Liturhiya sang Pulong
(Domingo, Nobyembre 17, 2019)
 |
| Santa Isabel de Hungaria, Relihiyoso |
1. Ang Pagbasa gikan sa Libro ni:
Malaquias nga Propeta 3:19-20
Ang Ginoo sang mga hangaway nagasiling: "Yari karon, ang adlaw magaabot nga ang tanan nga bugalon kag ang malaut nga mga tawo masunog subong sang dagami. Sa sadto nga adlaw masunog sila, kag wala gid sing may mabilin sa ila. Pero kamo nga nagatuman sa akon, ang akon gahom sa pagluwas magabutlak sa inyo subong sang adlaw, kag magaayo sa inyo subong sang pag-ayo sang silak sang adlaw.
Salmo sa Pagsabat:
Mga Salmo 98:5-6, 7-8, 9
(S) Ang Ginoo nagakari sa paghukom sing alalangay sa mga tawo.
Magkanta kamo sing mga pagdayaw sa Ginoo nga ginaupdan sang mga arpa, magtukar kamo sang sonata sa mga arpa! Upod sa mga trumpeta kag mga korneta, maghinugyaw kamo sa atubangan sang Ginoo, ang hari! (S)
Magdaguhob ka, O dagat, kag tanan nga tinuga nga yara sa imo; magkanta ka, O duta, kag tanan nga nagapuyo dira sa imo! Magpamalakpak kamo, O mga kadagatan; O mga kabakuloran, magkanta kamo sing tingob sa kalipay sa atubangan sang Ginoo. (S)
Kay nagakari sia sa paggahom sa duta! Pagagamhan niya ang tanan nga katawuhan sang kalibutan suno sa katarungan kag kamatuoran. (S)
2. Ang Pagbasa gikan sa Ikaduha nga Sulat ni San Pablo nga Apostol, sa mga:
Taga-Tesalonica 3:7-12
Kamo inyo nakahibalo gid nga dapat ninyo himuon man ang amon ginhimo. Wala kami magtinamad sang kami kaupod ninyo. Wala kami magbaton sing bulig ni bisan sin-o nga wala namon pagbayari, kundi nagpangabudlay kag nagpanikasog kami sa adlaw kag gab-i, agod nga wala sing isa sa inyo nga mabug-atan sa pagsakdag sa amon. Ginhimo namon ini indi tungod kay wala kami sing kinamatarong sa pagpaabot sang inyo pagsakdag sa amon, kundi ginhimo namon ini subong sulondan ninyo. Sang kami kaupod pa ninyo, ginsingganan namon kamo, “Ang bisan sin-o nga indi luyag mag-obra indi pagpakaunon.”
Ginasiling namon ini kay nakabati kami nga may iban sa inyo nga mga matamad, nga wala sing iban nga ginahimo kundi ang pagpahilabot sa mga bulohaton sang iban. Sa ngalan sang aton Ginoong Jesu-Cristo ginasugo namon ini nga mga tawo kag ginapaandaman nga dapat sila magkabuhi sing malinong, kag magpangita sang ila kaugalingon nga pangabuhian.
Aleluya:
Lucas 21:28
Magtindog kamo kag magbayaw sang inyo mga ulo kay ang inyo kaluwasan malapit na.
Ang Pagbasa sang Santos nga Ebanghelyo suno kay:
San Lucas 21:5-19
May mga tawo nga nagmuno kon daw ano katahom sang templo nga napugtakan sang matahom nga mga bato kag nabutangan sang mga dulot nga nahalad sa Dios. Si Jesus nagsiling sa ila, “Ini tanan nakita ninyo, pero magaabot ang tion nga wala sing mabilin diri nga isa ka bato nga nasampaw sa isa. Ang tanan marumpag.”
Nagpamangkot sila, “Manunodlo, san-o bala mahanabo ini? Kag ano bala ang tanda nga madali na lang ini mahanabo?”
Si Jesus nagsiling sa ila, “Magbantay kamo agod indi kamo pagpatalangon. Kay madamo nga mga tawo ang magakari sa akon ngalan nga magasiling, ‘Ako amo sia!’ kag, ‘Ang tion nag-abot na!’ Pero indi kamo magpati sa ila. Indi kamo magkahadlok kon makabati kamo nga may mga inaway kag mga ribok. Ini nga mga butang matabo anay, pero ini wala nagakahulogan nga ang katapusan malapit na.”
Kag nagsiling pa gid sia, “Ang isa ka pungsod magapakig-away sa isa ka pungsod, ang isa ka ginharian magagubat sang isa ka ginharian. May magaabot nga mabaskog nga mga linog, gutom, kag piste sa nagakalainlain nga mga duog. May makakulogmat nga mga butang kag dalagku nga mga tanda sa langit. Pero sa wala pa ini tanan mahanabo, dakpon nila kamo kag hingabuton. Pagahukman kamo sa mga sinagoga kag pagabilangguon. Pagadalhon kamo sa atubangan sang mga hari kag mga gobernador tungod sa akon ngalan. Ini manginkahigayunan ninyo sa pagpanaksi sang Maayong Balita. Gani magpakalig-on kamo kag indi lang anay magpalibog kon ano ang inyo isabat, kay hatagan ko kamo sang mga pulong kag kaalam agod nga ang inyo mga kaaway indi makasupok ukon makapamatok sang inyo ginasiling. Bisan ang inyo mga ginikanan, mga kautoran, mga himata kag mga abyan magatugyan sa inyo kag ang iban sa inyo ipapatay nila. Ang tanan magadumot sa inyo bangod sa akon. Pero wala sing bisan isa ka bilog nga buhok sa inyo ulo nga madula. Magpakalig-on kamo, kay sa sini nga paagi maluwas ninyo ang inyo kaugalingon.”
No comments:
Post a Comment