♤♤♤♤♤
Ang Pascua
(Ex. 12:1-20)
1 "Padunggi ang Ginoo nga imo Dios paagi sa pagsaulog sang Pascua sa bulan sang Abib, kay sang isa ka gab-i sina nga bulan ginluwas kamo sang Ginoo sa Egipto.
2 Kadto sa isa ka duog nga ginasimbahan kag ihawa didto ang isa sang imo mga karnero ukon mga baka para palascuahan sa pagpadungog sa Ginoo nga imo Dios.
3 Kon magkaon ka sini, indi ka magkaon sang tinapay nga may lebadora. Sa sulod sang pito ka adlaw magkaon ka sang tinapay nga wala sing lebadora, kay naggwa ka sing dalidali sa Egipto. Magkaon ka sining tinapay sa pagpahanumdom sa imo sang imo mga kabudlayan, agod nga sa nagakabuhi ka madumdoman mo ang adlaw sang imo paggwa sa Egipto.
4 Sa sulod sang pito ka adlaw wala sing isa sa imo duta nga magtago sing lebadora sa iya balay, kag ang karne sang sapat nga gin-ihaw sa gab-i sang nahauna nga adlaw kinahanglan kaunon sa wala pa mag-aga.
5 "Indi pag-ihawa ang palascuahan nga sapat sa bisan diin nga mga banwa nga ihatag sa imo sang Ginoo nga imo Dios.
6 Ihawa ini sa isa lang ka duog nga ginasimbahan, kag himoa ini sa pagtunod sang adlaw, ang tion sang adlaw sang inyo paggwa sa Egipto.
7 Lagaa ini kag kauna sa duog nga ginasimbahan, kag pagkaaga pauli ka.
8 Sa sulod sang anom ka adlaw magkaon ka sing tinapay nga wala sing lebadora, pero sa ikapito nga adlaw magtambong ka sa pagkatipon sa pagsimba sa Ginoo nga imo Dios, kag indi ka mag-obra sa sina nga adlaw.
Ang Piesta sang Pag-ani
(Ex. 34:22; Lev. 23:15-21)
9 "Mag-isip ka sing pito ka simana halin sa tion sang pagsugod ani,
10 dayon sauloga ang Piesta sa Pag-ani sa pagpadungog sa Ginoo nga imo Dios paagi sa pagdala sang halad nga kinabubot-on sa iya suno sa kaayuhan nga iya ginhatag sa imo.
11 Magkalipay ka sa atubangan sang Ginoo upod sa imo mga kabataan, sa imo mga alagad, sa mga Levita, sa mga dumoluong, sa mga ilo, kag sa mga balo nga nagapuyo sa imo mga banwa. Himoa ini sa duog nga ginasimbahan.
12 Dumdoma nga ulipon man ikaw anay sa Egipto, gani tumana gid ini nga mga sugo.
Ang Piesta sang mga Tolda
(Lev. 23:33-43)
13 "Sa tapos malinas mo ang imo trigo kag mapuga ang mga ubas, sauloga ang Piesta sang mga Tolda sing pito ka adlaw.
14 Magkalipay ka upod sa imo mga kabataan, sa imo mga alagad, sa mga Levita, sa mga dumoluong, sa mga ilo, kag sa mga balo nga nagapuyo sa inyo mga banwa.
15 Padunggi ang Ginoo nga inyo Dios paagi sa pagsaulog sini nga piesta sa sulod sang pito ka adlaw sa duog nga ginasimbahan. Magkalipay ka, kay ang Ginoo nagpakamaayo sang imo patubas kag pagpangabudlay.
16 "Ang tanan nga mga lalaki sang imo pungsod magkari sa pagsimba sa Ginoo sing makatlo sa isa ka tuig sa duog nga ginasimbahan: sa Pascua, sa Piesta sang Pag-ani, kag sa Piesta sang mga Tolda. Ang tagsa ka tawo magdala sang isa ka dulot
 |
| Ang tagsa ka tawo magdala sang isa ka dulot. (16:16) |
17 suno sa iya masarangan, suno sa mga kaayuhan nga ginhatag sang Ginoo nga iya Dios.
Ang Matarong nga Pagdumala
18 "Sa tagsa ka tribo magpili ka sing mga manughukom kag iban nga mga opisyales sa tagsa ka banwa nga pagaihatag sa imo sang GINOO nga imo Dios. Ini sila dapat maghukom sa mga tawo nga wala sing pinilian.
19 Indi sila maghukom sang di-matarong ukon magpabor sa bisan kay sin-o, kag indi sila magbaton sing mga regalo, kay ang hamham nagapabulag bisan sang maalam kag matarong nga tawo, kag amo ini ang kabangdanan nga nagahatag sila sing sayop nga paghukom.
20 Ang katarungan lamang amo ang sundon mo kag magmatarong ka sa gihapon, agod mapanag-iyahan mo ang duta nga ginahatag sang Ginoo nga imo Dios kag makapadayon ka sa pagpuyo didto.
21 "Kon maghimo ka sing altar para sa Ginoo nga imo Dios, indi ka magpatindog sang bisan ano nga palo sa luyo sini nga pagasimbahon.
22 Kag indi ka magpatindog sang balaan nga bato nga haligi, kay ginakangil-aran ini sang Ginoo.
No comments:
Post a Comment