Deuteronomio

Panguna
Ang Deuteronomio amo ang mga pamulongpulong ni Moises sa mga Israelinhon sa duta sang Moab, sa diin sila nagdulog sa tapos ang ila malawig nga pagpanglakaton sa desierto kag manugsulod na sila sa Canaan sa pagpanag-iya sang duta.
Ang pila sang mga bagay nga importante nga makita sa libro amo ang masunod: 1) Si Moises nagapahanumdom sa mga tawo sang dalagku nga mga hitabo sang nagligad nga 40 ka tuig. Nagapangabay sia sa mga tawo sa pagpanumdom kon paano gintuytuyan sila sang Dios sa desierto, kag magmatinumanon kag magmainunongon sila sa Dios. 2) Ginasulit ni Moises ang Napulo ka Sugo kag ginpatalupangod niya sing maayo ang kahulogan sang Nahauna nga Sugo, kag nagapangabay sia sa mga tawo sa paghigugma sa Ginoo lamang. Dayon ginsulit niya ang nanglainlain nga mga kasugoan nga amo ang magagahom sa kabuhi sang Israel sa ginsaad nga duta. 3) Si Moises nagapahanumdom sa mga tawo sang kahulogan sang kasugtanan sang Dios sa ila, kag nagapangabay sa ila sa pagbag-o sang ila mga saad sa ila katungdanan sa amo nga kasugtanan. 4) Si Josue ginpili nga pangulo sang mga tawo sang Dios. Sa tapos ni Moises makanta ang mga ambahanon nga nagasugid sang katutom sang Dios, kag sa tapos niya mabendisyonan ang mga tribo sang Israel, napatay sia didto sa Moab sa sidlangan sang Suba sang Jordan.
Ang daku nga tema sang libro amo ini: Ang Dios nagluwas kag nagbendisyon sang iya pinili nga mga tawo nga iya ginahigugma. Gani, ang iya mga tawo dapat magdumdom sini, kag maghigugma kag magtuman sa iya, agod magkabuhi sila kag mag-agom sang kaayuhan nga wala nagauntat.
Ang yabi nga mga bersikulo sini nga libro amo ang 6:4-6, kag nagalakip ini sang mga pulong nga ginatawag ni Jesus ang labing daku sang mga kasugoan: "Higugmaa ang Ginoo nga imo Dios sa bug-os mo nga tagipusoon, sa bug-os mo nga kalag, kag sa bug-os mo nga kusog."

Balayan sang Kaundan
Ang nahauna nga pamulongpulong ni Moises 1:1—4:49
Ang ikaduha nga pamulongpulong ni Moises 5:1—26:19
 a. Ang Napulo ka Sugo 5:1—10:22
 b. Ang mga Kasugoan, mga pagsulondan, kag mga paandam 11:1—26:19
Mga tugon sa pagsulod sa Canaan 27:1—28:68
Ang kasugtanan ginbag-o 29:1—30:20
Ang katapusan nga mga pulong ni Moises 31:1—33:29
Ang kamatayon ni Moises 34:1-12

☆☆☆ DEUTERONOMIO ☆☆☆

1 2 3 4 5 6 7 8 9 10
11 12 13 14 15 16 17 18 19 20
21 22 23 24 25 26 27 28 29 30
31 32 33 34

☆☆☆ DEUTERONOMIO ☆☆☆

NUMEROS 《 | 》 JOSUE

DEUTERONOMIO - Kapitulo 34

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34

♤♤♤♤♤

Ang Pagkapatay ni Moises

1 Si Moises nagtaklad sa bukid sang Nebo halin sa mga kapatagan sang Moab, pakadto sa putokputokan sang bukid sang Pisga sa sidlangan sang Jerico, kag didto ginpakita sa iya ang bug-os nga duta: ang kadutaan sang Galaad tubtob sa banwa sang Dan;

Ginpakita sa iya ang bug-os nga duta. (34:1)

2 ang bug-os nga kadutaan ni Neftali; ang mga kadutaan ni Efraim kag ni Manases; ang kadutaan ni Juda tubtob sa nakatundan sa dagat sang Mediteraneo;

3 ang bagatnan nga bahin sang Juda; kag ang kapatagan halin sa Zoar pakadto sa Jerico, ang siyudad sang mga palma.

4 Dayon ang GINOO nagsiling kay Moises, "Amo ini ang duta nga akon ginsaad kay Abraham, Isaac, kag kay Jacob nga akon ihatag sa ila mga kaliwatan. Ginpakita ko ini sa imo pero indi ko ikaw pagpakadtuon didto.”

5 Gani si Moises, ang alagad sang GINOO, napatay didto sa duta sang Moab suno sa ginsiling sang Ginoo.

6 Ginlubong sia sang Ginoo sa kapatagan sang Moab sa atubangan sang banwa sang Bet-peor, pero tubtob karon nga adlaw wala gid sing may makatultol sang pat-od nga lugar nga ginlubngan sa iya.

7 Si Moises nagaedad sing 120 ka tuig sang mapatay sia. Mabakod man sia gihapon kag masanag pa ang iya mga mata.

8 Ang mga tawo sang Israel naglalaw para sa iya sa sulod sang 30 ka adlaw sa mga kapatagan sang Moab. Ang tion sa paglalaw kay Moises natapos na.

9 Si Josue nga anak ni Nun napun-an sing kaalam, kay sia ang ginpili ni Moises sa pagbulos sa iya. Ang mga tawo sang Israel nagtuman kay Josue kag nagbantay sang mga sugo nga ginhatag sang Ginoo paagi kay Moises.

10 Halin sadto wala gid sing propeta sa Israel nga pareho kay Moises. Ang GINOO naghambal sa iya sing tampad.

11 Wala sing iban nga propeta nga nakahimo sing mga milagro kag mga kalatingalahan pareho sadtong ginsugo sang Ginoo kay Moises nga himuon batok sa hari sang Egipto, sa iya mga opisyales, kag sa bug-os nga pungsod.

12 Wala sing iban nga propeta nga sarang makahimo sang dalagku kag makakulogmat nga mga butang nga ginhimo ni Moises sa atubangan sang bug-os nga Israel. 

DEUTERONOMIO - Kapitulo 33
 <<<   >>> JOSUE - Kapitulo 1

DEUTERONOMIO - Kapitulo 33

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34

♤♤♤♤♤

Ginbendisyunan ni Moises ang mga Tribo sang Israel

1 Amo ini ang mga bendisyon nga ginhambal ni Moises, amg tawo sang Dios sa mga tawo sang Israel sa wala pa sia mapatay.

2 Ang Ginoo nag-abot halin sa bukid sang Sinai; nagbutlak sia subong sang adlaw sa ibabaw sang Edom, kag nagsilak sia sa iya mga tawo gikan sa bukid sang Paran. Ang napulo ka libo nga mga angheles kaupod niya, ang nagadabdab nga kalayo yara sa iya tuo nga kamot.

3 Ginahigugma sang Ginoo ang iya mga tawo,^y kag ginaapinan niya ang mga iya. Gani nagayaub kita sa iya nga tiilan kag nagatuman sang iya mga sugo.

4 Ginatuman naton ang Kasugoan nga ginhatag ni Moises, ang labing malahalon nga pagkabutang sang aton pungsod.

5 Ang Ginoo nanginhari sang iya mga tawo nga Israel sang magtipon sing tingob ang ila mga tribo kag mga pangulo.

6 Si Moises nagsiling nahanungod sa tribo ni Ruben: "Kabay nga si Ruben indi mapapas, bisan diutay lang ang iya mga kaliwat.”

7 Nahanungod sa tribo ni Juda nagsiling sia: "Ginoo, pamatii ang ila pagpangayo sing bulig, kag pabuyloga sila liwat upod sa iban nga mga tribo. O Ginoo, magpakig-away ikaw para sa ila, kag buligi sila batok sa ila mga kaaway.”^z

8 Nahanungod sa tribo ni Levi nagsiling sia: "O Ginoo, ikaw nagapahayag sang imo kabubot-on paagi sa kay Levi sila ang imo matutom nga mga tawo. Gintilawan mo sila didto sa Masa, kag napamatud-an sila nga masaligan sa tubig sang Meriba.

9 Nagpakita sila sing daku nga pag-unong sa imo, sang sa ila mga ginikanan, mga kautoran, ukon mga kabataan. Gintuman nila ang imo mga sugo, kag nanginmatutom sila sa imo kasugtanan.

10 Pagatudloan nila ang imo mga tawo sa pagtuman sang imo mga Kasugoan; magadulot sila sing mga halad sa imo altar.

11 O Ginoo, buligi ang ila tribo nga magbakod; kabay nga malipay ka sa ila ginahimo. Laglaga ang ila mga kaaway, agod indi na gid sila makabangon liwat.”

12 Nahanungod sa tribo ni Benjamin nagsiling sia: "Amo ini nga tribo nga ginapalangga sang Ginoo kag ginaapinan, tagsa ka adlaw nagapuyo sila sing malig-on sa iya atubangan.”

13 Nahanungod sang tribo ni Jose nagsiling sia: "Kabay nga bendisyunan sang Ginoo ang ila duta sing ulan, kag sang tubig gikan sa idalom sang duta.

14 Kabay bendisyunan niya ang ila duta sang mga prutas nga naluto sa puno, sa bugana sang labing maayo nga prutas sa tagsa ka panahon.

15 Kag kabay ang ila dumaan nga mga kabakuloran mapuno sang pinili nga prutas.

16 Kabay ang ila duta mapuno sang tanan nga butang nga maayo, ginbendisyunan paagi sa kaayo sang Ginoo, nga naghambal gikan sa nagadabdab nga kahuykahoy. Kabay nga ini nga mga bendisyon magaabot sa tribo ni Jose, kay sia amo ang pangulo sang iya mga kautoran.

17 Si Jose may kusog nga pareho sang baka, ang mga sungay sang toro nga baka nga simaron. Ang iya mga sungay amo ang linibo ni Manases, kag napulo ka libo ni Efraim. Paagi sini ginasungay niya ang mga kapungsoran kag ginadis-og sila tubtob sa utbong sang duta.”

18 Nahanungod sa tribo ni Zabulon kag ni Isacar nagsiling sia: "Kabay nga si Zabulon magmauswag sang ila negosyo sa dagat, kag ang manggad ni Isacar magdamo sa ila puloy-an.

19 Ginaagda nila ang mga kapungsoran sa ila bukid, kag didto nagadulot sila sang husto nga mga halad, kay nagakuha sila sang ila manggad sa dagat, kag gikan sa balas sa mga baybayon.”

20 Nahanungod sa tribo ni Gad nagsiling sia: "Dayawon ang Dios, nga nagpalapad sang ila kadutaan. Si Gad nagahukmong kaangay sang isa ka leon, sa pagkusnit sang butkon ukon alimpuduan sang ulo.

21 Ginkuha nila ang labing maayo sa duta para sa ila kaugalingon; ang bahin sang pangulo ginhatag sa ila. Gintuman nila ang mga sugo kag mga kasugoan sang Ginoo, sang magtipon sing tingob ang mga panguIo sang Israel.”

22 Nahanungod sa tribo ni Dan nagsiling sia: "Si Dan isa ka bataon nga leon, nga nagalumpat gikan sa Basan."

23 Nahanungod sa tribo ni Neftali nagsiling sia: "Si Neftali ginbendisyunan sing bugana sang kaayo sang Ginoo; ang ila duta nagalambot sa bagatnan halin sa linaw ang Galilea.”

24 Nahanungod kay Aser nagsiling sia: "Si Aser ginbendisyunan labaw pa sang sa iban nga mga tribo. Kabay nga sia amo ang pinalangga sang iya mga utod nga lalaki, kag kabay nga manginbugana ang mga kahoy nga olivo sa iya duta.

25 Kabay nga ang iya mga banwa maapinan sang mga puwerta nga salsalon, kag kabay nga magpuyo sia sa gihapon nga malig-on."

26 O mga tawo sang Israel, wala sing dios nga kaangay sang inyo Dios, nga nagasakay sing mahimayaon sa kalangitan, nga nagasakay sa mga panganod sa pagkari sa pagbulig sa imo.

27 Ang Dios sa gihapon amo ang inyo mangangapin, ang iya walay katapusan nga mga butkon nagaalay-ay sa inyo. Gintabog niya ang inyo mga kaaway samtang nagaabanse kamo, kag ginsugo kamo sa paglaglag sa ila tanan.

28 Gani ang mga kaliwat ni Jacob magapuyo sing malinong, nga wala sing katalagman sa duta nga bugana ang trigo kag bino, sa diin ang tun-og halin sa langit nagatulo sa duta.

29 O Israel, daw ano ka malipayon sa imo! Wala sing isa nga pareho sa imo, isa ka pungsod nga ginluwas sang Ginoo. Ang Ginoo amo gid ang imo taming kag imo espada, sa pag-apin kag sa pagpadaog sa imo. Ang imo mga kaaway magaampo kag magapangayo sing kaluoy, kag imo sila tasakon. 

^yAng isa ka dumaan nga pagbadbad ang iya mga tawo; sa Hebreo sang mga tawo.
^zO GINOO . . . mga kaaway; sa Hebreo Ang tribo sang Juda magapakig-away para sa iya kaugalingon, kag ang GINOO magabulig sini batok sa iya mga kaaway.

DEUTERONOMIO - Kapitulo 32 <<<   >>> DEUTERONOMIO - Kapitulo 34

DEUTERONOMIO - Kapitulo 32

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34

♤♤♤♤♤

1 "O Duta kag langit, pamatii ang akon mga pulong, pamatii sing maayo ang akon ginasiling.

2 Ang akon pagtulon-an magatupa kaangay sang mga tinulo sang ulan, kag magatulo sa duta kaangay sang tun-og. Ang akon mga pulong magatupa kaangay sang dabudabo sa mga bag-ong tubo nga mga tanom, kaangay sang talithi sa hilamon.

3 Dayawon ko ang ngalan sang Ginoo, kag ibantala ninyo ang iya kagamhanan.

4 "Ang GINOO amo ang inyo makusog nga mangangapin, himpit kag matarong sa tanan niya nga mga ginahimo. Ang inyo Dios masaligan kag maminatud-on, ang iya ginhimo matarong kag nagakaigo.

5 Pero indi kamo masaligan, indi takos nga mangin-iya mga tawo, isa ka makasasala kag malaut nga pungsod.

6 Amo bala ini ang inyo ibalos sa Ginoo, kamo nga mga buangboang kag wala sing paghangop nga mga tawo? Sia ang inyo Amay, ang inyo manunoga, ginhimo niya kamo nga isa ka pungsod.

7 "Dumdoma ang nagligad, ang mga panahon sang una, pamangkuta ang inyo amay kon ano ang nahanabo, pamangkuta ang mga tigulang kon ano ang nagligad.

8 Ang Labing Mataas naghatag sa mga kapungsoran sang ila mga duta. Ginpat-od niya kon diin ang mga katawuhan dapat magpuyo ginhatagan niya ang tagsa ka dios sang pungsod,

9 pero ginpili niya ang kaliwat ni Jacob para sa iya kaugaligon.

10 “Nakita niya sila nga nagdalangdalang sa desierto. Mamingaw, kigas nga desierto. Ginaapinan kag ginaatipan niya sila subong sang pag-apin niya sang iya mga mata.

11 Pareho sang agila nga nagatudlo sang iya buto sa paglupad,^w nga nagasalo sa ila sang ila nagahumlad nga mga pakpak, ang Ginoo nagatipig sa Israel nga indi madagdag.

12 Ang GINOO amo lamang ang nagatuytoy sa iya mga katawuhan nga wala ginabuligi sang iban nga dios.

13 "Ginapagahom niya sila sa mataas nga bukid sang duta, kag nagkaon sila sang nagtubo sa mga uma. Nakakita sila sang dugos sa dalagku nga mga bato; ang ila mga kahoy nga olivo nagtubo sing matambok sa batuhon nga duta.

14 Ang ila mga baka kag mga kanding naghatag sing madamo nga mga gatas; ila ang labing maayo nga mga karnero, mga kanding kag mga baka, ang labing maayo nga trigo, kag ang pinili nga bino.

15 "Nagmanggaranon ang katawuhan sang Ginoo kag nagmalalison; nagtambok sila kag nagbuy-onan. Ginbayaan nila ang Dios nga ila manunoga, kag ginsikway ang ila gamhanan nga manlulowas.

16 Ang ila pagsimba sa mga diosdios nagpaimon sa Ginoo, ang kalautan nga ila ginhimo nagpaakig sa iya.

17 Naghalad sila sa indi matuod nga mga dios, mga dios nga wala gid ginsimba sang Israel, mga dios nga wala gid ginakahadlukan sang ila mga ginikanan. 

18 Nalimtan nila ang ila Dios, ang ila gamhanan nga manlulowas, ang isa nga naghatag sa ila sing kabuhi.

19 “Sang makita ini sang GINOO, naakig sia, kag ginsikway niya ang iya mga anak nga lalaki kag babayi.

20 Nagsiling sia, ‘Indi ko na sila pagbuligan, dayon tan-awon ko kon ano ang maabutan nila, yadtong malimbungon kag indi masaligan nga mga tawo.

21 Ginpaakig nila ako sang ila mga diosdios, ginpaimon nila ako sang ila di-matuod nga mga dios. Gani, paakigon ko sila sa isa ka pungsod nga mga buangboang, paimunon ko sila sa isa ka pungsod nga walawala gid.

22 Ang akon kaakig magapadabdab kaangay sang kalayo, kag magasunog sang tagsa ka butang sa duta. Magalambot ini sa kadadalman sang duta,^x kag magaupos sang sadsaran sang mga kabukiran.

23 “ ‘Padalhan ko sila sing wala katapusan nga mga kalalat-an; kag gamiton ko ang tanan ko nga mga baslay batok sa ila.

24 Magakalamatay sila sa gutom kag sa mataas nga hilanat; mapatay sila sa grabe nga pamalatian. Padal-an ko sila sing mapintas nga mga sapat sa paghalit sa ila, kag dalitan nga mga man-og sa pagbuntog sa ila.

25 Madamo ang magakalamatay sa gira nga nagahuray-ad sa kalsada, madamo ang magakalamatay sa mga pamalay tungod sa kahadlok. Mga pamatan-on nga lalaki kag babayi magakalamatay, bisan mga lapsag kag mga tigulang indi makaluwas.

26 Kuntani laglagon ko sila sing bug-os, agod nga wala na sing may magdumdom sa ila.

27 Pero indi ako magtugot nga magpabugal ang ila mga kaaway nga ila ginlutos ang akon mga tawo, kag nga indi ako amo ang naglaglag sa ila.’

28 “Ang Israel isa ka pungsod nga wala sing paghangop kag wala sing kaalam.

29 Wala sila makahibalo kon ngaa nga nalutos sila, indi sila makahangop sang natabo.

30 Ngaa ang isa ka libo ginlutos sang isa, kag ang napulo ka libo ginlutos lamang sang duha? Ang Ginoo nga ila Dios nagbiya sa ila, ginpabay-an sila sang ila gamhanan nga Dios.

31 Ang ila mga kaaway nakahibalo nga ang ila kaugalingon nga mga dios maluya, indi gamhanan pareho sang Dios sang Israel.

32 Ang ila mga kaaway nga malaut subong sang Sodoma kag Gomorra, pareho sang mga ubas nga nagapamunga sing mapait kag makahililo nga ubas,

33 kaangay sang bino nga nahimo gikan sa laway sang dalitan nga mga man-og.

34 "Ang Ginoo nakahibalo sang ginhimo sang ila mga kaaway; nagahulat sia tubtob sa nagakaigo nga tion sa pagsilot sa ila.

35 Ang Ginoo magatimalos kag magasilot sa ila, magaabot ang tion nga mapukan sila, kag ang ila kalaglagan madali na lang.

36 Ang Ginoo magaluwas sa iya mga tawo, kon makita niya nga madulaan sila sing kusog. Kaluoyan niya ang mga nagaalagad sa iya, kon makita niya nga diutay na lang ang nabilin.

37 Dayon ang Ginoo magapamangkot sa iya mga tawo, ‘Diin ang gamhanan nga mga dios nga inyo ginasaligan?

38 Ginpakaon ninyo sila sang tambok sang inyo mga halad kag ginhatagan ninyo sila sang bino nga ilimnon. Karon pakaria sila kag pabuliga sa inyo. Padalidalia sila sa pagtabang sa inyo.

39 “ ‘Ako kag ako lamang amo ang Dios; wala sang iban nga dios nga matuod. Ako nagapatay kag nagahatag sang kabuhi, ako ang nagapilas kag nagaayo, kag wala sing isa nga makapamalabag sang akon ginahimo.

40 Subong nga ako amo ang buhi nga Dios, bayawon ko ang akon kamot, kag magasumpa

41 nga bairon ko ang akon nagaidlak nga espada, kag pat-uron ko nga magapangibabaw ang katarungan. Timalusan ko ang akon mga kaaway, kag silutan ang mga nagadumot sa akon.

42 Sa akon baslay magatulo ang ila mga dugo, kag ang akon espada magapamatay sang tanan nga nagasumpong sa akon. Indi ko pagkaluoyan ang mga nagapakig-away batok sa akon; bisan ang pilason kag mga binilanggo magakalamatay.'

43 "Mga kapungsoran, dapat ninyo dayawon ang mga tawo sang Ginoo ginasilutan niya ang nagapamatay sa ila; timalusan niya ang iya mga kaaway, kag panason niya ang mga kalautan sa duta sang iya mga tawo.”

44 Si Moises kag si Josue nga anak ni Nun naghambal sini nga mga kalantahon agod mabatian sang mga tawo sang Israel.

Ang Katapusan nga Laygay ni Moises

45 Sa tapos ni Moises mahatag ang mga pagtulon-an sang Dios sa mga tawo,

46 nagsiling sia, “Pat-ura gid ninyo ang pagtuman sini tanan nga mga sugo nga akon ginhatag sa inyo karon nga adlaw. Itudlo ini sa inyo mga kabataan, agod matuman nila sing maayo ang tanan nga mga pagtulon-an sang Dios.

47 Ini nga mga pagtulon-an mapuslanon gid. Amo ini ang inyo kabuhi. Tumana ninyo ini kag magakabuhi kamo sing malawig sa duta sa tabok sang Jordan nga madali na lang ninyo panag-iyahan."

48 Sa amo man nga adlaw ang Ginoo nagsiling kay Moises,

49 "Kadto ka sa kabukiran sang Abarim, sa duta sang Moab, sa atubang sang siyudad sang Jerico. Taklad ka sa bukid sang Nebo kag lantawa ang Canaan nga akon madali na lang ihatag sa mga tawo sang Israel.

50 Mapatay ikaw sa sina nga bukid subong nga ang imo utod nga si Aaron napatay sa bukid sang Hor,

51 kay kamo nga duha nagdi-matutom sa akon sa atubangan sang mga tawo sang Israel. Sang didto kamo, sa tubig sang Meriba, malapit sa banwa sang Cades sa desierto sang Zin, ginpakahuy-an ninyo ako sa atubangan sang mga tawo sang Israel.

52 Makita mo ang duta sa malayo, pero indi ka makasulod sa duta nga akon ihatag sa mga tawo sang Israel."

^wnga nagatudlo sang iya buto sa paglupad; ukon nagabantay sang iya buto.

^xKADADALMAN SANG DUTA: Ini napatungod sa kalibutan sang mga patay.

DEUTERONOMIO - Kapitulo 31 <<<   >>> DEUTERONOMIO - Kapitulo 33

DEUTERONOMIO - Kapitulo 31

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34

♤♤♤♤♤

Si Josue Nagbulos kay Moises

1 Si Moises nagpadayon sa paghambal sa mga tawo sang Israel,

2 kag nagsiling, "Karon 120 ka tuig na ang akon edad kag indi na ako makasarang sa pagpangulo sa inyo. Kag wala labot sini ang GINOO nagsiling sa akon nga indi ako, magtabok sa suba sang Jordan.

3 Ang Ginoo nga inyo Dios amo gid ang magauna sa inyo kag magalaglag sa sini nga mga kapungsoran, agod inyo mapanag-iyahan ang ila duta, kag si Josue mangin-inyo pangulo suno sa ginsiling sang Ginoo.

4 Ang Ginoo magalaglag sini nga mga tawo, subong sang iya paglutos kay Sihon kag kay Og, mga hari sang mga Amornon, kag ginlaglag ang ila pungsod.

5 Ang Ginoo magapadaog sa inyo batok sa ila, kag dapat ninyo himuon sa ila suno gid sa akon ginsiling sa inyo.

6 Magpakabakod kamo kag magpakaisog. Indi kamo magkahadlok sa sini nga mga tawo. Ang inyo Dios, ang GINOO gid, magaupod sa inyo. Indi niya kamo pagbayaan ukon pagpatumbayaan.”

7 Dayon ginatawag ni Moises si Josue kag ginsingganan sa atubangan sang tanan nga mga tawo sang Israel, "Magpakabakod kag magpakaisog ka. Ikaw amo ang magapangulo sini nga mga tawo sa pagpanag-iya sang duta nga ginsaad sang Ginoo sa ila mga katigulangan.

8 Ang GINOO mismo amo ang magauna kag magaupod sa imo. Indi niya ikaw pagbayaan ukon pagpatumbayaan, gani indi ka magpakaluya ukon magkahadlok.”

Ang Kasugoan nga Pagabasahon sa Tagsa ka Pito ka Tuig

9 Gani ginsulat ni Moises ang Kasugoan sang Dios kag ginhatag ini sa mga pari nga Levita nga gintugyanan sang Kaban sang Kasugtanan sang Ginoo kag sa mga pangulo sang Israel.

10 Ginmanduan niya sila "Sa katapusan sang tagsa ka pito ka tuig, kon mag-abot ang Tuig sang Paghilway, basaha ini sing mabaskog sa Piesta sang mga Tolda.

11 Basaha ini sa mga tawo sang Israel kon magtipon sila sa pagsimba sa Ginoo nga inyo Dios sa isa ka duog nga ginasimbahan.

12 Tipuna ang tanan nga mga lalaki, mga babayi, kag mga kabataan, kag ang mga dumoluong nga nagapuyo sa inyo mga banwa, agod ang tagsatagsa makabati sini kag magtahod sa Ginoo nga inyo Dios kag magtuman sing matutom sang iya mga pagtudlo.

13 Paagi sa sini, ang inyo mga kaliwat nga wala makabati sang kasugoan sang Ginoo nga inyo Dios makabati sini. Kag gani makatuon sila sa pagtahod sa iya tubtob nagakabuhi sila sa duta nga madali na lang ninyo panag-iyahan sa tabok sang Jordan."

Ang Katapusan nga Laygay sang GINOO kay Moises

14 Dayon ang Ginoo nagsiling kay Moises, “Indi na maglawig ang imo kabuhi. Tawga si Josue kag dalha sia sa Tolda sang Kasugtanan, agod tudloan ko sia sang iya pagahimuon.” Si Moises kag si Josue nagkadto sa Tolda,

15 kag didto ang Ginoo nagpahayag sa ila paagi sa isa ka haligi nga panganod nga nagtindog sa puwertahan sang Tolda.

16 Ang Ginoo nagsiling kay Moises, "Sa indi madugay mapatay ka, kag sa tapos ikaw mapatay ang mga tawo magadi-matutom sa akon kag magalapas sang kasugtanan nga akon ginhimo upod sa ila. Magabiya sila sa akon kag magasimba sa iban nga mga dios sang duta nga madali na lang nila pagasudlon.

17 Kon mahanabo ini, magakaakig ako sa ila. Patumbayaan ko sila kag malaglag sila. Ang madamo nga makahalalit nga kalalat-an magaabot sa ila kag dayon ila makilala nga ini nga mga butang nahanabo sa ila tungod kay ako, nga ila Dios wala na nagaupod sa ila.

18 Kag dayon indi ko sila pagbuligan kay naghimo sila sing malaut kag nagsimba sa iban nga mga dios.

19 Karon, isulat ini nga kalantahon. Itudlo ini sa mga tawo sang Israel, agod manginsaksi ko ini batok sa ila.

20 Dalhon ko sila sa sining maayo kag mapatubason nga duta, suno sa akon ginsaad sa ila mga katigulangan. Didto may bugana sila nga kalan-on, kag magakabuhi sila sing mainuswagon. Pero magabiya sila sa akon kag magasimba sa iban nga mga Dios. Sikwayon nila ako kag magalapas sang akon kasugtanan,

21 kag magaabot sa ila ang madamo nga makahalalit nga mga kalalat-an. Dayon ini nga ambahanon manginsaksi ko batok sa ila didto, kay ini pagaambahon sang ila mga kaliwat. Bisan gani subong, nga wala ko pa gani sila madala sa duta nga akon ginsaad sa ila, nahibal-an ko ang ila mga hunahona."

22 Sa sadto gid nga adlaw ginsulat ni Moises ang kalantahon kag gintudlo ini sa mga tawo sang Israel.

23 Dayon ang Ginoo nagsiling kay Josue nga anak ni Nun, "Magpakabakod ka kag magpakaisog. Pagapangulohan mo ang mga tawo sang Israel sa duta nga akon ginsaad sa ila, kag ako magaupod sa imo.”

24 Ginsulat ni Moises ang kasugoan sang Dios sa isa ka libro. Wala gid sia sing may nalipatan.

25 Sang matapos niya ini, ginsingganan niya ang mga pari nga Levita nga gintugyanan sang Kaban sang Kasugtanan sang Ginoo,

26 "Dalha ini nga libro sang Kasugoan sang Dios kag ibutang ini sa luyo sang Kaban sang Kasugtanan sang Ginoo nga inyo Dios, agod magapabilin ini didto subong nga saksi batok sa iya mga tawo.

27 Nahibal-an ko kon daw ano katig-a sang ila ulo kag ka mabinatuon sa ila. Kon nagmabinatuon sila sa Ginoo samtang buhi pa ako, daw ano pa gid kon patay na ako.

28 Tipuna sa atubangan ko ang tanan nga mga pangulo kag mga opisyales sang inyo tribo, agod hambalan ko sila sini nga mga butang. Manginsaksi ko ang langit kag ang duta batok sa ila.

29 Nahibal-an ko nga sa tapos ako mapatay kamo nga mga tawo manginmalaut kag magasikway sang akon gintudlo sa inyo. Kag sa ulihi magaabot sa inyo ang mga kalalat-an, kay ginpaakig ninyo ang GINOO paagi sa paghimo sang mga butang nga iya ginadumilian."

Ang Ambahanon ni Moises

30 Dayon ginhambal ni Moises ang mga pulong sang bug-os nga ambahanon samtang ang mga tawo sang Israel nagapamati.

DEUTERONOMIO - Kapitulo 30 <<<   >>> DEUTERONOMIO - Kapitulo 32

DEUTERONOMIO - Kapitulo 30

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34

♤♤♤♤♤

Mga Dapat Himuon agod Pakamaayuhon kag Pauswagon

1 “Karon ginapapili ko kamo sa pagpakamaayo ukon pagpakamalaut. Kon ini tanan nga mga butang mahanabo sa inyo, kag magapuyo kamo sa tunga sang mga kapungsoran sa diin ang Ginoo nga inyo Dios nagpaaplaag sa inyo, madumdoman ninyo ang akon ginsiling.

2 Kon kamo kag ang inyo mga kaliwat magabalikid sa Ginoo, kag sa bug-os ninyo nga tagipusoon kag kalag magatuman kamo sang iya mga sugo nga akon ginahatag sa inyo karon nga adlaw,

3 dayon ang Ginoo nga inyo Dios magakaluoy sa inyo. Dalhon niya kamo pabalik gikan sa mga kapungsoran sa diin ginpaaplaag niya kamo, kag iya kamo pauswagon liwat.

4 Bisan ginpaaplaag niya kamo sa bug-os nga kalibutan, ang GINOO nga inyo Dios magapabalik sa inyo,

5 sa pagpanag-iya sang duta sa diin ang inyo anay mga katigulangan nagpuyo. Kag pauswagon pa gid niya kamo kag padamuon subong sang sa inyo anay mga katigulangan.

6 Ang Ginoo nga inyo Dios magahatag sa inyo kag sa inyo mga kaliwat sing tagipusoon nga matinumanon, agod higugmaon ninyo sia sa bug-os ninyo nga tagipusoon kag kalag, kag magapadayon kamo sa pagpuyo sa sina nga duta.

7 Iya ihatag ini nga mga pagpakamalaut sa inyo mga kaaway nga nagdumot kag nagpigos sa inyo,

8 kag magatuman kamo liwat kag magabantay sang tanan niya nga mga sugo nga akon ginahatag sa inyo karon nga adlaw.

9 Ang GINOO magapauswag sa inyo sa tanan ninyo nga pagahimuon. Magadamo ang inyo mga kaanakan kag mga kahayupan, kag magadamo ang patubas sang inyo uma. Magakalipay sia sa pagpauswag sa inyo subong sang iya pagpauswag sa inyo mga katigulangan,

10 pero kinahanglan tumanon ninyo sia kag bantayan ang tanan niya nga mga sugo nga nasulat sa sini nga libro sang iya mga pagtulon-an. Kinahanglan magbalik kamo sa iya sa bug-os ninyo nga tagipusoon kag kalag.

11 "Ang sugo nga akon ginahatag sa inyo karon nga adlaw indi tama kabudlay, ukon indi ninyo masarangan.

12 Indi ini mataas pareho sang langit. Indi na kinahanglan nga magpamangkot kamo kon sin-o ang magsaka sa langit kag magkuha sini kag dalhon sa inyo, agod mabatian ninyo ini kag tumanon.

13 Ukon yadto ini sa tabok sang dagat. Indi na kinahanglan nga magpamangkot kamo kon sin-o ang magatabok sa dagat kag dalhon ini sa inyo agod inyo mabatian kag tumanon.

14 Yari ini sa inyo. Nahibaluan ninyo ini kag inyo ini nasaulo. Karon tumana ninyo ini.

15 “Karon nga adlaw ginapapili ko kamo sa kauswagan kag kabuhi ukon kalaglagan kag kamatayon.

16 Kon tumanon ninyo ang mga sugo sang GINOO nga inyo Dios,^v nga akon ginahatag sa inyo karon nga adlaw, kon ginahigugma ninyo sia, tumana ninyo sia, kag bantayi ang tanan niya nga mga kasugoan, dayon magauswag kamo kag mangin-isa ka pungsod nga may madamo nga mga tawo. Ang GINOO nga inyo Dios magabendisyon sa inyo sa duta nga madali na lang ninyo panag-iyahan.

17 Pero kon indi kamo magtuman kag indi magpamati, kag magsimba sa iban nga mga dios,

18 karon nga daan ginapaandaman ko nga malaglag kamo. Indi kamo magpuyo sing madugay sa sina nga duta sa tabok sang Jordan nga madali na lang ninyo panag-iyahan.

19 Ginapapili ko kamo karon sa kabuhi ukon kamatayon, sa pagpakamaayo ukon pagpakamalaut sang Dios, kag saksi ko ang langit kag duta sa inyo pagapilion. Pilia ang kabuhi.

20 Higugmaa ang GINOO nga inyo Dios, tumana sia kag magmatutom kamo sa iya, agod nga kamo kag ang inyo mga kaliwat magakabuhi sing malawig sa duta nga iya ginsaad nga ihatag sa inyo mga katigulangan nga amo sanday Abraham, Isaac kag Jacob.”

^vSa isa ka dumaan nga pagbadbad kon tumanon ninyo ang mga sugo sang GINOO nga inyo Dios; ang Hebreo wala nagalakip sini nga mga pulong.

DEUTERONOMIO - Kapitulo 29 <<<   >>> DEUTERONOMIO - Kapitulo 31

DEUTERONOMIO - Kapitulo 29

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34

♤♤♤♤♤

Ang Kasugtanan sang GINOO sa Israel sa Duta sang Moab

1 Amo ini ang nasulat sa kasugtanan nga ginsugo sang Ginoo sa kay Moises nga himuon upod sa mga tawo sang Israel sa duta sang Moab. Wala labot ini sa kasugtanan nga ginhimo sang Ginoo sa ila sa bukid sang Sinai.

2 Ginpatawag ni Moises sing tingob ang tanan nga mga tawo sang Israel kag ginsingganan sila, “Kamo gid nakakita sang ginhimo sang Ginoo sa hari sang Egipto, sa iya mga opisyales, kag sa iya bug-os nga pungsod.

3 Nakita ninyo ang makakulogmat nga mga kalalat-an, ang mga milagro, kag ang dalagku nga mga katingalahan nga ginhimo sang GINOO.

4 Pero tubtob karon nga adlaw wala kamo ginpahangop sang Ginoo sang inyo mga inagihan.

5 Sa sulod sang 40 ka tuig nga pagtuytoy sa inyo sang Ginoo sa desierto, ang inyo mga bayu kag mga sandalyas wala magdaan.

6 Wala kamo sing tinapay nga kalan-on, ukon wala kamo sing daan ukon bag-o nga bino nga ilimnon, pero ang Ginoo naghatag sang inyo mga kinahanglanon sa pagtudlo sa inyo nga sia amo ang inyo Dios.

7 Kag sang pag-abot naton sa sini nga duog, si Haring Sihon sang Hesbon kag si Haring Og sang Basan naggwa sa pagpakig-away sa aton. Pero ginlutos naton sila,

8 gin-agaw ang ila duta, kag ginpartida naton ini sa mga tribo ni Reuben, ni Gad, kag sa katunga nga tribo ni Manases.

9 Tumana sing maayo ang nasulat sa sini nga kasugtanan, agod manginmadinalag-on kamo sa tanan ninyo nga pagahimuon.

10 "Karon nga adlaw nagatindog kamo sa atubangan sang Ginoo nga inyo Dios, tanan kamo—ang inyo mga pangulo kag mga opisyales, ang inyo mga lalaki,

11 mga babayi, kag mga kabataan, kag ang mga dumoluong nga nagapuyo upod sa inyo nga nagapangahoy kag nagaagwada para sa inyo.

12 Yari kamo karon nga adlaw sa pagpakigbahin sa kasugtanan nga ginahimo sang Ginoo nga inyo Dios upod sa inyo kag sa pagbaton sang mga tulomanon sini,

13 agod nga ang Ginoo magahimo sa inyo nga iya mga tawo kag sia mangin-inyo Dios, suno sa iya ginsaad sa inyo kag sa inyo mga katigulangan nga amo sanday Abraham, Isaac kag Jacob.

14 Indi lamang kamo ang ginahimuan sang Ginoo sini nga kasugtanan kag lakip ang iya mga tulomanon.

15 Ginahimo niya ini upod sa aton tanan nga nagatindog diri sa iya atubangan karon nga adlaw, kag subong man sa aton mga kaliwat nga wala pa matawo.

16 "Nadumdoman ninyo kon ano ang aton pangabuhi didto sa Egipto, kag kon daw ano ang magpanglakaton sa kadutaan sang iban nga mga kapungsoran.

17 Nakita ninyo ang ila mga makangilil-ad nga mga diosdios nga nahimo sa kahoy, bato, pilak kag bulawan.

18 Pat-ura ninyo nga wala sing lalaki, babayi, panimalay, ukon tribo nga yari diri karon nga adlaw nga magbiya sa Ginoo nga aton Dios kag magsimba sa mga dios sang iban nga mga kapungsoran. Manginkaangay ini sa isa ka gamot nga magatubo kag manginmapait kag makahililo nga tanom.

19 Pat-ura ninyo nga wala sang isa nga yari diri karon nga adlaw nga nagapamati sining paandam, kag magasiling sa iya kaugalingon nga indi man sia maano bisan magpadayon sia sa iya pagkabatinggilan kag himuon niya ang iya luyag. Ini magalaglag sa inyo tanan, ang maayo kag ang malain.

20 Ang GINOO indi magpatawad sini nga sahi sang tawo. Sa baylo, ang nagabalingaso nga kaakig sang Ginoo magadabdab batok sa iya, kag ang mga kalalat-an nga nasulat sa sini nga libro matupa sa iya, tubtob nga malaglag sia sang Ginoo sa ibabaw sang duta.

21 Ang Ginoo magahimo sa iya nga talandaan sa atubangan sang tanan nga mga tribo sang Israel, kag magadala sing kalaglagan sa iya suno sa tanan nga mga pagpakamalaut sini nga kasugtanan nga nasulat sa sini nga libro sang pagtulon-an sang Ginoo.

22 "Sa ulihi ang mga kaliwatan sang inyo mga kaliwat kag ang mga dumoluong halin sa malayo nga mga kadutaan makakita sang mga kalaglagan kag mga pag-antos nga gindala sang Ginoo sa inyo duta.

23 Ang mga kaumhan mangin-isa ka desierto, natabunan sing asupre kag asin, wala sing tanom nga mabuhi sa sini kag bisan ang mga hilamon indi magtubo. Ang inyo duta manginkaangay sang mga banwa sang Sodoma kag Gomorra, sang Adma kag Zeboim, nga ginlaglag sang Ginoo sa iya nagabalingaso nga kaakig.

24 Dayon ang bug-os nga kalibutan magapamangkot, 'Ngaa ginhimo ini sang Ginoo sa ila duta? Ano ang kabangdanan sang iya nagabalingaso nga kaakig?'

25 Ang sabat amo ini, 'Tungod kay ginlapas sang mga tawo sang Ginoo ang kasugtanan nga ginhimo nila upod sa iya, ang Dios sang ila mga katigulangan, sang pagpagwa niya sa ila gikan sa Egipto.

26 Nag-alagad sila sa iban nga mga dios nga wala gid nila ginsimba sang una, ang mga dios nga gindumilian sang GINOO sa ila sa pagsimba.

27 Gani ang GINOO naakig sa iya mga tawo kag nagdala sa ila sang tanan nga mga kalalat-an nga nasulat sa sini nga libro.

28 Ang Ginoo nagbalingaso sa kaakig, kag sa iya daku nga kaakig ginpahalin niya sila sa ila duta kag gintabog sila pakadto sa duta sang mga dumoluong, kag yadto sila didto tubtob karon.'

29 "May mga sekrito nga wala ginpahayag sang Ginoo nga aton Dios. Pero ginpahayag niya ang iya Kasugoan, kag kita kag ang aton mga kaliwat dapat magtuman sini sa walay katapusan.

DEUTERONOMIO - Kapitulo 28 <<<   >>> DEUTERONOMIO - Kapitulo 30

DEUTERONOMIO - Kapitulo 28

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34

♤♤♤♤♤

Ang mga Kaayuhan sang Pagtuman

(Lev. 26:3-13; Deut. 7:12-24)

1 “Kon tumanon mo ang Ginoo nga imo Dios kag bantayan sing matutom ang tanan niya nga mga sugo nga akon ginahatag sa imo karon nga adlaw, himuon niya ikaw nga gamhanan sang sa iban nga pungsod sa duta.

2 Tumana ang Ginoo nga imo Dios kag ini tanan nga mga kaayuhan mangin-imo:

3 "Ang Ginoo magapauswag sang imo mga banwa kag mga uma.

4 "Ang Ginoo magahatag sa imo sang madamo nga mga kabataan, madamo nga mga patubas kag madamo nga mga kabakahan kag mga karnero.

5 "Ang Ginoo magahatag sa imo sang maayo nga mga patubas nga trigo kag sang mga kalan-on nga ginaaman mo gikan sa sini.

6 "Ang Ginoo magapauswag sang bisan ano nga imo himuon.

7 “Ang Ginoo magalutos sang imo mga kaaway kon sila magasalakay sa imo. Magatingob sila sa pagsalakay sa imo, pero magapalagyo sila nga nagalinapta.

8 "Ang Ginoo nga imo Dios magapauswag sang imo palangitan-an kag magapuno sang imo tambubo sang trigo. Bendisyunan niya ikaw sa duta nga iya ginahatag sa imo.

9 "Kon tumanon mo ang Ginoo nga imo Dios kag maghimo sang tanan nga iya ginasugo, himuon niya ikaw nga iya kaugalingon nga mga tawo suno sa iya ginsaad.

10 Dayon ang tanan nga mga katawuhan sa duta makahibalo nga ang GINOO nagpili sa imo nga mangin-iya kaugalingon nga tawo, kag magakahadlok sila sa imo.

11 Ang Ginoo magahatag sa imo sing madamo nga mga kabataan, madamo nga mga baka, kag bugana nga mga patubas sa duta nga ginsaad niya sa imo mga katigulangan nga ihatag niya sa imo.

12 Magapadala sia sing ulan sa nagakaigo nga tion gikan sa talaguan sang iya madamo nga mga manggad sa langit kag pauswagon ang tanan mo nga hilikuton, agod magapahulam ka sa madamo nga mga kapungsoran pero indi ka magpanghulam sa ila.

13 Ang Ginoo nga imo Dios magahimo sa imo nga pangulo sa tunga sang mga kapungsoran kag indi nga sumolunod lang. Magauswag ka sa gihapon kag indi ka mapaslawan kon tumanon mo sing matutom ang tanan niya nga mga sugo nga ginahatag ko sa imo karon nga adlaw.

14 Pero indi mo paglapason ini, ukon magsimba kag mag-alagad sa iban nga mga dios.

Ang mga Katalagman sang Pagdi-matinumanon

(Lev. 26:14-46)

15 "Pero kon indi ka magtuman sa GINOO nga imo Dios kag indi ka magbantay sing matutom sang tanan niya nga mga sugo kag mga kasugoan nga akon ginahatag sa imo karon nga adlaw, ini tanan nga mga kalainan mahanabo sa imo:

16 "Ang Ginoo magapakamalaut sang imo mga banwa kag mga uma.

17 “Ang Ginoo magapakamalaut sang imo mga patubas nga trigo kag sang mga kalan-on nga ginaaman mo gikan sa sini.

18 "Ang Ginoo magapakamalaut sa imo paagi sa paghatag sa imo sang pila lamang ka bilog nga mga kabataan, pigaw nga patubas, kag pila lamang ka bilog nga mga baka kag mga karnero.

19 "Ang Ginoo magapakamalaut sang tanan nga imo ginahimo.

20 "Kon maghimo ka sing malaut kag magsikway sa Ginoo, sia magapadala sa imo sang kalaglagan, pagkalisang, kag kagamo sa tanan nga imo ginahimo, tubtob malaglag ka sing gilayon.

21 Magapadala sia sa imo sang nagadinasundason nga balatian tubtob nga wala sing isa nga mabilin sa imo sa duta nga madali na lang nimo panag-iyahan.

22 Ang Ginoo magapadala sa imo sang makalalaton nga balatian, palanghubag kag hilanat. Magapadala sia sang malawig nga tingadlaw, panglaya sang mga tanom kag mainit nga dapya sang hangin sa pagpiyerde sang imo mga tanom. Ini nga mga halit magaabot sa imo tubtob magkalamatay ka.

23 Wala sing ulan nga magatupa, kag ang imo duta magatig-a subong sang salsalon.

24 Sa baylo sang ulan ang GINOO magapadala sa imo sang bagyo nga yab-ok kag balas tubtob malaglag ka.

25 "Ipalutos ka sang Ginoo sa imo mga kaaway. Magatingob ka sa pagsalakay sa ila pero magapalagyo ka nga nagalinapta, kag ang tanan nga mga katawuhan sang duta pagakugmaton kon makita nila ang nahanabo sa imo.

26 Kon magkalamatay ka, ang mga pispis kag mga sapat nga talunon magakari sa pagkaon sang imo mga bangkay kag wala sing bisan isa nga magapahadlok sa ila.

27 Ang Ginoo magapadala sing mga hubag sa imo subong sang iya ginhimo sa mga Egiptohanon. Patuboan niya sing mga hubag ang imo bug-os nga lawas. Magaarikison ka kag magapangalot pero wala sing bulong sini.

28 Ang Ginoo magapabuang sa imo, magabulag kag magapalisang sa imo.

29 Magapangapkap ka bisan masanag ang adlaw subong sang bulag, kag indi ka makatultol sang imo alagyan. Indi ka magmadinalag-on sa imo pagahimuon. Pagapiguson ka kag pagakawatan pirme, kag wala sing isa nga magabulig sa imo.

30 "May inugpakasal ka nga nobya pero ang iban magalugos sa iya. Magapatindog ka sing balay pero indi ka makapuyo sini. Magatanom ka sing mga ubas pero indi ka makakaon sang iya bunga.

31 Ang imo baka pagaihawon sa imo atubangan pero indi ka makatilaw sang iya karne. Ang imo mga asno pagaguyoron palayo samtang nagatan-aw ka kag indi ini pag-ibalik sa imo. Ang imo mga karnero, ihatag sa imo mga kaaway pero wala bisan isa nga magabulig sa imo.

32 Ang imo mga anak nga lalaki kag babayi ihatag sa mga dumoluong samtang nagatan-aw ka. Adlaw-adlaw ang imo mata kapuyon sa paglantaw sang pagbalik sang imo mga kabataan pero magapalangluya ka.

33 Ang isa ka dumoluong nga pungsod magakuha sang tanan nga mga patubas nga imo ginpangabudlayan sing tudo, samtang wala ka sing batunon kundi ang padayon nga pagpigos kag pagpintas.

34 Magasalimuang ka tungod sang imo mga pag-antos.

35 Ang Ginoo magapatubo sang mga katol nga indi mag-ayo sa imo mga batiis, kag mga hubag halin sa imo ulo tubtob sa tiil.

36 "Ang Ginoo nagadala sa imo kag sa imo hari didto sa iban nga pungsod, sa diin wala gid ikaw kag ang imo mga katigulangan makapuyo. Didto magaalagad ka sa mga diosdios nga nahimo sa kahoy kag bato.

37 Sa mga pungsod sa diin ang Ginoo nagpaaplaag sa inyo, ang mga tawo magakatingala sa matabo sa inyo. Magauligyat kag magahikay sila sa inyo.

38 "Magasab-og kamo sang madamo nga mga binhi, pero diutay lang ang inyo anihon. Kay ang mga apan magakaon sang inyo tanom.

39 Magatanom kamo sing mga ubas kag magaatipan sini, pero indi kamo makapamupo sang iya bunga ukon makainom sang bino gikan sini kay ang mga ulod magakaon sing balagon sang ubas.

40 Ang mga kahoy sang olivo magatubo bisan diin lang sa imo duta, pero wala ka sing lana nga makuha kay ang iya mga bunga magakapulak.

41 Magapamata ka sing mga anak nga lalaki kag babayi, pero pagakuhaon sila sa imo, kay sila pagabihagon sa inaway.

42 Ang tanan mo nga mga kahoy kag mga tanom pagakaunon sang mga sapatsapat.

43 "Ang mga dumoluong nga nagapuyo sa imo duta magaamat-amat gamhanan, samtang ikaw nagaamat-amat paubos.

44 Sila may kuwarta nga ipahulam sa imo, pero wala ikaw sang ipahulam sa ila. Sila magagahom sa imo.

45 "Ini tanan nga mga kalainan magaabot sa imo. Magapabilin ini sa imo tubtob nga malaglag ka, kay wala mo pagtumana ang Ginoo nga imo Dios kag wala mo pagbantayi ang tanan nga mga kasugoan nga ginhatag niya sa imo.

46 Ini mangintanda sang silot sang Dios sa imo kag sa imo mga kaliwatan sa wala sing katapusan.

47 Ang Ginoo nagpauswag sa imo sa tanan nga butang, pero indi ka mag-alagad sa iya nga may kalipay kag kasadya sa tagipusoon.

48 Gani, magaalagad ka sa mga kaaway nga ipadala sang Ginoo batok sa imo. Pagagutomon ka kag pagauhawon. Magaubauba ka kag mawad-an sang imo mga kinahanglanon. Ang imo mga kaaway^t magapigos sa imo sing tama tubtob malaglag ka.

49 Ang GINOO magapadala batok sa imo sang isa ka pungsod gikan sa malayo, isa ka pungsod nga ang ila hambal indi mo mahangpan. Magasalakay sila sa imo kaangay sang isa ka agila nga nagasulip.

50 Magapamintas sila kag indi magkaluoy sa kay bisan sin-o, pamatan-on ukon tigulang.

51 Pagakaunon nila ang imo mga baka kag imo mga patubas, kag mapatay ka sa gutom. Indi ka nila pagbilinan sing trigo, bino, lana sang olivo, mga baka ukon mga karnero kag mapatay ka.

52 Salakayon nila ang tagsa ka banwa sa duta nga ginahatag sa imo sang Ginoo nga imo Dios, kag ang mataas, mabakod nga mga pader nga imo ginasaligan magakalatumba.

53 "Kon ang imo mga kaaway magakibon sa imo mga banwa, magasalasala ikaw sa pagpangita sang pagkaon sa bagay nga pagakaunon mo ang mga kabataan nga ginhatag sang Ginoo nga imo Dios sa imo.

54-55 Bisan ang may tinun-an kag dungganon nga tawo magasalasala kon ang kaaway magkibon sang iya banwa, sa bagay nga iya pagakaunon ang isa sang iya mga kabataan tungod kay wala sia sing pagakaunon. Indi sia magpanghatag sa iya utod ukon sa asawa nga iya ginahigugma, ukon bisan sa isa sang iya mga kabataan nga nabilin.

56 Bisan ang may tinun-an kag dungganon nga babayi nga tama ka manggaranon nga indi na sia kinahanglan maglakat bisan diin, magahimo sing amo man. Indi sia magpanghatag sa iya pinalangga nga bana, ukon sa bisan isa sang iya mga kabataan,

57 sang bata nga bag-o lang niya ginbun-ag, ukon sang mga inunlan. Kon ang kaaway magkibon sa iya banwa, magasalasala sia sa pagpangita sang pagkaon sa bagay nga kaunon niya sang tago lang ang iya bag-o lang nabun-ag nga bata kag ang iya inunlan.

58 "Tumana sing maayo ang tanan nga mga ginatudlo sang Dios nga nasulat sa sini nga libro, kag tahura ang mahimayaon kag makahaladlok nga ngalan sang Ginoo nga imo Dios.

59 Kon indi, magapadala sia sa imo kag sa imo mga kaliwat sing mga masakit nga indi mag-ayo, kag makahaladlok nga mga pamalatian nga indi mag-untat.

60 Magapadala sia sa imo sing makahaladlok nga mga balatian nga imo natilawan sa Egipto, kag indi ikaw mag-ayo.

61 Magapadala man sia sang tanan nga sahi sang mga masakit kag mga pamalatian nga wala masambit sa sini nga libro sang Dios nahanungod sa mga kasugoan kag mga pagsulondan, tubtob nga malaglag ka.

62 Bisan nga nagdamo kamo subong sang mga kabituonan sa langit, pila lamang ang mabilin sa inyo nga buhi, kay wala kamo magtuman sa GINOO nga inyo Dios.

63 Subong nga ang Ginoo nagkalipay sa pagpauswag kag pagpadamo sa inyo, nagakalipay man sia sa pagpapas kag sa paglaglag sa inyo. Pahalinon kamo sa duta nga inyo madali na lang pagapanag-iyahan.

64 "Ang Ginoo magapaaplaag sa imo sa tanan nga mga kapungsoran sa bug-os nga kalibutan, kag didto magaalagad ka sa mga dios nga nahimo sa kahoy kag bato, mga dios nga wala mo ginsimba kag sang imo mga katigulangan.

65 Indi ka makaagom sing kalinong bisan diin kag wala sing duog nga matawag mo nga imo kaugalingon. Ang Ginoo magatublag sang imo hunahona, madulaan ka sing paglaom, kag kalisdanan.

66 Ang imo kabuhi mangin-yara pirme sa katalagman. Sa adlaw kag gab-i mapun-an ka sing kakugmat, kag pirme ka lang kulbaan nga mapatay.

67 Magakubakoba ang imo dughan sa kahadlok sa tanan nga butang nga imo makita. Sa tagsa ka aga magahandom ka nga maggab-i na. Sa tagsa ka gab-i magahandom ka nga mag-aga na.

68 Ang Ginoo magapabalik sa imo sa Egipto sakay sa sakayan nga nakargahan sang mga ulipon, bisan nagsaad sia^u nga indi na gid ikaw magbalik didto. Didto ibaligya mo ang imo kaugalingon sa imo mga kaaway subong mga ulipon, pero wala sing isa nga maluyag sa imo.”

^tAng imo mga kaaway; ukon Ang GINOO.

^usia; ukon ako.

DEUTERONOMIO - Kapitulo 27 <<<   >>> DEUTERONOMIO - Kapitulo 29

DEUTERONOMIO - Kapitulo 27

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34

♤♤♤♤♤

Ang mga Kasugoan sang Dios nga Nasulat sa mga Bato

1 Dayon si Moises upod sa mga pangulo sang Israel nagsiling sa mga tawo, "Tumana ninyo ang mga sugo nga akon ginahatag sa inyo karon nga adlaw.

2 Sa adlaw nga magtabok kamo sa suba sang Jordan kag magsulod sa duta nga ginahatag sa inyo sang Ginoo nga inyo Dios, magtumpok kamo sang dalagku nga mga bato, hapulasa ini sang apog,

3 kag isulat ang tanan nga mga kasugoan kag mga pagtudlo sa sini nga mga bato. Kon makasulod na kamo sa maayo kag mapatubason nga duta nga ginsaad sa inyo sang Ginoo, ang Dios sang inyo mga katigulangan,

4 kag didto na kamo sa tabok sang Jordan, ipahamtang ini nga mga bato sa bukid sang Ebal, suno sa akon ginasugo sa inyo karon nga adlaw, kag hapulasa ini sing apog.

5 Magpatindog kamo sing altar didto nga nahimo sa mga bato nga wala ninyo paggamiti sang gamit nga salsalon,

6 kay ang altar nga ginpatindog ninyo para sa GINOO nga inyo Dios kinahanglan nga nahimo sa mga bato nga wala mabasbasi. Didto idulot ninyo ang mga halad nga pagasunogon,

7 kag didto ihalad kag kaunon ninyo ang halad sa paghiambit kag magkalipay kamo sa atubangan sang Ginoo nga inyo Dios.

8 Sa mga bato nga nahapulas sang mga apog isulat sing maathag ang tagsa ka pulong sang kasugoan sang Dios.”

9 Dayon si Moises upod sa mga pari nga Levita nagsiling sa tanan nga mga tawo sang Israel, "Mga tawo sang Israel pamati kamo sa akon. Karon nga adlaw nangin-iya kamo mga tawo sang Ginoo nga inyo Dios.

10 Gani tumana ninyo sia kag bantayi ang tanan niya nga mga kasugoan nga ginahatag ko sa inyo karon nga adlaw.”

Ang mga Pagpakamalaut sa Di-pagtuman

11 Dayon ginsingganan ni Moises ang mga tawo sang Israel,

12 "Sa tapos kamo makatabok sa Jordan, ini nga mga tribo magatindog sa bukid sang Gerizim kon ang mga tawo ginabendisyunan: si Simeon, Levi, Juda, Isacar, Jose, kag Benjamin.

13 Kag ini nga mga tribo magatindog sa bukid sang Ebal kon ang mga tawo ginapakamalaut: Ruben, Gad, Aser, Zabulon, Dan, kag Neftali.

14 Ang mga Levita magahambal sini nga mga pulong sa mabaskog nga tingog:

15 “‘Pakamalauton sang Dios ang bisan sin-o nga nagahimo sang diosdios nga bato ukon metal kag nagasimba sini sing tago Iang. Ang Ginoo nagakaakig sa nagasimba sa diosdios.' "Dayon ang tanan nga mga tawo magasiling, 'Kabay pa!'

16 “‘Pakamalauton sang Dios ang bisan sin-o nga wala nagatahod sa iya amay ukon iloy.' "Dayon ang tanan nga mga tawo magasiling, 'Kabay pa!'

17 “‘Pakamalauton sang Dios ang bisan sin-o nga nagahalin sang muhon sang iya kapareho nga Israelinhon.' "Dayon ang tanan nga mga tawo magasiling, 'Kabay pa!'

18 "'Pakamalauton sang Dios ang bisan sin-o nga nagapatalang sang bulag.' "Dayon ang tanan nga mga tawo magasiling, 'Kabay pa!'

19 “‘Pakamalauton sang Dios ang bisan sin-o nga nagadaugdaog sang mga dumoluong, mga ilo, kag mga balo.' "Dayon ang tanan nga mga tawo magasiling, 'Kabay pa!'

20 “‘Pakamalauton sang Dios ang bisan sin-o nga nagapakahuya sa iya amay paagi sa pagpakighilawas sa isa sang mga asawa sang iya amay.' "Dayon ang tanan nga mga tawo magasiling, 'Kabay pa!'

21 “‘Pakamalauton sang Dios ang bisan sin-o nga nagapakighilawas sa sapat.' "Dayon ang tanan nga mga tawo magasiling, 'Kabay pa!'

22 “‘Pakamalauton sang Dios ang bisan sin-o nga nagapakighilawas sa iya utod nga babayi, ukon sa iya utod nga babayi sa amay ukon sa iloy.' "Dayon ang tanan nga mga tawo magasiling, 'Kabay pa!'

23 “‘Pakamalauton sang Dios ang bisan sin-o nga nagapakighilawas sa iya ugangan nga babayi.' "Dayon ang tanan nga mga tawo magasiling, 'Kabay pa!'

24 “‘Pakamalauton sang Dios ang bisan sin-o nga nagapatay sa tago sang isa ka tawo.' "Dayon ang tanan nga mga tawo magasiling, 'Kabay pa!'

25 “‘Pakamalauton sang Dios ang bisan sin-o nga nagabaton sing suhol sa pagpatay sing isa ka tawo nga wala sing sala.' "Dayon ang tanan nga mga tawo magasiling, 'Kabay pa!'

26 “‘Pakamalauton sang Dios ang bisan sin-o nga wala nagatuman sang tanan nga mga kasugoan kag mga pagtulon-an sang Dios.' "Dayon ang tanan nga mga tawo ma gasiling, 'Kabay pa!'

DEUTERONOMIO - Kapitulo 26 <<<   >>> DEUTERONOMIO - Kapitulo 28

DEUTERONOMIO - Kapitulo 26

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34

♤♤♤♤♤

Ang mga Dulot sa Tig-alani

1 "Kon mapanag-iyahan na ninyo ang duta nga ginahatag sa inyo sang Ginoo nga inyo Dios kag didto na kamo nagapuyo,

2 ang tagsatagsa sa inyo magbutang sa alat sang nahauna nga bahin sang inyo patubas nga inyo naani kag dalhon ninyo ini sa duog nga ginasimbahan.

3 Kadto kamo sa pari nga nagaalagad sa sina nga tion kag magsiling sa iya, ‘Ginakilala ko karon nga adlaw sa Ginoo nga akon Dios nga nakasulod ako sa duta nga iya ginsaad sa amon mga katigulangan nga iya ihatag sa amon.'

4 "Ang pari magakuha sang alat sa imo, kag ibutang ini sa atubangan sang altar sang Ginoo nga imo Dios.

5 Dayon amo ini ang imo isiling sa atubangan sang Ginoo, 'Ang akon katigulangan nga Arameanhon wala sing permanente nga puloy-an sang pagdala niya sang iya panimalay sa pagpuyo sa Egipto. Diutay pa lang sila sang pagkadto nila didto, pero nagdamo sila kag nangingamhanan nga pungsod.

6 Ang mga Egiptohanon nagpintas sa amon kag nagpilit sa amon sa pag-obra subong mga ulipon.

7 Dayon nagpanawag kami sa pagpangayo sing bulig sa Ginoo nga Dios sang amon mga katigulangan. Nagpamati sia sa amon, kag nakita niya ang amon pag-antos, kabudlayan, kag kalisod.

8 Sa iya daku nga gahom kag kusog ginluwas niya kami gikan sa Egipto. Naghimo sia sing mga milagro kag mga tanda, kag makakulogmat nga mga butang.

9 Gindala niya kami diri kag ginhatag ining maayo kag mapatubason nga duta.

10 Gani karon, ginadala ko sa Ginoo ang nahauna nga bahin sang patubas nga iya ginhatag sa akon.' “Dayon ibutang ang alat sa atubangan sang Ginoo kag magsimba didto.

11 Magkalipay ka tungod sang maayo nga mga butang nga ginhatag sa imo sang Ginoo nga imo Dios sa imo kag sa imo panimalay, kag pabuyloga ang mga Levita kag ang mga dumoluong nga nagapuyo upod sa imo sa inyo pagkinasadya.

12 "Sa tagsa ka ikatlo nga tuig ihatag ang ikapulo sang imo patubas sa mga Levita, nga dumoluong, mga ilo, kag mga balo, agod nga sa tagsa ka katilingban indi sila mawad-an sang ila kalan-on. Kon mahimo na nimo ini,

13 magsiling ka sa Ginoo, ‘Wala na sing balaan nga ikapulo nga nabilin sa akon balay. Ginhatag ko na ini sa mga Levita, sa mga dumoluong, sa mga ilo, kag sa mga balo suno sa imo ginsugo sa akon. Wala ako maglapas ukon magkalimot sang bisan isa sang imo mga sugo nahanungod sa ikapulo.

14 Wala ako magkaon sini sang nagalalaw ako. Wala ako maggamit sini sa di-balaan nga tinutoyo, kag wala ako maghatag sini subong dulot sa patay.^r O GINOO ko, gintuman ko ikaw; ginhimo ko ang tanan nga ginsugo mo nahanungod sa ikapulo.

15 Tamda kami gikan sa imo balaan nga puloy-an sa langit kag bendisyuni ang imo mga tawo nga Israel. Bendisyuni man ang maayo kag mapatubason nga duta nga imo ginhatag sa amon, suno sa imo ginsaad sa amon mga katigulangan.'

Ang Kaugalingon nga mga Tawo sang GINOO

16 “Karon nga adlaw ang GINOO nga inyo Dios nagamando sa inyo sa pagtuman sang tanan niya nga mga kasugoan. Gani tumana ini sing matutom sa inyo bug-os nga tagipusoon kag kalag.

17 Karon nga adlaw ginkilala ninyo ang GINOO nga inyo Dios. Nagsaad kamo sa pagtuman sa iya, sa pagbantay sang iya mga kasugoan kag sa paghimo sang tanan niya nga mga ginasugo.

18 Karon nga adlaw ang GINOO nagbaton sa inyo subong iya kaugalingon nga mga tawo, suno sa iya ginsaad sa inyo. Ginsugo niya kamo sa pagtuman sang tanan niya nga mga kasugoan.

19 Himuon niya kamo nga labi ka gamhanan sang sa iban nga pungsod nga iya gintuga. Mangin-iya kamo balaan nga mga tawo suno sa iya ginsaad, kag kamo magahatag sing pagdayaw kag kadungganan sa iya ngalan.”^s

^rsa patay; ukon para sa patay.
^smagabatyag sing pagdayaw . . . ngalan; ukon magabaton sing pagdayaw kag kadungganan.

DEUTERONOMIO - Kapitulo 25 <<<   >>> DEUTERONOMIO - Kapitulo 27