♤♤♤♤♤
Ang Pagbulagay kag ang Pagpangasawa Liwat
1 “Kon ang isa ka lalaki makapangasawa, pero sang ulihi wala niya maluyagi ang babayi kay may nasapwan sia nga makahuloya nga butang sa iya,p hatagan niya sia sing papeles sang pagbulagay, kag sa tapos sini pahalinon sia sa iya balay.
2 Kon abi sa tapos sia makahalin sa balay sini nga lalaki mangin-asawa sia sang isa pa gid ka lalaki,
3 kag ang ikaduha nga bana magbiya sa iya kag maghatag sing papeles sa pagbulagay kag pahalinon sia sa iya balay, ukon mapatay man sia sa tapos mapangasawa niya sia,
4 dayon ang iya nahauna nga bana nga nagbulag sa iya, indi makapangasawa sa iya liwat sa tapos nga mangindi-matinlo sia para sa iya. Kangil-aran ini para sa Ginoo; indi ka magdala sing sala sa duta nga ginahatag sang Ginoo nga imo Dios subong imo palanublion.
Ang Nagakalainlain nga mga Kasugoan
5 "Kon ang isa ka tawo bag-o lang makasal, indi sia pagpaentrahon sa pagkasoldado ukon sa bisan ano nga palangakuan sa gubyerno. Indi sia pagpaalagaron sa sulod sang isa ka tuig, agod nga makapabilin sia sa iya balay sa paglipay sang iya asawa.q
6 “Kon magpahulam ka sa isa ka tawo sing bisan ano, indi mo pagkuhaon ang iya galingan subong nga prenda, kay makuhaan mo sia sing pangabuhian.
7 “Ang bisan sin-o nga magkidnap sang iya kapareho nga Israelinhon kag maghimo sa iya nga ulipon, ukon magbaligya sa iya subong nga ulipon, pagapatyon. Sa sini nga paagi makuha ninyo ang kalautan.
8 "Nahanungod sa makalalaton nga balatian sa panit, tumana gid ang ginasiling sang mga pari nga Levinhon. Sunda ang mga pagsulondan nga akon ginhatag sa ila.
9 Dumdoma ang ginhimo sang GINOO nga imo Dios kay Miriam sang kita nagapagwa sa Egipto.
10 "Kon nagpahulam ka sa isa ka tawo sing bisan ano, indi ka magsulod sa iya balay sa pagkuha sang iya bayu nga iya ginprenda sa imo.
11 Pabilin ka sa gwa, kag sia ang magadala sini sa imo.
12 Kon sia isa ka imol nga tawo, indi ini pagtagoa tubtob sa gab-i.
13 Iuli ini sa iya tubtob sa pagtunod sang adlaw, agod masuksok niya ini sa pagtulog. Dayon magapasalamat sia, kag ang Ginoo nga imo Dios malipay sa imo.
14 "Indi pagdayai ang imol kag ang makalulooy nga ulipon, bisan Israelinhon sia ukon dumoluong nga nagapuyo sa isa sa inyo mga banwa.
15 Tagsa ka adlaw sa wala pa magtunod ang adlaw, bayari sia sang iya inobrahan, kay nagakinahanglan sia sang kuwarta kag ginapaabot niya nga mabaton ini. Kon indi mo sia pagsuholan, magasumbong sia sa GINOO batok sa imo kag pagakondenahon ka.
16 "Ang mga ginikanan indi pagpatyon tungod sang sala sang ila mga kabataan, kag ang mga kabataan indi pagpatyon tungod sang sala sang ila mga ginikanan. Ang tawo pagapatyon lang tungod sang sala nga iya ginhimo.
17 "Indi pagdaugdaoga ang mga dumoluong kag mga ilo, kag indi pagkuhaa ang bayu sang isa ka balo subong prenda.
18 Dumdoma nga mga ulipon kamo anay sa Egipto kag ginhilway kamo sang Ginoo nga inyo Dios. Gani ginahatag ko sa inyo ini nga sugo.
19 "Kon magtipon ka sang imo mga patubas kag malipatan mo ang pagdala sang iban nga inupong, indi ka magbalik sa pagkuha sini. Ibilin ini para sa mga dumoluong, mga ilo, kag mga balo, agod ang Ginoo nga imo Dios magabendisyon sa imo sa tanan mo nga ginahimo.
20 Sa tapos ka makapang-ipo sang imo mga olivo sing makaisa, indi ka magbalik sa pagsigpot sing nabilin. Ini para sa mga dumoluong, mga ilo, kag mga balo.
21 Sa tapos ka makapang-ipo sing makaisa sa imo mga ubas, indi ka magbalik sa pagpang-ipo sang nabilin. Ini para sa mga dumoluong, mga ilo, kag mga balo.
22 Indi gid kamo magkalipat nga kamo anay mga ulipon sa Egipto. Gani ginahatag ko sa inyo ini nga sugo.
pkay may nasapwan . . . iya; ukon kay may nasapwan sia sa iya nga wala niya maluyagi.
qsa paglipay sang iya asawa; ukon sa pagkalipay upod sa iya asawa.
No comments:
Post a Comment