DEUTERONOMIO - Kapitulo 18

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34

♤♤♤♤♤

Ang Parti sang mga Pari

1 "Ang mga pari nga kaliwat ni Levi indi paghatagan sing bahin sang duta sa Israel. Sila magakabuhi sa mga dulot kag sa iban nga mga halad nga ginahatag sa Ginoo.

2 Indi sila magpanag-iya sang duta pareho sang iban nga mga tribo. Ang ila bahin amo ang pagkaparisuno sa ginsaad sang Ginoo.

3 "Ang bisan sin-o nga maghalad sing baka ukon karnero, ihatag sa mga pari ang lumo, ang sag-ang kag ang kasudlan.

4 Ihatag sa mga pari ang nahauna nga patubas sang trigo, bino, lana sang olibo kag delana.

5 Sa tanan nga mga tribo, ang Ginoo nagpili sang tribo ni Levi sa pag-alagad sa iya subong mga pari sa walay katapusan.

6 “Ang bisan sin-o nga Levita nga nagapuyo sa bisan diin nga banwa sang lsrael makakadto sa isa ka duog nga ginasimbahan,

7 kag mag-alagad didto subong isa ka pari sang Ginoo nga iya Dios, pareho sang iban nga mga Levita nga nagaalagad didto.

8 Hatagan sia sing amo man kadamo nga kalan-on nga ginahatag sa iban nga mga pari, luas sa ginapadala sang iya panimalay.

Paandam batok sa mga Pagginawi sang Pagano

9 "Kon mag-abot na kamo sa duta nga ginahatag sa inyo sang Ginoo nga inyo Dios, indi kamo magsunod sa makangilil-ad nga mga ginahimo sang mga kapungsoran nga yadto didto.

10 Indi pag-ihalad ang inyo mga kabataan sa kalayo sang inyo mga altar, indi pagtugoti ang imo mga tawo sa paghimo sang madyik, ukon manugpakot, ukon manugbabaylan,

11 ukon salamangkero kag indi sila magpamangkot sa mga espiritu sang patay.

12 Ang Ginoo nga inyo Dios nagadumot sa mga tawo nga nagahimo sining makangilil-ad nga mga butang, gani gintabog niya ini nga mga tawo sa gwa sa duta samtang nagapasulod kamo.

13 Magmatutom gid kamo sa GINOO."

Ang mga Saad sang Dios sa Pagpadala sang mga Propeta

14 Dayon si Moises nagsiling, "Ang mga tawo sang duta nga madali na lang ninyo mapanag-iyahan nagasunod sa  mga laygay sang mga madyikero, ukon manugpakot, pero ang Ginoo nga inyo Dios indi magtugot sa inyo nga maghimo sini.

15 Sa baylo, magapadala sia sa inyo sang mga propeta^m kaangay sa akon gikan sa inyo kaugalingon nga mga tawo, kag tumanon ninyo sila.

16 “Sang adlaw nga nagtipon kamo sa bukid sang Sinai, nagpakiluoy kamo nga indi na makabati liwat sa  tingog sang GINOO, ukon makakita sang iya nagadabdab nga presensya, kay kon mahanabo ini mapatay kamo.

17 Gani ang GINOO nagsiling sa akon, ‘Maayo ang ila pangabay.

18 Padalhan ko sila sing mga propeta pareho sa imo halin sa ila kaugalingon nga mga tawo. Singganon ko sila kon ano ang ila ihambal, kag sugiran nilaⁿ ang mga tawo sang tanan nga akon ginasugo.

19 Kon ang isa ka propeta maghambal sa akon ngalan, silutan ko^o ang bisan sin-o nga indi magtuman sa iya.

20 Pero ang bisan sin-o nga propeta nga magpangahas sa paghambal sa akon ngalan nga wala ko ginsugo dapat sia mapatay, kay amo man ini ang dapat himuon sa bisan sin-o nga propeta nga nagahambal sa ngalan sang iban nga mga dios.’

21 "Ayhan mamangkot kamo kon paano ang inyo pagkahibalo nga ang ginahambal sang propeta wala nagikan sa Ginoo.

22 Kon ang propeta maghambal sa ngalan sang Ginoo kag kon ang ginasiling niya wala nagakatuman, indi ini iya sang Ginoo. Ang ginahambal sina nga propeta iya lang kaugalingon kag indi kamo magkahadlok sa iya.

^mmga propeta . . . sila; ukon propeta . . . sia.
ⁿmga propeta . . . sila . . . nila; ukon propeta . . . sia . . . niya.
^oKon . . . ko; ukon Magahambal sia . . . ko.

DEUTERONOMIO - Kapitulo 17 <<<   >>> DEUTERONOMIO - Kapitulo 19