♡♡♡♡♡
Ang Sala ni Akan
1 Pero ginlapas sang mga Israelinhon ang sugo sang Ginoo nga indi magkuha sang bisan ano nga dapat laglagon. Si Akan amo ang may ginkuha nga mga pagkabutang. Anak sia nga lalaki ni Karmi nga anak ni Sabdi, nga anak ni Sera, gikan sa tribo ni Juda. Nagsilabo gid ang kaakig sang Ginoo sa mga Israelinhon.2 Si Josue nagpadala sing mga tawo halin sa Jerico pakadto sa Ay, isa ka siyudad sa sidlangan sang Betel, nga malapit sa Betaben. Ginsugo niya sila sa pagkadto kag sa pagtan-aw sang duta. Gani ang mga tawo naglakat kag nagpang-espiya sa Ay.
3 Sang makabalik sila sa kay Josue, nagsugid sila nga nagasiling, "Indi na kinahanglan nga ang tanan magkadto. Padala ka lang sing mga duha ukon tatlo ka libo ka mga lalaki sa pagsalakay sa Ay. Indi na pag-ipadala ang tanan sa pagpakig-away didto. Indi man ato daku nga siyudad."
4 Gani mga 3,000 ka mga Israelinhon ang naglakat, pero ginpaisol sila pabalik sang mga taga-Ay.
5 May mga 36 sa ila nga ginpamatay sang mga kaaway. Ginlagas nila ang mga Israelinhon halin sa puwerta sang siyudad tubtob sa ginakuhaan sang dalagku nga mga bato, kag ginpamatay sila sa dulhogan sang bukid. Dayon ang mga Israelinhon nadulaan sing kaisog kag hinadlukan sila.
6 Gingisi ni Josue ang iya mga bayu sa kasubo, kag naghapa sia sa duta sa atubangan sang Kaban sang Kasugtanan sang Ginoo. Ang mga pangulo sang mga Israelinhon naghapa didto upod sa iya tubtob sa gab-i, nga may mga yab-ok sa ila mga ulo sa pagpakita sang ila kasubo.
7 Kag si Josue nagsiling, “O Ginoong Dios, ngaa nga gindala pa nimo kami diri sa tabok sang Jordan? Sa pagtugyan bala sa amon sa mga Amornon? Sa paglaglag bala sa amon? Ngaa wala na lang kami magpabilin didto sa pihak sang Jordan?
8 Ano bala ang akon masiling, O Ginoo, karon nga ang Israel nag-isol sa kaaway?
9 Ang mga Canaanhon kag ang tagsatagsa sa pungsod makabati sini. Pagalibutan nila kag pamatyon kami tanan! Kag ano bala ang imo himuon sa pag-apin sang imo dungog?"
10 Ang Ginoo nagsiling sa kay Josue, "Bangon ka. Ngaa bala nagahapa ka?
11 Ang Israel nakasala! Ginlapas nila ang kasugtanan nga ginsugo ko nga ila tumanon. May ginkuha sila nga mga butang nga dapat pagalaglagon. Ginkawat nila ini, nagbutig sila nahanungod sini, kag ginsimpon nila ini sa ila mga pagkabutang.
12 Tungod sini ang mga Israelinhon indi makabato sa ila mga kaaway. Nagpalagyo sila sa ila mga kaaway, kay karon sila mismo gintugyan nga pagalaglagon! Indi na ako mag-upod sa inyo, luas lamang kon laglagon ninyo ang mga butang nga akon ginsugo sa inyo nga indi pagkuhaon!
13 Bangon ka! Pakabalaana ang mga tawo, kag ihanda sila sa pag-atubang sa akon. Singgana sila nga maghanda sa pag-atubang sa akon buas, kay Ako, ang Dios sang Israel, nagasiling sini, ‘O Israel, may mga pagkabutang nga yara sa inyo, nga ginsugo ko nga inyo laglagon! Indi kamo makabato sa inyo mga kaaway tubtob makuha ini nga mga butang sa inyo!
14 Gani buas sa aga, paatubangon kamo, suno sa inyo tribo. Ang tribo nga pilion sang Ginoo, magapalapit suno sa mga kabaranggayan. Ang baranggay nga pilion sang Ginoo magpalapit suno sa tagsa ka panimalay. Ang panimalay nga pilion sang Ginoo, magpalapit suno sa tagsa ka tawo.
15 Ang tawo nga madakpan nga may iya sini nga pagkabutang pagasunogon, upod sa iya panimalay kag sang tanan niya nga pagkabutang. Nakahimo sia sing tama kalaut nga butang, kag ginlapas niya ang kasugtanan nga ginhimo sang akon mga tawo upod sa akon!'''
16 Si Josue nagbangon sing aga pa gid, kag gindala niya sa atubangan ang bug-os nga Israel suno sa kada tribo. Napilian ang tribo ni Juda.
17 Gindala niya sa atubangan ang tribo ni Juda suno sa kada baranggay, kag napilian ang baranggay ni Sera. Gindala niya sa atubangan ang baranggay ni Sera suno sa kada panimalay, kag napilian ang panimalay ni Sabdi.
18 Gani gindala ni Sabdi sa atubangan ang iya panimalay suno sa kada isa, kag napilian si Akan. Si Akan anak nga lalaki ni Karmi, nga anak ni Sabdi, nga anak ni Sera, sang tribo ni Juda.
19 Kag si Josue nagsiling kay Akan, "Anak ko, magsugid ka sing matuod sa atubangan sang Ginoo, ang Dios sang Israel, kag magtuad ka. Karon sugiri ako kon ano ang imo ginhimo. Indi ini pagtagutagoa sa akon."
20 Kag si Akan nagsabat, "Huo, nakasala ako batok sa Ginoo, ang Dios sang Israel, kag amo ini ang akon ginhimo.
21 Sa amon naagaw nga mga pagkabutang, nakita ko ang isa ka matahom nga kapa nga nahimo sa Babilonia, pilak nga nagabug-at sing mga tatlo ka kilo kag tunga kag isa ka barita nga bulawan nga nagabug-at sing mga isa ka kilo. Naibog gid ako sa ila sa bagay nga ginkuha ko sila. Ginlubong ko ini sa sulod sang akon tolda, kag ang pilak yara sa idalom gid."
22 Gani nagpadala si Josue sing mga tawo nga nagdalagan pakadto sa tolda, kag nakita nila nga nalubong didto ini nga mga pagkabutang kag ang pilak yara sa idalom.
23 Ginpagwa nila ini sa tolda, kag gindala nila ini kay Josue kag sa tanan nga mga Israelinhon, kag ginbutang ini sa atubangan sang Ginoo.
24 Si Josue kag ang tanan nga mga tawo sang Israel nagkuha kay Akan, ang pilak, ang kapa, ang barita nga bulawan, ang iya mga anak nga lalaki kag babayi, ang iya mga baka, mga asno, mga karnero, kag ang tanan niya nga mga pagkabutang, kag gindala sila pakadto sa kapatagan nga ginatawag Kalalat-an.
25 Kag si Josue nagsiling, "Ngaa man gindala mo ini nga mga kalalat-an sa amon? Karon ang GINOO magadala sing kalalat-an sa imo!" Gani si Akan ginpatay sang tanan nga mga tawo paagi sa pagbato. Ginbato man nila ang iya panimalay kag ginsunog ang ila mga pagkabutang.
26 Gintabunan nila sia sang daku nga tinumpokan sang mga bato nga ara pa tubtob sini nga adlaw. Gani yadto nga duog ginatawag tubtob karon nga adlaw nga Kapatagan sang Kalalat-an. Dayon nagtahaw ang kaakig sang Ginoo.
JOSUE - Kapitulo 6 <<< >>> JOSUE - Kapitulo 8
No comments:
Post a Comment