♡♡♡♡♡
Ang Pag-agaw kag Paglaglag sang Ay
1 Ang Ginoo nagsiling kay Josue, "Indi ka magkahadlok ukon magpakaluya. Dalha ang tanan nga mga hangaway upod sa imo kag salakaya ang Ay. Padag-on ko ikaw batok sa hari sang Ay, kag ang iya mga tawo, siyudad, kag duta mangin-inyo.2 Pagahimuon mo man sa Ay, kag sa iya hari, ang imo ginhimo sa Jerico kag sa iya hari, pero sa sini nga tion sarang mo na makuha ang ila mga pagkabutang kag mga kasapatan para sa inyo kaugalingon. Maghanda kamo sang kibot nga pagsalakay sang siyudad paagi sa likod.”
3 Gani si Josue kag ang tanan nga mga hangaway naghanda sa pagsalakay sang Ay. Nagpili si Josue sing 30,000 ka maisog nga mga hangaway kag ginpalakat sila sa kagab-ihon.
4 Kag nagmando sia sa ila, "Panago kamo sa likod sang siyudad. Indi kamo magpalayo sing tama gid sa siyudad, kundi maghanda sa pagsalakay.
5 Ako kag ang akon mga tinawo magapadulong sa siyudad. Kon maggwa sila sa pag-away batok sa amon, magapalagyo kami, subong sang ginhimo namon sang nagligad nga pag-away.
6 Pagalagson nila kami tubtob mapapalayo namon sila sa siyudad. Magahunahona sila nga nagapalagyo kami, subong sang ginhimo namon sang una.
7 Dayon magagwa kamo sa inyo ginapanaguan, kag agawa ninyo ang siyudad. Ang GINOO nga inyo Dios magahatag sini sa inyo.
8 Sa tapos ninyo maagaw ang siyudad, sunoga ninyo ini, suno sa ginsugo sang GINOO. Amo ini ang mando sa inyo.”
9 Gani ginpalakat sila ni Josue, kag nagkadto sila sa ila palanaguan, sa nakatundan sang Ay, sa gintung-an sang Ay kag Betel. Si Josue nagpabilin sa kampamento sadto nga gab-i.
10 Sang pagkaaga, aga pa gid nagbangon si Josue kag ginpatawag niya ang mga hangaway sing tingob. Karon sia kag ang mga pangulo sang Israel nag-una sa mga tawo pakadto sa Ay.
11 Ang mga soldado nga kaupod niya nagpadulong sa atubangan nga puwerta sang siyudad, kag nagpatindog sang ila mga tolda sa naaminhan nga bahin, nga may kapatagan nga nagaulot sa ila kag sa Ay.
12 Nagkuha sia sing mga 5,000 ka mga soldado kag ginpapanago sila sa nakatundan sang siyudad, sa gin-utlan sang Ay kag Betel.
13 Amo ini ang pagpahamtang nila sang mga soldado para sa inaway: ang madamo nga mga hangaway yara sa naaminhan sang siyudad, kag ang iban sa nakatundan. Si Josue nagpabilin sa sadto nga gab-i sa kapatagan.
14 Sang makita sang hari sang Ay ang mga tinawo ni Josue, sa gilayon naghulag sia. Sia kag ang tanan niya nga mga tinawo naggwa pakadto sa Kapatagan sang Jordan sa pagpakig-away batok sa Israel sa duog nga ila man gin-awayan sang una. Wala niya mahibal-i nga pagasalakayon sia gikan sa likod sang siyudad.
15 Si Josue kag ang iya nga tawo nagpakunokuno sa pagpalagyo, kag nagdalagan palayo pakadto sa desierto.
16 Ang tanan nga mga tawo sa siyudad ginpangtawag sing tingob sa paglagas sa ila, kag samtang ginalagas nila si Josue, nagaamat sila palayo sa siyudad.
17 Ang tanan nga mga tawo sa Ayb naglagas sang mga Israelinhon. Ang siyudad ginbayaan nga bukas ang puwerta, kag wala sing may nabilin sa pag-apin sini.
18 Dayon ang Ginoo nagsiling sa kay Josue, "Ipatuhoy ang inyo mga bangkaw sa Ay, kay ihatag ko ini sa inyo." Ginhimo ni Josue ang ginsiling sa iya,
19 kag sang mabayaw niya ang iya kamot, ang mga tawo nga nagpalanago nagtindog gilayon, nagdalagan pasulod sa siyudad, kag gin-agaw ini. Ila dayon ginsunog ang siyudad.
20 Sang magbalikid ang mga tawo sang Ay, nakita nila ang aso nga nagatub-ok pa langit. Wala na sila sing mapalagyuhan, kay ang mga Israelinhon nga nagdalagan pakadto sa desierto nagbalik sa pagpakig-away batok sa ila.
21 Sang makita ni Josue kag sang iya mga tawo nga naagaw na sang iya mga kaupdanan ang siyudad kag nasunog na ini, nagbalik sila kag ginpamatay nila ang mga tawo sang Ay.
22-23 Ang mga Israelinhon sa siyudad naggwa kag nagpakig-away batok sa mga tawo sang Ay. Ginlibutan gid sila sang mga Israelinhon, kag ginpamatay. Wala sing may nakapalagyo ukon nabilin nga buhi, luas lamang sa hari sang Ay. Gindakop nila sia kag gindala kay Josue.
24 Ang mga Israelinhon nagpamatay sang tagsa ka kaaway didto sa desierto diin sila ginlagas nila. Dayon nagbalik sila pakadto sa Ay, kag ginpamatay ang tanan nga yadto didto.
25 Ang tanan nga mga pumoluyo sang Ay nga napatay sa sadto nga adlaw, 12,000 ka mga lalaki kag babayi.
26 Padayon nga ginapatuhoy ni Josue ang iya bangkaw sa Ay, kag wala niya ini ginbutang tubtob nga ang tagsa ka tawo didto napamatay.
27 Ginpanguha sang mga Israelinhon ang mga kahayupan kag mga pagkabutang nga ila naagaw sa siyudad suno sa ginsiling sang Ginoo sa kay Josue.
28 Ginsunog ni Josue ang Ay, kag ginbilin ini nga nalaglag tubtob sa katapusan, subong sang makita karon nga adlaw.
29 Ginbitay niya sa kahoy ang hari, kag ginbilin sia didto tubtob sa hapon. Sang pagtunod sang adlaw nagsugo si Josue nga kuhaon ang iya bangkay, kag ila ini ginhaboy sa puwerta sang siyudad. Gintampukan nila ini sang isa ka daku nga tinumpok nga mga bato, nga tubtob karon nga adlaw yadto pa didto.
Ang Kasugoan Ginbasa sa Bukid sang Ebal
30 Dayon nagpatindog si Josue sing altar sa Ginoo nga Dios sang Israel sa Bukid sang Ebal.31 Ginhimo niya ini suno sa mga sugo nga ginhatag sa mga Israelinhon, ni Moises nga alagad sang GINOO, suno sa ginasiling sa Kasugoan ni Moises: "ang altar nga nahimo sa mga bato nga wala makaagi kihad sang mga gamit nga salsalon." Nagdulot sila sa sini nga altar sing halad nga sinunog sa Ginoo, kag nagdulot man sila sing mga halad sa paghiambit.
32 Samtang nagatan-aw didto ang mga Israelinhon, ginkopya ni Josue sa mga bato sang altar ang Kasugoan nga ginsulat ni Moises.
33 Ang tanan nga mga Israelinhon kaupod sang ila mga pangulo, mga opisyales, kag mga hukom, subong man sang mga dumoluong nga kaupod nila, nagtindog sa magtimbang sang Kaban sang Kasugtanan sang Ginoo nga nagaatubang sa mga pari nga Levita nga nagdala sini. Ang katunga sang mga tawo nagtindog nga nagaatubang sa Bukid sang Gerisim kag ang katunga sa Bukid sang Ebal. Si Moises nga alagad sang Ginoo, nagsugo sa ila sadto anay sa paghimo sini kon mag-abot na ang tion nga sila magabaton sang pagbendisyon.
34 Ginbasa dayon ni Josue sing mabaskog ang bug-os nga Kasugoan, lakip ang mga pagbendisyon kag ang mga pagpakamalaut subong sang nasulat sa Libro sang Kasugoan.
35 Ang tagsa ka sugo ni Moises ginbasa ni Josue sa bug-os nga katilingban nga nagalakip sang mga babayi, kabataan kag mga dumoluong nga nagapuyo kaupod nila.
bAng isa ka dumaan nga pagbadbad Ay; sa Hebreo Ay kag Betel.
JOSUE - Kapitulo 7 <<< >>> JOSUE - Kapitulo 9
No comments:
Post a Comment