"Ang Tawo nga Nagadula sang Iya Kabuhi bangod sa Akon Makakita sini"

Liturhiya sang Pulong

(Biyernes, Agosto 9, 2019)

Santa Teresa Benita de la Cruz, Birhen kag Martir

Ang Pagbasa gikan sa Libro sang:

Deuteronomio 4:32-40

   “Usisaa ang nagligad, sadtong panahon nga wala pa kamo matawo, halin sang pagtuga sang Dios sang tawo sa duta. Usisaa ang bug-os nga duta. May natabo bala halin sang una nga pareho sini ka daku? May nakabati bala sang isa ka butang nga pareho sini? May yara bala nga mga tawo nga nabuhi pa sa tapos nila mabatian ang Dios nga naghambal gikan sa kalayo pareho sang nabatian ninyo? May isa bala ka dios nga nangahas sa pagkuha sang isa ka grupo sang mga tawo gikan sa isa ka pungsod kag himuon niya nga iya kaugalingon nga mga tawo subong sang ginhimo sa inyo sang GINOO nga inyo Dios didto sa Egipto? Sa inyo gid atubangan gingamit niya ang iya daku nga gahom kag kusog kag nagdala sing mga kalalat-an kag inaway, naghimo sang mga milagro kag mga katilingalahan, kag naghimo sing makahaladlok nga mga butang. Ang Ginoo nagpakita sa inyo sini, agod mahibaluan ninyo nga sia amo lamang ang Dios kag wala na sing iban. Ginpabati niya kamo sang iya tingog halin sa langit agod matudloan niya kamo, kag sa duta ginpakita niya kamo sang iya balaan nga kalayo, kag gikan sa sini naghambal sia sa inyo. Tungod kay ginhigugma niya ang inyo mga katigulangan, ginpili niya ang inyo mga kaliwat, kag paagi sa iya daku nga gahom sia gid ang nagpagwa sa inyo sa Egipto. Samtang nagapakari kamo gintabog niya ang mga kapungsoran nga daku kag gamhanan pa sa inyo, agod iya kamo mapasulod kag mahatag sa inyo ang ila duta, ang duta nga tubtob karon inyo. Gani karon, dumdoma ninyo karon nga adlaw kag indi pagkalimti ang GINOO, Dios sa langit kag sa duta. Wala na sing iban nga Dios. Tumana ninyo ang tanan niya nga mga kasugoan nga akon ginahatag sa inyo karon nga adlaw, dayon ang tanan manginmaayo para sa inyo kag sa inyo mga kaliwat. Magapadayon kamo sa pagpuyo sa duta nga ginhatag sa inyo sang Ginoo nga inyo Dios nga mangin-inyo sa wala sing katapusan.”

Salmo sa Pagsabat:

Mga Salmo 77:12-13, 14-15, 16 kag 21

(S) O Ginoo, dumdomon ko ang imo dalagku nga mga binuhatan.

O Ginoo, dumdomon ko ang imo dalagku nga mga binuhatan, sang una. Dumdomon ko ang tanan nga imo ginhimo, pamalandungan ko ang tanan mo nga mga binuhatan. (S)

O Dios, ang tanan nga imo ginahimo balaan! Wala sing iban nga dios nga gamhanan subong sa imo! Ikaw amo ang Dios nga nagahimo sang mga milagro; ginpakita mo ang imo kusog sa mga kapungsoran. (S)
Sa imo gahom ginluwas mo ang mga tawo, ang mga kaliwat ni Jacob kag ni Jose. Gintuytoyan mo ang imo mga tawo kaangay sang manugbantay sang karnero, nga ginatatap ni Moises kag ni Aaron. (S)

Aleluya:

Mateo 5:10

Bulahan ang mga ginahingabot tungod kay ginatuman nila ang ginapaabot sang Dios sa ila, kay ila ang Ginharian sang langit!

Ang Pagbasa sang Santos nga Ebanghelyo suno kay:

San Mateo 16:24-28

   Dayon si Jesus nagsiling sa iya mga gintuton-an, “Ang bisan sin-o nga luyag magsunod sa akon, dapat niya kalimtan ang iya kaugalingon, magpas-an sang iya krus kag magsunod sa akon. Kay ang tawo nga buot magluwas sang iya kaugalingon nga kabuhi madula sini, pero ang tawo nga nagadula sang iya kabuhi bangod sa akon makakita sini. Ano bala ang makuha sang tawo kon maangkon niya ang bug-os nga kalibutan kag madula niya ang iya kabuhi? Wala gid! Wala sing sarang mahatag ang tawo agod mabuhi sia liwat. Kay ang Anak sang Tawo madali na lang magkari sa himaya sang iya Amay kaupod sa iya mga anghel, kag dayon magahatag sia sing balos sa tagsa ka tawo suno sa iya mga binuhatan. Dumdoma ninyo ini! May iban diri sa inyo nga indi mapatay tubtob nga makita nila ang Anak sang Tawo nga nagakari subong Hari.”

Agosto 8 | Agosto 10