugiran ta kamo kon daw ano ang tawo nga nagakari sa akon, kag nagapamati sang akon mga pulong kag nagatuman sini: Kaangay sia sang isa ka tawo nga nagpatindog sang balay. Nagkutkot sia sing madalom kag iya ginpasad ang sadsaran sa daku nga bato. Ang suba nagbaha kag nag-awas kag ang tubig nagsampi sa balay, pero wala ini makauyog sa balay kay ang balay napasad sing malig-on. Pero ang nagapamati sang akon pulong kag wala nagatuman sini kaangay sia sang isa ka tawo nga nagpatindog sang iya balay sa duta, nga wala sing sadsaran nga mapag-on. Sang ginbahaan ini nga balay natumba ini sa gilayon, kag nawasdak.”

Setyembre 11 | Setyembre 13