♡♡♡♡♡
Si Habin kag ang Iya mga Kadampig Nalutos
1 Si Habin nga hari sang Hasor, nakabalita nahanungod sini. Nagpasugo sia sa kay Hobab nga hari sang Madon, sa mga hari sang Simron kag Aksap,2 sa mga hari sang banwa sa kabakuloran sa naaminhan, sa Kapatagan sang Jordan sa nabagatnan sang Sinerot, sa kapatagan, kag sa baybayon malapit sa Dor.
3 Nagpasugo man sia sa mga Canaanhon sa magtimbang nga bahin sang Suba sang Jordan, sa mga Amornon, sa mga Hethanon, sa mga Peresnon, sa mga Hebusnon, sa mga kabakuloran, kag subong man sa mga Hebhanon nga nagapuyo sa kunsaran sang Bukid sang Hermon sa duta sang Mispa.
4 Nag-abot sila upod sang tanan nila nga mga hangaway, nga ang kadamuon sang ila mga soldado subong sang mga balas sa baybayon. May madamo sila nga mga kabayo kag mga karuwahi sa inaway.
5 Ini tanan nga mga hari nagtingob sang ila mga hangaway, kag nagtipon sila sing tingob sa kampamento sa mga tuboran sang Merom, sa pagpakig-away batok sa Israel.
6 Ang Ginoo nagsiling kay Josue, "Indi ka magkahadlok sa ila. Buas sa sini nga tion, pamatyon ko na sila tanan tungod sa Israel. Imo pamiangon ang ila mga kabayo kag sunogon ang ila mga karuwahi.”
7 Gani si Josue kag ang tanan niya nga mga tinawo nagsalakay sa ila sa hinali sa mga tuboran sang Merom.
8 Ang Ginoo nagpadaog sa mga Israelinhon batok sa ila. Ginsalakay sila sang mga Israelinhon, kag ginlagas sila tubtob sa naaminhan sa Daku nga Sidon kag sa Misrepotmaim, tubtob sa sidlangan sa kapatagan sang Mispa. Nagpadayon sila sa pagpakig-away tubtob nga wala na sing kaaway nga nabilin nga buhi.
9 Ginhimo sa ila ni Josue ang ginsugo sang Ginoo. Ginpamiang niya ang ila mga kabayo, kag ginpangsunog ang ila mga karuwahi.
10 Dayon si Josue nagbalik, gin-agaw niya ang Hasor kag ginpatay ang iya hari. (Sa sadto nga tion, ang Hasor amo ang labing gamhanan sa tanan sadto nga mga ginharian.)
11 Ginpamatay nila ang tanan didto. Wala sing isa nga nabilin nga buhi, kag ginsunog nila ang siyudad.
12 Ginpangdakop ni Josue ang tanan nga mga hari, kag gin-agaw ang ila mga siyudad. Subong sang ginmando ni Moises nga alagad sang Ginoo, ginpamatay niya sila tanan.
13 Pero ang mga siyudad nga yara sa kabakuloran, wala ginsunog sang mga Israelinhon, luas lamang sa Hasor nga gintutdan ni Josue.
14 Ginkuha sang mga tawo sang Israel ang tanan nga malahalon nga mga pagkabutang kag mga hayop gikan sa sini nga mga siyudad kag ginkuha nila ini para sa ila kaugalingon. Pero ila ginpamatay ang tanan nga mga tawo didto. Wala sing isa nga nabilin nga buhi.
15 Ang Ginoo naghatag sini nga mga sugo sa iya alagad nga si Moises. Si Moises naghatag sini kay Josue, kag gintuman niya ini. Gintuman ni Josue ang tanan nga ginsugo sang Ginoo sa kay Moises.
Gin-agaw ni Josue ang Bug-os nga Duta
16 Gin-agaw ni Josue ini tanan nga kadutaan: ang mga duog sa kabakuloran, ang tanan nga kadutaan sa Negeb, ang tanan nga duta sang Gosen, ang mga kapatagan, ang Kapatagan sang Jordan, ang mga kabakuloran kag kapatagan sang Israel,17 halin sa Bukid sang Halak nga malapit sa Seir tubtob sa Baalgad sa kapatagan sang Libano sa nabagatnan sang Bukid sang Hermon. Ginpamatay niya ang tanan nila nga mga hari,
18 sa tapos sang iya malawig nga pagpakig-away sa ila.
19 Wala gid sing mga siyudad nga nagpakighidait sa mga tawo sang Israel, luas lamang sa Gabaon, diin nagapuyo ang mga Hebhanon. Ang iban iya ginapangdaog sa inaway.
20 Ang GINOO nagpaisog sa ila sa pagpamat-od sa pagpakig-away sa mga Israelinhon, agod malaglag sila sing bug-os kag mapamatay sila tanan nga wala sing Iuoyluoy. Amo ini ang ginsugo sang Ginoo kay Moises.
21 Sa sadto nga tion si Josue naglakat, kag ginpapas ang mga higante nga Anakimnon nga nagapuyo sa mga kabakuloran sa Hebron, Debir, Anab, kag sa tanan nga mga kabakuloran sang Juda kag Israel. Ginpapas sila tanan ni Josue kag ginpangguba ang ila mga siyudad.
22 Wala sing mga Anakimnon nga nabilin sa duta sang Israel. Pero may pila pa ka bilog nga nabilin sa Gasa, sa Gat, kag sa Asdod.
23 Gin-agaw ni Josue ang bug-os nga duta suno sa ginsugo sang Ginoo kay Moises. Ginhatag niya ini sa mga Israelinhon nga mangin-ila kaugalingon, kag ginpamartida sa tagsa ka tribo. Gani ang mga tawo nakapahuway gikan sa inaway.
No comments:
Post a Comment