♤♤♤♤♤
Si Moises Naglaygay sa mga Israelinhon nga Magmatinumanon
1 Dayon si Moises nagsiling sa mga tawo, “Tumana ninyo ang tanan nga mga kasugoan nga akon ginatudlo sa inyo kag magakabuhi kamo kag mapanag-iyahan ninyo ang duta nga ginhatag sa inyo sang GINOO nga Dios sang inyo mga katigulangan.
2 Indi ninyo pagdugangi ukon pagbuhini ang akon sugo sa inyo. Tumana ninyo ang mga sugo sang GINOO nga inyo Dios nga akon ginhatag sa inyo.
3 Nakita gid ninyo ang ginhimo sang Ginoo sa bukid sang Peor. Ginpamatay niya ang tagsatagsa nga nagsimba kay Baal didto,
4 pero ang iban sa inyo nga nagmatutom sa Ginoo nga inyo Dios buhi pa tubtob karon nga adlaw.
5 “Gintudloan ko kamo sang tanan nga mga kasugoan suno sa sugo sang GINOO nga akon Dios. Tumana ini didto sa duta nga inyo pagagubaton kag panag-iyahan.
6 Tumana ini sing maayo, kay paagi sini mapakita ninyo ang inyo kaalam kag ihibalo sa mga tawo sang iban nga mga kapungsoran. Kon mabatian nila ini nga mga kasugoan magasiling sila, ‘Daw ano ang kaalam kag ihibalo sining gamhanan nga pungsod!’
7 “Wala na sing iban nga pungsod, bisan daw ano ka gamhanan nga may dios nga malapit sa ila kon magpanawag sila pareho sang GINOO nga aton Dios. Nagasabat sia kon kita magpangayo sing bulig sa iya.
8 Wala sing iban nga pungsod bisan daw ano ka gamhanan nga may mga kasugoan, nga pareho sang akon gintudlo sa inyo karon nga adlaw.
9 Pag-andam kamo! Samtang buhi pa kamo indi ninyo pagkalimti ang inyo nakita. Sugiri ninyo ang inyo mga kabataan kag ang inyo mga kaapuhan
10 nahanungod sang adlaw nga nagtindog kamo sa atubangan sang Ginoo nga inyo Dios sa bukid sang Sinai,d sang sia magsiling sa akon, 'Tipuna ang mga tawo. Luyag ko mabatian nila ang akon isiling, agod magtahod sila sa akon samtang buhi pa sila, kag tudloan nila ang ila mga kabataan sa pagtahod sa akon.'
11 "Sugiri ang inyo mga kabataan sang inyo pagpalapit kag pagtindog sa kunsaran sang bukid nga natabunan sang madamol nga gal-om nga gikan sa maitom nga aso kag kalayo nga nagaibwal tubtob sa langit.
12 Sugiri sila kon daw ano nga ang Ginoo naghambal sa inyo gikan sa kalayo, kag nabatian ninyo sia nga nagahambal, pero wala ninyo makita ang iya dagway.
13 Ginsingganan niya kamo kon ano ang inyo dapat himuon sa pagtuman sang kasugtanan nga ginhimo niya upod sa inyo—sa pagtuman sang Napulo ka Sugo, nga iya ginsulat sa duha ka malapadlapad nga bato.
14 Ang Ginoo nagsugo sa akon nga tudloan ko kamo sang tanan nga mga kasugoan nga inyo dapat tumanon sa duta nga inyo pagasudlon kag panag-iyahan.
Paandam batok sa mga Diosdios
15 "Sang paghambal sang Ginoo sa inyo gikan sa kalayo sa bukid sang Sinai, wala kamo sing nakita nga dagway. Gani, para sa inyo kaayuhan mag-andam kamo
16 nga indi kamo magpakasala paagi sa paghimo sang mga diosdios para sa inyo kaugalingon sa bisan ano nga dagway—lalaki ukon babayi,
17 sapat ukon pispis,
18 sapat nga nagasaog ukon isda.
19 Indi kamo magpadaladala sa pagsimba ukon sa pag-alagad sang mga butang nga inyo makita sa langit—ang adlaw, ang bulan, kag mga bituon. Ang Ginoo nga aton Dios naghatag sini sa iban nga mga tawo nga ila pagsimbahon.
20 Pero kamo ang mga tawo nga ginpagwa niya sa Egipto, inang nagadabadaba nga hornohan. Ginpagwa niya kamo agod mangin-iya kaugmgon nga mga tawo, nga karon nga adlaw iya kamo.
21 Ang Ginoo nga aton Dios naakig sa akon tungod sa inyo, kag nagsumpa sia nga indi ako makatabok sa suba sang Jordan sa pagsulod sa maayo nga duta nga iya ginahatag sa inyo.
22 Mapatay ako sa sini nga duta nga indi gid makatabok sa suba, pero kamo inyo manugtabok na kag makapanag-iya sang maayo nga duta.
23 Mag-andam kamo nga indi ninyo malimtan ang kasugtanan nga ginhimo sang Ginoo nga inyo Dios sa inyo. Tumana ang iya mga sugo, kag indi kamo maghimo sang diosdios para sa inyo kaugalingon,
24 kay ang Ginoo nga inyo Dios isa ka Dios nga maimon, nga kaangay sang nagadabdab nga kalayo.
25 "Bisan dugay na ang inyo pagpuyo sa duta kag magpamata ukon magpangapo kamo, indi kamo magpakasala paagi sa paghimo sang diosdios para sa inyo kaugalingon sa bisan ano nga dagway. Malain ini sa atubangan sang GINOO, kag magapaakig ini sa iya.
26 Kon himuon ninyo ini, ginatawag ko ang langit kag ang duta sa pagpanaksi batok sa inyo karon nga adlaw kag sa ulihi madula kamo sa duta. Indi kamo magpuyo sing malawig sa duta sa tabok sang Jordan nga inyo madali na lang panag-iyahan. Malaglag kamo tanan.
27 Ang GINOO magapaalaplaag sa inyo sa mga kapungsoran. Pila lamang sa inyo ang mabilin didto.
28 Kag magaalagad kamo sa mga dios nga nahimo sang tawo, mga dios nga kahoy kag bato, mga dios nga indi makakita ukon makabati, indi makakaon ukon makapanimaho.
29 Didto magapangita kamo sa Ginoo nga inyo Dios. Kon pangitaon ninyo sia sa inyo bug-os nga tagipusoon kag kalag makita ninyo sia.
30 Pero kon yara kamo sa kalisdanan, kag kon tanan ini nga mga butang matabo sa inyo, dayon magabalik kamo sa Ginoo kag magatuman sa iya.
31 Maluloy-on sia nga Dios. Indi sia magbiya ukon maglaglag sa inyo, kag indi niya pagkalimtan ang kasugtanan nga iya ginhimo sa inyo mga katigulangan.
32 “Usisaa ang nagligad, sadtong panahon nga wala pa kamo matawo, halin sang pagtuga sang Dios sang tawo sa duta. Usisaa ang bug-os nga duta. May natabo bala halin sang una nga pareho sini ka daku? May nakabati bala sang isa ka butang nga pareho sini?
33 May yara bala nga mga tawo nga nabuhi pa sa tapos nila mabatian ang Dios nga naghambal gikan sa kalayo pareho sang nabatian ninyo?
34 May isa bala ka dios nga nangahas sa pagkuha sang isa ka grupo sang mga tawo gikan sa isa ka pungsod kag himuon niya nga iya kaugalingon nga mga tawo subong sang ginhimo sa inyo sang GINOO nga inyo Dios didto sa Egipto? Sa inyo gid atubangan gingamit niya ang iya daku nga gahom kag kusog kag nagdala sing mga kalalat-an kag inaway, naghimo sang mga milagro kag mga katilingalahan, kag naghimo sing makahaladlok nga mga butang.
35 Ang Ginoo nagpakita sa inyo sini, agod mahibaluan ninyo nga sia amo lamang ang Dios kag wala na sing iban.
36 Ginpabati niya kamo sang iya tingog halin sa langit agod matudloan niya kamo, kag sa duta ginpakita niya kamo sang iya balaan nga kalayo, kag gikan sa sini naghambal sia sa inyo.
37 Tungod kay ginhigugma niya ang inyo mga katigulangan, ginpili niya ang inyo mga kaliwat, kag paagi sa iya daku nga gahom sia gid ang nagpagwa sa inyo sa Egipto.
38 Samtang nagapakari kamo gintabog niya ang mga kapungsoran nga daku kag gamhanan pa sa inyo, agod iya kamo mapasulod kag mahatag sa inyo ang ila duta, ang duta nga tubtob karon inyo.
39 Gani karon, dumdoma ninyo karon nga adlaw kag indi pagkalimti ang GINOO, Dios sa langit kag sa duta. Wala na sing iban nga Dios.
40 Tumana ninyo ang tanan niya nga mga kasugoan nga akon ginahatag sa inyo karon nga adlaw, dayon ang tanan manginmaayo para sa inyo kag sa inyo mga kaliwat. Magapadayon kamo sa pagpuyo sa duta nga ginhatag sa inyo sang Ginoo nga inyo Dios nga mangin-inyo sa wala sing katapusan.”
Ang mga Siyudad nga Dalangpan sa Sidlangan sang Jordan
41 Dayon si Moises nagpili sing tatlo ka siyudad sa sidlangan sang suba sang Jordan,
42 nga sarang madangpan sang isa ka tawo kon makapatay sia sang indi hungod sang isa ka tawo nga indi niya kaaway. Makadangop sia sa isa sini nga mga siyudad kag indi sia pagpatyon.
43 Para sa tribo ni Ruben yara ang siyudad nga Bezer sa kabakuloran, para sa tribo ni Gad yara ang Ramot sa kadutaan sang Galaad, kag para sa tribo ni Manases yara ang Golan sa kadutaan sang Basan.
Ginpahanumdom ni Moises ang mga Israelinhon sang mga Kasugoan
44 Si Moises naghatag sang mga kasugoan kag mga pagtulon-an sang Dios sa mga tawo sang Israel.
45 Ginhatag niya ini nga mga kasugoan sa ila sa tapos sila makagwa sa Egipto
46 kag yara sila sa sidlangan sang suba sang Jordan sa kapatagan, sa atubangan sang banwa sang Bet-peor. Ini sa kadutaan ni Haring Sihon sang mga Amornon nga naggahom sa banwa sang Hesbon. Si Moises kag ang mga tawo sa Israel naglutos sa iya sang makagwa sila sa Egipto.
47 Gin-agaw nila ang iya duta, kag ang duta ni Og nga hari sang Basan. (Ini sila amo ang duha ka hari nga Amornon nga nagpuyo sa sidlangan sang suba sang Jordan.)
48 Ang duta nga ila ginpanag-iyahan magasugod sa banwa sang Aroer sa pangpang sang suba sang Arnon tubtob sa bukid sang Sirione (nga amo ang bukid sang Hermon),
49 kag nagalakip man ini sang tanan nga kadutaan sa sidlangan sang suba sang Jordan tubtob sa Patay nga Dagat kag sa kunsaran sang bukid sang Pisga.
dSinai; ukon Horeb.
eAng isa ka dumaan nga pagbadbad Sirion; sa Hebreo Sion.
No comments:
Post a Comment