□□□□□
Ang Pagdaog Batok sa mga Canaanhon
1 Sang pagkabati sang Canaanhon nga hari sang Arad sa nabagatnan nga bahin sang Canaan nga ang mga Israelinhon nagapakari paagi sa alagyan sang Atarim, ginsalakay niya sila kag ginbihag ang iban sa ila.
2 Dayon ang mga Israelinhon naghimo sing panaad sa Ginoo, “Kon imo lang kami padag-on sa sini nga mga tawo, amon ihalad sa imo nga wala sing hawidhawidq sila kag ang ila mga siyudad sa imo kag laglagon sila.”
3 Ginpamatian sila sang Ginoo kag ginbuligan sila sa pagdaog sang mga Canaanhon. Gani ang mga Israelinhon nagdaog sing bug-os sa ila kag sang ila mga siyudad, kag ginhingalanan ang duog nga Horma.r
Ang Man-og nga Nahimo sa Saway
4 Ang mga Israelinhon naghalin sa bukid sang Hor paagi sa alagyan nga nagapadulong sa baybayon sang Aqaba, agod makalibot sila sa kadutaan sang Edom. Pero sa dalanon nadulaan sila sang pasensya,
5 kag naghambal sila batok sa Dios kag kay Moises. Nagreklamo sila, “Ngaa bala ginpagwa ninyo kami halin sa Egipto agod magkalamatay sa sini nga desierto, sa diin wala sing kalan-on kag tubig? Indi kami makaagwanta sining kalan-on nga wala sing data!”
6 Dayon ang GINOO nagpadala sing mga man-og nga dalitan sa tunga sang mga tawo, kag madamo sang mga Israelinhon ang ginkagat kag nagkalamatay.
7 Ang mga tawo nagpalapit kay Moises kag nagsiling, “Nakasala kami sang paghambal namon batok sa GINOO kag sa imo. Karon magpangamuyo ka sa GINOO nga panguhaon niya ini nga mga man-og.” Gani si Moises nagpangamuyo para sa mga tawo.
8 Dayon ang GINOO nagsugo kay Moises sa paghimo sing man-og nga saway kag ibutang ini sa isa ka tukon, agod nga ang bisan sin-o nga makagat makatulok sa sini kag magaayo.
9 Gani si Moises naghimo sing isa ka man-og nga saway kag ginbutang ini sa isa ka tukon. Ang bisan sin-o nga ginkagat magatulok sa sining man-og nga saway kag magaayo sia.
Halin sa Bukid sang Hor Pakadto sa Kapatagan sa mga Moabnon
10 Nagpadayon ang mga Israelinhon, kag naghimo sila sing kampamento sa Obot.
11 Sa tapos sila makahalin sa sadto nga duog, naghimo sila sing kampamento sa mga ginub-an sang Abarim sa desierto sa nasidlangan nga kadutaan sang mga Moabnon.
12 Dayon naghimo sila sing kampamento sa kapatagan sang Zared.
13 Halin didto nagpadayon sila liwat kag naghimo sing kampamento sa naaminhan nga bahin sang suba sang Arnon, sa desierto nga nagalambot sa kadutaan sang mga Amornon. (Ang Arnon amo ang dulonan sa tunga sang mga Moabnon kag mga Amornon.)
14 Amo ini ang kabangdanan nga ang Libro nahanungod sang Pagpakig-away sang Ginoo nagasugid nahanungod sang “ . . . ang banwa sang Vaheb sa Sufa, kag sa mga kapatagan; ang suba sang Arnon,
15 kag ang banglid sa mga kapatagan nga naglambot sa banwa sang Ar pakadto sa dulonan sang Moab.”
16 Halin didto nagpadayon sila pakadto sa isa ka duog nga gintawag mga Bubon, sa diin ang Ginoo nagsiling kay Moises, "Tipona ang mga tawo kag hatagan ko sila sing tubig.”
17 Sadto nga tion ang mga tawo sang Israel nagkanta sini nga ambahanon: "Mga bubon, patubora ang imo tubig; kag abiabihon namon ini sing isa ka ambahanon
18 ang bubon ginkutkot sang mga prinsipe, kag sang mga pangulo sang mga tawo, ang gingamit sa pagkutkot amo ang isa ka setro sang Hari kag sang ila mga sungkod." Halin sa desierto nagpadayon sila sa Matana,
19 kag halin didto nagpadulong sila sa Nahaliel, kag halin sa Nahaliel pakadto sa Bamot,
20 kag halin sa Bamot pakadto sa kapatagan sa kadutaan sang mga Moabnon, sa ubos sang putokputokan sang Pisga nga nagatamod sa desierto.
Ang Pagdaog Batok kay Haring Sihon kag kay Haring Og
(Deut. 2:26-3:11)
21 Ang mga tawo sang Israel nagpadala sing mga mensahero sa kay Haring Sihon nga Amornon sa pagsiling,
22 “Paagya kami sa imo duta. Kami kag ang amon mga kabakahan indi maglipas sa alagyan kag magkadto sa inyo mga kaumhan ukon mga talamnan sang ubas, kag indi kami mag-inom sing tubig sa imo mga bubon; indi kami maglipas sa alagyans tubtob makagwa kami sa imo duta."
23 Pero si Sihon indi magtugot sa mga tawo sang Israel sa pag-agi sa iya duta. Gintipon niya ang iya mga hangaway kag nagwa sila pakadto sa Jahaz sa desierto kag ginsalakay ang mga Israelinhon.
24 Pero ang mga Israelinhon nagpamatay sang madamo nga mga kaaway sa inaway, kag gin-agaw ang ila duta, halin sa suba sang Arnon sa naaminhan pakadto sa Jaboc, tubtob sa Jazer sa dulonan sang mga Amornon.
25 Gani ang mga tawo sang Israel nag-agaw sang tanan nga mga siyudad sang mga Amornon, lakip ang Hesbon kag ang palibot nga mga banwa, kag ginpuy-an nila ini.
26 Ang Hesbon amo ang kapital nga siyudad sang Amornon nga hari nga si Sihon, nga nagpakig-away sang una batok sa nahauna nga hari sang Moab kag gin-agaw ang iya duta tubtob sa suba sang Arnon.
27 Amo gani nga ang mga manugbinalaybay nagkanta, “Kari kamo sa Hesbon, sa siyudad ni Haring Sihon! Luyag namon makita nga ginpatindog ini liwat kag ginpalig-on.
28 Sang una halin sa sining siyudad sang Hesbon, ang mga hangaway ni Sihon naggwa kaangay sang kalayo; ginlaglag nila ang siyudad sang Ar, sa Moab! Kag ginhalunhon ang mga bakulod sa naibabaw nga Arnon.
29 Daw ano kalain sa inyo, mga tawo sang Moab! Kamo nga mga nagasimba kay Cemos, tapos na kamo! Ang inyo dios naghimo sang mga kalalakin-an nga mga laaslaas, ang mga kababayin-an nanginbihag sang Amornon nga hari.
30 Pero karon ang ila mga kaliwat nalaglag, halin sa Hesbon pakadto sa Dibon, halin sa Nashim pakadto sa Nofa, malapit sa Medeba."
31 Gani ang mga tawo sang Israel nagpuyo sa kadutaan sang mga Amornon,
32 kag si Moises nagpadala sing mga tawo sa pagpangita sang labing maayo nga paagi sa pagsalakay sang siyudad sang Jazer. Gin-agaw ini sang mga Israelinhon kag ang iya palibot nga mga banwa kag gintabog pa gwa ang mga Amornon nga nagapuyo didto.
33 Dayon nagliso ang mga Israelinhon kag nag-agi sa dalan pakadto sa Basan, si Haring Og sang Basan naggwa upod sa iya mga hangaway sa pagsalakay sa ila sa Edrei.
34 Ang Ginoo nagsiling kay Moises, "Indi ka magkahadlok sa iya. Padag-on ko ikaw batok sa iya, kag sa iya mga tawo, kag sa iya duta. Himoa sa iya ang imo ginhimo kay Sihon, ang Amornon nga hari nga naggahom sa Hesbon."
35 Gani ginpatay sang mga Israelinhon si Og, ang iya mga anak nga lalaki, ang tanan niya nga mga tawo, nga wala sing ginbilin nga buhi, kag ila dayon ginpuy-an ang duta.
qihalad . . . hawidhawid: Ang bisan ano nga ginhalad sa sini nga paagi iya sang GINOO sing bug-os kag indi sarang magamit; kinahanglan laglagon ini.
rHORMA: Ini nga ngalan sa Hebreo nagakahulogan "kalaglagan."
rHORMA: Ini nga ngalan sa Hebreo nagakahulogan "kalaglagan."
salagyan; ukon Dalan sang Hari.
No comments:
Post a Comment