"Ang mga Kababayin-an Nag-amuma kay Jesus"

Liturhiya sang Pulong

(Biyernes, Setyembre 20, 2019)

San Andres Kim Taegon, Pari kag Martir
San Pablo Chang Hasang kag mga Kaupdanan, Martires

Ang Pagbasa gikan sa Nahauna nga Sulat ni San Pablo nga Apostol, kay:

Timoteo 6:2-12

   Itudlo kag iwali mo ini nga mga pagtulon-an. Ang nagapanudlo sang iban nga pagtulon-an kag wala nagahisugot sa matuod nga mga pulong sang aton Ginoong Jesu-Cristo kag sa pagtulon-an sang aton pagtuloohan, nagahabok sa pagpabugal kag wala sing may nahibaluan. Ang iya naluyagan amo ang pagsinuay kag pagbanggianay nahanungod sa mga pulong, kag ini nagadala sing kahisa, pagbinahinbahin, pagpasipala, malaut nga mga pagpangduhadoha, kag dayon nga pagsinuay sa mga tawo nga wala sa ila husto nga painuino kag nawad-an sang kamatuoran. Naghunahona sila nga ang relihiyon isa ka paagi nga makapamanggad sa ila.
   Matuod man, ang relihiyon nagahimo sang tawo nga manggaranon kaayo, kon kuntento sia sang iya pagkabutang. Ano bala ang aton gindala sa kalibutan? Wala! Ano bala ang aton madala halin sa kalibutan? Wala! Gani, kon may kalan-on kita kag bayu, tuman na ina para sa aton. Pero ang luyag magmanggaranon nagakahulog sa mga pagsulay kag ginasiod sang binuang kag makahalalit nga mga handom nga nagadala sa ila sa kamusmosan kag kalaglagan. Kay ang paghigugma sa pilak amo ang ginahalinan sang tanan nga sahi sang kalautan. May iban nga mga tawo nga naghandom gid sini, gani nagtalang sila sa pagtuo kag napuno ang ila mga tagipusoon sang mga kalisod. Pero ikaw, tawo sang Dios, likawi ini nga mga butang. Himulati ang pagkamatarong, pagkadiosnon, pagtuo, paghigugma, pagbatas kag pagkalulo. Dalagan ka sing maayo sa palumba sang pagtuo kag dag-a ang kabuhi nga wala sing katapusan. Kay sa sini nga kabuhi gintawag ka sang Dios, sang pagpahayag mo sang imo pagtuo sa atubangan sang madamo nga mga saksi.

Salmo sa Pagsabat:

Mga Salmo 49:6-7, 8-10, 17-18, 19-20

(S) Bulahan ang mga nagakilala sang kinahanglanon sang ila mga kalag, kay ila ang Ginharian sang langit.

Wala ako mahadlok sa tion sang katalagman, kon ginalibutan ako sang malaut nga mga kaaway, sang mga tawo nga nagasalig sa ila mga manggad, nga nagapabugal sang ila madamo nga mga pagkabutang. (S)

Ang tawo indi gid makatubos sang iya kaugalingon; indi sia makasarang sa pagbayad sa Dios sang bili sang iya kabuhi, tungod kay tama ka mahal ang kabuhi sang isa ka tawo. Ang iya sarang mabayad indi tuman sa pagpalikaw sa iya sa lulobngan, agod magkabuhi sia sing walay katapusan. (S)

Indi ka magkahadlok kon magmanggaranon ang isa ka tawo, kon ang iya manggad magdugang pa gid; kay indi niya madala ini kon mapatay sia; ang iya manggad indi niya mabalon sa lulobngan. (S)

Bisan pa kon sa sini nga kabuhi nakapaayaw ang isa ka tawo, kag ginadayaw sia tungod sang iya kauswagan, sa iya pagkapatay magaupod sia sa tanan niya nga mga katigulangan, sa diin wala sing katapusan ang kadudolman. Ang pagkahalangdon sang tawo indi makaluwas sa iya sa kamatayon, mapatay sia subong sang mga sapat. (S)

Aleluya:

Mateo 11:25

   Bulahan ikaw, O Amay, Ginoo sang langit kag duta kay ginpahayag mo sa mga di-maalam ang mga misteryo sang Ginharian.

Ang Pagbasa sang Santos nga Ebanghelyo suno kay:

San Lucas 8:1-3

   Sa tapos sadto si Jesus nagkadto sa mga banwa kag mga baryo sa pagwali sang Maayong Balita sang Ginharian sang Dios. Nag-upod sa iya ang dose ka mga apostoles kag subong man ang pila ka mga babayi nga gin-ayo niya sa mga balatian kag malaut nga espiritu. Ang mga babayi amo sanday Maria nga ginatawag Magdalena nga gikan sa iya gintabog ni Jesus ang pito ka yawa; si Juana, ang asawa ni Chuza nga isa ka opisyal sa korte ni Herodes; si Susana, kag iban pa nga madamo nga mga kababayin-an nga suno sa ila masarangan nag-amuma kay Jesus kag sa iya mga gintuton-an.

Setyembre 19 | Setyembre 21