□□□□□
Ang Ikaduha nga Pascua
1 Ang GINOO naghambal kay Moises sa desierto sang Sinai sa nahauna nga bulan sang ikaduha nga tuig sa tapos makahalin ang mga tawo sang Israel sa Egipto. Nagsiling sia,
2 "Ang mga tawo sang Israel kinahanglan magsaulog sang Pascua.
3 Sa ika-14 nga adlaw sini nga bulan, sugod sa pagtunod sang adlaw suno sa tanan nga pagsulondan kag mga tulumanon para sa sini."
4 Gani ginsugo ni Moises ang mga tawo sa pagsaulog sang Pascua,
5 kag gintuman nila ini, sa gab-i sang ika-14 nga adlaw sang nahauna nga bulan sa desierto sang Sinai. Ang mga tawo nagtuman sang tanan suno sa ginsugo sang Ginoo kay Moises.
6 Pero may yara nga mga tawo nga di-matinlo, tungod kay nakatandog sila sing bangkay, kag wala sila makasaulog sang Pascua sa sadto nga adlaw. Nagkadto sila kay Moises kag kay Aaron
7 kag nagsiling, "Di-matinlo kami tungod kay nakatandog kami sing bangkay, pero ngaa bala indi kami pagtugotan sa pagdulot sing halad sa Ginoo upod sa iban nga mga Israelinhon?"
8 Si Moises nagsabat, "Maghulat kamo tubtob makabaton ako sang itudlo sang Ginoo sa akon.”
9 Ang Ginoo nagsugo kay Moises
10 nga singganon ang mga tawo sang Israel, "Kon di-matinlo ang bisan sin-o sa inyo ukon ang inyo mga kaliwat paagi sa pagtandog sang isa ka bangkay, ukon malayo kamo nga nagapanglakaton, pero luyag kamo magsaulog sang Pascua,
11 ginatugotan kamo sa pagsaulog sini sa tapos sang isa ka bulan, sa gab-i sang ika-14 nga adlaw sang ikaduha nga bulan. Sauloga ninyo ini lakip sa tinapay nga wala sing tapay kag mapait nga mga hilamon.
12 Indi kamo magbilin sang bisan ano sang kalan-on tubtob sa madason nga aga kag indi ninyo pagbalia ang bisan ano nga tul-an sang sapat. Sauloga ang Pascua suno sa tanan nga mga pagsulondan.
13 Pero ang bisan sin-onga matinlo kag indi man sia malayo nga nagapanglakaton, kag wala nagasaulog sang Pascua, indi na pagkabigon nga isa sang akon mga tawo, tungod kay wala sia magdulot sing halad sa akon sa natalana nga tion. Kinahanglan mag-antos sia tungod sang iya sala.
14 "Kon ang isa ka dumoluong nga nagapuyo upod sa inyo Iuyag magsaulog sang Pascua, kinahanglan saulogon niya ini suno sa tanan nga mga kasugoan kag mga pagsulondan. Amo man ini nga kasugoan ang pagatumanon sang tagsatagsa, tumandok man ukon dumoluong."
Ang Nagakalayo nga Panganod
(Ex 40:34-38)
15-16 Sa adlaw nga ginpatindog ang Tolda nga Tilipunan, ginlikopan ini sang isa ka panganod. Kon gab-i ang panganod daw kalayo kon tan-awon.
17 Kon mag-alsa ang panganod, ang mga tawo sang Israel nagahalin sing kampamento, kag nagahimo sila liwat sing kampamento sa duog sa diin nagapaidalom ang panganod.
18 Ang mga tawo nagahalin sing kampamento sa mando sang Ginoo, kag sa iya sugo nagahimo sila sing kampamento.
19 Kon ang panganod nagapabilin sa ibabaw sang Tolda sa malawig nga panahon, ginatuman nila ang Ginoo kag wala sila nagahalin.
20 Kon kaisa ang gal-om nagapabilin sa ibabaw sang Tolda sing pila lamang ka adlaw; sa bisan ano nga kahimtangan nagapabilin sila sa kampamento, ukon nagahalin sila suno sa mando sang GINOO.
21 Kon kaisa ang panganod nagapabilin lamang halin sa gab-i tubtob sa aga, kag nagahalin sila sa pag-alsa sang panganod, Kon mag-alsa ang panganod nagalakat sila.
22 Bisan duha ini ka adlaw, isa ka bulan, isa ka tuig ukon malawig pa, tubtob nga ang gal-om nagapabilin sa ibabaw sang Tolda, wala sila nagahalin; pero kon mag-alsa ini, nagalakat sila.
23 Nagahimo sila sing kampamento ukon nagahalin sila sing kampamento suno sa mga sugo nga ginhatag sang Ginoo paagi kay Moises.
No comments:
Post a Comment