□□□□□
Ang Pagrebelde Nanday Core, Datan, kag Abiram
1-2 Si Core nga anak ni Izar, isa ka Levita sa baranggay ni Coat, nagpangahas sa pagrebelde batok kay Moises. Ginbuylogan sia sang tatlo ka mga katapo sang tribo ni Ruben—sanday Datan kag Abiram, mga anak nga lalaki ni Eliab, kag si On nga anak nga lalaki ni Pelet—kag sang 250 ka mga Israelinhon nga mga bantog nga mga pangulo nga ginpili sang katilingban.
3 Nagtipon sila sa atubangan ni Moises kag ni Aaron kag ginsingganan sila, "Sobra na ang ginhimo ninyo! Ang tanan nga mga katapo sang katilingban iya sang Ginoo kag ang Ginoo nagaupod sa amon tanan. Ngaa bala, Moises, ginpahamtang mo ang imo kaugalingon nga labaw sa katilingban sang Ginoo?
4 Sang pagkabati sini ni Moises, nagluhod sia nga ang iya guya nagaduot sa duta kag nagpangamuyo.
5 Dayon ginsingganan niya si Core kag ang iya mga sumolunod, "Buas sa aga ang GINOO magapakita sa aton kon sin-o ang iya; papalapiton niya sa iya sa altar ang mga ginpili niya.
6-7 Buas sa aga, ikaw kag ang imo mga sumolunod magakuha sing insensario, butangi ini sing mga baga kag insyenso, kag dalha ini sa altar. Dayon tan-awon ta kon sin-o sa aton ang ginpili sang Ginoo. Kamo nga mga Levita amo ang nagsobra na sa inyo ginahimo!"
8 Nagpadayon si Moises sa paghambal kay Core. “Pamati, kamo nga mga Levita!
9 Ginpakadiutay bala ninyo ang pagpain sa inyo sang Dios sang Israel sa katilingban, agod makapalapit kamo sa iya, makahimo kamo sang inyo pag-alagad sa Tolda nga Tilipunan sang Ginoo, kag mag-alagad sa katilingban?
10 Ginhatag niya sa imo kag sa tanan nga mga Levita ini nga kadungganan, kag karon nagatinguha kamo sa pag-agaw man sang pagkapari!
11 Sang pagreklamo ninyo batok kay Aaron, nagrebelde ikaw kag ang imo mga sumolunod batok sa Ginoo."
12 Dayon ginpatawag ni Moises si Datan kag si Abiram, pero nagsiling sila, "Indi kami magkadto dira!
13 Indi pa bala tuman nga gindala mo kami paggwa sa maayo nga duta sang Egipto agod patyon diri sa desierto? Imo man bala kami daugdaugon?
14 Wala mo kami pagdalha sa maayo nga duta ukon ginhatagan mo kami sing mga uma kag mga talamnan sing ubas nga mangin-amon pagkabutang kag karon nagtinguha ka sa paglimbong sa amon. Indi kami magkadto dira!”
15 Naakig si Moises kag nagsiling sia sa Ginoo, "Indi pagbatona ang bisan ano nga dulot nga dalhon sini nga mga tawo. Wala ako sing nahimo nga sayop sa bisan isa sa ila, wala ako nagkuha bisan isa sang ila mga asno.”
16 Ginsingganan ni Moises si Core, "Buas, ikaw kag ang imo 250 ka mga sumolunod kinahanglan magkadto sa Tolda nga Tilipunan; si Aaron magakadto man didto.
17 Ang kada isa sa inyo magkuha sang iya insensario, butangan ini sang insyenso kag dalhon ini sa alta."
18 Gani ang tagsa ka tawo nagkuha sang iya insensario, ginbutangan ini sing mga baga kag insyenso, kag nagtindog sila sa puwertahan sang Tolda nga Tilipunan upod kay Moises kag kay Aaron.
19 Dayon gintipon ni Core ang bug-os nga katilingban, kag nagtindog sila nga nagaatubang kay Moises kag kay Aaron sa puwertahan sang Tolda. Sa hinali lang ang masilaw nga kapawa nga nagapakita sang presensya sang Ginoo nagpahayag sa bug-os nga katilingban,
20 kag ang Ginoo nagsiling kay Moises kag kay Aaron,
21 "Magpalagyo kamo sa sini nga mga tawo, kay laglagon ko sila sa labing madali.”
22 Si Moises kag si Aaron nagluhod nga ang ila mga guya nagaduot sa duta kag nagsiling, “O Dios, ikaw ang ginahalinan sang tanan nga kabuhi. Kon makasala ang isa ka tawo, maakig bala ikaw sa bug-os nga katilingban?"
23 Ang Ginoo nagsiling kay Moises,
24 “Singgana ang mga tawo sa pagpalagyo gikan sa mga tolda nanday Core, Datan, kag Abiram."
25 Dayon si Moises upod sa mga pangulo sang Israel nagkadto kay Datan kag kay Abiram.
26 Ginsingganan niya ang mga tawo, "Magpalagyo kamo gikan sa mga tolda sining malaut nga mga tawo kag indi kamo magtandog sang bisan ano nila nga mga pagkabutang. Kon indi kamo magpati, malaglag kamo upod sa ila tungod sang ila tanan mga sala."
27 Gani nagpalagyo sila sa mga tolda nanday Core, Datan, kag Abiram. Si Datan kag si Abiram naggwa kag nagtindog sa puwertahan sang ila mga tolda, upod sa ila mga asawa kag mga kabataan.
28 Nagsiling si Moises sa mga tawo, "Sa sini nga paagi mahibal-an ninyo nga ang Ginoo nagpadala sa akon sa paghimo sini tanan nga mga butang, kag indi sa akon kaugalingon nga luyag ang paghimo sini.
29 Kon ini nga mga tawo magkalamatay sa kamatayon nga kinaandan, nga wala sing silot halin sa Dios, ang Ginoo wala magpadala sa akon.
30 Pero kon ang Ginoo maghimo sing butang nga wala pa naton mabatii, kag magbuka ang duta kag maghalonhon sa ila kag sang tanan nila nga mga pagkabutang, sa bagay nga magapanaog sila nga buhi pakadto sa kalibutan sang mga patay,m mahibal-an ninyo nga ini nga mga tawo nagsikway sa Ginoo.”
31 Sang pagkatapos niya hambal, ang duta nga ginatindogan ni Datan kag ni Abiram nagbuka
32 kag naghalonhon sa ila kag sang ila panimalay, upod ang tanan nga mga sumolunod ni Core kag ang ila mga pagkabutang.
33 Gani nagpanaog sila nga buhi pakadto sa kalibutan sang mga patay, upod sa ila mga pagkabutang. Ang duta nagtakop sa ibabaw nila kag nawala sila.
34 Ang tanan nga mga tawo sang Israel nga yadto didto nagpalagyo sang pagkabati nila sang ila hinibi, kag nagsinggit sila, "Dalagan! Basi kon halonhonon man kita sang duta!"
35 Gani ang Ginoo nagpadala sing kalayo nga naglamon kag nagsunog sang 250 ka mga tawo nga naghalad sang insyenso.
Ang mga Insensario
36 Dayon ang Ginoo nagsiling kay Moises,
37 "Singgana si Eleazar nga anak ni Aaron nga pari sa pagkuha sang mga insensario nga saway sa mga bangkay sang mga tawo nga nagkalasunog kag palaptahon ang mga baga sa iban nga duog halin sa mga insensario, kay ang mga insensario balaan.
38 Nangin balaan ini sang paghalad sini sa altar sang GINOO. Gani kuhaa ang mga insensario sining mga tawo nga ginpamatay tungod sang ila mga sala, papaa ini nga manginmanipis, kag maghimo ka sing taklap para sa altar. Mangin isa ini ka paandam sa mga tawo sang Israel."
39 Gani si Eleazar nga pari nagkuha sang mga insensario kag ginpapa niya ini nga manginmanipis nga mga pinanid agod mahimo nga haklap para sa altar.
40 Nanginpaandam ini sa Israel agod wala sing isa nga indi kaliwat ni Aaron nga magpalapit sa altar sa pagsunog sang insyenso para sa Ginoo, kag kon indi malaglag sia kaangay kay Core kag sang iya mga tinawo. Ini tanan nahimo suno sa ginsugo sang Ginoo kay Eleazar paagi kay Moises.
Si Aaron Nagluwas sang mga Tawo
41 Sang madason nga adlaw ang bug-os nga katilingban nagreklamo batok kay Moises kag kay Aaron kag nagsiling, "Ginpamatay ninyo ang iban nga mga tawo sang Ginoo.”
42 Sa tapos sila tanan makatipon sing tingob sa pagreklamo kay Moises kag kay Aaron, nagliso sila pakadto sa Tolda nga Tilipunan kag nakita nila nga ang panganod nagputos sini kag ang masilaw nga kapawa nga nagapakita sang presensya sang Ginoo nagpahayag.
43 Si Moises kag si Aaron naglakat kag nagtindog sa atubangan sang Tolda,
44 kag ang Ginoo nagsiling kay Moises,
45 "Magpalagyo kamo sa sini nga mga tawo, kag laglagon ko sila sa gilayon!" Nagluhod sila nga ang ila mga guya nagaduot sa duta,
46 kag si Moises nagsiling kay Aaron, "Kuhaa ang imo insensario, butangi sing mga baga halin sa altar, kag butangi sing insyenso ang mga baga. Dayon dalha ini sing dalidali sa mga tawo kag himoa ang tulomanon sa pagpaninlo para sa ila. Dalidalia! Ang kaakig sang Ginoo nagsugod na kag ang pamalatian nag-abot na."
47 Nagtuman si Aaron, nagkuha sia sang insensario kag nagdalagan sia sa tunga sang nagtilipon nga mga tawo. Sang makita niya nga ang pamalatian nagsugod na, nagbutang sia sing insyenso sa mga baga kag naghimo sia sang tulomanon sa pagpaninlo para sa mga tawo.
48 Nagpauntat ini sang mga pamalatian kag nabilin sia nga nagatindog sa tunga sang mga buhi kag mga patay.
49 Ang kadamuon sang mga tawo nga nagkalamatay mga 14,700, wala labot sadtong mga nagkalamatay sa pagrebelde ni Core.
50 Sang pag-untat sang pamalatian, nagbalik si Aaron kay Moises sa puwertahan sang Tolda nga Tilipunan.
mKALIBUTAN SANG MGA PATAY: Ginapatihan sadto anay nga ang mga patay nagapadayon sa pagkabuhi sa madulom nga kalibutan sa idalom sang duta.
No comments:
Post a Comment