"Madamo nga mga Makasasala nga Nagsunod kay Jesus"

Liturhiya sang Pulong

(Sabado, Enero 18, 2020)

Ang Pagbasa gikan sa Nahauna nga Libro ni:

Samuel nga Propeta 9:1-4, 17-19, 10:1

   May isa ka tawo gikan sa tribo ni Benjamin nga ginahingalanan kay Cis, anak nga lalaki ni Abiel, apo ni Seror, sa panimalay ni Bekorat, sa kabaranggayan ni Apia. Si Cis manggaranon kag kinilala nga tawo. May anak sia nga lalaki nga ginahingalanan kay Saul, pamatan-on sia kag guwapo. Taga-abaga lang niya ang bisan sin-o, kag pinakaguwapo sia sa Israel.
   Karon ang iban sang mga asno ni Cis nadula, gani nagsiling sia kay Saul, "Dalha ang isa sa mga suloguon kag pangitaa ang mga asno. Naglakat sila sa mga kabakuloran sang Efraim kag sa mga kadutaan sang Salisa, pero wala didto ang mga asno. Gani nagpadayon sila sa kadutaan sang Saalim, pero ang mga asno wala didto. Dayon nagpadayon sila sa kadutaan sang Benjaminhon, pero wala man nila makita didto ang mga asno.

   Sang makita ni Samuel si Saul, ang Ginoo nagsiling sa iya, "Amo ini sia ang tawo nga ginsiling ko sa imo. Magagahom sia sa akon mga tawo." Dayon si Saul nagkadto kay Samuel malapit sa puwerta kag namangkot, “Diin bala nagaestar ang palamangkutan?"

   Si Samuel nagsabat,"Ako amo ang palamangkutan. Una ka lang sa akon sa duog nga ginasimbahan. Magakaon kamo nga duha upod sa akon karon nga adlaw. Buas pagasabton ko ang tanan mo nga mga pamangkot kag palakton ko ikaw sa imo kaladtuan.

   Si Samuel nagkuha sang isa ka botelya nga lana sang olibo kag ginbubo sa ulo ni Saul, ginhalukan sia, kag nagsiling, "Ang Ginoo nagahaplas sa imo subong pangulo sang iya mga tawo nga Israel. Magagahom ikaw sa iya mga tawo kag magaluwas sa ila gikan sa ila mga kaaway. Amo ini ang pamatuod nga ang Ginoo nagpili sa imo nga manginpangulo sang iya mga tawo."

Salmo sa Pagsabat:

Mga Salmo 21:2-3, 4-5, 6-7

(S) Nagakalipay ang hari, O Ginoo, kay ginhatagan mo sia sing kusog.

Nagakalipay ang hari, O Ginoo,kay ginhatagan mo sia sing kusog; nagakasadya gid sia, kay imo sia ginpadaog. Ginhatag mo sa iya ang iya naluyagan,ginhatag mo ang iya ginapangayo. (S)

Gindalhan mo sia sang madamo nga mga kaayuhan, kag ginkoronahan mo sia sing bulawan. Nagpangayo siasang kabuhi,kag imo sia ginhatagan; kabuhi nga malawig kag wala sing katapusan. (S)

Tungod sang imo pagbulig daku ang iya himaya, ginhatagan mo sia singkadungganan kag pagkahalangdon. Ginahatagan mo sia sing mga kaayuhan sa gihapon, kag ang imo pagpakig-upod nagahatag sa iya sing kalipay. (S)

Aleluya:

Lucas 4:18

   Ginpili ako sang Ginoo sa pagwali sang Maayong Balita sa mga imol, ginpadala Niya ako sa pagbantala sang kahilwayan sang mga bihag.

Ang Pagbasa sang Santos nga Ebanghelyo suno kay:

San Marcos 2:13-17

   Si Jesus nagbalik liwat sa higad sang Linaw sang Galilea. Nagpalapit sa iya ang madamo nga mga tawo kag nagsugod sia sa pagpanudlo sa ila. Sang nagapadayon sia sa paglakat, nakita niya ang isa ka manugsokot sang buhis, si Levi nga anak ni Alfeo, nga nagapungko sa iya opisina. Si Jesus nagsiling sa iya, “Sunod ka sa akon.” Nagtindog si Levi kag nagsunod sa iya.
   Sang ulihi nagkaon si Jesus sa balay ni Levi. May madamo nga mga manugsokot sang buhis kag mga makasasala nga nagsunod kay Jesus, kag ang iban sa ila nagkaon upod sa iya kag sa iya mga gintuton-an. May pila ka manunodlo sang Kasugoan nga mga Fariseo nga nakakita kay Jesus nga nagkaon upod sa mga makasasala kag mga manugsokot sang buhis. Gani ginpamangkot nila ang iya mga gintuton-an, “Ngaa bala nagakaon sia upod sa mga manugsokot sang buhis kag mga makasasala?”
   Nabatian sila ni Jesus kag nagsiling sia, “Ang mga tawo nga wala sing balatian wala nagakinahanglan sang manugbolong, kundi ang mga masakiton lang. Wala ako magkari sa pagtawag sang mga matarong kundi sang mga makasasala.”

Enero 17 | Enero 19